‘Bintu bia argent mbianyi, bintu bia or mbianyi’

MU BIDIMU bia 500 kumpala kua bikondo bietu ebi, Kolesha Mukalenge wa bena Pelasa wakapatula bantu ba Nzambi mu bupika mu Babulona. Ba bungi ba kudibu bakapingana mu Yelushalema bua kuibakulula ntempelo wa Yehowa uvua mushale anu bikulu. Bantu aba kabavua ne bubanji bua bungi to, ne bisamba bivua bibanyunguluke biakabaluisha bua kubapangisha bua kuibakulula ntempelo. Ke bualu kayi bamue ba kudibu bavua mua kuikala badiebeje ni bavuaku mua kuajikija mudimu eu munene.

Yehowa wakambila bibaki abu mukana mua muprofete wende Hagai ne: udi nabu. Wakabambila ne: ‘Nenzakeje bisamba bionso ne meme nenguuje nzubu eu ne butumbi tente.’ Bua bintu bivua bibaki nabi dijinga, Hagai wakamanyisha ne: ‘Yehowa wa misumba udi wamba ne: Bintu bia argent bidi bianyi, bintu bia or bidi bianyi.’ (Hagai 2:7-9) Bidimu bitanu panyima pa Hagai mumane kuamba mêyi aa avua akolesha ku muoyo, mudimu wa dibakulula wakajika.​—Ezela 6:13-15.

Mu bidimu bishale ebi, mêyi a Hagai avua kabidi masake basadidi ba Yehowa bua kutuadija midimu minene ya ntendelelu wende. Mu 1879 pakatuadija kasumbu ka mupika wa lulamatu ne wa budimu kupatula tshibejibeji etshi tshiakaluabu kubikila ne: Tshibumba tshia Nsentedi tshia Siona ne Mumanyishi wa dikalaku dia Kristo tshivua ne mêyi adi alonda aa: “Tudi batuishibue ne: YEHOWA ke udi ukuatshisha dipatuka dia ‘Tshibumba tshia Nsentedi tshia Siona,’ ne bu mudibi nanku, katuena mua kulomba dikuatshisha dia kudi bantu anu bu dibanza tunana to. Pikala Yehowa udi wamba ne: ‘Or ne argent bionso bidi mu mikuna mbianyi’ mubenge bua kufila mfranga idi ikengedibua, netumone ne: tshikondo tshia kulekela kutshipatula tshiakumbanyi.”

Kabatu banji kulekela kupatula Tshibumba tshia Nsentedi to. Bakapatula bibejibeji ebi 6 000 bua musangu wa kumpala mu Anglais nkayamu. Lelu eu, badi babipatula 28 578 000 mu miakulu 161. * Tshibejibeji tshia Réveillez-vous! badi batshipatula patshi 34 267 000 mu miakulu 81.

Bantemu ba Yehowa badi benza midimu ya bungi idi ne tshipatshila tshia muomumue ne tshia Tshibumba tshia Nsentedi bua kutumbisha Yehowa, Mukalenge Mutambe bunene wa diulu ne buloba ne kumanyisha lumu luimpe lua Bukalenge buende. (Matayo 24:14; Buakabuluibua 4:11) Bantemu ba lelu badi ne dishindika dia muomumue anu bu divuabu baleje mu tshibejibeji etshi mu 1879. Mbitabe mudi Nzambi ukuatshisha mudimu wabu ne neabapeteshe mfranga idi ikengela bua kuenza nayi midimu idiye wanyisha. Kadi nkuepi kutu Bantemu ba Yehowa bapeta makuta bua kuenzeja nawu midimu yabu? Mmidimu ya mushindu kayi idibu benza bua kumona mua kuyisha lumu luimpe pa buloba bujima?

Makuta atu afuma kuepi?

Mu miaba ya bungi batu bebeja Bantemu ba Yehowa padibu bayisha ne: “Batu banufuta bua kuenza mudimu eu anyi?” Batu bandamuna ne: kabatu batufuta to. Batu bafila dîba diabu tshianana. Bayishi ba tshisumi aba badi benza mêba a bungi mu diambila bantu malu a Yehowa ne nsombelu muimpe udi Bible ulaya bualu badi ne dianyisha dia bungi. Badi ne dianyisha dia bungi bua tshidi Nzambi mubenzele ne bua mushindu udi lumu luimpe lulengeja nsombelu wabu ne mmuenenu wabu wa malu. Ke bualu kayi batu bambila bakuabu malu mimpe aa. Padibu benza nunku, badi batumikila mêyi a Yezu aa: ‘Nuakuangata tshianana, nubapebu tshianana.’ (Matayo 10:8) Bushuwa, dijinga diabu dia kuikala bantemu ba Yehowa ne ba Yezu didi dibasaka kabidi bua kutula makuta abu bua kumona mua kulongesha bantu bakuabu Bible nansha badi mu matunga a kule ne muaba  udibu basombele.​—Yeshaya 43:10; Bienzedi 1:8.

