“Bulelela ntshinyi?”

NGOVENA wa bena Lomo Pontio Pilato ke wakela Yezu lukonko elu ne kapeja. Kavua ukeba bua bamuandamuna to, ne Yezu muine kakamuandamuna to. Pamuapa Pilato uvua mua kuikala wela meji ne: mbikole bua kumvua tshidi bulelela bumvuija.​—Yone 18:38.

Lungenyi lua dipepeja bulelela elu ludi kudi bantu ba bungi lelu eu, too ne kudi bamfumu ba bitendelelu, balongeshi ne bena tshididi. Buabu bobu, bulelela nangananga bulelela mu malu a bikadilu ne a ntendelelu kabuena bumue to, ne budi bulonda tshidi muntu ne muntu ne badi mua kubushintulula. Ke bualu bantu badi ne lungenyi lua kudisunguila nkayabu tshidi tshimpe ne tshidi tshibi. (Yeshaya 5:20, 21) Mbifikishe kabidi bantu ku dimona mikenji ya bikadilu ya bantu ba kale bu idi kayitshiyi ne mushinga.

Mêyi avua mafikishe Pilato ku diela lukonko luende alu adi ne mushinga. Yezu uvua muambe ne: ‘Ngakaledibua bua bualu ebu, ngakuluila pa buloba bualu ebu, ne bua kuamba malu malelela.’ (Yone 18:37) Kadi bulelela buvua Yezu wamba kabuvua tshintu tshikodiakane tshidi bantu kabayi mua kumvua to. Wakambila bayidi bende ne: “Nenumanye bulelela, bulelela pabu nebunupikule.”​—Yone 8:32, MMM.

Nkuepi kutudi mua kupeta bulelela ebu? Dituku dikuabu Yezu wakambila Nzambi mu disambila ne: ‘Dîyi diebe mbulelela.’ (Yone 17:17) Bible udi Nzambi mufundishe ku nyuma wende udi utuleja bulelela budi mua kutuludika bimpe ne kutupesha ditekemena dimpe dia muoyo wa tshiendelele bua matuku adi kumpala.​—2 Timote 3:15-17.

Pilato wakabenga ne kapeja kuonso bua kumanya bulelela ebu. Kadi wewe udi musue kubumanya anyi? Bikalabi nanku, ambila Bantemu ba Yehowa bakuleje tshidi “bulelela” buvua Yezu muambe abu. Nebikale ne disanka dia bungi bua kukulejabu.