Balama kudi mikenji mimpe itu kayiyi ishintuluka

BANTU ba matunga onso batu ne mikenji idi ilombola bikadilu biabu. Kuenaku witaba ne: ngikadilu bu mudi kuamba bulelela, kulejangana bulenga, luse ne kukeba disanka dia bakuabu batu bayanyisha pa buloba bujima ne itu isankisha ba bungi ba kutudi anyi?

Ngikadilu eyi mmifume kuepi?

Mu bidimu lukama bia kumpala, muntu mukuabu uvua mulonge bikole diende Shaula  uvua musombele munkatshi mua bantu ba bisamba bisatu: bena Yuda, bena Gelika ne bena Lomo. Pa kumbusha bilele ne mikenji bienza bimpe bivuabu basuisha bantu bua kulondabu, Shaula wakafika ku dijingulula ne: bantu bonso mbalombola kudi tshintu kampanda tshia ku tshifukilu tshidi tshibaleja tshidi tshimpe ne tshibi. Tshintu atshi nkondo ka muoyo. Shaula wakalua muena Kristo ne kushalaye mupostolo Paulo. Pashishe wakafunda ne: “Padi bantu ba bisamba bikuabo kabayi bamanye Diyi, kadi bikale bakumbaja bidi meyi a ku tshifukilu amba, bantu aba mbalondi ba Diyi, nansha kabayi babalongeshadio. Badi baleja ne: meyi aa mmafunda mu muoyo wabo. Kondo kabo ka muoyo ne meji a munda adibo badiwulangana nansha batumbishangana nawo ke bidi bamanyisha bualu ebu.”​—Lomo 2:14, 15, MMM.

Kadi mbikumbane bua tuetu kulombodibua anu kudi “meyi a ku tshifukilu” patudi tusua kuangata dipangadika dia kumanya tshidi tshimpe ne tshidi tshibi anyi? Anu muukadi mua kuikala mudimuenabi, katshia ku kale bantu anyi bisumbu bia bantu mbipangile bualu. Bualu ebu mbufikishe ba bungi ku ditaba ne: tudi dijinga ne mibelu ya kudi muntu udi mututambe bua kutujadikilaye mikenji ya bikadilu idi mitambe buimpe. Bantu ba bungi mbafike ku ditaba ne: Mufuki wa bantu ke udi mukumbane bua kuela mikenji idi anu ne mushinga ya mushindu eu. Mu mukanda kampanda uvua Carl Jung mufunde udi wamba ne: “Muntu udi kayi mushindame mu malu a Nzambi kêna mua kuikala ne bukole bua kukandamena mateta makole a mubidi ne bilobeshi bia pa buloba ebu to.”​—The Undiscovered Self.

Mêyi au adi umvuangana ne tshikavua muprofete wa kale muambe ne: “Muntu kena mfumu wa njila udiye ulonda, muntu wendenda ewu kena ne bukole bua kuludika makasa ende.” (Yelemiya 10:23, MMM) Mufuki wetu udi wamba ne: “Ndi nkulongesha bua wikale ne diakalenga, ndi nkuludika mu njila uudi wenda.”​—Yeshaya 48:17, MMM.

Mukanda muimpe wa mikenji ya kueyemena

Mêyi atudi tufuma ku dibala aa nga mu Bible, mukanda eu udi mutamba kutangalaka udi ne mikenji ya bikadilu bimpe. Bantu binunu ne binunu pa buloba bujima, nansha badi kabayi bena Kristo ne aba batu kabayi batendelela, bakadiku babale Mukanda wa Nzambi bua kupeta meji ne lungenyi. Mufundi wa tusala wa mu ditunga dia Allemagne Johann Wolfgang von Goethe wakamba ne: “Buanyi meme, ntu munange [Mukanda wa Nzambi] ne ntu ngunemeka bualu wowu ke udi mumpeteshe tshikadilu tshionso tshimpe tshindi natshi.” Badi bamba mutu mfumu wa bena Hindu Mohandas Gandhi muambe ne: “Udienzeje bua kubala malu male adibu bakupeshe mu Muyuki wa pa Mukuna [dimue dia ku malongesha a Yezu Kristo adi mu Bible] . . . Bualu dilongesha adi dia pa Mukuna divua dilongoluela yonso wa kutudi.”

