Kakuena mushindu wa kujikija bubi anyi?

Muana mukuabu udi wangula kabulubulu ka mushinda mu tshisuku. Kabulubulu aka kadi katayika ne udi ushala mpofo ne ukoseka bimue bitupa bia mubidi. Mamu mukuabu udi wimansha muanende utshimulelelaku, umusokoka mu butshiafu ku mpenga kua njila. Muntu udibu bipate ku mudimu, udi upingana ku muaba wa mudimu eu ne wasa bantu bonso badiye umona masashi, ne pashishe udiasa pende ufua. Muntu udi bantu ba bungi banemeka udi ukuata bana ba bende ku bukole ulala nabu.

DIAKABI, tutu tumvua malu a nunku pa tshibidilu lelu eu. Kadi patudi tumvua miyuki ya mudi bantu bashipa bantu ba bisamba bikuabu ne ya malu a terorisme, malu atudi batele kulu eku, adi amueneka bu a bilele. Tshibejibeji tshikuabu tshifunda mu 1995 tshiakamba ne: “Bidimu bia 1900, mbidimu bidi Satana muenze mudimu bikole. Kakutu kuanji kuikala tshikondo tshikuabu kumpala kua etshi tshidi bantu bamueneka ne dimanya ne nyota mikole ya kushipa bantu nabu anu bualu mba tshisamba tshiabu, tshitendelelu tshiabu anyi bua nsombelu udibu nende.”

Padi malu aa enzeka, bantu badi benda banyanga kapepe ne buloba, bapawula bubanji budipu ne bashipa nyama ya bungi mishilashilangane, yamba mene kujika yonso. Bantu badiku mua kujikija malu mabi onso aa ne kuenza bua buloba buikale buimpe anyi? Anyi kuenza nunku nekuikale anu bu kupula nsanga ne tshielele? Mulongeshi mukuabu wa mu iniversite udi mufunde bikole pa bualu bua bubi wakamba ne: “Mvua ne dijinga dikole dia kushintulula malu pa buloba bua kubulengeja. Kadi bidi bimueneka ne: buloba kabuena bulengela.” Pamuapa ke muudi udiumvua pebe.

Tudi mua kufuanyikija mushindu udi malu a pa buloba aya ne mazuwa adi pa mâyi manene ne tshipepele tshikole tshidi tshijuka pa mâyi apu. Tshipepele atshi tshidi tshienda tshikola ku dituku ne ku dituku. Nansha mudi muntu nansha umue kayi musue kuya kudi tshipepele atshi tshikoka mazuwa, malu onso adibu benza bua kushintulula njila kaena akumbana to. Mazuwa adi anu enda aya ne tshipepele tshikole tshidi muntu kayi mua kuimanyika.

Mu mushindu kampanda, tudi mua kuamba ne: dipanga bupuangane dia bantu ke didi dinyangishe malu nunku. (Lomo 3:23) Kadi bua mushindu udi malu mabi matangalake, bungi buawu ne bukole buawu, bidi bimueneka ne: mbipite tshikisu tshidi mua kufumina kudi bantu nkayabu. Bidiku bimueneka ne: bantu badi ku bukokeshi bua tshintu kampanda tshidi katshiyi tshimueneka tshia muoyo mubi tshidi tshikale ne bukole bua bungi anyi? Biobi bikale nanku, ntshintu kayi atshi, ne mmushindu kayi utudi mua kudikuba? Tshiena-bualu tshidi tshilonda netshiandamune nkonko eyi.

[Mêyi a dianyisha bua tshimfuanyi mu dibeji 3]

© Heldur Netocny/​Panos Pictures