Buena-Kristo budi bubuela mu Asia Mukese

MU BIDIMU lukama bia kumpala, bisumbu bia bena Kristo biakavulangana mu Asia Mukese bu buowa. (Lelu tshitupa tshiende tshinene tshidi mu ditunga dia Turquie) Bena Yuda ne bantu ba bisamba bia bende ba bungi bakitaba bua kulua bena Kristo. Nkonga miaku mukuabu wa Bible udi wamba ne: “Pa kumusha mu tshitupa tshia Sulia ne tshia Palestine, mu Asia Mukese ke muvua bena Kristo ba kumpala batamba kutantshila bikole.”

Tudi mua kufika ku dimanya muvua lumu luimpe lutangalake mu tshitupa tshia buloba etshi tuetu balamakaje malu onso adibu batuambila. Mpindieu tudi mua kuanji kutangila malu atudi nawu mudiwu mua kutuambuluisha.

Bena Kristo ba kumpala mu Asia Mukese

Bualu bua kumpala buvua bufikishe Buena-Kristo mu Asia Mukese buvua buenzeke mu dituku dia Pentekoste wa tshidimu tshia 33, pavua bantu ba bungi ba miakulu mishilangane ne bena Yuda bavua ku ba bende ne bantu bavua bitabe buena Yuda balue ku masangisha mu Yelushalema. Bapostolo ba Yezu bakayisha benyi aba lumu luimpe. Bible udi uleja ne: bantu bavua bafume ku Kapadokia, ku Ponto, ku Asia, ku Fugia ne ku Pampulia, misoko ivua yenza tshitupa tshinene tshia Asia Mukese. * Bantu batue ku 3 000 bavua bateleja bakitabuja ne kutambushibua. Bakapingana ku mabu ne malu avuabu balonge.​—Bienzedi 2:5-11, 41.

Bualu buibidi butudi nabu dijinga budi mu muyiki wa mu Bible udi utulondela bua ngendu ya mupostolo Paulo mu Asia Mukese. Mu luendu luende lua kumpala, luvua luenzeke bu pankatshi pa tshidimu tshia 47 ne 48, uvua ne bena diende, wakumuka ku Kupulio mutangile ku Asia Mukese, kutudilabu mu Pêge wa mu Pampulia. Mu tshidila tshia Antiokia wa mu Pisidia, bantu ba bungi bavua bitabe lumu luimpe, kadi kujudishabi mukawu ne buluishi bua bena Yuda. Padi Paulo upueka kuinshi kua ditunga mutangile ku Ikonio, bena Yuda bakuabu bakajinga bua kuenzela ba misionere aba bibi. Pakamona bena mu musoko wa Luseta uvua pabuipi apu malu avua Paulo wenza, bakamba muvuaye muikale nzambi. Kadi padi bena Yuda bavua baluisha bena Kristo bafika bafumine ku Antiokia ne ku Ikonio, tshisumbu tshia bantu ba mu musoko au tshidi tshiasa Paulo mabue ne tshimushiya bu mufue! Panyima pa lutatu elu, Paulo ne Banaba  badi bangata disangu dia ku Dêbe uvua mu tshitupa tshia buloba bua Galatia tshilombola kudi bena Lomo muvuabu bakula muakulu wa Lukaonia. Bakasa bisumbu bia bungi ne kutekamu bakulu. Muaba eu udi mua kumona ne: bidimu bitue ku 15 panyima pa Pentekoste wa mu 33, Buena-Kristo bukavua bushindame bimpe mu Asia Mukese.​—Bienzedi 13:13–14:26.

Mu luendu luibidi lua Paulo, luvuaye muenze bu mu tshidimu tshia 49 too 52, yeye ne bena diende bakanji kuenda lua makasa too ne ku Luseta, bimueneka ne: bavua bapitshile mu musoko wa ba Paulo wa Tâso wa mu Kilikia. Pakajikijabu kutangila bana betu ba mu Luseta ne kuya batangile ku Nord, Paulo udi uteta bua ‘kuamba dîyi’ mu Bitunia ne mu Asia. Kadi nyuma muimpe udi ubakandika. Bitupa bia maloba ebi bivua ne bua kuyishibua pashishe. Kadi Nzambi udi ulombola Paulo bua kuya ku Est kua Asia Mukese, mutangile ku Toa uvua ku muelelu wa mâyi. Pashishe mu tshikena kumona, Paulo wakamona bamuleja bua kuyisha lumu luimpe ku Mputu.​—Bienzedi 16:1-12; 22:3.

