Tuindile dituku dia Yehowa ne dinanukila

‘Ku ditabuja dienu nutentakaje [dinanukila].’​—2 PETELO 1:5, 6.

1, 2. Dinanukila ntshinyi? Bua tshinyi bena Kristo badi ne bua kuikala nadi?

DITUKU dinene dia Yehowa didi pabuipi menemene. (Yoele 1:15; Sefanya 1:14) Tuetu bena Kristo badi badisuike bua kushala balamate anu Nzambi, tudi bindile ne muoyo mujima dituku edi dikala bumfumu bua Yehowa mua kubingishibua. Mu dindila dituku adi, badi batukina, batupenda, batukengesha ne batushipa bua ditabuja dietu. (Matayo 5:10-12; 10:22; Buakabuluibua 2:10) Nunku tudi ne bua kunanukila, mmumue ne: kuimana tendee kumpala kua makenga. Mupostolo Petelo udi utuambila ne: ‘Ku ditabuja dienu nutentakaje [dinanukila].’ (2 Petelo 1:5, 6) Tudi ne bua kunanukila bualu Yezu wakamba ne: ‘Wananukila too ne ku nshikidilu neasungidibue.’​—Matayo 24:13.

² Tudi kabidi mua kusama, kufuisha anyi kupeta makenga makuabu. Satana neasanke bikole patudi tulekela ditabuja dietu. (Luka 22:31, 32) Ku diambuluisha dia Yehowa, tudi mua kunanukila mu makenga a mishindu yonso. (1 Petelo 5:6-11) Tumonayi bimue bilejilu bia mu matuku etu aa bidi bileja ne: tudi anu mua kuindila dituku dia Yehowa ne ditantamena eku bikale anu ne ditabuja dikole.

Masama kaakabimanyika

3, 4. Fila tshilejilu tshidi tshileja ne: tudi mua kuenzela Yehowa mudimu ne lulamatu nansha tuetu tusama.

³ Nzambi kêna utondopa mu tshishima to, kadi utu utupesha bukole bua kutantamena nabu masama. (Musambu 41:1-3) Tshilejilu, Sharon udi wamba ne: “Katshia anu ku buana buanyi, nkuasa wa balema ke uvua wanyi mulunda. Disama dia buongo ditu dienza bantu tuneke diakantshibuila panshi anu pakandelabu ne kumpangisha bua kunaya manaya avua bana nanyi banaya.” Kadi Sharon wakapeta ditekemena pakamanyaye Yehowa ne dilaya diende dia ne: newondope bantu bonso. Nansha mudiye ne lutatu lua kuakula ne kuenda, udi uyisha ne disanka dionso. Kukadi bidimu bitue ku 15 mpindieu, wakamba ne: “Pamuapa disama dianyi neditungunuke anu ne kukola, kadi dieyemena dindi nadi kudi Nzambi ne malanda andi mudie nende, ke wanyi ngabu. Ndi ne disanka dia bungi bua mundi munkatshi mua bantu ba Yehowa badi bangambuluisha misangu yonso!”

⁴ Mupostolo Paulo wakambila bena Kristo ba mu Tesalonike bua ‘kukolesha badi ne mitshima yamba kupanga.’ (1 Tesalonike 5:14) Malu adi atekesha mu mikolo adi mua kufikisha muntu ku disama dia mutu. Mu 1993, Sharon  wakamba ne: “Ngakadiumvua anu bu tshintu tshianana, meme . . . kusama disama dia mutu didi dipangisha muntu bua kuikala ne disanka munkatshi mua bidimu bisatu bijima. . . . Bakulu bakankolesha ku muoyo ne kumpesha mibelu. . . . Ku diambuluisha dia Tshibumba tshia Nsentedi, Yehowa wakangambuluisha bua kumanya tshivua lutatu lumvua nalu. Eyowa, Yehowa udi ulama bantu bende ne umvua makenga abu.” (1 Petelo 5:6, 7) Sharon mmuindile dituku dinene dia Yehowa eku muikale umuenzela mudimu ne lulamatu luonso.

5. Mbualu kayi budi buleja ne: bena Kristo badi mua kunanukila lutatu lua mu lungenyi?

⁵ Bamue bena Kristo mbakenge bikole bua nsombelu uvuabu nende kale. Harley uvua muluangane Mvita mibidi ya buloba bujima ne mumone lufu lua bantu miandanda; kushalaye ulotakana malu adi enza buôwa a mvita ayi. Pavuaye ku tulu, uvua wela mbila ne: “Wamanya!” Pavuaye utabuluka, uvua ne tshisululu mbidi mujima. Kadi wakenza muende muonso bua kutumikila mikenji ya mu Bible mu nsombelu wende, ne panyima pa matuku bilotalota biende bia buôwa kukepelabi.

