Tshidimu tshijima mu “Buloba Buimpe”

MU TSHIDIMU tshia 1908 bakangula tshintu tshimpe tshitambe mu tshimenga tshia kale tshia Gezê tshia malu a mu Bible tshidi ku Ouest kua Yelushalema. Bakapeta pa dibue dikese dia mu siekele wa dikumi kumpala kua Yezu kuluaye pa buloba mêyi mafunda mu tshiena-Ebelu tshia kale avua aleja tshidimu tshia babidime ne midimu mishilangane itu yenzeka munkatshi mua tshidimu atshi. Bakalua kubikila dibue adi ne: Kalandriye ka Gezê.

Pa dibue adi pavua dîna dia Abiya. Nansha mudi bakebuludi ba bintu bia muinshi mua buloba kabayi bitaba bualu ebu, bantu ba bungi badi bamona mêyi adi mafunde pa dibue edi bu mudimu wa mulongi kampanda wa mu kalasa. * Tudi tukulomba bua udimuene muvua bikondo bilondangane ku diambuluisha dia muana uvuaku tshikondo atshi. Kuenza nunku kudi mua kukuambuluisha bua kuvuluka amue malu a mu Bible.

Ngondo ibidi ya dinowa

Mufundi wa kalandriye ka kale ka Gezê watuadija ne dinowa mu kabujima. Bikala dinowa divua dia kumpala mu kalandriye aka, udi mua kumanya bua tshinyi bena Isalele bavua bamona dinowa edi bu dia ndekelu bua tshitupa tshinene tshia tshidimu tshia babidime. Ngondo wa Ethanim (wakaluabu kubikila ne: Tishri) udi upetangana ne ngondo wa 9 anyi wa 10 mu kalandriye ketu ka lelu. Tshikondo tshivuabu benza dinowa edi, tshivua tshikondo tshia disanka dia bungi bua nsonga Abiya. Ela meji disanka divuaye mua kuikala nadi pavuaye wambuluisha tatuende bua kuasa katanda kavuabu ne bua kusombela munkatshi mua lumingu luvuabu bela Yehowa tuasakidila bua bia pa madimi abu!​—Dutelonome 16:13-15.

Tshikondo atshi, tumuma tua olive tuvua tukola bua bena mu dîku dia Abiya kukuma matamba atu bua kutupola; mudimu eu uvua mukole bua nsonga eu Abiya kadi uvua muusue bikole. (Dutelonome 24:20) Pashishe bavua bapola tumuma tua olive ne baya natu ku tshikaminu tshivua pabuipi  bua kuenza mafuta. Mushindu mukuabu mupepele uvua bena mu dîku mua kupeta mafuta uvua wa kuangata tumuma tuvua tutayike, kututeka mu mâyi pashishe bengulula mafuta avua alelema pa mutu pa mâyi. Mu mishindu yonso, mafuta aa kaavua anu ambuluisha bua biakudia to. Bavua kabidi baela mu miendu, buondopa nawu mputa bu mudi ivua Abiya mua kutapika pavuaye unaya.

Ngondo ibidi ya kukuna bintu

Pavua tshikondo tshia mvula tshisemena pabuipi, Abiya uvua mua kuikala usanka bua kuowa mâyi matalale. Tatuende uvua mua kuikala pamuapa mumuambile mudi mvula wambuluisha buloba. (Dutelonome 11:14) Buloba buvua bûme bikole mu ngondo ya bungi bua munya mukole, budi buteketa bua kubudima. Ku kale, tshidime uvua mua kuendesha ditempu dia mabaya pamuapa dienza ne lukasu lua tshiamu divuabu benda bakoka kudi nyama kampanda. Tshipatshila tshiende tshivua tshia kuela mabula malulame. Bu muvua buloba buimpe butambe, babidime bena Isalele bavua nansha mua kudima muaba mukese nansha muaba eu muikale pa mukuna. Kadi mu kabudimi aku bavua mua kuenzamu mudimu ne bintu bikuata ku bianza.