Mu luendu luisatu lua Paulo, pamuapa mu tshidimu tshia 52 too ne tshia 56, wakapitshila kabidi mu Asia Mukese, kufika ku Efeso  (Tshimenga tshinene tshia ku mpenga kua mâyi) mu Asia. Ukavua mupitshile mu tshimenga etshi pavuaye walukila ku luendu luibidi. Mu tshimenga etshi muvua tshisumbu tshia bena Kristo bavua benza mudimu bikole, ke kuenzabu nabu mudimu eu munkashi bidimu bitue ku bisatu. Mu bidimu ebi, uvua mumone mabika ne mala, ne lumue lua ku ntatu ivuaye mupete luvua lua ne: bansenda ba mu Efeso bakajudisha tshimvundu tshikole bua mushinga wabu wa mpingu ya nzambi kutungunukawu bilenga.​—Bienzedi 18:19-26; 19:1, 8-41; 20:31.

Bidi bimueneka ne: mudimu wa bamisionere aba ukavua muela miji bikole mu Efeso. Bualu Bienzedi 19:10 udi wamba ne: ‘Bonso bakadi bashikama mu Asia bakumvua dîyi dia Mukalenge, bena Yuda ne bena Gelika.’

Diya kumpala mu Asia Mukese

Pabuipi ne Paulo kumbuka mu Efeso, wakafundila bena Kolinto ne: ‘Bena ekeleziya (anyi bisumbu) ba mu Asia badi banutumina muoyo.’ (1 Kolinto 16:19) Paulo uvua wakula bua bisumbu kayi? Pamuapa uvua mu meji ne bisumbu bia mu Kolosai, Laodikiya, ne Hielapoli. (Kolosai 4:12-16) Mukanda kampanda udi wamba ne: “Bidi bimueneka ne: bisumbu bivua biasa mu Semuna, Pêgamo, Sâdi ne Filadelefia bivua bituadija bua mudimu wa bumisionere uvua mutuadijile mu Efeso. . . . Bionso bivua munda mua tshipapu tshia kilometre 192 ne Efeso ne bilamakaja ne njila ivua mienza bilenga be.”​—Paul​—His Story.

Nanku, bidimu bitue ku 20 panyima pa Pentekoste wa 33, kukavua bisumbu bia bena Kristo ku Sud ne ku Est kua Asia Mukese. Netuambe bishi bua bitupa bikuabu bia buloba ebu?

Bavua Petelo mutumine mikanda

Mupostolo Petelo wakafunda mukanda wende wa kumpala pankatshi pa tshidimu tshia 62 ne tshia 64 bikondo bietu ebi. Uvua muutumine bena Kristo bavua mu Ponto, Galatia, Kapadokia, Asia ne Bitunia. Mukanda eu udi uleja ne: mu misoko eyi muvua bisumbu bia bena Kristo, bualu uvua ubela bakulu bavuamu bua ‘kulama tshisumbu tshia mikoko.’ Ndîba kayi divua bisumbu ebi bituadije?​—1 Petelo 1:1; 5:1-3.

Imue ya ku misoko idi Petelo utumina mukanda wende bu mudi Asia ne Galatia, nyivua Paulo  muyishe. Kadi kavua mufike ne lumu luimpe mu Kapadokia ne mu Bitunia to. Bible kena utuambila mushindu uvua Buena-Kristo bubuele miaba eyi to, kadi bidi bimueneka ne: buvua bubuele ku diambuluisha dia bena Yuda ne bantu bavua bitaba buena Yuda bavuapu dituku dia Pentekoste wa tshidimu tshia 33 ne bavua bapingana kuvuabu basombele. Mu mishindu yonso, bidimu bitue ku 30 panyima pa Pentekoste pavua Petelo mufunda mikanda yende, mulongi mukuabu wa Bible udi wamba ne: bidi bimueneka ne: bisumbu ‘bikavua bitangalake mu Asia Mukese muonso.’

Bisumbu muanda-mutekete bia mu Buakabuluibua

Ditombokela dia bena Lomo kudi bena Yuda diakabutuisha tshimenga tshia Yelushalema mu tshidimu tshia 70 bikondo bietu ebi. Bidi bimueneka ne: bamue bena Kristo bena Yuda bakavua bakasombele mu Asia Mukese. *

Pabuipi ne tshidimu tshia 100, Yezu Kristo wakafundisha mikanda kudi Yone ne kuyitumina bisumbu 7 bia mu Asia Mukese. Mikanda eyi mitumina bisumbu bia ku Efeso, Semuna, Pêgamo, Tuatila, Sâdi, Filadelefia ne ku Laodikiya idi ileja ne: Bena Kristo bavua mu tshitupa atshi tshia Asia Mukese bavua ne njiwu ya mu nyuma ya bungi. Tshilejilu, ya tshiendenda tshia masandi, tusumbusumbu ne ya butontolodi.​—Buakabuluibua 1:9, 11; 2:14, 15, 20.