Bunene bua mudimu wa kuyisha ne bintu bidibu benza nabi mudimu bua kuwenza bu mudi: biamu bia dipatula nabi mikanda, Betele, Nzubu ya mpungilu, ya ba misionere ne bikuabu bidi bitudisha makuta mapite bungi. Kadi makuta aa atu afuma kuepi? Makuta a kuenzeja nawu midimu yonso eyi atu afumina ku mapa a budisuile. Bantemu ba Yehowa kabatu benzeja bena mu bisumbu bua kufilabu makuta bua kuenzeja nawu midimu ya mu bulongolodi to; ne kabatu balomba bantu bua kufila makuta bua mikanda idibu babapesha to. Kadi padi bantu basue kufila makuta abu bua kukuatshisha nawu mudimu eu wa dilongesha, Bantemu batu baanyisha ne disanka dionso. Kadi tuanjayi kuakula mpindieu bua mudimu wa dikudimuna dia mikanda udi muikale umue wa ku midimu idi yenzeka bua kumona mua kuyisha lumu luimpe pa buloba bujima.

Mikanda mu miakulu 437

Kukadi bidimu bia bungi, mikanda ya Bantemu ba Yehowa ngimue ya ku mikanda idibu batambe kukudimuna pa buloba bujima. Mbakudimune trakte, broshire, bibejibeji ne mikanda mu miakulu 437. Bushuwa, anu bu midimu mikuabu itudi tuenza bua kuyisha lumu luimpe, mudimu wa dikudimuna mikanda udi ulomba makuta a bungi. Kadi mmunyi mutu mudimu eu wenzeka?

Patu bafundi ba mikanda ya Bantemu ba Yehowa bajikija kufunda biena-bualu bia mukanda kampanda mu Anglais, batu babitumina tusumbu tua bakudimunyi badibu balongeshe mudimu eu pa buloba bujima ku Internet. Bakudimunyi ba mu kasumbu konso badi bakudimuna malu au mu muakulu wabu. Bilondeshile bungi bua mudimu udibu benza anyi ntatu itu nayi muakulu wabu, badi mua kuenza kasumbu ka bakudimunyi miaba yonso ne bantu batuadijile ku 5 too ne ku 25.

Batu bakonkonona malu adibu bakudimune ne baabala bua kamuikadi bilema to. Tshipatshila tshiabu ntshia kukudimuna ngenyi idi mu muakulu udibu bangatshila malu au ne mikale yumvuika bimpe. Ki mbitekete bua kuenza mudimu eu to. Padi tshiena-bualu  tshidibu bakudimuna tshikale ne miaku mikole, bakudimunyi badibu bapeshe tshiena-bualu atshi badi benza bonso makebulula mu muakulu wa Anglais udibu bangatshile bidibu bakudimuna anyi mu muakulu mukuabu bu mudi wa Mfualansa, tshiena Russie anyi tshiena Espagne pashishe ne mu muakulu wabu udibu bakudimuna bua malu adibu bamba ikale majalame. Tshilejilu, padi tshiena-bualu kampanda tshia Réveillez-vous! tshiakula bua malu a sianse anyi malu a kale, bakudimunyi batu benza makebulula a bungi.

Bakudimunyi ba bungi batu benza mudimu eu basombele ku Betele, bakuabu pabu batu balua kuwenza amue matuku ne makuabu benza midimu yabu mikuabu. Bakuabu badi bawenzela muaba udibu bakula muakulu udibu bakudimuna. Kabatu bafuta bakudimunyi bua mudimu udibu benza to. Batu bapesha bakudimunyi badi mu mudimu wa ku dîba ne ku dîba muaba wa kulala ne biakudia ne tukuta tukese bua kujikija majinga abu makuabu. Pa buloba bujima, tudi ne Bantemu 2 800 badi benza mudimu wa dikudimuna mikanda yetu. Patudi tuakula apa, Betele ya Bantemu ba Yehowa 98 idi ne tusumbu tua bakudimunyi anyi idi itangila bakudimunyi badi mu matunga makuabu. Tuangate anu tshilejilu tshimue patupu: Betele wa mu ditunga dia Russie udi utangila bakudimunyi bapite pa 230 badi bakudimuna mikanda mu miakulu mipite pa 30 kusangisha ne idi kayiyi mimanyike pa buloba bu mudi wa tchouvache, ossète ne ouïgour.