Pavuabu bajikija kubundulula buloba bavua bakuna blé ne ntete ya orge. Bualu bua dikema, mu Kalandriye ka Gezê kunyima kua ngondo ibidi ya dinowa, badi bakula bua ngondo ibidi ya dikuna. Tshidime uvua mua kuela ntete mu tshilamba tshivuaye muvuale ne kutuadija kuyambula ne tshianza wenda uyimuangalaja mu budimi.

 Ngondo ibidi ya dikuna dia pashishe

“Buloba buimpe” kabuvua bupanga kupatula biakudia. (Dutelonome 3:25) Mu ngondo wa 12, mvula ya bungi ivua iloka ne bintu bituadija kusampila. Tshivua tshikondo tshia kukuna bisekiseki bua musangu wa ndekelu bu mudi nkunde, nyimu ne bintu bikuabu. (Amosa 7:1, 2) Abiya wakatshibikila mu mêyi avua mafunde pa dibue diende ne: “dikuna dia ndekelu,” tshikondo tshimpe tshivua bantu bapeta midioko ya bungi.

Pavua tshikondo tshia mashika tshiya tshitangile ku ndekelu, mutshi wa amande uvua upatula bilongo bitoke ne bikunzubile bia bungi bua kuleja ne: mvula ikadi pa kumata panshi. Bivua bituadija kuenzeka nunku pabuipi ne ngondo wa kumpala.​—Yelemiya 1:11, 12.

Ngondo wa dikosa mitshi ya lin

Abiya udi utela kabidi mitshi ya lin. Mitshi eyi idi ituvuluija bualu buvua buenzeke bidimu bia bungi kumpala kua tshikondo tshia Abiya ku Est kua Yudaya. Mu tshimenga tshia Yeleko, Lahaba wakasokoka batentekedi babidi ‘muinshi mua mitshi ya lin ivuaye mulonge’ pa musaka wa nzubu wende. (Yoshua 2:6) Mitshi ya lin ivua yambuluisha bena Isalele bikole. Bua kupeta mionji ya mitshi ya lin, idi ne bua kuanji kubola. Bavua babolesha mitshi ku kakese ku kakese ne lumuma anyi bayiteka mu mâyi bua kubolayi lukasa. Pavua mitshi eyi ipanduluka, bavua bangata mionji yayi bua kuenza nayi manda avuabu benza nawu makondo, mitanda ne bilamba. Bavua kabidi benza nayi mikaba ya miendu.

Bamue bantu badi bamba ne: bavua mua kuikala badima mitshi ya lin mu Gezê muaba uvua mâyi makese. Bakuabu pabu badi bamba ne: mitshi eyi ivua ikola anu ku ndekelu kua tshidimu. Ke bualu kayi bamue bantu batu bela meji ne: mu Kalandriye ka Gezê, “mitshi ya lin” ivua tshimanyinu tshia biakudia “bitumpuka” mu mpata.

Ngondo wa dinowa dia bimuma bia orge

Tshidimu tshionso, panyima pa ngondo wa dikosa dia mitshi ya lin, Abiya uvua umona muvua mpata miûle ne miepu mibishi ya orge idiye utela kabidi mu kalandriye kende. Ngondo udi upetangana ne tshikondo etshi mu tshiena-Ebelu ngua Abiba udi umvuija ne: “Miepu mibishi,” tuamba ne: dîba dikadi miepu mimane kukola kadi mitshikale anu mibishi. Yehowa wakela mukenji ne: ‘Nuvuluke ngondo wa Abiba bua kutendelela kupita kua Yehowa.’ (Dutelonome 16:1) Ngondo wa Abiba (wakaluabu kubikila ne: Nisana) udi upetangana ne ngondo muisatu anyi muinayi wa matuku etu aa. Tshikondo tshia dikola dia bimuma bia orge tshidi mua kutuambuluisha bua kumanya ntuadijilu wa ngondo eu. Nansha lelu eu, bena Yuda ba Bakaraite batu bamanya ntuadijilu wa tshidimu kudiambuluisha dia dipia dia bimuma bia orge. Mu mishindu yonso,  bimuma bia orge bia kumpala bivuabu bapola, bavua babilambula kumpala kua Yehowa mu dituku dia 16 dia ngondo wa Abiba.​—Lewitiki 23:10, 11.

