Udi muvuluke anyi?

Dibala dia nimero ya ndekelu ya Tshibumba tshia Nsentedi divua dikusankishe anyi? Nanku, anji tangila ni udi mua kuandamuna nkonko idi ilonda eyi:

• Mmu mishindu kayi inayi idi Mifundu ya mu tshiena Greke yakula bua muaku “tshisumbu”?

Mushindu wa kumpala ngua tshisumbu tshia bayidi ba Kristo bela manyi a nyuma bonso basanga (mu imue mvese badi basangishaku kabidi Kristo). Imue misangu, ‘ekeleziya wa Nzambi’ anyi tshisumbu udi umvuija bena Kristo badi ne muoyo mu tshikondo kampanda. Mushindu muisatu udi umvuija bena Kristo bonso badi basombele mu tshitupa kampanda tshia buloba. Muinayi, udi umvuija bena Kristo badi benza tshisumbu tshimue tshia muaba kampanda.​—15/4, dibeji dia 21-23.

• Ndîba kayi diajika disungula dia bena Kristo badi ne ditekemena dia kuya mu diulu?

Bible kêna ufila diandamuna disunguluke bua lukonko elu to. Bakatuadija kusungula bantu aba mu 33 bikondo bietu ebi ne batshidi batungunuka ne kubasungula too ne lelu. Panyima pa tshidimu tshia 1935 tshipatshila tshinene tshia mudimu wa kuvuija bantu bayidi tshiakalua tshia kusangisha bena mu musumba munene. Kabidi nyuma muimpe uvua mumanyishe bamue bena Kristo bavua batambule panyima pa 1935 ne: nebaye mu diulu, nunku katuena mua kuamba dîba menemene didi Nzambi ulekela kusungula bena Kristo bua kuya mu diulu. Bela manyi balelela kabena ne nyuma wa Nzambi wa bungi kupita mikoko mikuabu to, anyi bakeba bua bakuabu babenzela malu mu mushindu wa pa buawu to. Bena Kristo bonso nansha bobu bikale bela manyi anyi mikoko mikuabu badi ne bua kushala ne lulamatu ne kuenza disua dia Nzambi.​—1/5, dibeji dia 30-31.

• Pavua Yefeta muditshipe, uvuaku mulongolole bua kufila muanende wa bakaji bu mulambu wa kuosha kudi Nzambi anyi?

Tòo. Yefeta uvua musue kuamba ne: uvua ne bua kufila muntu yonso uvua ne bua kulua kumpala kuende mu mudimu wa Nzambi anu bu muvuabi bileja mu mikenji ya Mose. (1 Samuele 2:22) Bua kukumbaja mutshipu eu, muana mukaji wa Yefeta wakaya kuenza mudimu ku ntempelu. Bualu ebu buvua mulambu munene bualu uvua ne bua kushala mujike too ne ku lufu luende.​—15/5, dibeji dia 9-10.

• Mmudimu kayi uvua nawu kodekse kudi bena Kristo ba kumpala?

Bidi bimueneka ne: bena Kristo bakenza mudimu bikole ne mivungu too ne ku ndekelu kua bidimu lukama bia kumpala. Mu bidimu nkama ibidi biakalonda, kuvua bavua bafundila pa mivungu ne bakuabu bafunda mu kodekse. Bamanyi ba mianda badi bitaba ne: mudimu uvua bena Kristo benza ne kodekse wakambuluisha bikole bua bantu ba miaba yonso kumuanyishabu.​—1/6, dibeji dia 14-15.

• Kalandriye ka Gezê ntshinyi?

Ndibue dikese divuabu bangule mu 1908 mu tshimenga tshia Gezê. Bantu ba bungi badi bela meji ne: mêyi adi mafunde pa dibue edi mmudimu wa mulongi kampanda wa mu kalasa. Malu adi pa dibue edi adi aleja mu mêyi makese tshidimu tshijima tshia babidime tshivua tshituadija ne dinowa mu ngondo udi upetangana ne Kabitende ne Kasuamansense. Adi kabidi aleja bintu ne malu a bungi avua babidime benza.​—15/6, dibeji dia 8.

• Kuenzela nyuma muimpe bubi kudi kumvuija tshinyi?

Muntu udi mua kuenzela nyuma wa Yehowa bibi, bubi budibu kabayi mua kumufuila luse. (Matayo 12:31) Nzambi mmumanye patudi tuenza bubi budibu kabayi mua kutufuila luse ne udi utunyenga nyuma wende. (Musambu 51:11) Patudi tumvua bitutonda bikole bua bubi butudi benze, dîba adi bidi bileja ne: tudi banyingalale ne nunku katuena benzela nyuma muimpe bubi to.​—15/7, dibeji dia 16-17.

• Nansha mukavua mukalenge Shaula musombe ne Davidi kuonso eku, bua tshinyi wakamukonka bua kumanya ni uvua muana wa nganyi? (1 Samuele 16:22; 17:58)

Shaula kavua musue kumanya anu dîna dia tatuende wa Davidi to. Pakamonaye ne: Davidi mmuntu wa ditabuja dikole ne dikima uvua ufuma ku ditshimuna Goleyata, Shaula wakasua kumanya ne: tatu wa mushindu kayi uvua mukoleshe muana wa nunku. Shaula uvua mua kuikala musue kubueja Yishai anyi bena mu dîku diende bakuabu mu tshiluilu tshia basalayi.​—1/8, dibeji dia 31.