Utu utabalela bakuabu bu mutu Yehowa ubatabalela anyi?

BIBLE udi utuambila ne: “[Upuilayi Nzambi] ntatu yenu yonso, bualu yeye ke udi unulama.” (1 Petelo 5:7, MMM) Mubelu muimpe be! Yehowa Nzambi yeye nkayende udi uditatshisha bua bantu bende. Tudi tudiumvua mu ditalala mu maboko a bulami buende.

Tudi petu ne bua kuditatshisha bua bakuabu ne kuleja mutudi tubatabalela. Kadi bu mutudi bena mapanga, mbimpe tumanye mateyi atudi ne bua kuepuka patudi tutabalela bakuabu. Kumpala kua tuetu kumone amue a kudiwu, tuanjayi kumona mushindu utu Yehowa utabalela bantu bende.

Mufundi wa Misambu Davidi wakafuanyikija Yehowa ne mulami wa mikoko wamba ne: ‘Yehowa udi mulami wanyi, tshiena nkengela tshintu. Yeye udi undadika mu mitoloka ya mashinde. Udi undombola pepi ne mâyi adi talalaa; udi ukankamija mutshima wanyi. Nansha bingenda mupitshile mu lupongo lua mundidimbi wa lufu, tshiena ntshina bualu bubi; bualu bua wewe udi nanyi.’​—Musambu 23:1-4.

Bu muvua Davidi muine muikale mulami wa mikoko, uvua mumanye bimpe tshivua kulama mikoko kulomba. Mulami wa mikoko udi uyikuba kudi nyama ya luonji, bu mudi ntambue, mibuabua ne ours. Udi ulama mikoko bua kayimuangalaki, ukeba idi mijimine, wambula bana ba mikoko badi batshioke mu tshiadi tshiende, wondopa idi isama ne idi mitshibuke. Udi uya kuyinuisha mâyi dituku dionso. Kadi abi kabiena biumvuija ne: mulami udi ulondolola mukoko ku kantu ne kantu konso kadiwu wenza nansha. Mikoko itu idienzela malu.

Ke mudi Yehowa ulama pende bantu bende. Mupostolo Petelo wakamba ne: ‘Nuenu mbadi balamibua ku bukole bua Nzambi.’ Muaba eu, kuikala ‘badi balamibua’ kudi kumvuija “kuikala badibu batangila.” (1 Petelo 1:5) Bua kuditatshisha kua Yehowa bua bualu buetu ne muoyo mujima, udi amu utulama misangu yonso, muikale anu mudiakaje bua kutuambuluisha patudi tumulomba. Kadi Yehowa mmutufuke ne budikadidi bua kudienzela malu, ke bualu kayi katu ubuelakana mu malu onso atudi tuenza anyi tusungula bua kuenza to. Mmunyi mutudi mua kumuidikija mu bualu ebu?

Idikija Nzambi mu dikolesha dia bana bebe

‘Bana badi bupianyi bufume kudi Yehowa.’ Nunku baledi badi ne bua kulama bana ne kubatabalela. (Musambu 127:3) Abi bidi mua kulomba baledi bua kusaka bana babu bua bikale babaleja meji adibu bela ne mudibu badiumvua, ne kusomba nabu bilondeshile meji abu au. Baledi bobu bakeba kulondolola bana babu mu kalu ne kalu konso bapua muoyo ne: bana badi ne abu majinga, bidi anu bu mulami wa mikoko udi ukeba kulombola mukoko wende muwele muonji  mu nshingu. Kakuena mulami udi mua kulama mikoko yende bimpe mushindu eu to; ke mudibi kabidi bua Yehowa.