6. Mmunyi muvua muanetu mukuabu mutantamene disama diende dia mpala?

⁶ Muanetu mukuabu wa balume uvua ne disama dia mpala uvua ne lutatu lukole lua kuyisha ku nzubu ne ku nzubu. Kadi wakatungunuka anu ne kuyisha bualu uvua mumanye ne: padiye uyisha, udi udisungila yeye muine ne bakuabu badi bamuteleja. (1 Timote 4:16) Imue misangu uvua upanga too ne mua kukokola ku tshiibi tshia ku lupangu bua kubikila benamu, kadi wakamba ne: “Kadi nansha bishi, mvua anu ngenza muanyi muonso bua kutukija lungenyi luanyi, nya ku tshiibi tshikuabu ne nteta kabidi bua kukokola. Kutungunuka ne kuyisha nkungambuluishe bua kulama ditabuja dikole.” Muanetu eu uvua kabidi ne lutatu lua kubuela mu bisangilu kadi uvua mumanye ne: kudisangisha kudi ne mushinga wa bungi. Nunku uvua udienzeja bua kuikala mu bisangilu.​—Ebelu 10:24, 25.

7. Nansha mudi bamue bumvua buôwa bua kuakula kumpala kua bantu anyi kubuela mu bisangilu, mmunyi mudibu bananukile?

⁷ Bamue bena Kristo batu bumvua buôwa bua bungi padibu bamona bintu kampanda anyi bualu kansanga. Tshilejilu, badi batshina bua kuakula kumpala kua bantu ba bungi anyi bua kubuela mu bisangilu. Ela meji mudibi mua kubakolela bua kuandamuna mu bisangilu anyi kuenza mudimu mu Kalasa ka Mudimu wa Nzambi. Kadi badi batungunuka ne kuenza malu aa ne bidi bituenza disanka patudi tubamone mu bisangilu ne tubumvua bandamuna.

8. Mbualu kayi bua mushinga budi muntu udi ne disama kampanda dia mu butu ne bua kuenza?

⁸ Mbimpe muntu udi ne buôwa anyi ne disama dia mutu kuikishaye bimpe ne kulala bikole. Udi kabidi mua kuya kumonangana ne baminganga. Kadi udi nangananga ne bua kueyemena Nzambi ne kumusambila bikole. Musambu wa 55:22 udi wamba ne: ‘Teka bujitu buebe pambidi pa Yehowa, ne yeye neakukoleshe; kêna witabuja tshiendelele bua bantu bakane banyungishibue.’ Nunku mu mishindu yonso, “eyemena Yehowa ne mutshima webe wonso.”​—Nsumuinu 3:5, 6.

Tunanukile patudi mu tshinyongopelu

9-11. (a) Ntshinyi tshidi mua kutuambuluisha bua kushala anu bakole mu ditabuja patudi tufuisha? (b) Mmunyi mudi tshilejilu tshia Anna mua kutuambuluisha bua kunanukila patudi mu tshinyongopelu?

⁹ Patu bena mu dîku bafuisha mulela wabu, batu bashala ne kanyinganyinga ka bungi. Abalahama wakadila bikole pakafua mukajende munanga Sala. (Genese 23:2) Nansha Yezu uvua muntu mupuangane, “wakashikunka” ne kudila pakafua mulunda wende Lazalo. (Yone 11:35) Nunku ki mbibi bua muntu kunyingalalaye ne kubungama padiye ufuisha munanga wende to. Kadi bena Kristo mbamanye ne: bafue nebabike. (Bienzedi 24:15) Ke bualu kayi kabena ‘banyingalala bu mudi bakuabu badi kabayi ne ditekemena benza.’​—1 Tesalonike 4:13.

¹⁰ Mmunyi mutudi mua kunanukila mu tshinyongopelu? Bua kumvua bualu ebu bimpe, tuangatayi tshilejilu. Pa tshibidilu katutu tushala tunyingalala matuku a bungi padi mulunda wetu kampanda uya ku luendu to, bualu tudi bamanye ne: nealukile. Tuetu bikale ne mmuenenu wa muomumue bua bena Kristo ba lulamatu padibu bafua, kanyinganyinga ketu nekakepele bikole, bualu tudi bamanya ne: nebabishibue.​—Muambi 7:1.

