‘Mumanyi udi mujalame wa mu diulu’

KUKADI bidimu bia bungi bidi bedi ba tusala ne bafundi ba misambu batumbishe ngondo bu tshintu tshilengele. Tshilejilu, musambu mufundisha ku nyuma wa Nzambi udi wakula bua mukaji “udi ne bulengele bu ngondo.” (Musambu wa Solomo 6:10) Muimbi wa misambu udi ubikila ngondo mu kasala kakuabu ne: “mumanyi wa mu diulu udi mujalame.” (Musambu 89:37) Mêyi aa adi umvuija tshinyi bua ngondo?

Ngondo katu upangila bua kuenza misangu yonso matuku 27,3 adiye unyunguluka ku buloba nansha. Nunku, lulamatu anyi bujalame bua ngondo budi mua kuikala bumvuija dibenga kushintuluka diende. Kadi muimbi wa Misambu uvua mua kuikala mutume meji ku diumvuija dikuabu dia mushinga mukole. Wakabikila ngondo ne: “mumanyi mujalame” mu musambu uvua ne mêyi a buprofete a Bukalenge buvua Yezu muambile bayidi bende bua kulomba mu disambila.​—Matayo 6:9, 10.

Kukadi bidimu bipite pa 3 000, Yehowa Nzambi wakadia tshipungidi tshia Bukalenge ne Mukalenge Davidi wa mu Isalele wa kale. (2 Samuele 7:12-16) Tshipatshila tshia tshipungidi atshi tshivua tshia kupesha Yezu Kristo bukenji bua kusomba mu nkuasa wa bumfumu kashidi bu mupianyi wa Davidi. (Yeshaya 9:7; Luka 1:32, 33) Muimbi wa Misambu wakamba bua nkuasa wa bumfumu wa ‘kankanunuina’ ka Davidi ne: “Neajadikibue tshiendelele bu mudi bikondo bia ngondo bijadikibue, mumanyi wa mu diulu udi mujalame.”​—Musambu 89:36, 37.

Ngondo udi muikale ‘muinda udi ukokesha butuku’ ne udi utuvuluija bimpe bitambe mudi bukokeshi bua Kristo buikalaku kashidi. (Genese 1:16) Danyele 7:14 udi wamba bua Bukalenge ebu ne: ‘Bukokeshi buende budi bukokeshi bua tshiendelele, budi kabuyi mua kujimina, bukalenge buende mbukalenge budi kabuyi mua kubutudibua.’ Ngondo udi mumanyishi udi utuvuluija Bukalenge abu ne mabenesha atuadilabu bantu.

[Mêyi a dianyisha bua tshimfuanyi mu dibeji 32]

Ngondo: foto wa NASA