‘Kualukijidi muntu bubi ku bubi buende’

‘Kualukijidi muntu bubi ku bubi buende. Nudianjile kuela meji bua kuikala ne malu mimpe ku mêsu kua bantu bonso.’​—LOMO 12:17.

1.Ngikadilu kayi udi mutangalake mu bantu?

BOBU basakile muana kudi muanabu, tshia kumpala tshidiye wenza nkumusakila pende. Diakabi, ngikadilu wa dipingajilangana nunku katu anu kudi bana batekete to. Bantu bakole ba bungi batu pabu ne tshilele etshi. Bobu benzele muntu mukole bibi, udi ukeba bua kudisombuela. Bushuwa, bantu bakole bavule kabatu anu basakilangana patoke nunku to, kadi ba bungi batu bapingajilangana mu mishindu misokome. Pamuapa muntu mukole udibu benzele bibi udi mua kuendeshila udi mumubungamije lumu lubi peshi udi mua kukeba mishindu ya kumupangishisha bualu kampanda. Nansha yeye muenze bualu kayi, tshipatshila tshidi anu tshia muomumue: kudisombuela.

2. (a) Bua tshinyi bena Kristo balelela badi bakandamena dijinga dia kupingaja bubi ku bubi? (b) Nnkonko kayi ne nshapita kayi wa mu Bible bituakonkonona?

² Nansha mudi dijinga dia kudisombuela diele miji mu bantu, bena Kristo balelela badi badikandamena. Pamutu pa nanku, badi badienzeja bua kulonda mubelu wa mupostolo Paulo wa ne: ‘Kualukijidi muntu bubi ku bubi buende.’ (Lomo 12:17) Ntshinyi tshiatusaka bua kulonda mukenji mulenga eu? Mbanganyi nangananga batudi katuyi ne bua kupingajila bubi ku bubi? Mmasanka kayi atuapeta bituabenga kudisombuela? Bua kuandamuna nkonko eyi, tuanji kumonayi tshivua Paulo muambidile mêyi aa ne mushindu udi Lomo nshapita 12 uleja ne: kubenga kupingaja bubi ku bubi nnjila muakane, wa dinanga ne wa budipuekeshi utudi ne bua kulonda. Netumone malu asatu aa bumue ku bumue.

‘Nunku ndi nusengelela’

3, 4. (a) Kubangila mu Lomo nshapita 12, mmalu kayi adi Paulo wamba, ne muaku “nunku” udiye mutele udi ne diumvuija kayi? (b) Luse lua Nzambi luvua ne bua kusaka bena Kristo ba mu Lomo ku dienza tshinyi?

³ Kubangila mu nshapita 12, Paulo udi utela mianda inayi idi itangila nsombelu wa bena Kristo. Udi wakula bua malanda etu ne Yehowa, ne bena Kristo netu, ne bantu badi kabayi bena Kristo, ne bakokeshi ba mbulamatadi. Paulo udi uleja ne: kudi bualu bunene butudi ne bua kukandamena meji mabi, ne aa adi asaka bua kudisombuela, padiye wamba ne: “Nunku, bana betu, ndi nusengelela, bua luse lua Nzambi.” (Lomo 12:1) Tangila muaku “nunku,” udi umvuija “bilondeshile bidi bidianjile ebi.” Paulo udi usua kuamba ne: ‘Bilondeshile malu andi mfuma ku dinumvuija, ndi nusengelela bua kuenza tshindi nsua kunuambila mpindieu.’ Ntshinyi tshikavua Paulo mumvuije bena Kristo ba mu Lomo abu?

⁴ Mu nshapita ya kumpala 11 ya mukanda wende eu, Paulo wakakula bua diakalenga dia mushinga mukole didi nadi bena Yuda ne bantu ba bisamba bia bende dia kukokesha pamue  ne Kristo mu Bukalenge bua Nzambi, ditekemena divua bena Isalele wa ku mubidi babenge. (Lomo 11:13-36) Diakalenga dia mushinga adi divua anu bua “luse lua Nzambi.” Ntshinyi tshivua bena Kristo ne bua kuenza bua bualu bunene ebu bua bulenga bua Nzambi buvuabu kabayi bakanyine? Mitshima yabu ivua ne bua kuula ne dianyisha dia bungi ne kubasaka bua kuenza tshidi Paulo wamba mpindieu ne: ‘Nufile mibidi yenu bu mulambu udi ne muoyo, wa tshijila, udi usankisha Nzambi bimpe; bualu ebu budi kutendelela kuenu kudi ne meji.’ (Lomo 12:1) Kadi mmunyi muvua bena Kristo abu mua kudifila bu “mulambu” kudi Nzambi?

