Mudimu munene wa Ernst Glück

KUKADI bidimu bipite pa 300, Ernst Glück wakatuadija mudimu uvua bantu ba bungi kabayi ne dikima dia kutua tshiadi. Wakangata dipangadika dia kukudimuna Bible mu muakulu uvuaye kayi mumanye.

Glück wakaledibua bu mu 1654 mu tshimenga tshikese tshia Wettin, pabuipi ne Halle mu ditunga dia Allemagne. Tatuende uvua pastere mu ekeleziya wa Luther. Malu a ntendelelu avua mu dîku dia ba Glück akamupesha dijinga dia kumanya Nzambi. Wakajikija tulasa tua teoloji ne bidimu 21 mu Allemagne ne kuyaye mu ditunga didibu babikila lelu eu ne: Lettonie. Tshikondo atshi, bena mu ditunga adi bavule kabavua balonge tulasa tua nsongo to, ne mikanda ya mu muakulu wabu ivua mikese. Glück wakamba ne: “Ngakafika mu ditunga pantshivua nsonga, lutatu lua kumpala lungakamona luvua ne: ekeleziya ya mu Lettonie kayivua ne Bible to . . . Ke tshiakansaka bua kudifila kumpala kua Nzambi bua kulonga muakulu eu ne kuumanya bimpe menemene.” Uvua mudisuike bua kupetesha bena mu Lettonie Bible mu muakulu wabu.

Didilongolola bua kukudimuna

Ditunga divua Glück musombele bavua badibikila tshikondo atshi ne: Livonie ne divua ku bukokeshi bua ditunga dia Suède. Muleji-mpala wa mukalenge wa mu Suède diende uvua Johannes Fischer. Mulumiane eu uvua ne malu abidi avuaye wipatshila: kulengeja ndongelu wa tulasa wa bantu ne kupeta bubanji bua bungi. Glück wakayukila ne Fischer bua dijinga diende dia kukudimuna Bible mu muakulu wa mu Lettonie. Fischer uvua ne tshiapu tshia mikanda mu tshimenga tshikulu tshia Riga. Mu dipatula Bible mu muakulu wa mu Lettonie, uvua mua kuambuluisha bantu bua kulonga ne kabidi uvua mua kupeta mfranga. Fischer wakalomba dianyisha kudi Mukalenge Charles XI wa mu Suède bua kukudimunaye Bible. Mukalenge wakamuitabila ne  kumulaya kabidi bua kumupesha mfranga ya kuenzeja nayi midimu eu. Dipangadika dia mukalenge difunda mu dia 31 Tshimungu 1681 diakamuanyishila bua kutuadija mudimu wa dikudimuna eu.

Pinapu Glück uvua wenda udilongolola. Bu muvuaye mukolele mu Allemagne, uvua mua kuangata Bible wa Martin Luther bua kumuambuluisha bua kukudimuna Bible wa mu muakulu wa mu Lettonie. Kadi Glück uvua musue kukudimuna Bible muimpe mutambe, ke bualu kayi wakamona ne: bivua bikengela bua kukudimuna bilondeshile miakulu ya ku ntuadijilu: tshiena Ebelu ne tshiena Greke. Kadi Glück kavua mumanye bimpe miakulu ibidi eyi to, ke bualu kayi wakaya bua kuyilonga mu tshimenga tshia Hambourg mu Allemagne. Bidi bimueneka ne: pavuaye mu tshimenga atshi, pastere mukuabu wa mu Livonie diende Jānis Reiters wakamuambuluisha bua kumanya muakulu wa mu Lettonie ne tshiena Greke tshia mu Bible.

Bidimu bia mudimu, bidimu bia dindila

Glück wakajikija kulonga miakulu mu 1680, wakapingana ku Lettonie ne kutuadijaye mudimu wa bupastere. Matuku makese pashishe yeye kutuadija mudimu wende wa dikudimuna. Mu 1683, bakamuteka pastere mu paruase munene wa mu Alūksne wakalua kumanyika bu muaba uvuabu bakudimuine Bible wende au.

Tshikondo atshi, mu muakulu wa mu Lettonie kamuvua miaku ya kumvuija nayi biambilu bia bungi bia mu Bible to. Ke bualu kayi Glück wakela imue miaku ya mu tshiena Allemagne mu Bible uvuaye ukudimuna. Kadi wakenza muende muonso bua kukudimuna Dîyi dia Nzambi mu tshiena Lettonie, ne bamanyi ba malu a dikudimuna badi bamba ne: Bible uvuaye mukudimune mmuimpe mutambe. Glück wakenza too ne imue miaku mipiamipia ne ya bungi ya kudiyi badi bayakula bikole mu Lettonie. Munkatshi muayi mudi miaku ya mu tshiena Lettonie idi yumvuija “tshilejilu,” “difesto,” “muntu mulemule wa kafiondo,” “kutentekela” ne “kujadika.”

