Teleja kondo kebe ka muoyo

‘Bintu bionso bidi biakane kudi bantu badi ne mitshima mitoke; kadi kudi badi babipe, badi kabayi ne ditabuja, kakuena tshintu tshidi tshiakane.’​—TITO 1:15.

1. Ntshinyi tshivua Paulo muenze bua bisumbu bia mu Kuleta?

BAKAKUATA mupostolo Paulo ku Lomo, kuenzaye bidimu bibidi mu buloko panyima pa yeye mumane kuenza luendu luende luisatu lua bumisionere. Wakenza tshinyi pakapatukaye mu buloko? Wakaya mu tshidila tshia Kuleta pamue ne Tito matuku makese panyima. Pashishe wakafundila Tito ne: ‘Bua bualu ebu ngakakushiya mu Kulete, bua wewe kulongolola malu akadi mashale, ne bua wewe kusunguisha bakulu.’ (Tito 1:5) Pavua Tito ne bua kusungula bakulu uvua ne bua kupetangana ne bantu bavua ne kondo ka muoyo kimpe ne kabi.

2. Tito uvua mupete bilumbu kayi mu tshidila tshia Kuleta?

² Paulo wakaleja Tito malu avua muntu ne bua kukumbaja bua kuluaye mukulu mu tshisumbu. Wakamuleja kabidi ne: kuvua ‘bena bupidia ba bungi ne bena biakulakula, ne bena mashimi.’ Bantu aba bavua ‘banyanga ditabuja dia bena nzubu mujima, bayisha bantu malu avuabu kabayi ne bualu bua kubayisha.’ Tito uvua ne bua ‘kubabela bikole.’ (Tito 1:10-14; 1 Timote 4:7) Paulo wakamba ne: meji abu ne mioyo mikese yabu (anyi tondo tuabu tua muoyo) bivua ‘bioneka’ anu bu mutu tshilamba tshinyanga kudi ditoba kampanda. (Tito 1:15) Bamue ba kudibu bavua bena Yuda bualu bavua ‘ba munkatshi mua bena ditengula.’ Mu bisumbu bia lelu kamuena bantu badi bamba ne: ditengula didi ne mushinga to. Kadi mubelu uvua Paulo mupeshe Tito udi mua kutulongesha malu a bungi adi atangila kondo ka muoyo.

Bantu badi ne kondo ka muoyo koneka

3. Paulo wakafundila Tito tshinyi bua kondo ka muoyo?

³ Tumone tshivua tshisake Paulo bua kuakula bua kondo ka muoyo. Wakamba ne: ‘Bintu bionso bidi biakane kudi bantu badi ne mitshima mitoke; kadi kudi badi babipe, badi kabayi ne ditabuja, kakuena tshintu tshidi tshiakane; kadi meji abu ne muoyo mukese wabu mbioneka. Bobu badi bamba ne: Tudi bamanye Nzambi; kadi badi bamudiwula ne bienzedi biabu.’ Nunku, bamue bantu bavua ne bua kushintuluka bua ‘bikale balenga mu ditabuja.’ (Tito 1:13, 15, 16) Kabavua bamanye bimpe tshivua tshiakane ne tshibi, ne bualu ebu buvua butangila kondo kabu ka muoyo.

4, 5. Ntshilema kayi tshivua natshi bamue bantu mu tshisumbu? Tshivua tshibafikisha ku tshinyi?

⁴ Bidimu dikumi kumpala, bena mu kasumbu kaludiki ka bena Kristo bakavua bambe ne: ditengula kadivua ne mushinga bua muntu kuluaye muena Kristo, ne bakafundila bisumbu bua bualu abu. (Bienzedi 15:1, 2, 19-29) Kadi bamue bantu mu Kuleta batshivua anu ‘balomba ditengula.’ Bavua babenga tshivua kasumbu kaludiki kambe, bualu  bavua ‘bayisha bantu malu avuabu kabayi ne bualu bua kuyisha.’ (Tito 1:10, 11) Bu muvuabu ne meji mabi, bavua mua kuikala basaka bantu bua kulonda mikenji ivua ikandika bimue biakudia ne ya didikezula. Bavua kabidi mua kuikala basakidila mikenji mikuabu anu bu muvua bena mu tshikondo tshia Yezu benza. Bavua pabu balonda bilele ne mikenji ya bantu.​—Mâko 7:2, 3, 5, 15; 1 Timote 4:3.