5. (a) Mmunyi mudi muntu mua kudifila bu “mulambu” kudi Nzambi? (b) Ndîyi kayi didi ne bua kulombola ngikadilu wa bena Kristo?

⁵ Paulo udi utungunuka ne kumvuija ne: ‘Kanudifuanyikiji ku malu a mu tshikondo etshi, kadi nuandamuke ku dikudimuna dia meji enu bu meji mapiamapia bua nuenu nujingulule mudi disua dia Nzambi didi dimpe, didi dimusankisha, ne didi diakane tshishiki.’ (Lomo 12:2) Pamutu pa kulonda lungenyi lua pa buloba, bavua ne bua kukudimuna meji abu bua apetangane ne a Kristo. (1 Kolinto 2:16; Filipoi 2:5) Dîyi adi divua ne bua kulombola ngikadilu wa dituku dionso wa bena Kristo balelela bonso, ne wetu petu lelu eu.

6. Bilondeshile malu adi Paulo muambe mu Lomo 12:1, 2, ntshinyi tshidi tshitusaka bua kubenga kupingaja bubi ku bubi?

⁶ Mmunyi mudi malu adi Paulo muambe mu Lomo 12:1, 2 atuambuluisha? Anu bu bena Kristo bela manyi abu ba mu Lomo, tudi ne dianyisha dia bungi bua mishindu ya bungi ya luse idi Nzambi mutungunuke ne idiye utungunuka ne kutuleja dituku dionso mu nsombelu wetu. Nunku, mutshima muule tente ne dianyisha udi utusaka bua kuenzela Nzambi mudimu ne bukole buetu buonso, mpetu yetu yonso ne mamanya etu onso. Dijinga dikole edi didi ditusaka kabidi bua kuenza muetu muonso bua kuela meji ki mbu bena panu, kadi bu Kristo. Kabidi, kuikala ne meji a Kristo kudi kushintulula mushindu utudi tuenzela bakuabu malu, nansha bobu bena Kristo anyi kabayi bena Kristo. (Galatia 5:25) Tshilejilu: Tuetu tuela meji bu Kristo, netudiumvue benjibue bua kubenga kupingaja bubi ku bubi.​—1 Petelo 2:21-23.

“Dinanga dienu kadikadi ne lubombo”

7. Ndinanga dia mushindu kayi didibu bakuila mu Lomo nshapita 12?

⁷ Tudi tubenga kupingaja bubi ku bubi ki nganu bualu njila muakane wa kulonda to, kadi mbualu kabidi njila wa dinanga. Tangila mushindu udi mupostolo Paulo wakula mpindieu bua dinanga. Mu mukanda wa Lomo, Paulo udi utela muaku “dinanga” (agape mu tshiena Greke) misangu ya bungi padiye wakula bua dinanga dia Nzambi ne dia Kristo. (Lomo 5:5, 8; 8:35, 39) Kadi mu nshapita 12, Paulo udi utela muaku agape mu mushindu mukuabu bua kuakula bua dinanga ditudi tuleja bantu netu. Kunyima kua Paulo mumane kuleja ne: bena kuitabuja badi ne mapa a nyuma mashilangane, udi utela ngikadilu udi bena Kristo bonso ne bua kuikala nende. Udi wamba ne: “Dinanga [dienu] kadikadi ne lubombo.” (Lomo 12:4-9, MML) Kuleja bakuabu dinanga ntshimanyinu tshinene tshia bena Kristo balelela. (Mâko 12:28-31) Paulo udi utukankamija bua kuenza bua dinanga ditudi tuleja bu bena Kristo dikale dilelela.

8. Mmunyi mutudi mua kuleja dinanga didi kadiyi ne lubombo?

⁸ Pashishe Paulo udi uleja  mushindu utudi tuleja dinanga didi kadiyi ne lubombo, wamba ne: “Nukine malu adi mabi; nulamate malu adi mimpe.” (Lomo 12:9) ‘Kukina’ ne ‘kulamata’ mmiaku idi ne bujitu. Tudi ne bua kukina ki nganu bipeta bia bubi kadi ne bubi buine kabidi. (Musambu 97:10) Muena Kristo udi ne dinanga dilelela mmulamate bikole ku buimpe mu mushindu wa se: dinanga edi didi dibuela mu bumuntu buende.