Bimuma bia orge bivua ne mushinga wa bungi mu nsombelu wa ku dituku ne ku dituku wa bena Isalele ba bungi. Nansha muvuabi ne mushinga mushadile ku wa blé, bantu bavua basue kuenza nabi mampa bikole, nangananga bapele.​—Yehezekele 4:12.

Ngondo wa dinowa ne dipima

Mu matuku a Abiya, pavuaye umona mu dinda menemene bivubavuba bia bujitu bijimina uvua wela meji ne: mvula kêna pabuipi bua kuloka to. Dîba adi mitshi ya mu mpata ivua ikola anu ne lumuma. (Genese 27:28; Zekâya 8:12) Babidime ba mu Isalele bavua bamanye ne: bintu bishilangane bivuabu banowa mu ngondo ya munya mukole ya munkatshi mua tshidimu, bivua dijinga ne mpepele mimpe too ne ku Pentecoste. Lupepele lua mashika luvua lufumina ku Nord luvua luimpe bua bintu bu mudi matala, kadi kaluvua luimpe bua mitshi ya bimuma ikavua miele bilongo to. Lupepele lua luya luvua lufumina ku Sud luvua luambuluisha bilongo bua kubululuka ne kukuama bimuma.​—Nsumuinu 25:23; Musambu wa Solomo 4:16.

Yehowa Mufuki wa bintu ebi uvua mubiteke bilondangana bimpe menemene. Mu matuku a Abiya, Isalele uvua ‘buloba bua blé ne orge ne mionji ya tumuma ne mitshi ya nfigi ne grenade; mitshi ya olive ne buitshi.’ (Dutelonome 8:8) Kakuende mulume wa Abiya uvua mua kuikala mumulondele bua tshikondo tshivua bantu ne bintu bipite bungi mu bukokeshi bua Mukalenge wa meji Solomo; bubanji ebu buvua buleja muvua Yehowa mubabeneshe.​—1 Bakelenge 4:20.

Pashishe Abiya mumane kuakula bua dinowa, kudi muaku mukuabu mu kalandriye aku udi bamue bamba ne: udi umvuija “dipima.” Badi mua kuikala bakula bua dipima dia bintu bivuabu banowa bua kupesha muena budimi ne bena mudimu anyi bua kufuta bitadi. Kadi bamanyi bakuabu ba malu a kale badi bamona ne: muaku wa tshiena-Ebelu udi umvuija “difesto” udi uleja Tshibilu tshia Mbingu tshivuabu benza mu ngondo wa Sivan (Muitanu anyi Muisambombo).​—Ekesode 34:22.

Ngondo ibidi ya ditula dia mabeji

Abiya udi wakula kabidi bua ngondo ibidi ya diakaja dia mitshi ya mvinyo. Pamuapa Abiya uvua mua kuikala muambuluishe pende bua kutula mabeji a mitshi ya mvinyo avua apangisha bimuma bua kabipetshi munya anyi? (Yeshaya 18:5) Pashishe, bavua batuadija kukunguja mabeji, mmudimu uvua usankisha nsonga wa tshikondo atshi. Mabeji a kumpala atshivua mabishi avua mimpe be! Pamuapa Abiya uvua mua kuikala mumvue bakula bua batentekedi 12 bavua Mose mutuma mu Buloba Bulaya. Bavua baye mu tshikondo tshivua bimuma bia mvinyo bia kumpala bimane kupia bua kumona mushindu  uvua ditunga adi dimpe. Musangu au, ditamba dimue dia tumuma tua mvinyo divua ne bujitu bivua bikengela bantu babidi bua kudiambulabu.​—Nomba 13:20, 23.

