Mapangadika adi afikisha ku disanka

KUTUKU muanji kudiambila misangu ya bungi ne: “Ndi ndijinga mumvua mua kuikala muenze bualu ebu mushindu kampanda anyi kansanga anyi”? Tuetu bonso tutu basue kuangata mapangadika adi kaayi mua kutunyingalaja pashishe to, nangananga adi atangila nsombelu wetu. Kadi mmunyi mutudi mua kuangata mapangadika adi apetesha masanka?

Tshia kumpala, tudi ne bua kuikala ne mikenji miakane ya kueyemena. Mikenji ya mushindu eu ituku anyi? Bua Bantu ba bungi kayituku to. Bilondeshile nkonko ivuabu bele balongi ba mu bikadilu mu États-Unis, balongi 75 pa lukama badi bamba ne: mbabalongeshe ne: kakuena mukenji wa tshidi tshimpe ne tshibi to, ne kabidi malu a tshidi tshimpe ne tshibi adi ashilangana bilondeshile “bantu ne bikadilu biabu.”

Mbimpe bua kuela meji ne: mikenji miakane ntshilumbu tshia muntu nkayende anyi ntshia yeye kulonda tshidi bantu ba bungi bamba anyi? Tòo. Bu bantu bobu badisunguila bua kuenza malu bu mudibu basue, kuvua mua kuikala anu bimvundu. Tshilejilu, nganyi udi mua kuitaba bua kusomba muaba udibu kabayi bela mukenji nansha umue, kauyi tubadi tua kulumbuluishila bantu ne kauyi bampulushi balama bantu ne bintu biabu? Kabidi, mushindu udi muntu umona malu kautu anu wa kueyemena misangu yonso to. Tudi mua kuangata dipangadika dia kuenza bualu butudi bamona ne: mbuimpe, kadi pashishe tulua kumona ne: tuvua batupakane. Nunku, malu adi menzeke ku kale too ne lelu adi ajadika bulelela bua mêyi aa a mu Bible: ‘Muntu kêna ne bukole munda muende bua kuendesha nabu biendedi biende bimpe.’ (Yelemiya 10:23) Kadi nkuepi kutudi mua kupeta mibelu patudi basue kuangata mapangadika a mushinga mu nsombelu wetu?

Mukalenge utuvua batele mu tshiena-bualu tshishale au uvua muenze bimpe pavuaye muye  kulomba Yezu mibelu. Anu bu mutuvua bamone, Yezu wakandamuna nsongalume au bilondeshile mikenji ya Nzambi. Yezu uvua mumanye ne: Yehowa Nzambi ke udi ne dimanya ne meji malelela ne yeye ke udi mumanye tshidi tshimpe bua bifukibua biende. Ke bualu kayi wakamba ne: ‘Diyisha dianyi ki ndianyi, ndia udi muntume.’ (Yone 7:16) Bushuwa, mu Dîyi dia Nzambi ke mudi mibelu ya nsongo idi mua kutuambuluisha bua kuangata mapangadika mimpe mu nsombelu wetu. Tukonkononayi mpindieu mikenji mikese ya mu Dîyi dia Nzambi idi mua kutupetesha masanka patudi tuyitumikila.

Mushindu utudi mua kuenzela bakuabu malu

Mu Muyuki uvua Yezu muenze pa mukuna, wakaleja bualu bua mushinga budi mua kutuambuluisha bua kuangata mapangadika mimpe mu malanda etu ne bakuabu. Wakamba ne: “Nuenzele bantu malu onso anudi basue banuenzele.”​—Matayo 7:12.

Bamue bantu mbapatule biabu biambilu bidi lungenyi lusua kufuanangana ne lua Yezu bamba ne: “Kuenzedi bantu bakuabu tshiudi kuyi musue bua kudienzela.” Bua kumona dishilangana didi pankatshi pa mubelu wa Yezu ne tshidi bantu bamba, tuangatayi tshilejilu tshia lusumuinu lua muena Samalea wa luse. Bavua bakume muena Yuda mukuabu ne bamushiye mufua tshipuka. Muakuidi ne muena Lewi mukuabu bakamona muntu au, kadi kabakamulenga. Bu muvuabu kabayi basakidile muntu au dikenga ku dikuabu, tudi mua kuamba ne: ki mbenzele muntu mukuabu bualu budibu kabayi basue bua kudienzela. Kadi muena Samalea wakapitshila pende muaba au ne kumona muntu au e kumuambuluisha. Wakamusuika bilamba pa mputa, ne kuya nende ku nzubu wa tshilala benyi. Wakenzela muntu au malu avuaye musue bua bamuenzela. Wakatumikila mubelu wa Yezu wa kuenzela bakuabu bitudi basue bua batuenzele petu ne kuangata dipangadika dimpe.​—Luka 10:30-37.