 ¹¹ Kueyemena “Nzambi wa busambi buonso” ne muoyo mujima nekutuambuluishe kabidi bua kunanukila mu tshinyongopelu. (2 Kolinto 1:3, 4) Tshivua Anna, mukaji wa mu lufuila wa bidimu lukama bia kumpala muenze tshidi mua kutuambuluisha. Bayende wakafua patshivuabu anu ne bidimu 7 patupu mu dibaka. Kadi too ne pakakumbajaye bidimu 84, uvua anu wenzela Yehowa mudimu wa tshijila ku ntempelo. (Luka 2:36-38) Didifila diende ne muoyo mujima mu mudimu wa Nzambi edi diakamuambuluisha bua kubenga kunyingalala bikole ne kudiumvua nkaya. Kuenza midimu ya bena Kristo pa tshibidilu bu mudi kuyisha lumu luimpe kudi mua kutuambuluisha bua kutantamena ntatu itudi mua kupeta patudi tufuisha.

Mua kunanukila mu makenga a mishindu yonso

12. Bamue bena Kristo badi ne bua kunanukila lutatu kayi mu mêku abu?

¹² Bamue bena Kristo badi mua kupeta ntatu mu dîku diabu. Tshilejilu, mulume anyi mukaji yeye muende masandi, kutu kumueneka ntatu mibi be! Bua kanyinganyinga ne dibungama, muntu udi kayi ne bualu udi mua kushala katshiyi umona tulu ne kudila tshianana tshianana. Udi mua kupangila too ne bua kuenza tu midimu tukese anyi kunyanga bintu bualu kêna ne lungenyi kaba kamue to. Muena dibaka nende udi kayi ne bualu udi mua kupanga mua kudia, kunyana ne kusama nansha mpala. Bidi mua kumukolela ne bua kuenza midimu ya bena Kristo. Bualu ebu budi kabidi mua kukebela bana ntatu ya bungi.

13, 14. (a) Disambila diakenza Solomo pavuaye ubanjija ntempelo didi ditukankamija ku tshinyi? (b) Bua tshinyi tudi ne bua kulomba Nzambi nyuma muimpe?

¹³ Padi bualu bua mushindu eu butufikila, Yehowa udi utupesha diambuluisha didi dikengela. (Musambu 94:19) Disambila diakenza Mukalenge Solomo dituku dia dibanjija ntempelo didi dileja ne: Yehowa utu uteleja masambila a bantu bende. Solomo wakalomba Nzambi ne: ‘Biakutendelela anyi biakutendekena muntu umue anyi bena Isalele bonso, biamanya muntu yonso dikenga dia mutshima wende, ne biololaye bianza biende ku nzubu eu; ubumvuile mu diulu muudi ushikama, ubabuikidile mibi yabu, ubenzele bu muudi mumanye malu adi mu mitshima yabu (bualu bua anu wewe nkayebe ngudi mumanye mitshima ya bantu bonso); bua bobu bakutshine matuku onso adibu bashikame mu buloba buwakapa bankambua babu.’​—1 Bakelenge 8:38-40.

 ¹⁴ Mbimpe kutungunuka ne kulomba Nzambi nyuma wende. (Matayo 7:7-11) Ku mamuma a nyuma eu kudi disanka ne ditalala. (Galatia 5:22, 23) Padi Tatu wetu wa mu diulu wandamuna ku masambila etu, disanka didi dipingana pa muaba wa kanyinganyinga ne ditalala didi dipingana pa muaba wa buôwa.

15. Mvese kayi idi mua kutuambuluisha bua kutuyisha bukole bua ntatu yetu?

¹⁵ Tumanye ne: patudi mu ntatu mikole, netupete tunyinganyinga. Kadi tudi mua kutuyisha bukole bua tumue tua ku tunyinganyinga etu tuetu bavuluke mêyi a Yezu aa: ‘Kanutambi kuelangana meji bua muoyo wenu ne: Netudie tshinyi? Netunue tshinyi? Kanutambi kuelangana meji bua mibidi yenu ne: Netuluate tshinyi? Kadi diambedi kebayi bukalenge bua [Nzambi] ne buakane buende , nunku nebanupe bintu ebi bionso.’ (Matayo 6:25, 33, 34) Mupostolo Petelo udi utulomba bua ‘tuteke ntatu yetu yonso kudi [Nzambi], bualu bua yeye udi utulubulula.’ (1 Petelo 5:6, 7) Ki mbibi bua kudienzeja bua kujikija lutatu lutudi nalu to. Kadi panyima pa tuetu bamane kuenza tshitudi mua kuenza, buôwa kabuangatshi muaba wa disambila nansha. Mufundi wa Misambu wakamba ne: ‘Uteke njila webe mu bianza bia Yehowa; umueyemene yeye kabidi, ne yeye neenze malu ende.’​—Musambu 37:5.