Ngondo wa bimuma bia tshikondo tshia munya

Tshitupa tshia ndekelu tshia kalandriye ka Abiya tshidi tshiakula bua bimuma bia mu tshikondo tshia munya. Ku kale mu Asia wa pankatshi, tshikondo tshia mvula babidime bavua batamba kudifila bikole ku bimuma. Panyima pa matuku a Abiya, Yehowa wakakula bua “tshikondo tshia mamuma mabobe” bua kuleja ne: ‘nshikidilu wakufika kudi bantu bende bena Isalele’, uvua muakule bua “mamuma mabobe” ne “nshikidilu” mu tshiena-Ebelu. (Amosa 8:2) Bualu ebu buvua buvuluija bena Isalele bavua kabayi ne lulamatu ne: nshikidilu wabu ukavua pabuipi ne dilumbuluisha dia Yehowa divua ne bua kulua. Ku bimuma bia mu tshikondo tshia luya bivua Abiya utela, kuvua ne bua kuikala kabidi bimuma bia mfigi. Bavua mua kuela tumuma tua mfigi mu kato bua kudia anyi kutuzaza bua kondopa natu biuja.​—2 Bakelenge 20:7.

Mudi Kalandriye ka Gezê mua kukuambuluisha

Nsonga eu Abiya uvua mua kuikala mumanye muvua midimu ya madimi yenzeka mu ditunga diabu. Mu matuku au, bena Isalele bavua badima bikole. Nansha wewe kuyi mumanye bimpe menemene midimu ya madimi, malu adi pa dibue dia Gezê adi mua kukuambuluisha bua kuvuluka malu autu ubala mu Mukanda wa Nzambi bua kuumvua bimpe ne kuamanya kabidi.

[Mêyi adi kuinshi]

[Kazubu/​Tshimfuanyi mu dibeji 11]

MUSHINDU UTUDI MUA KUBALA KALANDRIYE KA GEZÊ:

“Ngondo ya kunowa tumuma tua olive; ngondo ya kukuna;

ngondo wa dinowa dia orge;

ngondo itu bisosa bisampila mu mpata;

ngondo wa dikosa mitshi ya lin;

ngondo wa dinowa blé ne dipima;

ngondo ya ditula mabeji a mitshi;

ngondo wa bimuma bibobe.”

[mufundi:] Abiya *

[Mêyi adi kuinshi]

[Mêyi a dianyisha]

Archaeological Museum of Istanbul

[Tablo/​Bimfuanyi mu dibeji 9]

(Bua kumona malu bimpe, tangila mu mukanda)

NISANA (ABIBA)

Luabanya-Tshisanga

IYYAR (ZIV)

Tshisanga-Lumungulu

SIVAN

Lumungulu-Kabalashipu

TAMMUZ

Kabalashipu-Kashipu

AB

Kashipu-Tshimungu

ELUL

Tshimungu-Kabitende

TISHRI (ETHANIM)

Kabitende-Kasuamansense

HESHVAN (BUL)

Kasuamansense-Kasuabanga

CHISLEV

Kasuabanga-Tshisua-munene

TEBETH

tshisua-munene-Tshiongo

SHEBAT

Tshiongo-Luishi

ADAR

Luishi-Luabanya

VEADAR

Luabanya

[Mêyi a dianyisha]

Tshidime: Garo Nalbandian

[Tshimfuanyi mu dibeji 8]

Bintu bidi bishala ku Gezê

[Mêyi a dianyisha]

© 2003 BiblePlaces.com

[Bimfuanyi mu dibeji 10]

Mutshi wa amande

[Tshimfuanyi mu dibeji 10]

Mutshi wa lin

[Mêyi a dianyisha]

Dr. David Darom

[Tshimfuanyi mu dibeji 10]

Orge

[Mêyi a dianyisha]

U.S. Department of Agriculture