Malongesha a mushinga bua bana

GLADYS udi wenza mudimu mu tulasa tua mu Mendoza mu ditunga dia Argentine. Dimue dituku uvua upitshila pabuipi ne kalasa kampanda e kumonaye mulongeshi mukuabu wa mu kalasa kinayi ubadila balongi bende mukanda wa Miyuki ya mu Mukanda wa Nzambi. * Gladys wakadimanyisha kudi mulongeshi au mudiye Ntemu wa Yehowa ne kumulombaye bua amuleje malu mimpe adi mu mukanda au. Mulongeshi wakakema bikole bua malu avua Gladys mumumvuije ne yeye kujinga bua kubueja mukanda eu mu malu a kulongesha mu kalasa. Kadi uvua ne bua kulomba dianyisha kudi bamfumu ba tulasa. Biakamusandisha pakamuanyishilabu dilomba diende.

Pashishe, pakakumbana dituku dia kubala mukanda, mulongeshi wakalomba balongi bende bua kubala nshapita kampanda wa mu mukanda eu kumpala balongi nabu. Bua buimpe bua programe eu, bakabikila mulongeshi eu ku tshisanji tshia televizion bua kumuelabu nkonko. Pakakulabu bua ngikadilu ya balongi bende, kamona-kamba wakamuebeja ne: “Ntshinyi tshiudi wenza bua balongi bebe kuikalabu ne ngikadilu muimpe?” Mulongeshi wakamuandamuna ne: uvua ubalongesha ne mukanda wa Miyuki ya mu Mukanda wa Nzambi. Wakumvuija ne: nansha muvuaye kayi ulongesha malu a tshitendelelu mu kalasa kende, mukanda au uvua umuambuluisha bua kulongesha bana malu a mushinga bu mudi kanemu, lutulu, buobumue, diumvuangana, ditumikila ne dinanga. Bantu bonso bakitaba bamba ne: malu aa avua malongesha a mushinga mukole bua bana.

Udiku musue pebe kulongesha bana bebe malu a mushinga aa anyi? Udi mua kulomba Ntemu wa Yehowa kampanda mukanda eu mulenga wa Miyuki ya mu Mukanda wa Nzambi.

[Mêyi adi kuinshi]