Shaula udi upetangana ne balunda bende ba kale ne baluishi bende ba kale

SHAULA, wakalua kumanyika ku dîna dia mupostolo Paulo, uvua ne bua kuikala ne ndambu wa buôwa pakapinganaye ku Yelushalema musangu wa kumpala panyima pa yeye mumane kulua muena Kristo. * Kukavua bidimu bisatu bivuaye mumbuke mu tshimenga etshi, pavuaye wenda ufuna bua kushipa bayidi ba Yezu. Bavua bamupeshe bukokeshi bua kukuata muena Kristo yonso uvuaye ne bua kusangana mu Damaseke.​—Bienzedi 9:1, 2; Galatia 1:18.

Pakaluaye muena Kristo, Shaula wakamanyisha ne dikima dionso muvuaye witabuja Masiya ukavua mubishibue. Ke bualu kayi bena Yuda ba mu Damaseke bakakeba bua kumushipa. (Bienzedi 9:19-25) Uvuaku bushuwa mua kutekemena bua balunda bende ba kale bena Yuda kumuakidilabu bimpe mu Yelushalema anyi? Kadi tshipatshila tshia Shaula tshivua tshia kupetangana ne bayidi ba Kristo ba mu Yelushalema. Kadi abu kabuvua ne bua kuikala bualu butekete to.

Bible udi utuambila ne: ‘Pakayaye ku Yelushalema,  wakasua kulamata kudi bayidi; kadi bobu bakamutshina, kabakitabuja ne: udi muyidi.’ (Bienzedi 9:26) Bivua anu mua kuenzeka nanku. Kuonso aku bavua bamanye Shaula bu mukengeshanganyi wa tshikisu. Diamba muvuaye ne ditabuja bu muena Kristo divua mua kumueneka bu mayele menza bua kubuela mu tshisumbu. Ke bualu kayi bena Kristo ba mu Yelushalema bakajinga bua kikadi nabu pabuipi to.

Kadi umue wa kudibu wakambuluisha Shaula. Bible udi wamba ne: Bânaba wakaya ne muntu eu uvua ukengesha kumpala “kudi bapostolo,” bimueneka ne: kudi Petelo (Kefa) ne Yakobo, bana babu ne Mukalenge, ne kubambilaye muvua Shaula mukudimune mutshima ne muvuaye muyishe mu Damaseke. (Bienzedi 9:27; Galatia 1:18, 19) Bible ki mmuleje tshivua tshisake Bânaba bua kueyemena Shaula mushindu eu to. Bantu babidi aba bavuaku bamanyangane anyi, kusakabi Bânaba bua kuyikila ne Shaula ne kukeba bua kutuishibua muvuaye mushintuluke anyi? Bânaba uvuaku muyikile ne bena Kristo ba ku Damaseke ne bobu kumumanyisha muvua Shaula mushintuluke bushuwa? Nansha biobi bikale bivua mushindu kayi, Bânaba kavua welela Shaula meji makuabu nansha. Ke bualu kayi Shaula wakasomba ne Petelo matuku 15.

Udi usomba ne Petelo matuku 15

Anu bu muvua Paulo muambile bena Galatia, Yezu nkayende ke uvua mumupeshe mudimu uvuaye ne bua kuenza kabiyi bilomba dianyisha dia muntu mukuabu. (Galatia 1:11, 12) Kadi kakuyi  mpata Shaula wakamona mushinga wa kuikala mumanye malu a bungi a mudimu wa Yezu. Disomba diende ne Petelo divua ne bua kupetesha mushindu muimpe wa kumanya malu au. (Luka 24:12; 1 Kolinto 15:3-8) Shaula uvua mua kuikala ne malu a bungi a kukonka Petelo ne Yakobo, ne bobu pabu bavua ne nkonko ya kumuela bua tshikena-kumona tshivuaye mupete ne bua mudimu uvua Yezu mumupeshe.

Mmunyi muakapandukaye mu bianza bia balunda bende ba kale?

Kumpala kua Stefano kuluaye muntu wa kumpala wakafuila ditabuja, wakelangana mpata ne bantu ‘ba mu nsunagoga udibu babikila ne: ngua bena Budishikaminyi, ne wa bena Kulene, ne wa bena Alesandelia, ne wa bena Kilikia ne bena Asia.’ Mpindieu Shaula uvua ‘wakula ne bena Yuda bakadi bakula [muakulu] wa bena Gelika’ ne ubayisha ne dikima. Tshiakenzabu ntshinyi? Bavua bakeba bua kumushipa.​—Bienzedi 6:9; 9:28, 29.