⁵ Meji mabi aa avua anyanga mushindu uvuabu bamona malu anyi kondo kabu ka muoyo. Paulo wakamba ne: ‘Kudi badi babipe, badi kabayi ne ditabuja, kakuena tshintu tshidi tshiakane.’ Kondo kabu ka muoyo kakavua kanyanguke bikole, kakatshivua kalombola bienzedi biabu ne mushindu wabu wa dimona malu bimpe to. Bavua kabidi balumbuluisha bena Kristo nabu bua malu avua kaayi mabatangile, malu adi muntu ne muntu mua kuenza mudiye mumone. Ke mushindu ukavua bena Kuleta aba bamona malu mimpe bu mabi. (Lomo 14:17; Kolosai 2:16) Nansha muvuabu bamba ne: bavua bamanye Nzambi, bienzedi biabu kabivua bileja nanku to.​—Tito 1:16.

‘Bintu biakane kudi bantu badi ne mitshima mitoke’

6. Paulo uvua wakula bua bantu ba mishindu kayi ibidi?

⁶ Malu avua Paulo mufundile Tito adi mua kutuambuluisha mushindu kayi? Tutangile dishilangana didi mu mêyi aa: ‘Bintu bionso bidi biakane kudi bantu badi ne mitshima mitoke; kadi kudi badi babipe, badi kabayi ne ditabuja, kakuena tshintu tshidi tshiakane; kadi meji abu ne muoyo-mukese wabu mbioneka.’ (Tito 1:15) Kakuyi mpata, Paulo kavua wamba ne: bua muntu muakane, malu onso avua anu makane to. Tudi batuishibue bua bualu ebu, bualu Paulo ukavua muleje mu mukanda wende mukuabu ne: muntu udi wenda mansandi, utendelela mpingu, upaka manga anyi wenza malu makuabu mabi ‘kakupiana Bukalenge bua Nzambi’ to. (Galatia 5:19-21) Nunku, tudi mua kuamba ne: Paulo uvua wakula bua bantu ba mishindu ibidi: aba badi bakane ne badi mu malanda mimpe ne Nzambi, ne bakuabu badi kabayi bakane.

7. Ebelu 13:4 udi wamba tshinyi? Kadi ndukonko kayi lutudi mua kudiela?

⁷ Muena Kristo mulelela kêna ne bua kubenga kuenza anu malu adi Bible ukandika patoke to. Tuangate tshilejilu tshia mvese eu: “Dibaka dikale dinemekibua munkatshi mua bantu bonso, bulalu kabunyanguki; Nzambi nealumbuluishe bena masandi bajike ne bena masandi babake.” (Ebelu 13:4) Nansha bantu badi kabayi bena Kristo ne aba badi kabayi bamanye Bible nebamone bimpe ne: mvese eu udi ukandika tshiendenda. Mvese eu ne mikuabu idi ileja patoke ne: Nzambi udi ukandika muntu udi mu dibaka bua kuangata muntu udi kayi bayende anyi mukajende udi ku mikanda ya mbulamatadi. Kadi, netuambe tshinyi bua bantu babidi badi kabayi baselangane badi bangatshilangana mukana? Bansonga ba bungi batu bamba ne: tshilela etshi  ki ntshibi to. Kadi, muena Kristo udi mua kumona tshilele etshi nanku anyi?

8. Bua diangatshilangana mukana, mmushindu kayi udi bena Kristo bashilangane ne bantu bakuabu?

⁸ Mu Ebelu 13:4 ne mu 1 Kolinto 6:9 Nzambi udi ubenga tshiendenda tshia bantu bakadi baselangana ne batshidi bajika (anyi pornêia mu tshiena Greke). Muaku wa tshiena Greke eu udi umvuija tshinyi? Udi umvuija kuenza mudimu mu mushindu wa pa tshibidilu anyi udi kauyi wa pa tshibidilu ne bitupa bia lulelu ne lungenyi lubi. Udi uleja mishindu mibi yonso idi ibengangana ne tshidi Bible wamba bua dibaka. Nunku, tudi tusanganamu diangatshilangana mukana, nansha mutu bansonga ba bungi bela meji ne: tshilele etshi ntshimpe, anyi bu mutubu babambila. Kadi bena Kristo balelela kabatu bitaba lungenyi ne bienzedi bia “bena biakulakula, ne bena mashimi.” (Tito 1:10) Batu balonda mikenji ya mu Bible. Pamutu pa kuamba ne: diangatshilangana mukana ndimpe, batu bamona ne: bilondeshile Bible ntshiendenda (anyi pornêia), ne badi balongesha kondo kabu ka muoyo bua kubenga tshilele etshi. *​—Bienzedi 21:25; 1 Kolinto 6:18; Efeso 5:3.