9. Mmubelu kayi udi Paulo mufile njila ne njila?

⁹ Paulo udi uleja njila ne njila mushindu umue musunguluke utudi tuleja dinanga edi. Udi wamba ne: ‘Nusankishe badi banukengesha; nubasankishe, kanubedi mulawu.’ ‘Kualukijidi muntu bubi ku bubi buende.’ “Kanudisombuedi, bana betu banangibue.” ‘Lekela kupitshibua [bukole] kudi malu mabi; kadi wikale upita malu mabi [bukole ne] malu mimpe.’ (Lomo 12:14, 17-19, 21) Mêyi a Paulo aa adi aleja patoke mushindu utudi ne bua kuenzela bantu badi kabayi bena Kristo malu, nansha aba badi batuluisha.

‘Nusankishe badi banukengesha’

10. Mmushindu kayi utudi mua kusankisha badi batukengesha?

¹⁰ Mmunyi mutudi tutumikila mubelu wa Paulo eu wa ne: ‘Nusankishe badi banukengesha’? (Lomo 12:14) Yezu wakambila bayidi bende ne: ‘Suayi badi nenu lukuna, lombelayi badi banukengesha Nzambi.’ (Matayo 5:44; Luka 6:27, 28) Nenku, mushindu umuepele utudi tusankisha badi batukengesha nkusambila bua bualu buabu, kubalombela Nzambi ne: bikalaku kudi badi batuluisha mu dipanga, Yehowa unzulule mêsu abu bua bamone bulelela. (2 Kolinto 4:4) Bushuwa, bidi mua kumueneka bu bibi bua kulomba Nzambi bua abeneshe muntu udi utukengesha. Kadi, ngelelu wetu wa meji yeye mutambe kufuanangana ne wa Kristo, netufike ku dileja baluishi betu dinanga. (Luka 23:34) Dileja dinanga dia mushindu eu didi mua kupatula tshipeta kayi?

11. (a) Tshilejilu tshia Stefano tshidi mua kutulongesha tshinyi? (b) Anu mudibi bileja kudi nsombelu wa Paulo, mmunyi mudi bamue bantu badi batukengesha mua kushintuluka?

¹¹ Tshilejilu, Stefano wakalombela bantu bavua bamukengesha Nzambi, ne disambila diende kadiakaya mu mâyi to. Matuku makese kunyima kua Pentekoste wa mu 33, bantu bavua baluisha tshisumbu tshia bena Kristo bakakuata Stefano, kuyabu nende too ne pambelu pa tshimenga tshia Yelushalema ne bobu kumushipa ne mabue. Kumpala kua kufuaye, wakela dîyi dikole ne: ‘Mukalenge, kubatekedi bubi ebu.’ (Bienzedi 7:58–8:1) Umue wa ku bantu bavua Stefano mulombele Nzambi dituku adi uvua Shaula, uvua mumone ne muanyishe bua bashipe Stefano. Pashishe, Yezu mumane kubika ku lufu wakamuenekela Shaula. Muntu eu uvua ukengeshangana kumpala wakalua muyidi wa Kristo ne kufikaye ne ku dilua mupostolo Paulo, mufundi wa mukanda wakatuminaye bena Lomo. (Bienzedi 26:12-18) Mu diumvuangana ne disambila dia Stefano, bidi bimueneka ne: Yehowa wakabuikidila Paulo bubi buende bu mukengeshanganyi. (1 Timote 1:12-16) Kabiena bikemesha muvua Paulo musengelele bena Kristo bua bikale ‘basankisha bantu badi babakengesha’! Malu avua mamufikile yeye muine akamulongesha ne: bamue bantu badi batukengesha badi mua kulua basadidi ba Nzambi ndekelu wa bionso. Mu matuku etu aa, bamue bantu bavua batukengesha mbalue bena Kristo bua ngikadilu wa ditalala udi nende basadidi ba Yehowa.

