Nzambi udi ukumona anyi?

YEYOWA, Mufuki Munene udiku ne bukole bua kumona anyi? Eyowa! Mukanda wa Nzambi udi wamba patoke ne: ‘Yeye wakafuka dîsu, kêna umona anyi?’ (Musambu 94:9) Lumonu lua Yehowa ndupite lua bantu kule ne kule. Kêna umona anu tshimuenekelu tshietu tshia pambelu, kadi udi kabidi ‘uteta mitshima.’ (Nsumuinu 17:3; 21:2) Bushuwa, Yehowa udi ne bukole bua kukonkonona meji etu, tshidi tshitusaka bua kuenza malu ne majinga etu.

Yehowa mmumanye ntatu itudi tupeta ne udi wandamuna ku milombu yetu. Muimbi wa misambu wakamba ne: ‘Mêsu a Yehowa adi kudi bakane, ne matshi ende adi buashi ku kudila kuabu. Yehowa udi pabuipi ne bantu badi ne mitshima itamba kunyingalala, udi usungila badi ne mitshima ya majiya.’ (Musambu 34:15, 18) Bidi bitukolesha ku muoyo bua kumanya ne: Yehowa mmumanye ntatu yetu ne udi ututeleja patudi tumulomba ne muoyo mujima.

Yehowa Nzambi mmumanye malu adi enzeka nansha mu mîdima mikole. Bulelela, ‘bintu bionso bidi butaka ne bibulula ku mêsu kua utudi nende ne bualu.’ (Ebelu 4:13) Nunku, Nzambi udi umona malu onso atudi tuenza, nansha wowu mimpe anyi mabi. (Nsumuinu 15:3) Tshilejilu, Genese 6:8, 9 udi wamba ne: ‘Noa wakasangana luse ku mêsu kua Yehowa’ ne “wakendakana ne Nzambi.” Bushuwa, Noa wakasankisha Yehowa ne wakapeta dibenesha bualu uvua umutumikila ne ulonda mikenji yende. (Genese 6:22) Kadi bantu ba mu tshikondo tshia Noa bobu bavua bena tshikisu ne benzavi. Nzambi uvua mumone bionso bivuabu benza. ‘Wakamona ne: Mibi ya bantu idi idiundadiunda munkatshi mua ba pa buloba ne meji adibu bela mu mitshima yabu adi mabi matuku onso.’ Ndekelu wa bionso Yehowa wakabutula bantu babi, kadi wakalama Noa ne bena mu dîku diende.​—Genese 6:5; 7:23.

Yehowa udiku ukuanyisha anyi? Bulelela, Mêsu a Yehowa ‘adi akenzakana ku nseke yonso ya buloba bua kuleja bukole buende kudi bantu badi ne mitshima miakane kudiye.’ (2 Kulondolola 16:9) Mu katupa kakese emu, neumbushe kabidi bantu babi bonso pa buloba ne neapandishe bantu badi ne mitshima mipuekele.​—Musambu 37:10, 11.