Kumanya mua kukudimuna bimpe

Anu bu mutu muntu ukadi mutete bua kulonga muakulu mukuabu mumanye, ki mbitekete bua kukudimuna ngenyi idi mikole mu muakulu mukuabu to. Tshipatshila ntshia kuangata ngenyi idi mu muakulu udibu bangatshile malu ne kuyidikumuna bimpe mu muakulu mukuabu ne kuyifunda mu mushindu udibu mua kuyibala bipepele bienze anu bu ne: ki mbayangatshile mu muakulu mukuabu to. Bua kuenza nunku, bidi bikengela kulonga mudimu eu. Bua bakudimunyi bapiabapia kumanyabu mudimu eu bimpe, bidi bikengela matuku a bungi ne Bantemu ba Yehowa batu babalongeshawu ku kakese ku kakese. Bana betu batu balongesha bakudimunyi mudimu eu batu imue misangu benda batangila bakudimunyi bua kubaleja mua kukudimuna bimpe ne kumanya mua kuenza mudimu ne ordinatere.

 Dilongesha dia bakudimunyi edi ndiambuluishe bikole. Tshilejilu, Betele wa mu ditunga dia Nicaragua udi wamba ne: “Bua musangu wa kumpala, mulongeshi mukuabu uvua mufume mu ditunga dia Mexique wakalongesha bakudimunyi betu ba muakulu wa Miskito mudi dikudimuna ne bua kuenzeka pamue ne mishindu mimpe ya kukudimuna. Dilongesha edi diakambuluisha bakudimunyi bua kushintululabu mushindu wabu wa dienza mudimu. Kutuadijabu kukudimuna malu mu mushindu muimpe mutambe.”

Mêyi adi alenga ku muoyo

Bantemu badi benza muabu muonso bua kukudimuna Bible ne mikanda yabu ya malu a mu Bible mu miakulu ya bantu ya ku dibele bua kumona mua kulenga mioyo yabu ne ke tshidi tshienzeka. Mu tshidimu tshia 2006, Bantemu ba Yehowa ba mu ditunga dia Bulgarie bakasanka bikole bua dipatuka dia Les Écritures grecques chrétiennes​—Traduction du monde nouveau mu tshiena Bulgarie. Betele wa Bulgarie udi uleja ne: uvua mupete mikanda ya bungi ya diela tuasakidila bua bualu ebu. Bena mu bisumbu badi bamba ne: “mpindieu Bible kêna ulenga anu lungenyi luetu nkayalu to, kadi udi ulenga kabidi mioyo yetu bushuwa.” Mukulakaje mukuabu wa mu tshimenga tshia Sofia wakamba ne: “Ndi mubale Bible bidimu bia bungi, kadi tshitu muanji kubala nkudimuinu udi mupepele bua kumumvua ne udi utua ku muoyo buludiludi nunku to.” Bia muomumue, kunyima kua bena mu ditunga dia Albanie bamane kupeta Traduction du monde nouveau mu tshiena Albanie, ntemu mukuabu wa mu ditunga edi wakamba ne: “Edi n’Dîyi dia Nzambi dimpe ditambe mu tshiena-Albanie! Edi ndiakalenga dinene dia kumvua Yehowa wakula netu mu muakulu wetu.”

 Dikudimuna dia Bible mujima didi mua kuangata bidimu bia bungi. Kadi kuenaku umona ne: mbimpe kuenza mudimu eu bualu udi wambuluisha bantu miliyo mivule bua kumvua Dîyi dia Nzambi bimpe bua musangu wa kumpala anyi?

‘Tudi benzejanganyi ba mudimu ne Nzambi’

Bushuwa, dikudimuna dia mikanda ngumue wa ku midimu mipite bungi idi yambuluisha bua kuyisha lumu luimpe bimpe. Mudimu wa kufunda mikanda, kuyipatula ku biamu ne kuyitumina bisumbu pamue ne mikuabu midimu ya bungi idibu benza ku betele, mu bijengu ne mu bisumbu bia Bantemu ba Yehowa idi ilomba bukole bua bungi ne makuta a bungi. Kadi bantu ba Nzambi ‘mbadifile ne disanka’ bua kuenza mudimu eu tshianana. (Musambu 110:3) Badi bangata dienza mudimu eu ne difila kabu kadibu naku bua kuutungunuja bu diakalenga ne butumbi ne Yehowa udi ubangata bu ‘benzejanganyi nende ba mudimu.’​—1 Kolinto 3:5-9.