Tondo tua muoyo tushilangane, mapangadika mashilangane pawu

9. Bikale “bintu bionso bidi biakane,” kondo ka muoyo kadi ne mudimu kayi?

⁹ Kadi Paulo uvua musue kuamba tshinyi pakambaye ne: “Bintu bionso bidi biakane kudi bantu badi ne mitshima mitoke”? Uvua wakula bua bena Kristo bakavua balonda mikenji ya Nzambi idi mu Bible. Bena Kristo aba mbamanye ne: muntu ne muntu udi mua kuenza tshidiye musue padi Bible kayi ukandika bualu kampanda patoke. Pamutu pa kuakula bibi bua bantu bakuabu, badi bamona malu adi Nzambi kayi ukandika bu ‘makane.’ Kabena batekemena bua bantu bonso bikala bela meji mushindu umue nabu bua malu onso adi Bible kayi uleja tshia kuenza patoke. Tuangatayi bilejilu ebi.

10. Mmunyi mudi dibaka (anyi madilu) mua kuikala tshilumbu tshinene?

¹⁰ Mu amue mêku mudi mulume anyi mukaji muikale muena Kristo, kadi muena dibaka nende kayi muena Kristo to. (1 Petelo 3:1; 4:3) Kudi mua kumueneka ntatu dîba didi mu dîku muikale difesto dia dibaka anyi madilu. Tuangate tshilejilu tshia mukaji udi ne bayende kayi muena Kristo. Mpindieu, mulela kampanda wa bayende udi ubuela mu dibaka. Kadi badi ne bua kuanji kuya mu tshitanda tshiabu. (Anyi mulela wa bayende bu mudi tatuende anyi mamuende mmufue; badi ne bua kuanji kuya ne tshitalu mu tshitanda tshiabu.) Mulume ne mukajende badi ne bua kuya mu dibaka adi anyi mu madilu. Kondo ka muoyo ka mukaji nekamuambile tshinyi? Neaye anyi kakuya? Tangila bilejilu bibidi ebi.

11. Leja mudi mukaji muena Kristo mua kuela meji bua kuya anyi kubenga kuya mu dibaka didibu benzela mu tshitanda. Neangate dipangadika kayi?

¹¹ Mamu Odia udi utuma meji ku mukenji wa mu Bible udi wamba ne: ‘Lopokayi munkatshi mua Babulona Munene,’ anyi bitendelelu bionso bia dishima. (Buakabuluibua 18:2, 4) Kumpala kua kuluaye muena Kristo uvua mu tshitanda mudibu benzela dibaka adi. Nanku mmumanye ne: nebalombe bantu bonso bua kuenza amue malu bu mudi: kuimba misambu, kusambila anyi malu makuabu. Ki mmusue kubuelakana mu malu au ne kuya nansha mu tshitanda atshi to, bualu udi mua kunyanga malanda ende ne Nzambi. Mamu Odia udi unemeka bayende ne mmusue kumuambuluisha bualu yeye ke mfumu wa dîku. Kadi ki mmusue kutupa ku mikenji ya mu Bible to. (Bienzedi 5:29) Nunku, udi umvuija bayende ne dîyi dimpe ne: kêna mua kuya mu tshitanda atshi to. Udi umuambila ne: yeye muyemu kakuenza malu adi bantu bonso benza to. Nanku, bua kubenga kumufuisha bundu, ki mbimpe ayamu to. Nunku neashale ne kondo ka muoyo kimpe.

