“Akafundibua bua kutuyisha”

“KAKUENA ndekelu wa kufunda kua mikanda ya bungi.” (Muambi 12:12) Bua bungi bua mikanda idibu bafunde lelu, mêyi aa mmakumbane mpindieu kupita pakaafundabu. Mpindieu, mmunyi mudi mubadi mua kusungula mikanda idi mikumbane bua kubalaye?

Padi bantu bajinga kubala mukanda kampanda udi mua kuikala mubasankishe, ba bungi batu basue kuanji kumanya udi muufunde. Bapatudi ba mikanda idi bakuabu bafunda batu batamba kufunda malu makese adi aleja mufundi wa mukanda bu mudi: kuabu, tulasa tudiye mulonge ne minga mikanda ikadiye mufunde kabidi. Kumanya udi mufunde mukanda kudi ne mushinga, mushinga eu udi umuenekela ku bualu buvua buenzeke kale menemene. Tshilejilu, pavua muntu mukaji ufunda mukanda munene wikala bantu ba bungi mu kubala, uvua ufunda dîna dia mafi dia muntu mulume bua babadi kabalu kuwangata ne mushinga mukese anu bualu mmufunda kudi mamu nansha.

Diakabi, anu bu mutukavua bambe mu tshiena-bualu tshishale, bamue bantu badi babenga bua kuanyisha Mifundu ya tshiena Ebelu bela meji ne: Nzambi udimu ngua tshikisu uvua ushipa baluishe bende kayi luse. * Bua mpindieu, tuanji kutangila tshidi Mifundu ya tshiena Ebelu ne ya tshiena Greke yamba bua muena Bible.

Muena Bible

Bilondeshile Mifundu ya tshiena Ebelu, Nzambi wakambila bena Isalele ne: “Meme Yehowa tshitu ngakudimuka.” (Malaki 3:6) Bidimu bu 500 pashishe, mufundi mukuabu wa Bible diende Yakobo wakafunda bua Nzambi ne: ‘Kudiye kakuena dikudimuka anyi mundidimbi wa tshintu tshidi tshinyunguluka.’ (Yakobo 1:17) Bu mudibi nunku, bua tshinyi bamue bantu batu bamona Nzambi wa mu Mifundu ya tshiena Ebelu bu mushilangane ne Nzambi wa mu Mifundu ya tshiena Greke?

Diandamuna didi ne: bualu kudi mishindu ya bungi idibu baleje bumuntu bua Nzambi mu bitupa bishilangane bia mu Bible. Tshilejilu, mu Genese nkayamu badi baleja mudi Nzambi muikale ne ‘kanyinganyinga mu mutshima wende,’ mudiye “mufuki wa diulu ne buloba” ne “Mulumbuluishi wa buloba buonso.” (Genese 6:6; 14:22; 18:25) Bionso ebi bidi anu bileja Nzambi umue anyi? Kakuyi mpata bidi nanku.

Tuangata tshilejilu: Nzuji kampanda udi mua kuikala mumanyike mudiye muntu utu ulamata mikenji padiye ulumbuluisha.  Kadi bua kudi bana bende, utu tatu muimpe wa dinanga. Balunda bende ba pa muoyo batu bamumona muntu mulenga muedi wa bilele ne bakuabu. Nzuji, tatu ne mulunda, bionso ebi bidi anu bua muntu umue. Mbitupa bia mu bumuntu buende bidi bimuenekela mu mishindu mishilashilangane bilondeshile nsombelu.

Ke mudibi bua diumvuija edi didi mu Mifundu ya tshiena Ebelu bua Yehowa: ‘Nzambi wa luse ne dinanga, kena ukuata tshiji lubilu, udi muule tente ne luse lujalame ne bushuwa.’ Kadi idi yamba kabidi ne: ‘Kadi kêna ubingisha muntu udi upila.’ (Ekesode 34:6, 7) Ngikadilu yonso ibidi eyi idi ileja diumvuija dia dîna dia Nzambi. Dîna “Yehowa” didi diumvuija “Eu udi uvuija.” Nanku, Nzambi udi ulua tshionso tshidi tshikengela bua kukumbaja malaya ende. (Ekesode 3:13-15) Kadi udi ushala anu Nzambi umue. Yezu wakamba ne: “[Yehowa] Nzambi wetu, [Yehowa] udi umue.”​—Mâko 12:29.

Bakatu bumushe Mifundu ya tshiena Ebelu anyi?

Bitu bienzeka lelu pa tshibidilu ne: padi mukanda mupiamupia upatuka, udi upingana pa muaba wa wa kale anyi ngenyi mipiamipia idi ipingana pa ya kale. Mifundu ya tshiena Greke mmipingane pa muaba wa ya tshiena Ebelu anyi? Kabiena nanku to.