16, 17. (a) Bua tshinyi tudiku anu mua kupeta ntatu? (b) Tuetu batumikile tshidibu bambe mu Filipoi 4:6, 7, netupete tshinyi?

¹⁶ Paulo wakafunda ne: ‘Lekelayi kuditatshisha ku bualu bumue; kadi mu malu onso ku ditendelela ne ku disengelela numanyishe Nzambi bua milombu yenu ne disakidila. Ne ditalala dia Nzambi didi ditamba dijingulula dionso dia bantu, nedilame mitshima yenu ne meji enu mu Kristo Yezu.’ (Filipoi 4:6, 7) Bana ba Adama bonso badi anu ne bua kusamisha mitu yabu bua ntatu bualu mbapange bupuangane. (Lomo 5:12) Tshilejilu, bakaji ba bena Hiti bavua Esau musele ‘bakanyingalaja mutshima’ wa baledi bende Isaka ne Lebeka. (Genese 26:34, 35) Masama avua kabidi mua kuikala makebele bena Kristo bu Timote ne Tofimo ntatu. (1 Timote 5:23; 2 Timote 4:20) Paulo uvua pende mupete ntatu bua bena Kristo nende. (2 Kolinto 11:28) Kadi Nzambi udi ‘umvua milombu’ udi pabuipi ne bantu badi bamunange misangu yonso.​—Musambu 65:2.

¹⁷ Mu dindila dituku dia Yehowa udi utuambuluisha ne utusamba bualu yeye udi “Nzambi wa ditalala.” (Filipoi 4:9) Yehowa udi ne “luse ne dinanga,” udi “muimpe ne musue kubuikidila bantu mibi” ne ‘udi uvuluka ne: tudi dimfuekenya.’ (Ekesode 34:6; Musambu 86:5; 103:13, 14) Nunku, ‘tumanyisha milombu kudiye,’ nunku netupete “ditalala dia Nzambi” didi ditupite tshipidi.

18. Bilondeshile tshidi Yobo 42:5 wamba, mmunyi mutudi mua ‘kumona’ Nzambi?

¹⁸ Padi Nzambi wandamuna ku masambila etu, tudi tumanya ne: udi netu. Panyima pa Yobo mumane kunanukila mu makenga ende onso wakamba ne: ‘Ngakumvua lumu luebe [Yehowa] diambedi anu ku matshi, kadi mpindieu mêsu anyi akukumona.’ (Yobo 42:5) Ku diambuluisha dia mêsu a mu lungenyi, a ditabuja ne a dianyisha, tudi mua kufika ku ‘dimona’ Nzambi bimpe menemene patudi tuela meji ku bienzedi biende. Patudi tudiumvua pabuipi nende mushindu eu, tudi tupeta ditalala mu muoyo ne mu lungenyi.

19. Tshinyi tshidi tshituenzekela patudi ‘tuteka ntatu yetu yonso kudi Yehowa’?

¹⁹ Tuetu ‘tuteka ntatu yetu yonso kudi Yehowa,’ netutantamene ntatu ne ditalala didi dilama muoyo wetu ne bieledi bietu bia lungenyi. Padi ditalala edi dibuela mu muoyo wetu wa mu tshimfuanyi bikole menemene, netudiumvue basulakane, katuyi ne buôwa ne dibungama. Lungenyi luetu neluikale lutukije, katuakutamba kusamisha mutu to.

20, 21. (a) Tshivua tshienzekele Stefano tshidi tshitujadikila tshinyi bua ditalala padibu batukengesha? (b) Tela tshilejilu tshia matuku etu aa tshia muntu uvua mutukije pavuaye mu makenga.