Mupostolo Paulo utukavua batele mêyi ende wakaleja mushinga udi nawu Mifundu Minsantu mu difila mikenji ya kueyemena ya bikadilu bimpe, wamba ne: ‘Dîyi dionso dia mu Mukanda wa Nzambi didi ne mudimu muimpe wa kuyisha bantu.’ (2 Timote 3:16) Bualu ebu mbulelela anyi?

Bua tshinyi kubenga kuditangidila bualu ebu wewe nkayebe? Konkonona mêyi adibu baleje mu dibeji didi dilonda. Umone ngikadilu mimpe idiwu aleja. Welangane meji a mushindu udi ngenyi idi mu malongesha aa mikale ne bukole bua kulengeja nsombelu webe ne malanda ebe ne bantu bakuabu.

Neupetamu masanka anyi?

Mêyi atudi baleje kulu eku adi anu bilejilu bikese patupu bia mibelu milenga idi mu Mukanda wa Nzambi. Pa kumbusha mibelu eyi, mu Bible mudi malu a bungi adi atudimuija ku ngenyi mibi, ngakuilu ne bienzedi bidi mua kunyanga nsombelu wetu.​—Nsumuinu 6:16-19.

Bushuwa, malongesha a mu Bible adi atupesha tshintu tshidi bantu bonso ba pa buloba bapangile: mibelu idi yambuluisha bantu bua kuikala ne bikadilu bitambe buimpe. Bantu badi bitaba ne batumikila malongesha aa badi  bashintuluka bikole menemene. Ngelelu wabu wa meji udi ulengela. (Efeso 4:23, 24) Badi balua bapeta bipatshila bimpe. Kulonga mikenji ya Nzambi idi mu Bible nkuambuluishe bantu ba bungi bua kulekela kansungansunga ne kumbusha lukinu mu mitshima yabu. (Ebelu 4:12) Bible ne mikenji ya bikadilu bimpe idimu mbifikishe bantu ku dilekela tshikisu ne malu mabi a mishindu yonso, ne mbalue bantu ba nsongo.

Bulelela, mikenji ya mu Bible mmiambuluishe bantu bapite bungi bua kulekela bikadilu ne bilele bikavua biele miji bidi binyangile bantu bakuabu nsombelu. (1 Kolinto 6:9-11) Malongesha a mu Mukanda wa Nzambi mmashintulule bantu aba, ki nganu bibidilu biabu patupu  to, ne mitshima yabu, malu adibu batekemene ne mêku abu. Nansha nsombelu yeye wenda unyanguka mushindu kayi pa buloba apa, kudi bantu pa buloba bujima badi batungunuka ne kuenda kulengela. Ne kabiakushikidila anu apu to. ‘Mashinde adi afubidila, tshilongo tshidi tshitutuka; kadi dîyi dia Nzambi wetu nedijalame tshiendelele.’​—Yeshaya 40:8.

Kadi wewe neupetaku masanka mu ‘dîyi dia Nzambi wetu’ anyi? Bantemu ba Yehowa nebikale ne disanka dia kukuleja muudi mua kutumikila mikenji ya mu Bible bua diakalenga diebe. Wewe utumikila mikenji eyi neulengelele Nzambi mpindieu ne newikale ne muoyo wa tshiendelele mulombola kudi mikenji ya Nzambi idi anu ne mushinga bikondo bionso.

[Kazubu/​Bimfuanyi mu mabeji 6, 7]

MÊYI ADI NE MUSHINGA DÎBA DIONSO

Mua kuenzela bakuabu malu. ‘Nuenzele bantu malu onso anudi basue banuenzele, bualu bua mikenji ya Mose ne mêyi a baprofete bidi nunku.’​—Matayo 7:12.

Unange muntu nebe. ‘Sua mukuenu bu muudi mudisue.’ (Matayo 22:39) ‘[Dinanga] kadiena dienzela mukuabu bubi; nunku dinanga didi tshiuwidi tshia mikenji.’​—Lomo 13:10.

Unemeke bakuabu. ‘Mu dinanga dia bana benu ba mu Kristo nunangangane muntu ne muntu; mu buneme muntu ne muntu ateke mukuabu kumpala.’​—Lomo 12:10.