Johannes Fischer uvua ufundila mukalenge wa mu Suède pa tshibidilu bua kumumanyisha luendu lua mudimu wende wa dikudimuna, ne mikanda ivuabu bafundilangana idi ileja ne: pabuipi ne mu 1683, Glück ukavua mukudimune Mifundu ya bena Kristo ya mu tshiena Greke. Wakajikija Bible mujima pabuipi ne mu 1689, mmumue ne: wakajikija mudimu wende munene eu munkatshi mua bidimu 8. * Kuakapita bidimu bia bungi bua kupatulabu Bible eu uvuaye mukudimune, kadi mu 1694 wakakumbaja tshipatshila tshiende bualu  mbulamatadi wakitaba bua kuabanya Bible wa mu tshiena Lettonie mu bantu.

Bamue bamanyi ba miyuki ya kale bavuabu bebeja bua kumanya bikala Glück uvua mukudimune Bible au nkayende. Kakuyi mpata, uvua mutangilaku kabidi mu Bible uvua Luther mukudimune ne muangate bimue bitupa bia mu Bible ikavuabu bakudimune mu tshiena Lettonie mu tshikondo tshiende. Kadi patudi tusangisha bitupa bionso ebi, bidi bienza anu katupa kakese patupu ka nkudimuinu wende. Uvuaku muenza mudimu eu pamue ne bakudimunyi bakuabu anyi? Glück uvua ne muambuluishi ku luseke luende pavuaye ukudimuna, ne bantu bakuabu bakalongolola ne kulondolola bivuaye mukudimune bua kumanya ni bivua bikudimuna bimpe. Kadi bidi bimueneka ne: bantu aba kabavua bamuambuluishe bua kukudimuna to. Nunku tudi mua kuamba ne: Glück nkayende ke uvua mukudimuna Bible eu.

Bible uvua Glück mukudimune wakambuluisha bikole bua kulengeja mfundilu wa muakulu wa tshiena Lettonie, kadi nangananga wakapetesha bena mu Lettonie mushindu wa kubala Dîyi dia Nzambi mu muakulu wabu ne bua kupeta malongesha adimu adi apetesha muoyo. Ki mbapue muoyo tshivua Ernst Glück mubenzele to. Kukadi bidimu bipite pa 300, bena mu tshimenga tshia Alūksne balame bimpe mitshi ibidi ya nsanga idibu babikila ne: Glika ozoli anyi mitshi ya Glück. Glück uvua mukune mitshi eyi bua kuikala kuvuluka Bible wa mu tshiena Lettonie. Mu Alūksne mudi nzubu mukese wa dilamina bintu udi ne Bible mishilangane ikadibu bakudimune, munkatshi muayi mudi Bible umue wa ku nkudimuinu wa kumpala wa Glück wakapatulabu. Mu bintu bidi bileja bimanyinu bia ditunga bidi mu Alūksne mudi kabidi miaku Bible ne tshidimu tshia 1689, tshivua Glück mujikije mudimu wa dimukudimuna.

Mudimu wakenzaye pashishe

Glück wakatuadija kulonga tshiena Russie matuku makese pakafikaye mu Lettonie. Mu 1699 wakafunda ne: uvua ukumbaja dijinga diende dikuabu: dia kukudimuna Bible mu muakulu au. Wakamba mu mukanda wende wa mu 1702 ne: ukavua mutuadije kufundulula Bible mu tshiena Lettonie. Kadi nsombelu uvuaku kavua kabidi umupetesha mushindu wa kukudimuna Bible to. Kunyima kua bidimu bia bungi, mvita yakakutuka mu Lettonie. Mu 1702, basalayi ba bena Russie bakatshimuna bena Suède ne kukuatabu tshimenga tshia Alūksne. Bakaya ne Glück ne dîku diende mu Russie. * Mu matuku au a bimvundu, Glück kujimijaye mabeji avuaye mufundile Bible mupiamupia ukavuaye mutuadije kukudimuna mu tshiena Lettonie ne mukuabu wa mu tshiena Russie. Wakafuila mu tshimenga tshia Moscou mu 1705.

Dijimina dia Bible ivuaye ukudimuna, wa mu tshiena Lettonie ne wa mu tshiena Russie divua dibi be! Kadi too ne lelu Bible wa ntuadijilu uvua Glück mukudimune udi wambuluisha muntu yonso udi ubala Mukanda wa Nzambi mu tshiena Lettonie.

Pa kumbusha Ernst Glück, kuvua bantu ba bungi bavua benze mudimu munene wa kukudimuna Bible mu miakulu mikuabu. Ku diambuluisha dia bakudimunyi bakuabu ba bungi, bantu ba miakulu pabuipi ne yonso idibu bakula pa buloba badi mua kubala Dîyi dia Nzambi ne kupeta bulelela bua mushinga mukole budimu. Bushuwa, Yehowa udi utungunuka ne kudimanyisha kudi bantu ba miaba yonso ku diambuluisha dia Bible mikudimuna mu miakulu mipite pa 2 000.

[Mêyi adi kuinshi]

[Tshimfuanyi mu dibeji 13]

Bible wa Glück

[Tshimfuanyi mu dibeji 14]

Bantemu ba Yehowa badi balongesha bantu Bible mu tshimenga muvua Glück mumukudimuine