12. Mmunyi mudi muntu mua kumona diya ku dibaka didibu benzela mu tshitanda? Udi mua kuenza tshinyi?

 ¹² Mamu Tshianda udi pende ne tshilumbu tshia muomumue. Udi unemeka bayende, mmusue kusankisha Nzambi, ne kulonda kondo kende ka muoyo kadi kalongesha kudi Bible. Panyima pa yeye mumane kuela meji bu mamu Odia, udi ubala ne muoyo umue “Nkonko ya babadi” idi mu Tshibumba tshia Nsentedi tshia dia 15 ngondo muitanu 2002. Udi uvuluka ne: bansonga basatu bena Yuda bavua baye muaba uvua bantu batendelela lupingu, kadi kabavua batendelele lupingu to. (Danyele 3:15-18) Udi witaba bua kuya ne bayende kadi ubenga mua kuenza malu enzabu mu tshitanda atshi bua kunemeka kondo kende ka muoyo. Udi uleja bayende patoke kadi ne dîyi dimpe tshikalaye ne bua kuenza ne kubenga kuenza. Mamu Tshianda udi utekemena ne: bayende neamone dishilangana didi pankatshi pa ntendelelu mulelela ne wa dishima.​—Bienzedi 24:16.

13. Bua tshinyi kabiena ne bua kutuenza bibi padi bena Kristo babidi bangate mapangadika mashilangane bua bualu bumue?

¹³ Bu mudi bena Kristo mua kuangata mapangadika mashilangane mu tshilumbu tshimue, bidiku bileja ne: muntu udi mua kuenza tshidiye musue anyi kuamba ne: mukuabu udi ne kondo ka muoyo katekete anyi? Tòo. Bu mudi mamu Odia mumanye misambu ne malu atu enzeka mu tshitanda atshi, udi umona ne: yeye muyemu bidi mua kuikala bibi buende yeye. Bu mutuye kabidi muyukile malu a Nzambi ne bayende, bidi mua kushintulula mudi kondo kende ka muoyo kenza mudimu. Nunku, mmutuishibue ne: dipangadika didiye muangate ndimpe buende yeye.

14. Bena Kristo badi ne bua kumanya tshinyi pa bidi bitangila dipangadika didi muntu udiangatshila?

¹⁴ Kadi dipangadika dia mamu Tshianda ndibi anyi? Ki mbualu budi butangila bantu bakuabu to. Kabena ne bua kuakula bibi buende yeye bualu mmuitabe bua kuya mu tshitanda kadi ubenga mua kuenza malu onso enzekamu. Katupu muoyo mubelu uvua Paulo mufile bua biakudia to. Wakamba ne: ‘Muntu udi udia bintu bionso kapetudi udi kayi ubidia; ne udi kayi ubidia kalumbuluishi udi ubidia. Yeye udi wimana anyi udi upona bua mukalenge wende mene. Yeye neimane, bualu bua Mukalenge udi ne bukole bua kumuimanyika.’ (Lomo 14:3, 4) Kakuyi mpata, muena Kristo mulelela nansha umue kêna ne bua kuenzeja muntu bua kubenga kulonda tshidi kondo kende ka muoyo kalongesha kudi Bible kamuambila to. Kuenza nanku kudi anu bu kubenga kumvua dîyi didi mua kuikala diamba malu adi mua kupandisha muntu.

15. Bua tshinyi tudi ne bua kuela meji ku kondo ka muoyo ka bakuabu ne mushindu udibu badiumvua?

¹⁵ Kadi ba mamu aba badi ne bua kutangila malu makuabu, bu mudi mushindu udi bakuabu bantu mua kubamona. Bualu Paulo  wakamba ne: ‘Dilumbulula dienu dikale bua muntu kateki buteyi anyi tshilenduishi mu njila wa muanetu wa mu Kristo.’ (Lomo 14:13) Mamu Odia mmumanye ne: malu a nunku avua mapatule bilumbu mu tshisumbu tshiabu anyi mu dîku diabu. Tshidiye wenza tshidi kabidi mua kuambuluisha bana bende. Kadi, mamu Tshianda yeye mmumanye ne: malu a mushindu eu akavua menzeke mu tshisumbu tshiabu anyi muaba udiye musombele, ne kaavua makebeshe bilumbu to. Ba mamu aba ne tuetu bonso tudi ne bua kumanaya ne: kondo ka muoyo kalongesha bimpe kadi kamona tshidi bualu butudi tuenza mua kuenzela bakuabu. Bualu Yezu wakamba ne: ‘Bialenduisha muntu umue wa mu bantu aba bapuekele badi bangitabuja, biakadi bimpe kumusuika dibue dinene dia kupela nadi mu nshingu muende, kumuina mu bunene bua mâyi manene.’ (Matayo 18:6) Muntu yeye kayi utangila tshidi bienzedi biende bienzela bakuabu, kondo kende ka muoyo kadi mua kunyanguka anu bu ka bena Kristo ba mu Kuleta.