‘Nusombe ne bantu bonso mu ditalala’

12. Mmunyi mudi mêyi adi mu Lomo 12:9, 17 apetangana ne akavua Paulo muambe mu mvese wa 9?

¹² Mubelu mukuabu wa Paulo wa mushindu wa kuenzela bena Kristo ne badi kabayi bena Kristo malu udi ne: ‘Kualukijidi muntu bubi ku bubi buende.’ Mêyi aa adi apetangana ne akavuaye muambe kumpala a ne: “Nukine malu adi mabi.” Bushuwa, mmunyi mudi muntu mua kuamba ne: mmukine menemene malu adi mabi bikalaye wenza malu mabi bua kudisombuela kudi bakuabu? Kuenza nanku nkubengangane ne kuikala ne dinanga didi ‘kadiyi ne lubombo.’ Pashishe Paulo udi wamba ne: ‘Nudianjile kuela meji bua kuikala ne malu mimpe ku mêsu kua bantu bonso.’ (Lomo 12:9, 17) Mmunyi mutudi tutumikila mêyi aa?

13. Mmu mushindu kayi mutudi tuenza malu “ku mesu kua bantu bonso”?

¹³ Kumpala, mu mukanda uvua Paulo mufundile bena Kolinto, wakakula bua makenga avua bapostolo bapete. Wakamba ne: ‘Tuakavuijibua tshimuenenu kudi ba pa buloba, ne kudi banjelu ne kudi bantu. Patupendabu, tudi tubavudijila disanka; patuikala ne makenga, tudi tudikankamika; patuvuijilabu lumu lubi, tudi tubasengelela.’ (1 Kolinto 4:9-13) Bia muomumue, lelu badi babandila bena Kristo balelela kudi bantu ba pa buloba ebu. Padi bantu badi batunyunguluke bamona malu malenga atudi tuenza nansha bobu batuenzela bibi, badi mua kufika ku diteleja mukenji utudi tumanyisha.​—1 Petelo 2:12.

14. Netuye too ne penyi mu dikeba dia ditalala?

 ¹⁴ Kadi netuye too ne penyi mu dikeba dia ditalala? Tudi ne bua kuya mutantshi mule mu dikeba dia ditalala. Paulo udi wambila bana babu bena Kristo ne: “Bu biobio mua kuenzeka, nuenze muenu muonso bua kusomba ne bantu bonso mu ditalala.” (Lomo 12:18, MMM) “Bu biobio mua kuenzeka” ne “muenu muonso” mmêyi adi aleja ne: kusomba ne bakuabu mu ditalala kakuena anu mua kuenzeka misangu yonso to. Tshilejilu, katuakushipa mukenji wa Nzambi anu bua kukeba ditalala ne muntu kampanda nansha. (Matayo 10:34-36; Ebelu 12:14) Tshidibi, tudi tuenza muetu muonso bua kuikala mu ditalala “ne bantu bonso” katuyi tushipa mêyi makane a Nzambi.

“Kanudisombuedi”

15. Mbualu kayi budi mu Lomo 12:19 butudi tubengela kupingaja bubi ku bubi?

¹⁵ Paulo udi wamba bualu bukuabu butudi katuyi ne bua kupingajila bubi ku bubi: kuenza nunku nnjila wa budipuekeshi utudi ne bua kulonda. Udi wamba ne: ‘Kanudisombuedi, bana betu banangibue, kadi nushile tshiji tshia Nzambi muaba; bualu bua bakafunda ne: Busombuedi mbuanyi, meme nemfute; mudi  muamba Mukalenge.’ (Lomo 12:19) Muena Kristo udi udisombuela udi ne didibandisha. Udi udipesha mudimu udi muikale wa Nzambi. (Matayo 7:1) Kabidi, padiye udiangatshila malu mu bianza, udi uleja mudiye kayi witabuja mêyi a Yehowa adiye utujadikila ne: ‘Meme nemfute.’ Kadi bena Kristo balelela badi ne dishindika dia ne: Yehowa ‘neasombuele badiye musungule.’ (Luka 18:7, 8; 2 Tesalonike 1:6-8) Ne budipuekeshi buonso badi bashiya disombuela dia bubi budibu babenzele mu bianza bia Nzambi.​—Yelemiya 30:23, 24; Lomo 1:18.

16, 17. (a) ‘Kutentekaja makala a kapia’ pa mutu pa muntu kudi kumvuija tshinyi? (b) Ukadiku mudimuene muvua malu mimpe matekeshe mutshima wa muntu uvua kayi muena Kristo anyi? Biwikala ukavua mumone, fila tshilejilu.

