“Itabayiku tuntu tukese etu”

MÊYI aa avua mu mukanda kampanda uvua muanetu wa bakaji Alla mutume ku Betele wa Bantemu ba Yehowa wa mu ditunga dia Russie. Mukanda eu uvua mu dibuki dinene dia nshesheta ivua muanetu eu muluke.

Muanetu eu uvua ne bidimu 67, ne uvua mu tshisumbu kampanda tshia ku Est kua Russie. Alla uvua Ntemu wa Yehowa kukadi bidimu bipite pa 10, ne uvua muambi wa lumu luimpe wa tshisumi. Kadi disama dikole diakatekesha mikolo yende. Nansha nanku, dinanga diakamusaka bua kutelela bena Kristo nende bilamba anu bu muvua Dôka muenze mu bidimu lukama bia kumpala.​—Bienzedi 9:36, 39.

Alla wakafunda ne: “Tshiena mua kunyungisha mikolo yanyi, kadi ndi mua kunyungisha bianza. Nunku, ndi mfundila bantu mikanda bua kubayisha.” Wakamba kabidi ne: “Mvua mudiambile ne: bu mundi mua kunyungisha bianza bianyi, nenduke nshesheta ya mashika. Ndi musue nuyipeshe bana betu batu baya kuibaka Nzubu ya Bukalenge mu miaba idi mashika makole, bu mudi ku Est kua ditunga dietu ne mu Sibérie.”

Yezu Kristo wakamba bua bayidi bende balelela ne: ‘Bua bualu ebu bantu bonso nebamanye ne: nudi bayidi banyi, binuasuangana nunku.’ (Yone 13:35) Dinanga dia buena divua Alla muleje edi, ntshimanyinu tshia bena Kristo balelela.