Bu Yezu ne meji a kupingaja pa muaba wa Mifundu ya tshiena Ebelu miyiki ya malu avuaye muenze ne mikanda ivua balongi bende bafunde uvua ne bua kuikala muleje muanda eu patoke kakuyi mpata. Matuku makese kumpala kua Yezu kubanda mu diulu, Luka wakamba bua bualu buende ne: ‘Wakabangila ku Mose ne ku baprofete bonso [mu Mifundu ya tshiena Ebelu], wakajinguluila [bayidi bende babidi] malu akafundabu mu Mukanda wa Nzambi wonso bua bualu buende.’ Pashishe Yezu kumuenekela kabidi bapostolo bende ba lulamatu ne bantu bakuabu. Luka udi utungunuka ne: ‘Wakabambila ne: Aa adi mêyi anyi angakanuambila pangakadi nenu, ne: Budibu nabu mbua kujikija malu onso akafundabu bualu buanyi mu mikenji ya Mose ne mu luseke lua baprofete ne mu Misambu.’ (Luka 24:27, 44) Bua tshinyi Yezu uvua anu wenza mudimu ne Mifundu ya tshiena Ebelu too ne ku ndekelu kua mudimu wende pa buloba pikalabi ne: kayitshivua ne mushinga?

 Panyima pa tshisumbu tshia bena Kristo tshimane kushindama, bayidi ba Yezu bavua anu batungunuke ne kuenza mudimu ne Mifundu ya tshiena Ebelu bua kumvuija malu a buprofete avua kaayi manji kukumbane, mêyi manene a mu Mikenji ya Mose avua ne malongesha a mushinga, ne miyuki ya basadidi ba kale bavua bilejilu bilenga bua bena Kristo kushalabu ne lulamatu. (Bienzedi 2:16-21; 1 Kolinto 9:9, 10; Ebelu 11:1–12:1) Mupostolo Paulo wakafunda ne: ‘Dîyi dionso dia mu Mukanda wa Nzambi didi difume munda mua Nzambi bu mupuya wende, ne didi ne mudimu muimpe.’ * (2 Timote 3:16) Mmushindu kayi udi Mifundu ya tshiena Ebelu ne mushinga lelu eu?

Mibelu bua nsombelu wa dituku dionso

Tuangata tshilejilu tshia kansungansunga kadi mu bantu lelu eu. Mu dimue dia ku matunga a ku Mputu wa ku Est, nsongalume mukuabu wa bidimu 21 wa mu Éthiopie wakamba ne: “Tuetu basue kuya muaba kayi wonso, tudi ne bua kuya anu tshisumbu. Pamuapa, patudi ba bungi badi bapanga mua kutubunda.” Udi utungunuka wamba ne: “Katuena mua kupatuka bua kendakana ku mêba a 6 wa dilolo to, nangananga bua kubuela mu kawulu kadi kapitshila mu njila wa muinshi mua buloba. Padi bantu batutangila, tshidi tshibakoka bikole menemene ndikoba dietu.” Mifundu ya tshiena Ebelu idiku mua kuambuluisha mu nsombelu mukole wa mushindu eu anyi?

Bavua bambile bena Isalele ku kale ne: ‘Biashikama muenyi mu buloba buenu, kanumuenzedi bibi. Muenyi udi ushikama munkatshi muenu ikale bu muntu muledibue mu nzubu yenu; numusue bu munudi badisue; bualu bua nuenu nuakadi benyi mu buloba bua Ejipitu.’ (Lewitiki 19:33, 34) Mu Isalele, mukenji eu uvua ubalomba bua kunemeka benyi, anyi ‘bantu badi bashikama’ muabu ba kua bende ne mukenji eu udi mu Mifundu ya tshiena Ebelu. Kuenaku pebe umona ne: mêyi adi mu mukenji eu adi mua kuambuluisha bantu lelu bua kujikija kutapululangana anyi?

Nansha mudi Mifundu ya tshiena Ebelu kayiyi yumvuija bikole malu a makuta, kadi mudi mibelu  ya meji idi yambuluisha bua kujikija nsombelu mikole ya mfranga. Tshilejilu, mu Nsumuinu 22:7, tudi tubala ne: ‘Musombi wa bintu udi mupika wa mumusombeshi.’ Bafidi ba mibelu mu malu a mpetu badi bamba ne: kusumba bintu tshianana tshianana ne makuta masomba kudi mua kufikisha muntu ku bupele bukole.

Kabidi, Mukalenge Solomo umue wa ku bantu babanji ba kale wakaleja njiwu ya kukeba mu mishindu yonso bua kulua mubanji, dijinga mene didi ditangalake mu bantu lelu. Wakafunda ne: ‘Wananga biuma kêna usankishibua ku biuma; wananga bubanji kêna ukuta bubanji; ebu mbualu bua patupu kabidi.’ (Muambi 5:10) Eu mmubelu mulenga wa dikema!

Ditekemena bua matuku atshilualua

Bible mujima udi anu ne tshiena-bualu tshimue: Nzambi neabingishe bukokeshi buende ne kuvuija dîna diende dinsantu ku diambuluisha dia Bukalenge budi mu bianza bia Yezu Kristo.​—Danyele 2:44; Buakabuluibua 11:15.

