Utuku uyisha misangu yonso iutu upeta mushindu anyi?

BAKELA balongi ba mu tulasa tua bikadilu mu ditunga dia Pologne diteta divua ne tshiena bualu etshi: “Bulelela bua menemene butuku anyi?” Bavua bambile balongi bavua ne bua kuenza diteta adi ne: “Katuena dijinga ne bulelela bua menemene to. Kakuena muntu udi nabu dijinga to. Bulelela bua menemene kabuena muaba nansha umue to.” Mulongi mukuabu wa bakaji wa bidimu 15 Ntemu wa Yehowa diende Agata wakangata tshikondo etshi bu mpunga muimpe bua kulongesha bantu malongesha etu.

Kumpala kua Agata kulongololaye diteta edi, wakanji kusambila bua Yehowa amuambuluishe ne pashishe kutuadijaye kukeba malu avuaye ne bua kufunda. Kupetaye ngenyi mu Tshibumba tshia Nsentedi tshia dia 1 Kashipu 1995. Yeye kutela lukonko luvua Yezu muele Pontio Pilato lua ne: “Bulelela ntshinyi?” (Yone 18:38) Lukonko luvuaye mufunde elu luvua luleja lungenyi lubi lua Pilato bienze anu bu udi wamba ne: ‘Bulelela ntshinyi? Kakuena tshintu tshia mushindu eu to.’ Agata wakafunda ne: “Lukonko lua Pilato elu luakamvuluija tshivuabu batulombe bua kuenza mu diteta.”

Pashishe kuakulaye pa tshilumbu tshia lungenyi ludi nalu bantu lua ne: bualu budi mua kuikala bulelela kudi muntu umue, budi mua kuikala bua dishima kudi mukuabu ne bonso babidi badi mua kuikala bamba bulelela. Kuelaye lukonko elu: “Nnganyi wa kutudi udi mua kujinga bua kubuela mu ndeke bikalaye kayi mutuishibue ne: mikenji ya dienda mulu mmilelela bushuwa?” Pashishe kuakulaye bua Bible wamba ne: “Malu adi mu Dîyi dia Nzambi mmalelela ne nga kueyemena bushuwa.” Kulejaye ne: bantu bonso badi bakeba bulelela bua menemene ne muoyo mujima, badi ne bua kuikala ne lutulu bua kubupeta.

Agata wakapeta dipoloma dia pa buadi ne kupetaye mushindu wa kuakulaye pa tshiena-bualu kampanda kumpala kua balongi bonso. Balongi babu ba bungi bakitaba bua abalongeshe Bible. Agata udi ne disanka dia bungi bua muvuaye muangate mpunga eu bu tshikondo tshimpe tshia kuyisha bantu ba bungi malongesha etu. Eyowa, kukeba mpunga yonso udi umueneka bua kuyisha bantu kudi mua kupatula bipeta bimpe. Mpunga kayi uwakeba bua kuyisha?