Kabivua mua kuikala bibi to bua Shaula kumvuijaye balunda bende ba kale muvuaye mushintuluke ne bua kukebaye bua kubalongesha malu a Masiya. Kadi bena Yuda bavua bakula tshiena Gelika aba kabakitabuja malu a muntu uvuabu bamona bu muena tshitungu nansha.

Shaula uvuaku mumone bunene bua njiwu ivua kumpala kuende anyi? Bible udi utuambila ne: pavuaye usambila mu ntempelo, wakalotakana ne kumonaye Yezu umuambila ne: ‘Umuka mu Yelushalema lubilu, bua kabena bitabuja dîyi diudi wamba bua bualu buanyi.’ Shaula wakandamuna ne: ‘Mukalenge, bobu badi bamanye mungakadi mbueja bakakuitabuja mu nzubu wa lukanu ne mungakadi mbakuma mu nsunagoga yonso; pakadibu bamatshisha mashi a Stefano, mumanyishi wa bualu buebe, meme kabidi ngakadi ngimana pabuipi, ngitabuja bualu ebu.’​—Bienzedi 22:17-20.

Bamue bantu badi bamona ne: pakandamuna Shaula nunku uvua mujingulule njiwu ivuaku. Bakuabu badi bela meji ne: uvua wamba ne: ‘Bobu mbamanye bimpe ne: mvua mukengeshanganyi bu bobu. Bushuwa, badi ne bua kuangata dikudimuna dianyi dia mutshima ne mushinga. Pamuapa ndi mua kubambuluisha bua kuitaba bulelela.’ Pabi Yezu uvua mumanye ne: bena Yuda abu kabavua mua bumanyishi bua muntu uvuabu bangata bu mupidie ditabuja nansha. Kuambilaye Shaula ne: ‘Umbuke munemu, bualu bua nenkutume kuaka kule kudi bisamba bia bende.’​—Bienzedi 22:21, 22.

Pakamanya bena Kristo nende bakuabu ne: Shaula uvua mu njiwu, bakaya nende lukasa lukasa ku tshitudilu tshia mazuwa tshia Kaisalia ne kumutumabu ku Tâso, musoko uvuabu bamulelele uvua ntanta wa kilometre 500. (Bienzedi 9:30) Shaula uvua ne bua kuenza bidimu bia bungi kayi upingana ku Yelushalema to.

Diumbuka mu tshimpitshimpi edi diakambuluisha bua kukuba tshisumbu tshia bena Kristo. Dikala dia muntu eu uvua mukengeshanganyi kumpala divua mua kujudija tshimvundu. Shaula mumane kuya, ‘bena ekeleziya ba mu Yudaya yonso ne ba mu Galela ne ba mu Samalea bakadi ne ditalala, bakadi badiunda mu bualu bua Nzambi; bakadi benda mu ditshina dia Mukalenge ne mu disamba dia nyuma muimpe; bakadi bavulangana ba bungi.’​—Bienzedi 9:31.

Dilongesha dia budimu

Anu bu siekele wa kumpala, lelu kudi mua kumueneka nsombelu idi ilomba bua kuikala ne budimu. Katuena ne bua kubanda patupu bantu batudi katuyi bamanye nansha. Kadi imue misangu bantu babi bakadi bakebe bua kushima bantu ba Yehowa, bua kukumbaja majinga abu anyi bua kunyanga tshisumbu. Ke bualu kayi tudi ne dijingulula dia malu bua katukuatshiki ku mashimi a bantu babi aba.​—Nsumuinu 3:27; 2 Timote 3:13.

Mushindu uvua Shaula umona diyisha mu Yelushalema udi kabidi utuleja mushindu mukuabu utudi ne bua kuikala ne budimu. Kuyisha imue miaba anyi bamue bantu bu mudi balunda betu ba kale kudi mua kutukebela njiwu ku mubidi, mu nyuma anyi mu bikadilu. Tudi ne bua kuikala ne budimu, tshilejilu patudi tusungula dîba ne muaba wa kuyishila.​—Nsumuinu 22:3; Matayo 10:16.

Tuikale bajadike ne: nebamanyishe lumu luimpe lua Bukalenge bua Nzambi kumpala kua nshikidilu wa bukua panu ebu bubi. Shaula mmutushile tshilejilu tshilenga mu muanda eu, bualu uvua “ulongesha mu dina dia Mfumu ne dikima” too ne balunda bende ba kale ne baluishi bende ba kale.​—Bienzedi 9:28, MMM.

[Mêyi adi kuinshi]

[Tshimfuanyi mu dibeji 16]

Pakafika Shaula mu Yelushalema, wakayisha bena Yuda bavua bakula tshiena Greke ne dikima