¹⁶ Kudisombuela kudi muluishi wetu kudi mua kupapisha mutshima wende, kadi kumuenzela malu mimpe kudi mua kuutekesha. Bua tshinyi? Tangila mêyi avua Paulo muambile bena Kristo ba mu Lomo. Udi wamba ne: ‘Bikala muena lukuna webe ne nzala, umupe biakudia; bikalaye ne nyota, umupe bia kunua; bualu bua biwenza nunku, neutentekaje makala a kapia pa mutu pende.’ (Lomo 12:20; Nsumuinu 25:21, 22) Mêyi aa adi umvuija tshinyi?

¹⁷ ‘Kutentekaja makala a kapia pa mutu wende’ ngakuilu wa mu tshimfuanyi udi uleja mushindu uvuabu bengulula biamu kale. Bavua bela tshiamu mu mfulu, ne bela makala a kapia muinshi ne pa mutu patshi. Makala a kapia avua pa mutu avua avudija luya mu mushindu wa se: tshiamu tshivua tshikole atshi tshivua tshienguluka ne bikanganya biumukamu. Bia muomumue, patudi tuenzela muntu udi utuluisha malu mimpe, tudi mua “kuengulula” dipapa dia mutshima wende ne kupatula ngikadilu yende milenga. (2 Bakelenge 6:14-23) Bushuwa, tshivua tshikoke kumpala bantu ba bungi mu ntendelelu mulelela mmalu malenga avua basadidi ba Yehowa babenzele.

Tshitudi katuyi tupingajila bubi ku bubi

18. Bua tshinyi kubenga kupingaja bubi ku bubi mbualu buakane, bua dinanga ne bua budipuekeshi?

¹⁸ Dikonkonona dia Lomo nshapita 12 mu tshikoso ndituleje malu a bungi a mushinga atudi katuyi ne bua ‘kualukijila muntu bubi ku bubi buende.’ Bua kumpala, kubenga kupingaja bubi ku bubi nnjila muakane wa kulonda. Patudi tumona luse ludi Yehowa Nzambi mutuleje, mbiakane ne mbia meji bua tuetu kudifila kudiye ne kutumikila mikenji yende ku budisuile, kusakidila ne wa kunanga baluishi betu. Buibidi, kubenga kupingaja bubi ku bubi nnjila wa dinanga wa kulonda. Patudi tubenga kupingaja bubi ku bubi ne tukeba ditalala, tudi batekemene bua kuambuluisha nansha bamue baluishi betu ba tshikisu bua kuluabu batendeledi ba Yehowa. Buisatu, kubenga kupingaja bubi ku bubi nnjila wa budipuekeshi wa kulonda. Tudi tulua badibandishi patudi tudisombuela, bualu Yehowa udi wamba ne: “Busombuedi mbuanyi.” Dîyi dia Nzambi didi ditudimuija kabidi ne: ‘Palua kudibandisha, bundu bulualua kabidi; kadi meji adi kudi bantu bapuekele.’ (Nsumuinu 11:2) Kushila Nzambi bujitu bua kutusombuela kudi badi batuenzele bibi kudi kuleja mutudi tudipuekesha.

19. Ntshinyi tshituamona mu tshiena-bualu tshidi tshilonda?

¹⁹ Paulo udi umvuija mu tshikoso mushindu utudi ne bua kuenzela bakuabu malu. Udi usengelela bena Kristo ne: “Kuitabuji bua malu mabi akupite bukole, kadi wenze malu mimpe bua kupita malu mabi bukole.” (Lomo 12:21, MML) Mmakole kayi a malu mabi atudi tuluangana nawu lelu eu? Mmunyi mutudi mua kuatshimuna? Netupete mandamuna a nkonko eyi ne a mikuabu mu tshiena-bualu tshidi tshilonda.

Udi mua kumvuija anyi?

• Mmubelu kayi udibu bambulule njila ne njila mu Lomo nshapita 12?

• Ntshinyi tshiatusaka bua kubenga kupingaja bubi ku bubi?

• Mmasanka kayi atuapeta tuetu ne bantu bakuabu bituikala katuyi ‘tualukija bubi ku bubi’?

[Nkonko ya dilonga]

[Kazubu mu dibeji 22]

Lomo nshapita 12 udi wakula bua malanda a muena Kristo ne:

• Yehowa

• bena Kristo nende

• bantu badi kabayi bena Kristo

[Tshimfuanyi mu dibeji 23]

Mukanda wa Paulo mutumina bena Lomo udi upesha bena Kristo mibelu milenga

[Tshimfuanyi mu dibeji 25]

Tshilejilu tshia muyidi Stefano tshidi mua kutulongesha tshinyi?