Nkonko ya babadi
Nkonko ya babadi
Bua tshianyi kunyima kua Davidi mumane kushipa Goleyata, Mukalenge Shaula wakamukonka ne: “Wewe nsongalume, udi muana wa nganyi?” nansha mukavuaye mubikidishe Davidi bua kuikalaye musadidi wende?—1 Samuele 16:22; 17:58.
Diandamuna dipepele didi mua kuikala ne: Shaula uvua mupue Davidi muoyo bualu musangu wa kumpala uvuabu bapetangane bivua mu lupitapita. Kadi kabiena nanku to, bualu muyuki udi mu 1 Samuele 16:18-23 udi uleja ne: Mukalenge Shaula uvua mubikidishe Davidi nkayende ne yeye kufika ku dimunanga bikole ne kumutekaye mumuambuidi wa bia mvita. Shaula uvua ne bua kuikala mumanye Davidi bimpe menemene.
Bamue bashikuluji ba malu a mu Bible badi bangata 1 Samuele 17:12-31 ne 17:55–18:5 bu mvese misakidila panyima bualu kayena mu imue Bible ya Septante wa mu tshiena Gelika, nkudimuinu wa Mifundu ya tshiena Ebelu wakajikijabu mu siekele muibidi kumpala kua diledibua dia Yezu. Kadi ki mbimpe kuimanyina anu pa Bible ya Septante nkayayi to, bualu mvese eyi idi mu maniskri makuabu mamanyike a Mifundu ya tshiena Ebelu. *
Bidi bimueneka ne: pavua Shaula muanji kuela Abinê lukonko elu ne pashishe kuluelaye Davidi nkayende, kavua ukeba kumanya patupu dîna dia tatuende wa Davidi to. Shaula uvua mufike ku dijingulula bimpe ne: Davidi uvua muntu wa ditabuja dikole ne dikima dia bungi uvua ufuma ku ditshimuna Goleyata, nunku uvua musue kumanya tatu uvua mukoleshe muana wa mushindu eu. Shaula uvua mua kuikala musue kubueja Yishai tatuende wa Davidi anyi bamue bena mu dîku diabu mu tshiluilu tshia mvita bualu uvua wela meji ne: bobu pabu badi mua kuikala ne dikima ne bukole bu bia Davidi.
Nansha mudi mu 1 Samuele 17:58 muikale anu diandamuna dia tshikoso dia Davidi dia ne: ‘ndi muana wa muntu webe Yishai, muena Beteleheme,’ malu adi alonda adi aleja ne: bavua mua kuikala bayukile malu makuabu a bungi. Bua bualu ebu, tangila tshiakamba Carl Keil ne Franz Delitzsch: “Mêyi adi mu [1 Samuele 18:1] adi aleja patoke ne: ‘pavuaye mujikije kuyukila ne Shaula,’ ne: Shaula wakayukila nende too ne bua malu a dîku diabu, bualu mêyi au adi aleja ne: bavua bayukile mutantshi mule.”
Bionso ebi bidi bitufikisha ku diamba ne: pavua Shaula muebeje ne: “Wewe nsongalume, udi muana wa nganyi?” uvua ukeba kumanya, ki ndîna dia Davidi anyi dia tatuende, dikavuaye mumanye, kadi dîku divuaye mufumine ne nkoleshilu uvuaye mupete.
[Mêyi adi kuinshi]
^ tshik. 4 Bua bujalame bua mvese idibu bapue muoyo mu Bible wa Septante, bala Étude perspicace des Écritures, Tshitupa 2, dibeji 885, mupatula kudi Bantemu ba Yehowa.
[Tshimfuanyi mu dibeji 31]
Bua tshinyi Shaula wakebeja Davidi ne: uvua muana wa nganyi?