²⁰ Muyidi Stefano uvua mutukije pakatetabu ditabuja diende. Kumpala kua yeye kuyisha bantu bua musangu wa ndekelu, bena ku tshilumbuluilu ‘bakamona mpala wende mukudimuke bu wa muanjelu.’ (Bienzedi 6:15) Kavua ulubakana to, uvua mutukije anu bu muanjelu wa Nzambi. Stefano mumane kubaleja muvuabu bapile bua muvuabu bashipe Yezu, balumbuluishi ‘bakakuatshika tshiji tshikole ne bakatuadija kumudiangena ku menu. Kadi yeye muule tente ne nyuma muimpe, wakatangila mulu talalaa, wakamona butumbi bua Nzambi ne Yezu muimane  ku tshianza tshia balume tshia Nzambi.’ Bualu buakamona Stefano ebu buakamukolesha, kushalaye ne lulamatu too ne ku lufu. (Bienzedi 7:52-60) Nansha mutudi katuyi mua kupeta bikena kumona, tudi mua kupeta ditalala dia kudi Nzambi padibu batukengesha.

²¹ Tumonayi muvua bamue bena Kristo bavuabu bakengeshe too ne ku lufu kudi bena Nazi mu tshikondo tshia Mvita mibidi ya buloba bujima badiumvue. Umue wa kudibu udi ulonda bualu buende pavuabu bamulumbuluisha wamba ne: “Bakamfundila tshibawu tshia lufu. Meme kumvua, pashishe meme kuamba ne: ‘Ikala ne lulamatu too ne ku lufu’ ne amue mêyi a Mukalenge wetu, kuakajika. . . . Kuedi kabidi meji ku tshibawu atshi to. Bualu mvua ne ditalala, mvua mutukije mu mushindu unudi kanuyi mua kuela meji to!” Muena Kristo mukuabu utshivua nsonga uvuabu bakosele tshibawu tshia kukosa mutu bua kumushipa wakafundila baledi bende ne: “Tukadi dîba mundankulu ne tusunsa pamutu. Ndi ne dîba dia bungi dindi mua kushintulula mmuenenu wanyi. Kah! Nengumvue kabidi disanka pa buloba apa panyima pa meme mumane kuvila Mukalenge wetu anyi? Nansha kakese! Kadi manyayi mpindieu ne: ndi ngumbuka pa buloba apa mu disanka ne ditalala.” Bushuwa, Yehowa udi ukuatshisha basadidi bende ba lulamatu.

Udi mua kunanukila

22, 23. Ntshinyi tshitudi ne bua kuikala bajadike patudi bindile ne ditantamena dituku dia Yehowa?

²² Pamuapa kuena ne ntatu itudi batele eyi to. Kadi Yobo, muntu uvua utshina Yehowa wakamba ne: ‘Muntu udi muledibue kudi mukaji udi ne matuku makese a muoyo wende ne udi muule tente ne ntatu.’ (Yobo 14:1) Imue misangu udi wenza muebe muonso bua kukolesha bana bebe bilondeshile mibelu ya mu Mukanda wa Nzambi. Badi mua kupita ntatu idibu bapeta mu tulasa bukole, kadi newikale ne disanka dia bungi padibu bashale balamate Yehowa ne mikenji yende. Pamuapa udi ne ntatu ne matetshibua ku mudimu. Kadi udi mua kutantamena malu aa ne makuabu bualu Yehowa ‘udi ututuadila bujitu buetu ku dituku ku dituku.’​—Musambu 68:19.

²³ Udi mua kudimona bu muntu tshianana, kadi umanye ne: Yehowa kakupua mudimu webe ne dinanga diudi muleje bua dîna diende dia tshijila muoyo to. (Ebelu 6:10) Diambuluisha edi didi ditukolesha bua kutantamena mateta a ditabuja dietu. Nunku tutungunukayi ne kuenza disua dia Nzambi mu masambila etu ne bienzedi bietu. Tuetu benza nunku, Yehowa neatuambuluishe ne kutubenesha patudi bindile dituku diende ne dinanukila.

Mmunyi muwandamuna?

• Bua tshinyi bena Kristo badi ne bua kunanukila?

• Ntshinyi tshidi mua kutuambuluisha bua kunanukila mu masama ne mu tshinyongopelu?

• Mmunyi mudi disambila dituambuluisha bua kunanukila mu makenga?

• Bua tshinyi kudi mushindu wa kuindila dituku dia Yehowa ne dinanukila?

[Nkonko ya dilonga]

[Tshimfuanyi mu dibeji 29]

Kueyemena Yehowa kudi kutuambuluisha bua kunanukila mu tshinyongopelu

[Tshimfuanyi mu dibeji 31]

Kusambila ne muoyo mujima kudi kutuambuluisha bua kunanukila mu mateta a ditabuja dietu