16. Mmalu kayi adi muena Kristo ne bua kushintulula mu bungi bua matuku?

¹⁶ Malanda adi nawu muena Kristo ne Nzambi adi ne bua kuenda anu akola, anu bu mudi diteleja kondo kende ka muoyo. Tuangate tshilejilu tshia muanetu Mukendi udi ufuma ku ditambula. Kondo kende ka muoyo kadi kamuambila bua kubenga malu ende onso mabi avuaye wenza kumpala, bu mudi malu adi atangila mpingu ne mashi. (Bienzedi 21:25) Mpindieu, udi ubenga ne muoyo mujima bua kuenza nansha malu adi mafuanangane kakese ne adi Nzambi mukandike. Kadi udi ukema bualu bantu bakuabu badi babenga amue malu adiye umona ne: mmimpe, bu mudi malu makuabu ku televizion.

17. Leja mudi bungi bua matuku ne dikolesha malanda ne Nzambi mua kuambuluisha kondo ka muoyo ka muena Kristo ne mushindu udiye wenza malu.

¹⁷ Mu bungi bua matuku, Mukendi udi ukolesha dimanya diende ne malanda ende ne Nzambi. (Kolosai 1:9, 10) Ntshinyi tshidi tshienzeka? Kondo kende ka muoyo kadi kalonga malu a bungi. Mpindieu Mukendi udi uteleja kondo kende ka muoyo ne utangila bimpe mikenji ya mu Bible. Udi umona mpindieu ne: amue malu avuaye umona bu mafuanangane ne adi Nzambi ukandika ki mmabi to. Mpindieu kondo ka muoyo ka Mukendi kadi kamusaka bua kubenga kutangila malu adibu baleja ku televizion avuaye umona bu mimpe, bualu udi ulonga Bible bikole ne uteleja kondo kende ka muoyo. Bushuwa, mmulengeje kondo kende ka muoyo.​—Musambu 37:31.

18. Tudi ne diakalenga kayi?

¹⁸ Mu bisumbu bia bungi, mudi bena Kristo bapiabapia ne ba kale. Imue misangu kondo ka muoyo ka bapiabapia kadi kashala kapuwe bua amue malu, kadi kakula ne dîyi dikole bua makuabu. Bena Kristo aba badi dijinga ne matuku a bungi ne diambuluisha bua kuibidilangana ne mikenji ya Yehowa ne kuteleja kondo kabu ka muoyo kalongesha kudi Bible. (Efeso 4:14, 15) Kadi kudi bakuabu bena Kristo badi ne dimanya dia bungi, bakadi bamanye mua kutumikila mikenji ya Nzambi ne badi ne kondo ka muoyo kadi kapetangana bikole ne dîyi diende. Ndiakalenga dinene dia kuikala ne “bantu badi ne mitshima mitoke” aba, badi bamona malu adi asankisha Mukalenge bu ‘makane.’ (Efeso 5:10) Tukebayi tuetu bonso bua kuikala bu bena Kristo aba, ne bua kondo ketu ka muoyo kikale kapetanga ne dimanya dijalame dia bulelela.​—Tito 1:1.

[Mêyi adi kuinshi]

Newandamune bishi?

• Bua tshinyi bamue bena Kristo ba mu Kuleta bavua ne tondo tua muoyo tunyanguke?

• Bua tshinyi bena Kristo babidi badi ne tondo tua muoyo tuimpe badi mua kuenza malu mashilangane?

• Mu bungi bua matuku, ntshinyi tshidi ne bua kufikila kondo ketu ka muoyo?

[Nkonko ya dilonga]

[Karte mu dibeji 26]

(Bua kumona malu bimpe, tangila mu mukanda)

Sicile

GRÈCE

Kuleta

ASIA MUKESE

Chypre

MBUU WA MÉDITERRANÉE

[Tshimfuanyi mu dibeji 28]

Bena Kristo babidi badi ne tshilumbu tshimue badi mua kuenza malu mashilangane