Mariko * udi wamba ne: “Kudi bidimu bia bungi bimvua anu ngambila bana banyi ne: ‘Ikalayi nuenza etshi,’ ‘Kanuikadi nuenza tshiatshia to.’ Mvua ngela meji ne: bu mundi muledi, mvua ne bua kuikala ngenza nanku. Tshivuaku mbela kalumbandi anyi nyukila nabu muyuki wa bushuwa eu nansha.” Nansha muvua muanende wa bakaji uyukila mêba a bungi ne balunda bende ku telefone, bavua bayukila ne mamuende anu mu tshikoso. Mariko udi utungunuka wamba ne: “Ngakalua kumona dishilangana divuaku. Pavua muananyi au uyukila ne balunda bende, uvua wamba mêyi avua aleja muvuaye uditeka pa mua wabu, bu mudi a ne: ‘Mmuomu, ndi mumvue,’ anyi ne: ‘Bidi binsama panyi muomumue.’ Meme kutuadija kuamba panyi mêyi a muomumue bua kusaka muananyi ku dingambila muvuaye udiumvua; matuku makese patupu, tuetu kutuadija kuyukila bilenge bia dikema.” Bualu ebu budi buleja ne: kuyukila bimpe ne bakuabu kudi ne mushinga wa bungi, kuyukila kua nuakula bonso.

Baledi badi ne bua kusaka bana babu bua kubambila meji abu ne majinga abu; bana pabu badi ne bua kumvua bua tshinyi dibatabalela dia baledi babu didi dibakuba. Bible udi ubela bana bua kutumikila baledi babu, pashishe ubaleja tshidibu ne bua kuenzela nanku ne: ‘Bua wikale ne dikasa dimpe ne wikale ne muoyo musangu mule pa buloba.’ (Efeso 6:1, 3) Padi muana mumanye bimpe bulenga bua ditumikila baledi, kabiena bimukolela bua kutumikila to.

Panudi nulama tshisumbu tshia mikoko ya Yehowa

Mu tshisumbu tshia bena Kristo ke mutudi tumuena dinanga dia Yehowa dia mudiye utabalela bantu bende. Bu mudi Yezu muikale Mutu wa tshisumbu, udi ulombola bakulu bua kulama mikoko yende. (Yone 21:15-17) Muaku wa mu tshiena Gelika udibu bakudimune ne: mutangidi udi umvuija “kulama bimpe menemene.” Petelo wakaleja bakulu mudibu ne bua kuenza mudimu eu wamba ne: ‘Nulame tshisumbu tshia mikoko ya Nzambi tshidi munkatshi muenu, nubalame, kanuyi benzejibue ku bukole, kadi ne mitshima ya disanka bu mu disua dia Nzambi; ki mbua kukeba biuma, kadi nuikale ne mutshima mulongolola bimpe; kanuikadi bu bakokeshi ba badi kunyima kuenu, kadi nudivuije bifuanyikiji bimpe kudi mikoko.’​—1 Petelo 5:2, 3.

 Bushuwa, mudimu wa bakulu mmufuanangane ne wa balami ba mikoko. Bakulu bena Kristo badi ne bua kutabalela bana betu badi basama mu nyuma ne kubambuluisha bua bikale batumikila mikenji ya Nzambi mu nsombelu wabu. Bobu ke badi ne bua kulongolola malu a mu tshisumbu, kulongolola bua bisangilu kuenzekabi ne kuteka bulongame mu tshisumbu.​—1 Kolinto 14:33.

Mêyi a Petelo adi kulu eku adi atuleja ne: bakulu badi ne bua kudimuka bua kabadivuiji ‘bakokeshi’ ba badi mu tshisumbu. Mukulu udi mua kudivuija nanku yeye mubange kuelela bena mu tshisumbu mikenji idi kayiyi ne mushinga. Bua dijinga dikole dia kukuba tshisumbu tshia mikoko, mukulu udi yeye kayi mutangile bimpe udi pamuapa mua kuela kalela. Tshilejilu, mu tshisumbu tshikuabu tshia ku Asie, bakulu bavua belele benamu mikenji ya mushindu wa kuelanganabu muoyo ku Nzubu wa Bukalenge, baleja bu mudi muntu udi ne bua kuakula kumpala kua mukuabu, bela meji ne: kutumikila mikenji ayi kuvua mua kufila ditalala mu tshisumbu. Nansha muvua bakulu abu kabayi bele mikenji eyi ne meji mabi, bavua balama bana babu mutu Yehowa ulama bantu bende anyi? Bushuwa, meji avua nawu mupostolo Paulo avua amuenekela ku mêyi ende aa: ‘Ki mbua ne: tudi ne bukokeshi ku ditabuja dienu, kadi tudi bakuatshishanganyi nenu mu disanka dienu; bualu bua nudi nujalama mu ditabuja.’ (2 Kolinto 1:24) Yehowa utu weyemena bantu bende.