Mifundu ya tshiena Ebelu idi itumanyisha malu a bungi adi aleja muikala nsombelu pakokesha Bukalenga bua Nzambi. Malu aa adi atukolesha ne atusemeja pabuipi na Yehowa Nzambi wa busambi. Tshilejilu, muprofete Yeshaya ukavua muleje muikala ditalala pankatshi pa bantu ne nyama wamba ne: ‘Tshimungu netshilale mu nzubu umue ne muana wa mukoko, ne nkashama nealale popamue ne muana wa mbuji. Muana wa ngombe ne nyama wa ntambue ne nyama udi ne manyi neyidie mashinde mu muaba umue, ne muana mutekete neayilombole.’ (Yeshaya 11:6-8) Bisamina muoyo bikole be!

Kadi netuambe tshinyi bua bantu badibu bakengesha bua dikoba diabu anyi bua tshisamba tshiabu, ne bua badi ne masama makole peshi badi kabayi ne mushindu wa kupeta makuta? Mifundu ya tshiena Ebelu idi yamba mu mêyi a tshiprofete bua Kristo Yezu ne: ‘Bualu bua neapandishe mukengedi wa bintu padileye kudiye, neapandishe muntu mupele udi kayi ne mukuatshishi. Neafuile udi mutekete ne udi ukengela dikuatshisha luse, neasungile mioyo ya bakengedi.’ (Musambu 72:12, 13) Malaya a mushindu eu mmakumbane bualu adi ambuluishe muntu yonso udi uatekemena bua kuindila matuku adi alue ne ditekemena ne dieyemena.​—Ebelu 11:6.

Bua mushinga wa malu aa, mupostolo Paulo wakafunda ku bukole bua nyuma wa Nzambi ne: ‘Malu onso akafundabu diambedi akafundibua bua kutuyisha, bua tuetu tuikale ne ditekemena bua ditantamana dietu ne bua busambi bua mu Mukanda wa Nzambi.’ (Lomo 15:4) Bushuwa, Mifundu ya tshiena Ebelu ntshitupa tshidi ne mushinga mu Mukanda wa Nzambi. Idi ne mushinga wa bungi kutudi lelu. Dijinga dietu ndia ne: uditatshishe bua kulonga Bible mujima bua kumanya tshidiye ulongesha menemene ne bua ufika ku disemena pabuipi ne Yehowa Nzambi muena Bible eu.​—Musambu 119:111, 112.

[Mêyi adi kuinshi]

[Kazubu mu dibeji 6]

DIPUNGILA DIKULUKULU PESHI MIFUNDU YA TSHIENA EBELU?

Tshiambilu ‘dipungila dikulukulu’ tshidi mu 2 Kolinto 3:14. Dikudimuna dia miaku dia mushindu eu didi dileja ne: ‘dipungila’ ndifume ku muaku wa tshiena Greke diatheke. Mu Bible mikuabu, bu mudi Mukanda wa Mvidi Mukulu mudi tshiovo, kadi muaku eu di·a·theʹke udibu bakudimuna mushindu eu udi umvuija tshinyi menemene?

Mufundi mukuabu wa nkonga-miaku diende Edward Robinson wakamba ne: “Bu muvua tshiovo tshia kale tshikale mu mikanda mifunda kudi Mose, [diatheke] udi uleja mikanda ya tshiovo, mikanda ya Mose, tshilejilu mikenji.” Mu 2 Kolinto 3:14, mupostolo Paulo uvua wakakula bua Mikenji ya Mose, idi anu tshitupa tshia Mifundu ivuabu bafunde kumpala kua buena-Kristo kutuadijabu.

Bu mudibi nanku, ndîna kayi didi dikumbanyine mikanda 39 ya mu Bible ya kumbukila ku Genese too ne ku Malaki? Pamutu pa kuyibikila dîna didi dileja mukadiyi mipitshile matuku anyi ya kale, Yezu Kristo ne balongi bende bavua babikila tshitupa etshi tshia Bible ne: “Mukanda wa Nzambi” kabidi ne: “Mifundu ya tshijila.” (Matayo 21:42; Lomo 1:2) Ke bualu kayi mu diumvuanga ne mushindu eu wa dibikila mêyi mafundisha ku nyuma, Bantemu ba Yehowa badi babikila Dipungila Dikulukulu ne: Mifundu ya tshiena Ebelu bualu bavua bafunde tshitupa etshi tshia Bible ku ntuadijilu mu tshiena Ebelu. Bia muomumue batu babikila Dipungila Dipiadipia ne: Mifundu ya tshiena Greke, bualu bantu bavua Nzambi muenze nabu mudimu bua kufunda tshitupa etshi tshia Bible bakatshifunda mu tshiena Greke.

[Bimfuanyi mu dibeji 4]

Muntu umue udi mua kuikala: nzuji mulondi wa mikenji, muikala kabidi tatu wa dinanga ne mulunda muimpe

[Tshimfuanyi mu dibeji 5]

Yezu uvua wenza mudimu ne Mifundu ya tshiena Ebelu pavuaye pa buloba

[Bimfuanyi mu dibeji 7]

Mmêyi kayi a mu Bible adi mua kuambuluisha muntu bua kuangata mapangadika malenga?