Ntshia bushuwa bua se: Yehowa ngudi muambe ne: ‘bintu bia argent mbianyi, bintu bia or mbianyi’ ne kêna dijinga ne makuta etu bua kumonaye mua kuenzeja mudimu wende to. Kadi Yehowa mmuangate basadidi bende ne mushinga padiye mubapeshe diakalenga dia kutumbisha dîna diende pa kufila makuta abu bua kuenzeja nawu mudimu wa kuamba kua lumu luimpe, mudimu udi usungila mioyo ya bantu “ba bisamba bionso.” (Matayo 24:14; 28:19, 20) Kuenaku udiumvua musakibue bua kuenza muebe muonso bua kukuatshisha mudimu eu wikala kauyi mua kuenzeka kabidi anyi?

[Mêyi adi kuinshi]

[Kazubu mu dibeji 18]

“BIDI BITUELESHISHA MEJI BIKOLE”

Muana wa bakaji wa bidimu 14 wakafundila Betele wa ditunga dia Cameroun wamba ne: “Meme mumane kusumba bimvua nabi dijinga bua kalasa ka tshidimu etshi, mvua mushale ne mfranga 2 500 [dolare 5] imvua mua kusumba nayi mikanda ibidi bua tshidimu tshianyi tshia ndekelu. Ndi nnutumina makuta aa ne makuabu 910 [dolare mitue ku ibidi] amvua mulame. Ndi musue kunukankamija bua nutungunuke ne kuenza mudimu muimpe unudi nuenza. Tuasakidilayi wa bungi bua tshibejibeji tshia Tshibumba tshia Nsentedi ne tshia Réveillez-vous! Bidi bitueleshisha meji bikole.”

[Kazubu/​Tshimfuanyi mu dibeji 18]

DIPA DIA PA BUADI

Betele wetu wa mu ditunga dia Mexique uvua mupete mukanda wa kudi Manuel, muana wa bidimu 6 udi musombele mu tshimenga tshia Chiapas. Bu muvuaye kayi muanji kumanya mua kufunda, mulunda wende wakamufundilawu. Manuel udi wamba ne: “Kakuanyi wakampesha ngulube. Pakalela ngulube eu tuana, ngakasungula kavua kimpe ku tuonso ne kukakolesha pa nkayaku ne diambuluisha dia bana betu ba mu tshisumbu. Ne dinanga dionso, ndi nnutumina makuta andi mupete pandi mupanyishe nguluba eu. Uvua ne kilo 100 ne ndi mumupane ku dolare 110. Suayi nuenze mudimu ne makuta aa bua Yehowa.”

[Kazubu mu dibeji 19]

‘NUENZE NAWU MUDIMU BUA KUKUDIMUNA BIBLE’

Mu ditunga dia Ukraine, bakamanyisha dipatuka dia Les Écritures grecques chrétiennes​—Traduction du monde nouveau mu tshiena Ukraine mu mpungilu wa distrike wa Bantemu ba Yehowa wa 2005. Dituku diakalonda, bakasangana makuta mavunga mu mukanda mu kashete ka mapa bafundamu ne: “Ndi ne bidimu tshitema. Tuasakidilayi wa bungi bua Les Écritures grecques. Mamu uvua mutupeshe meme ne muakunyanyi wa balume makuta makese aa bua kufuta njila bua kuya mu kalasa. Kadi pavua mvula kayi uloka, tuvua tuya lua makasa, ke tuetu kulama makuta aa dolare 10. Meme ne muakunyanyi tudi basue bua nuenze mudimu ne makuta aa bua kukudimuna Bible mujima mu tshiena Ukraine.”

[Kazubu mu mabeji 20, 21]

MISHINDU IDI BAMUE BAFILA MAPA

MAPA BUA MUDIMU WA PA BULOBA BUJIMA

Bantu bavule batu balama ndambu wa mfranga bua kuela mu tushete tua “Mapa bua mudimu wa pa buloba bujima​—Matayo 24:14.”

Ku ngondo yonso bisumbu bitu bituma mfranga eyi ku biro bia Bantemu ba Yehowa bidi bitangila mudimu mu ditunga diabu. Bantu badi mua kutuma kabidi mfranga eyi buludiludi ku Watch Tower Bible and Tract Society of Pennsylvania, Attention Treasurer’s Office, 25 Columbia Heights, Brooklyn, New York 11201-2483, anyi ku biro bia Bantemu ba Yehowa bidi bitangila mudimu mu ditunga diabu. Sheke ya mfranga idibu batuma mu adrese eu idi ne bua kuikala mu dîna dia “Watch Tower.” Nudi mua kufila nansha bilengejilu bu mudi mpeta ne bikanu bia or peshi bintu bikuabu bia mushinga mukole. Mapa enu aa nuatume ne mukanda muipi udi uleja ne: nudi baatume bua kashidi.