Kudi mishindu ya bungi itudi mua kutumikila mukenji eu ne kupeta masanka. Ela meji ne: dîku kampanda ndilue kusombela pabuipi nenu. Kanuenaku mua kuya kudibu ne kubajingila difika dilenga pamutu pa kuindila bua bobu balue kunudi anyi? Nudi mua kubambuluisha bua kumanyabu tshitupa atshi bimpe, kuyukila nabu ne kubambuluisha ne bidibu nabi dijinga. Panudi nudianjila kuya kudibu ne bulenga buonso, bidi mua kubafikisha ku didia nenu bulunda. Nudi kabidi nupeta disanka panudi nuvuluka ne: nuvua benze bualu budi busankisha Nzambi. Edi ki ndipangadika dimpe anyi?

Mapangadika adi aleja mutudi banange bakuabu

Pa kumusha mukenji wa Yezu utudi batele kulu eku, mmutuleje kabidi tshitudi mua kuenza bua kuangata mapangadika mimpe. Pakamuebejabu mukenji udi mupite mikuabu mu Mikenji ya Mose, wakandamuna ne: ‘Sua Mukalenge Nzambi webe ne mutshima webe wonso ne muoyo webe wonso ne lungenyi luebe luonso. Ke mukenji munene, udi wa kumudilu. Muibidi udi mufuanangane nawu ne: sua mukuenu bu muudi mudisue. Mikenji yonso ya Mose ne mêyi a baprofete bidi bikudika ku mikenji eyi ibidi.’​—Matayo 22:36-40.

Yezu wakalela bayidi bende ‘mukenji mupiamupia’ butuku bua muladilu wa lufu luende bua kunanganganabu. (Yone 13:34) Bua tshinyi wakamba muvua mukenji eu mupiamupia? Kakavuaku mudianjile kumvuija ne: kunanga muntu netu ngumue wa ku mikenji minene ibidi udibu bakudike mikenji yonso anyi? Bavua bambile bena Isalele mu mikenji ya Mose ne: ‘Sua mukuenu bu muudi mudisue.’ (Lewitiki 19:18) Kadi mpindieu tshidi Yezu wambila bayidi bende bua kuenza ntshipite mukenji eu kule ne kule. Anu bobu butuku abu, Yezu wakambila bayidi bende ne: uvua ne bua kufila muoyo wende bua bualu buabu. Pashishe wakabambila ne: ‘Eu udi mukenji wanyi ne: Nusuangane bu mungakanusua. Kakuena muntu udi ne dinanga didi ditambe edi, dia muntu udi ufuila balunda bende.’ (Yone 15:12, 13) Eyowa, mukenji eu uvua mupiamupia mu ngumvuilu wa se: uvua ulomba bua kuteka malu a bakuabu kumpala kua etu.

Kudi mishindu ya bungi itudi mua kuleja mutudi banange bakuabu kupita mutudi badinange ne kubenga kutangila anu malu etu nkayetu. Tshilejilu, fuanyikijabi ne: udi mu nzubu muebe kadi udi musue kuteleja mijiki ne dîyi dikole bua kukutuilayi bimpe, eku itondesha muena  mutumba nebe nsombelu. Udiku mua kuitaba bua kukepesha disanka diebe edi bua muena mutumba nebe kusombaye ku matshi talala anyi? Mu mêyi makuabu, udiku mua kuteka majinga a muena mutumba kumpala kua ebe anyi?

Tangila bualu bukuabu buvua buenzeke mu ditunga dia Canada. Dituku dikuabu kuvua mashika makole ne neje ivua iloka, Bantemu ba Yehowa bavua baye kutangila mukulakaje kampanda. Muntu au wakambila Bantemu bavua bayukila nende ne: disama diende dia muoyo didi dimupangisha mua kumbusha neje ivua kumpala kua nzubu. Panyima bu pa dîba dijima, e kumvuaye anu mutoyi wa tshikasu pambelu. Bantemu babidi abu bavua balukile bua kumbusha neje ivua mu njila uvua muye too ne ku tshibi tshia nzubu wende. Tatu eu wakafundila Betele wa Bantemu ba Yehowa wa mu Canada wamba ne: “Lelu ndi mudimuene ne anyi abidi dinanga dia bena Kristo balelela mu tshienzedi. Dinanga edi ndishintulule mmuenenu wa bena panu umvua nende wa ne: kakuena muntu udi utangila mukuabu. Ndikoleshe kabidi kanemu kamvua nanku bua mudimu wenu mukole unudi nukuata pa buloba bujima.” Eyowa, kuangata dipangadika dia kuambuluisha bakuabu nansha mu bualu bukese patupu, kudi mua kubalenga ku muoyo bikole. Bidi bienza disanka dia bungi patudi tudifila bua kuambuluisha bakuabu.

Mapangadika adi aleja mutudi banange Nzambi

Bualu bukuabu butudi katuyi mua kupua muoyo patudi tuangata mapangadika ngumue wa ku mikenji minene ibidi yakatela Yezu, tuamba ne: kunanga Nzambi. Mêyi aa Yezu uvua muambile bena Yuda bavua tshisamba tshivua tshidilambule kudi Yehowa. Nansha nanku, muena Isalele yonso uvua ne bua kusungula bikalaye musue kuenzela Nzambi mudimu ne muoyo wonso ne kumunanga ne muoyo mujima.​—Dutelonome 30:15, 16.

