Badi benda bakeba malu a mu nyuma

MU MUYUKI wa Yezu wa pa mukuna wakamba ne: ‘Ba diakalenga mbadi bamanye majinga abu a mu nyuma.’ (Matayo 5:3, NW) Pamuapa udi witaba mêyi aa. Bantu ba miaba yonso batu bumvua dijinga dia malu a mu nyuma mu nsombelu wabu ne batu bela meji ne: padibu baapeta adi abapetesha disanka. Kadi tshiambilu etshi ‘malu a mu nyuma’ tshidi tshiumvuija tshinyi?

Nkonga miaku mukuabu udi umvuija tshiambilu etshi bu “didifila ku malu a ntendelelu” ne bu “mushindu udi muntu udi mulamate ku malu a mu nyuma.” Ke bualu kayi bantu ba bungi batu bangata biambilu bu mudi “malu a mu nyuma,” “kunanga malu a mu nyuma,” anyi “kulamata ku malu a mu nyuma” bu bidi biumvuija tshintu tshimue. Bua kumvuija tshiambilu etshi bimpe menemene, tuangate tshilejilu etshi: padibu bamba ne: muntu kampanda mmunange anyi mmudifile bikole mu malu a mishinga, mmumue ne: udi ngenda-mushinga wa dikema. Bia muomumue, muntu udi mudifile ku malu a mu nyuma anyi a ntendelelu mmuntu udi munange malu au.

Kadi mushindu kayi udi muntu mua kufika ku dinanga malu a mu nyuma a bushuwa? Tshilejilu bitendelelu bia bungi bidi ne wabi mushindu wa kufikisha benamu ku dinanga malu a mu nyuma anyi malu a Nzambi. Bu mudi muena Mishonyi udi mua kumona dibuela mu masangisha bu mushindu wa kufika ku dinanga malu a mu nyuma. Muena Katolike yeye udi mua kufika ku dinanga malu aa padiye udia bulunda ne Nzambi mu misa. Muena Bouddha udi ukeba butoke anyi dimanya dijalame mu dinana lungenyi bikole. Bu mudi Muena Hindu witaba mudi muntu ukaledibua muaba mukuabu anyi mu tshintu tshikuabu padiye ufua, nanku udi ukeba kumbuka mu mulongo wa diledibua edi pa kuikala ne nsombelu wa didipangisha masanka. Mishindu yonso eyi idiku ifikisha ku dipeta malu a mu nyuma a bushuwa anyi? Kakuenaku nansha umue udi mukumbane anyi?

Bua bantu ba bungi diandamuna dia nkonko eyi didi ne: tòo. Buabu bobu, kukeba malu a mu nyuma kudi kumvuija “kuitaba tshintu, kadi kuyi ubuela mu tshintu atshi to,” mumue ne: kuitabuja nzambi kampanda kadi kuyi ulua muena nzambi au to. Bakuabu badi bela meji ne: kukeba malu a mu nyuma kakuena kutangila kumanya tshitendelelu kampanda, kadi kudi kutangila dijinga dia kuikala ne ditalala dia mu mutshima ne kuikala ne tshipatshila mu nsombelu. Badi bamba ne: bantu badi bakeba malu a mu nyuma kabena dijinga ne tshitendelelu kampanda to. Kadi badi baakeba munda muabu buobu nkayabu. Mufundi mukuabu udi wamba ne: “Malu malelela a mu nyuma ntshintu tshidi munda mua muntu nkayende. Mmushindu uudi munange buloba ne malanda audi nawu ne bantu. Kuena mua kutshipeta mu tshitendelelu kampanda anyi mu ditaba malongesha a ntendelelu kansanga.”

Bushuwa, bantu badi ne mmuenenu mishilangane bikole mu tshilumbu tshia malu a mu nyuma. Mikanda binunu ne binunu idi yamba mudiyi ileja njila wa kupetela malu a mu nyuma, kadi bantu bonso badi babala mikanda eyi badi badiumvua kabayi ne disanka ne bikale mu tshibuejakaji. Kadi kudi mukanda umue udi ne buludiki butudi mua kueyemena mu malu a mu nyuma. Mmukanda udi ne bijadiki bidi bileja ne: mmufundisha ku nyuma wa Nzambi. (2 Timote 3:16) Mukanda eu m’Bible. Nanku tukonkononayi tshidiye wamba bua diumvuija dia malu a mu nyuma ne mushinga wende.

 [Mêyi a dianyisha bua tshimfuanyi mu dibeji 2]

COVER: Background: © Mark Hamblin/​age fotostock