Ukebe ditalala. ‘Ikalanganayi talalaa.’ (Mâko 9:50) “Binuamanya mua kuenza nunku mu bienzedi bienu, nuikale ne bantu bonso ditalala.” (Lomo 12:18) ‘Nunku tulonde bietu malu adi avuija ditalala.’​—Lomo 14:19.

Wikale ufuilangana luse. ‘Utulekelele mabanza a malu mabi etu bu mutuakumana kulekelela kabidi badi netu mabanza a malu mabi.’ (Matayo 6:12) ‘Nulejangane kalolo, nuikalangane ne mitshima ya luse, nulekelelangane malu mabi enu.’​—Efeso 4:32.

Ikala ne lulamatu. ‘Unue mâyi a mu tshina tshiebe wewe. Usanke bua mukaji uwakabaka. Mabele ende akusankishe misangu yonso; wikale mukuatshike ne dinanga diende misangu yonso. Mmunyi wewe muananyi, muudi ne bua kukuatshika ne dinanga dia mukaji wa bende, ne bua kuela tshitupa mu tshiadi tshia muena tshiendenda?’ (Nsumuinu 5:15-20) ‘Muntu udi mua kueyemenyibua padiye ne bintu bikese neikale mua kueyemenyibua kabidi pikalaye ne bintu bia bungi; muntu udi mubi padiye ne bintu bikese neikale mubi kabidi pikalaye ne bintu bia bungi.’ (Luka 16:10) “Badi bakeba munkatshi mua balami bua kusangana mulami yonso muikale muntu udibo mua kueyemena.”​—1 Kolinto 4:2.

Ikala muena malu malelela. ‘Ndi mumanye mua kuitabuja muntu udi ne tshipiminu tshidi tshidinga, ne udi ne tshibombi tshia bipiminu bidi biba, bu muena mutshima mutoke anyi?’ (Mika 6:11) ‘Tudi tuitabujibua ne: tudi ne mioyo mikese mimpe, tudi basue kuenda bimpe mu malu onso.’​—Ebelu 13:18.

Ikala muntu wa kueyemena ne muakane. ‘Kinayi malu mabi, nangayi malu mimpe, jadikayi kulumbulula kuakane ku tshibuelelu tshia musoko.’ (Amosa 5:15) ‘Ambilanganayi mêyi a bushuwa buonso buenu, muntu ne muntu ne muena mutumba nende; kosayi bilumbu mu bilumbuluidi bidi ku bibuelelu bia musoko ne kulumbulula kua bushuwa ne kua ditalala.’ (Zekâya 8:16) ‘Nulekele mashimi, muntu ne muntu nuambilangane ne muena mutumba nenu mêyi malelela.’​—Efeso 4:25.

Ikala muenji wa mudimu wa tshisumi. ‘Udi utangila muntu udi wenza mudimu wende ne lungenyi anyi? Yeye neimane kumpala kua bakalenge.’ (Nsumuinu 22:29) ‘Mu disuminyina kanuikadi bajanguluki.’ (Lomo 12:11) ‘Malu onso anudi nuenza, nuenze ne mitshima yenu bu munudi nuenzela Mukalenge; ki mbu munudi nuenzela bantu.’​—Kolosai 3:23.

Ikala ne lutulu, luse ne bulenga. ‘Luatayi mutshima wa luse, ne wa dikuatshisha, ne wa kudipuekesha ne wa kalolo ne wa lutulu.’​—Kolosai 3:12.

Utshimune malu mabi pa kuenza malu mimpe. ‘Suayi badi nenu lukuna, lombelayi badi banukengesha Nzambi.’ (Matayo 5:44) “Kuitabuji bua malu mabi akupite bukole, kadi wenze malu mimpe bua kupita malu mabi bukole.”​—Lomo 12:21, MML.

Udifile ne muoyo mujima kudi Nzambi. ‘Sua Mukalenge Nzambi webe ne mutshima webe wonso ne muoyo webe wonso ne lungenyi luebe luonso. Ke mukenji munene, udi wa kumudilu.’​—Matayo 22:37, 38.

[Bimfuanyi]

Kutumikila mikenji ya mu Bible kudi mua kutuambuluisha bua kusomba bimpe mu dibaka, kuikala mu malanda mimpe ne bena mu dîku ne kupeta balunda ba nsongo