DILAMISHA MAKUTA

Muntu udi mua kusombesha Watch Tower makuta bua enza nawu mudimu miaba yonso idiye musue pa buloba bujima. Kadi padi muntu au nawu dijinga badi bamupingajilawu musangu umue. Wewe musue kumanya malu makuabu, udi mua kufundila biro bia Treasurer’s Office mu adrese udi kuulu eku.

MAPA MALONGOLOLA

Pa kumusha mapa a mfranga mifila bua kashidi, kudi mishindu mikuabu ya kufila bintu bua mudimu wa Bukalenge udi wenzeka pa buloba bujima. Tudi mua kutela:

Mfranga ya tshieya: Muntu udi mua kushila Watch Tower bukenji bua kuangata mfranga yende ya tshieya anyi ya pansio.

Konte ya ku banke: Muntu udi mua kufundisha konte yende ya ku banke, mikanda ya mfranga mitekesha ku banke anyi konte yende ya mfranga ya pansio mu dîna dia Watch Tower anyi kufunda bua kuyifutabu Watch Tower dîba dia lufu luende, bilondeshile mikenji ya banke ya muaba udiye.

Bukenji bua kupeta bintu ne mfranga misombesha: Badi mua kupesha Watch Tower bukenji bua kupeta bintu ne mfranga misombesha bu dipa dia kashidi.

Mpangu ne Nzubu: Muntu udi mua kufila lupangu anyi nzubu wende bua kashidi, kadi utungunuka ne kusombamu patshidiye ne muoyo. Manyishe biro bia filiale bidi mu ditunga dienu kumpala kua kumupesha lupangu anyi nzubu.

Dipa dia kufuta ku tshidimu: Etshi ndipa dia muntu wangata makuta anyi mikanda ubifila kudi biro bia Bantemu ba Yehowa. Pashishe muntu eu (anyi mukuabu udiye musungule) udi utuadija kupeta makuta bungi kampanda tshidimu tshionso patshidiye ne muoyo. Tshidimu tshidi muntu ufila dipa edi badi bamupuekeshila mushinga wa bitadi bituye ufuta.

Testama ne bintu bilamisha: Muntu udi mua kushila Watch Tower bintu anyi mfranga yende, peshi kumupa bukenji bua kuangata bintu bidiye mulamisha. Badi mua kukepesha mushinga wa bitadi padi bintu bitekesha mu dîna dia tshitendelelu.

Anu mudi miaku eyi: “mapa malongolola” ileja, mapa a mushindu eu atu alomba bua muntu adianjile kudilongolola. Bua kuambuluisha bantu badi bajinga kukuatshisha mudimu udi Bantemu ba Yehowa benza pa buloba bujima ne mapa malongolola, mbapatule kakanda ka mu Anglais ne mu tshiena-Espagne kadi ne tshiena-bualu tshia ne: Charitable Planning to Benefit Kingdom Service Worldwide (Mapa malongolola bua kukuatshisha mudimu wa Bukalenge wa pa buloba bujima). Bavua bafunde kakanda aka bua kuleja mishindu mishilangane idibu mua kufila mapa ne bintu bia bumpianyi. Kunyima kua bantu ba bungi bamane kubala kakanda aka ne bayukile ne aba batu babapesha mibelu mu malu a mikenji anyi a bitadi, mbafike ku dikuatshisha mudimu wa Nzambi ne wa diambuluisha bantu udi Bantemu ba Yehowa benza pa buloba bujima, ne bungi bua makuta a bitadi biabu avuabu bafuta mbukepele. Udi mua kulomba kakanda aka ku Charitable Planning Office (Biro bia Mapa Malongolola).

Bua kumanya malu makuabu, udi mua kufundila Charitable Planning Office anyi kuela nshinga mu adrese udi kuinshi eku, peshi ku biro bia Bantemu ba Yehowa bidi bitangila mudimu mu ditunga dienu.

Charitable Planning Office

Watch Tower Bible and Tract Society of Pennsylvania

100 Watchtower Drive

Patterson, New York 12563-9204

Telephone: (845) 306-0707

[Tshimfuanyi mu dibeji 19]

Bakudimunyi ba muakulu wa Miskito ku Betele wa Nicaragua