Nkonko ya babadi

Nsumuinu 22:6 udi usua kuamba ne: bana ba bena Kristo bobu bakolesha bimpe kabakuela Yehowa nyima anyi?

Mvese eu udi wamba ne: ‘Yisha muana mu njila udiye ne bua kuendela; nunku pakoleye, kêna umukamu.’ Bidi anu bu mutshi: bobu baululamije bimpe patshidiwu muana, padiwu ukola neululame. Ke mudibi kabidi bua bana, bobu bakolesha bimpe, misangu ya bungi batu batungunuka ne kuenzela Yehowa mudimu patubu bakola. Anu bu mudi muledi yonso mumanye, bitu bikengela kudienzeja bikole ne kuikala ne dîba dia bungi bua kukolesha bana mushindu eu. Ke bualu kayi bua baledi kufikisha bana babu ku dilua bena Kristo, badi ne bua kubalongesha, kubabela, kubakolesha ku muoyo, kubanyoka bimpe ne kuikalabu tshilejilu tshimpe bua bana. Badi ne bua kuenza bionso ebi ne dinanga dia bungi, munkatshi mua bidimu ne bidimu.

Bidi bisua kumvuija ne: padi muana ubenga malu a Yehowa mmumue ne: baledi ki mbamukoleshe bimpe ne dibela ne didimuisha bia Yehowa anyi? Imue misangu bitu bua bualu abu. (Efeso 6:4) Kadi mvese eu kêna usua kuamba ne: padi baledi bakolesha muana bimpe, muana eu padiye ukola neashale anu mulamate Yehowa to. Baledi kabena mua kuvuija muana tshionso tshidibu basue to. Bakulumpe ne bana batu ne budikadidi bua kusungula tshidibu basue kuikala. (Dutelonome 30:15, 16, 19) Bamue bana mbafuane Solomo mufundi wa Nsumuinu utudi tuakuila eu, bualu batu anu batomboka nansha mudi baledi babu badienzeja muabu muonso. Nansha Yehowa mene udi pende ne bana bakamutombokela.

Nunku mvese eu kêna usua kuamba ne: dîba dionso didi baledi benza nanku ‘muana kakumbuka mu njila’ to. Kadi mvese udi usua kuamba ne: misangu ya bungi muana katu umukamu to. Kabienaku bikolesha baledi ku muoyo anyi? Bidi bikolesha baledi ku muoyo padibu bamanya ne: bobu badienzeja bua kukolesha bana babu mu njila wa Nzambi, bana nebatungunukamu. Baledi badi ne bua kuenza mudimu wabu ne muoyo umue bualu malu adibu benza ne tshilejilu tshiabu nebiambuluishe bana bikole.​—Dutelonome 6:6, 7.

Nansha bana bobu balekele Yehowa, baledi badi benze muabu muonso bua kubakolesha nebatekemene se: imue misangu bana aba nebapingane kudi Yehowa. Malongesha a mu Bible adi ne bukole, bana kabatu bapua muoyo ne lukasa malu a mu Bible adi baledi babalongesha to.​—Musambu 19:7.