Mudimu mukese kadi muenza ne muoyo mujima

Buena-Kristo buvua butangalake bikole mu bidimu lukama bia kumpala kupita ne mudi mukanda wa Bienzedi wamba. Bapostolo badibu batambe kutela mu malu avua menzeke mu Bienzedi badi anu Petelo ne Paulo, kadi kudi bakuabu ba bungi badi kabayi bamanyike bavua bayisha pabu miaba mikuabu. Mushindu uvua lumu luimpe lutangalake mu Asia Mukese udi uleja muvua bena Kristo ba kumpala batumikila ne muoyo mujima mukenji wa Yezu wa ne: ‘Ndayi bienu, nuvuije ba bisamba bionso bayidi.’​—Matayo 28:19, 20.

Lelu kabidi, Bantemu ba Yehowa ba lulamatu badi pa buloba bujima kadi anu malu a bakese ba kudibu ke adi mamanyike kutudi tuetu bonso. Anu bu muvuabi bua bamanyishi ba lulamatu ba bungi ba mu bidimu lukama bia kumpala bavua benza mudimu Asia Mukese, tshitupa tshinene tshia bambi ba lumu luimpe ba lelu kabena batamba kumanyika to. Nansha nanku, bobu pabu badi benza mudimu udi ubapesha disanka ne badi bumvua bimpe padibu bamanya ne: ditumikila diabu bua kuenza mudimu eu didi disungila mioyo ya bakuabu.​—1 Timote 2:3-6.

[Mêyi adi kuinshi]

[Kazubu mu dibeji 11]

BENA KRISTO BA KUMPALA MU BITUNIA NE MU PONTO

Buloba bua Bitunia ne bua Ponto adi ku muelelu wa Mbuu Mufike mu Asia Mukese. Nsombelu wamu udi mumanyike bikole ngavua umue wa ku bakokeshi ba muomu Pline le Jeune mufundile mukalenge wa bena Lomo Trajan.

Bidimu bu 50 panyima pa mikanda ya Petelo mimane kuendakana mu bisumbu bionso bia mu malaba aa, Pline udi ukonka Trajan tshivuaye mua kuenza ne bena Kristo. Pline wakafunda ne: “Ntshitu muanji kuikalapu patubu balumbuluisha bena Kristo. Nanku, tshiena mumanye manyoka atubu batamba kubafundila to. Badi balua ku tubadi ne bantu ba mishindu yonso, bidimu bishilashilangane, babanji ne bapele, balume ne bakaji, ne bidi bimueneka ne: nebatungunuke ne kulua nabu. Kabidi bine bantu abu kabena anu ba mu bimenga to, badi balue too ne ba ku misoko ya kule yikadibu babuele kudi ntendelelu eu mubi.”

[Diumvuija dia bidi mu tshimfuanyi/​Diumvuija dia karte mu dibeji 9]

(Bua kumona malu bimpe, tangila mu mukanda)

NGENDU YA PAULO

Luendu lua kumpala

KUPULIO

PAMPULIA

Pêgamo

Antiokia (mu Pisidia)

Ikonio

Luseta

Dêbe

Luendu luibidi

KILIKIA

Tuatila

Dêbe

LUKIA

Ikonio

Antiokia (mu Pisidia)

PÊGE

GALATIA

Toa

Luendu luisatu

KILIKIA

Tâso

Dêbe

Luseta

Ikonio

Antiokia (mu Pisidia)

Efeso

ASIA

Toa

[Bisumbu muanda mutekete]

Pêgamo

Tuatila

Sâdi

Semuna

Efeso

Filadelefia

Laodikiya

[Miaba mikuabu]

Hielapoli

Kolosai

LYCIA

BITUNIA

PONTO

KAPADOKIA

[Tshimfuanyi mu dibeji 9]

Antiokia

[Tshimfuanyi mu dibeji 9]

Toa

[Mêyi a dianyisha]

© 2003 BiblePlaces.com

[Tshimfuanyi mu dibeji 10]

Nzubu wa manaya.​—Bienzedi 19:29, MMM

[Tshimfuanyi mu dibeji 10]

Tshibumba tshia tshioshelu tshia Zewuse (anyi Yupita) mu Pêgamo. Bena Kristo ba mu tshimenga etshi bavua basombele muaba uvua “nkuasa wa Satana.”​—Buakabuluibua 2:13

[Mêyi a dianyisha]

Pictorial Archive (Near Eastern History) Est.