Nkonko ya babadi

Nyoka uvua muakule ne Eva uvua ne makama anyi?

Anu bu mudibi bileja mu Genese 3:14, Yehowa Nzambi wakakula ne nyoka uvua mudinge Eva mu budimi bua Edene. Nzambi wakamba ne: ‘Bualu bua wewe wakuenza nunku, ndi nkuela mulawu, mulawu webe neutambe wa nyama yonso ya mu madimi; wewe neukoke difu diebe panshi, neudie dimfuekenya dia buloba matuku onso.’ Mukanda wa Nzambi kawena utuleja patoke ne: nyama eu uvuabu benze nende mudimu bua kushima Eva uvua kumpala ne makama to. Nansha mudi mêyi adi mu Genese 3:14 mua kufikisha bamue bantu ku diela meji mushindu eu, ki mbimpe bua tuetu kuamba diakamue ne: kumpala kua mulawu eu nyoka ivua ne makama to. Bua tshinyi?

Bualu uvua Yehowa ne bua kulumbuluisha uvua Satana, muanjelu uvua muenze mudimu bibi ne nyama wetu wa tshianana eu. Bible udi ubikila Satana ne: ‘tatu wa mashimi’ ne “nyoka wa kale.” Bibikidilu bionso bibidi ebi mbikumbanyine Satana wakakuila munda mua nyoka uvua umueneka ne mêsu bua kushima Eva bua ashipe mukenji wa Nzambi.​—Yone 8:44; Buakabuluibua 20:2.

Nzambi wakafuka nyoka, ne bidi bimueneka ne: Adama wakinyika nyoka mêna kumpala kua Satana kushima Eva. Nyoka wetu muena dîna uvua muakule ne Eva kavua ne bualu to, bualu kavua ne bukole bua kuela meji to. Nyoka kavua mumanye ne: Satana udi wakuila munda muende to, ne kavua mumvue milawu ivua Yehowa muele bantomboji abu to.

Kadi bua tshinyi Nzambi uvua muakule bua dipuekeshibua milongo dia nyoka wetu muena dîna eu? Muaba uvua nyoka ne bua kusomba ne kuendela, kudikoka panshi ne difu diende ne kupatula ludimi luende bu udi udia dimfuekenya dia buloba bidi bileja mu tshimfuanyi dipuekeshibua dia Satana milongo. Satana uvua kumpala ne muanzu mubandile bu umue wa ku banjelu ba Nzambi, kadi wakapuekeshibua mu nsombelu udi Bible ubikila ne: nyongolo ya mîdima.​—2 Petelo 2:4.

Pashishe, anu bu mutu nyoka wetu eu mua kusuma muntu ku tshikankanyi, Satana mu nsombelu wende wa dipuekeshibua milongo uvua ne bua ‘kusuma ku tshikankanyi’ tshia “muana” anyi diminu dia Nzambi. (Genese 3:15) Yezu Kristo ke tshitupa tshia kumpala tshia diminu edi, wakakenga bua matuku makese mu bianza bia bena mudimu ba Satana. Kadi ndekelu wa bionso, nebaboze mutu wa nyoka eu wa mu tshimfuanyi kudi Kristo ne bena diende bena Kristo bela manyi babishibue ku lufu. (Lomo 16:20) Nunku, mulawu uvua Nzambi muele nyoka wetu muena dîna eu udi uleja mu tshimfuanyi dipuekeshibua milongo ne dibutuka dia ndekelu dia Satana Diabolo “nyoka wa kale.”