Pa kumbusha dibenga kuelela bantu mikenji yabu bobu, bakulu badi kabidi baleja mudibu baditatshisha bua bakuabu padibu kabayi bambila bantu malu masokoka adi atangila bakuabu. Batu anu bavuluke didimuija dia Nzambi edi dia ne: “Kusokolodi bualu busokoka bua munga muntu.”​—Nsumuinu 25:9.

Mupostolo Paulo wakafuanyikija tshisumbu tshia bena Kristo bela manyi ne mubidi wa muntu wamba ne: ‘Nzambi wakasangisha bitupa bia mubidi bua mu mubidi kamuikadi ditapuluka, kadi bua bitupa biambuluishangane muomumue.’ (1 Kolinto 12:12, 24-26) Tshiambilu tshia mu tshiena Gelika tshia ne: “biambuluishangane muomumue” tshidi tshiumvuija ne: tshitupa tshionso ‘tshidi ne bua kuditatshisha bua tshikuabu.’ Bena mu tshisumbu badi ne bua kuditatshisha bikole bua bakuabu.​—Filipoi 2:4.

Mmunyi mudi bena Kristo balelela mua kuleja ne: yonso wa kudibu udi ‘uditatshisha bua muinende’? Badi ne bua kusambila bua bualu buabu ne kuambuluisha badi mu dikenga. Bualu ebu budi busaka bakuabu bua kuikalabu benzelangana pabu bimpe. Tshilejilu, tangila muvuabu bambuluishe Tadataka ne dinanga dia mushindu eu. Pakatambulaye ne bidimu 17, anu yeye nkayende ke uvua Ntemu wa Yehowa mu dîku diabu. Udi wamba ne: “Bena mu dîku dikuabu dia mu tshisumbu tshietu bavua bambikila bua kudiaku nabu ne kusomba nabu. Mvua mpitshila kuabu pabuipi ne mu dinda dionso kumpala kua kuya mu kalasa bua kukonkonona nabu mvese wa ku dituku. Bavua bampesha mibelu ya mua kupita ne malu a mu kalasa, tusambila nabu ne bua mine malu au. Malu avua dîku adi dingenzele akandongesha panyi bua kuambuluisha bakuabu.” Lelu eu Tadataka ukadi wenza mudimu mu umue wa ku Betele ya Bantemu ba Yehowa.

Mupostolo Paulo mmutudimuije bua buteyi kampanda busunguluke bua kudimukila patudi tutabalela bakuabu. Wakakula bua bakaji bakuabu bavua ‘babuela mu malu adi kaayi abatangila, bakula biakulakula.’ (1 Timote 5:13) Patudi tutabalela bakuabu, tudimuke bua katudibueji mu malu abu bobu adi kaayi atutangila. Ditabalela dibi dia bakuabu didi mua kumuenekela ku ‘diakula biakulakula,’ bu mudi kubela muntu bienze bu udi umulumbuluisha.

Katupu muoyo ne: muena Kristo yonso udi ne wende mushindu wa kulongolola malu, wa biakudia bituye musue ne wa kujikija lutetuku udi muimpe. Muena Kristo yonso udi ne bukenji bua kusungula tshidiye mua kuenza bilondeshile mikenji ya mu Mukanda wa Nzambi. Paulo wakadimuija bena Kristo ba ku Lomo ne: ‘Katulumbuluishanganyi kabidi. Tulonde malu adi avuija ditalala ne malu atudi mua kudiundishangana nawu.’ (Lomo 14:13, 19) Ditabalelangana dietu dia muoyo mujima mu tshisumbu kadikadi dia kudibueja mu malu a bakuabu to, kadi dikale dia kujinga bua kuambuluishangana. Tuetu tutabalelangana mushindu eu, dinanga ne buobumue nebivule mu mêku etu ne mu bisumbu bietu.

[Mêyi adi kuinshi]

[Tshimfuanyi mu dibeji 19]

Ikala wela bana kalumbandi ne ubumvuila bua bafike ku dikuambila tshidi meji abu