Mbikole bua kudipuekesha

BANTU ba bungi badi bamone didipuekesha bu didi kadiyi ne muaba matuku etu aa. Bantu badibu basue kutua makumbu ne kunemeka badi anu aba badi benza muabu muonso bua kuditeka ku mutu kua bakuabu, badibandishi, badi benza muabu muonso bua kupeta bidibu bakeba. Bantu ba bungi mbasue kuikala ne nsombelu wa buena udi nende babanji ne bantu bende lumu, ki ngudi nende bena bupuekele ne bapele to. Bantu badi ne bubanji batu baditumbisha bamba mudibu bapete bubanji ebu ku bukole buabu nkayabu. Pamutu pa kudipuekeshabu, badi baditumbisha bua malu manene adibu benza.

Mukebuludi mukuabu wa mu ditunga dia Canada udi wamba ne: mu ditunga diabu mudi “lungenyi lua didileja ne diditumbisha.” Bakuabu badi bela meji ne: tudi munkatshi mua bantu badi bangata kuditumbisha ne mushinga wa bungi kupita kuikala ne nsombelu mushindame. Ba bungi ba kutudi badi bitaba ne: lelu eu bantu badi batangila anu malu abu nkayabu. Mu muaba wa mushindu eu, didipuekesha kadiena dimueneka bu ngikadilu muimpe to.

Nansha nanku, bantu ba bungi badi bitaba ne: budipuekeshi ngikadilu muimpe bua bakuabu bualu mbitekete bua kusomba ne bantu badi badipuekesha. Kadi lelu eu udi bantu bakeba anu kuikala ku mutu kua bakuabu, bamue badi batshina bua kudipuekesha bualu badi mua kulua kubamona bu batebelele.

Mukanda wa Nzambi ukavua mudianjile kumanyisha ne: mu matuku etu aa bantu nebikale ‘baditumbishi, badileji.’ (2 Timote 3:1, 2) Kuenaku umona ne: mulayi eu udi wenda ukumbana anyi? Udi umona ne: mbimpe kuikala ne budipuekeshi anyi? Peshi udi wela meji ne: bantu badi mua kumona muntu udi udipuekesha bu mutebelele udibu mua kutatakaja mudibu basue.

Mukanda wa Nzambi udi utuleja malu mimpe adi atufikisha ku diangata didipuekesha ne mushinga ne kuikala ne budipuekeshi. Udi uleja mmuenenu muimpe utudi ne bua kuikala nende bua ngikadilu eu ne utulomba bua kuikala nende, ne uleja ne: didipuekesha dilelela didi tshimanyinu tshia bukole, ki mbutekete nansha. Tshiena-bualu tshidi tshilonda netshiumvuije malu aa.

[Tshimfuanyi mu dibeji 3]

Mmunyi mutudi ne bua kudiumvua bua bitudi benze?