Bia muomumue, mapangadika atudi tuangata adi aleja mushindu utudi tumona Nzambi. Tshilejilu, paudi upeta dimanya dia bungi ne wangata Bible ne mushinga, udi udimona kumpala kua dipangadika dia kuangata. Newitabe bua kudifila bikole bua kulonga Bible bua kumona mua kulua muyidi wa Yezu anyi? Wewe muangate dipangadika edi, neupete diakalenga bualu Yezu wakamba ne: ‘Badi bapele mu mitshima yabu badi ne disanka.’​—Matayo 5:3.

Katuena bamanye bikala nsongalume mubanji au ni uvua munyingalale bua dipangadika divuaye muangate. Kadi tudi bamanye muvua mupostolo Petelo mudiumvue panyima pa yeye mumane kulonda Yezu bidimu bia bungi. Pakavuaye pa kufua mu bidimu bu bia 64 bikondo bietu ebi, wakakankamija bena kuitabuja nende ne: ‘Nanukilayi bua banusangane [kudi Nzambi] mu ditalala ne kanuyi ne katoba, kanuyi ne kadiwu kudiye.’ (2 Petelo 1:14; 3:14) Mbimueneke patoke ne: Petelo kakanyingalala nansha kakese bua dipangadika divuaye muangate kukadi bidimu bipite pa 30 to, ke bualu kayi wakakankamija bakuabu bua bashale balamate anu ku dipangadika divuabu bangate.

Kulonda mubelu wa Petelo kudi kumvuija kuangata dipangadika dia kulua bayidi ba Yezu ne kutumikila mikenji ya Nzambi. (Luka 9:23; 1 Yone 5:3) Bualu ebu budi mua kumueneka bu bukole kadi Yezu udi utujadikila ne: ‘Luayi kundi, bonso badi ne mudimu mukole, badi ne bujitu bunene, meme nennupe dikisha. Angatayi  mutshi wanyi wa tshikokedi pa nshingu yenu, nuyile malu kundi; bualu bua meme ndi ne kalolo ne kanemu mu mutshima wanyi; nunku nenusangane dikisha mu mitshima yenu. Bualu bua mutshi wanyi wa tshikokedi udi muakane ne bujitu buanyi budi bupepele.’​—Matayo 11:28-30.

Tuangatayi tshilejilu tshia Arthur. Bu muvuaye musue kulua muimbi munene wa mijiki, wakatuadija kulonga tshisanji tshia violon pavuaye ne bidimu dikumi. Pakakumbajaye bidimu 14, bakamuteka muimbi wa tshisanji etshi mu dingumba dia bimbi ba mijiki. Nansha nanku kavua ne disanka to. Tatuende uvua udiela nkonko misangu yonso bua kumanya tshidibu batufukile ne uvua ubikila balongeshi ba malu a Nzambi bua bamuandamune, kadi bivuabu bamuandamuna kabivua bimusankisha to. Bakayukila mu dîku diabu bua kumanya Nzambi ni utuku bulelela ne bua tshinyi mmulekele malu mabi enzeka. Pashishe tatuende wakatuadija kuyukila ne Bantemu ba Yehowa. Muyuki wabu wakalenga tatuende wa Arthur bikole, kufikishawu dîku diende dijima ku dilonga Bible.

Dîba adi, Arthur wakafika ku diumvua ku diambuluisha dia Mukanda wa Nzambi bua tshinyi Nzambi mmulekele malu mabi enzeka ne kumanya bua tshinyi tudi pa buloba. Yeye ne bena mu dîku diabu basatu bakangata dipangadika didi kadiyi mua kumunyingalaja. Wakadilambula kudi Yehowa. udi wamba ne: “Ndi ne disanka dia bungi be bua mudi Yehowa mmumpeteshe mushindu wa kumanya bulelela ne mungepule ku dikuyakana ditu divule mu batungimba. Bua kupita bakuabu mu malu a misambu, bidi bikengela kuenza bualu bubi kampanda.”

Arthur utshitu anu musue kuimbila balunda bende tshisanji tshia violon bua kubasanguluja, kadi nsombelu wende mujima kêna muimanyine anu pa dimba to. Nsombelu wende mmuimanyine pa mudimu wa Nzambi. Udi wenza mudimu ku Betele kampanda wa Bantemu ba Yehowa. Anu bu Arthur ne bantu bakuabu binunu ne binunu pa kumbusha nsongalume mubanji eu, udi pebe mua kuangata dipangadika didi mua kukupetesha disanka dinene ditambe pa kuitaba dibikila dia Yezu dia kulua muyidi wende.

[Tshimfuanyi mu dibeji 6]

Dipangadika diebe didi mua kuvuija nsombelu webe mushilangane ne wa bakuabu

[Tshimfuanyi mu dibeji 7]

Neulonge Bible ne kulua muyidi wa Yezu anyi?