Ntshinyi tshitu ne mushinga mu nsombelu webe?

KENNY mmuena mudimu mu kumpanyi munene, uvua ne mashinyi a mushinga mukole ne uvua mu nzubu muimpe mu kartshie ka babanji ka mu tshimenga kampanda. Uvua kabidi musue manaya a bantu bapatuka mu ndeke muikale muulu ne badilekelela ne makumbi. Pavuaye udiela nanku, uvua umvua bimpe be! Kadi uvua ne disanka dilelela anyi? Bilondeshile tshikandakanda kampanda, Kenny wakamba ne: ‘Lelu eu unkadi ne bidimu 45 tshiena ne bua nsongo bundi muenze. Kuikala kuanyi ne muoyo kakuena ne mushinga to.’​—The Wall Street Journal.

Elyn yeye uvua mudifile bikole mu dinaya dia diselemuka pa neje, e kuluaye kumanyika bikole. Wakapeta tshivuaye ukeba. Pabi wakadilakana wamba ne: “Kadi masanka onso amvua ngelela meji mmaye penyi? Mvua ndiumvua nkayanyi. Bukulakaje nebunkuate; nansha mumvua ne makuta a bungi ne mupete tshimvua nkeba, nsombelu wanyi neikale anu tshianana.”

 Hideo uvua pende mumanyike bikole bualu uvua uzola bintu bimpe menemene. Kavua upanyisha bintu biende ebi, umona kubipanyisha bu dinyanga mudimu wende. Wakafua ne bidimu 98. Kadi kumpala kua kufuaye, wakafila bintu biende bia bungi mu nzubu kampanda utubu balamina bintu bia kale. Wakadifila ne muoyo mujima mu mudimu wende eu. Kadi kavua ne disanka, bualu uvua mumanye ne: kavua mua kuenza mudimu eu bu muvuabi bikengela to.

Bamue bantu batu benza muabu muonso bua kuambuluisha bakuabu. Tuangate tshilejilu tshia muntu kampanda uvua utangila kumpanyi munene utu wenzeja filme mu tshimenga tshia Hollywood mu États-Unis. Nunku uvua muende lumu bikole ne uvua musombele mu kartshie ka bena kantu ku bianza. Pavuaye muye mu dikisha mu ditunga dia Cambodge, muana wa bakaji mukuabu wakalua kumulomba makuta pavuaye udia mu nganda kampanda mu tshimenga tshia Phnom Penh. Wakamupesha dolare ne maluvu a nsukadi. Muana eu kusanka bikole. Kadi dituku diakalonda wakalua ku nganda au bua kulomba kabidi makuta. Muntu au kumonaye ne: muana eu kavua ne dijinga anu ne makuta to.

Kunyima kua tshidimu, wakalekela mudimu wa kuenzeja filme ne kutuadija kuambuluisha bapele ba mu Cambodge. Wakashisha tulasa tuvua ne miaba ya kulala ne biakudia. Kadi katu anu udiumvua ne disanka to, bualu ntatu idiye upetangana nayi idi anu yenda ivula.

Bantu bonso banayi batudi batele aba bavua bamanye tshivuabu basue kuenza mu nsombelu wabu. Kadi pavuabu batshikumbaja, bavua badimona tshianana. Kadi, wewe udi ukeba tshinyi? Ntshinyi tshitu pa muaba wa kumpala mu nsombelu webe? Udiku mutuishibue ne: kuakunyingalala pashishe bua mushindu uudi wenza malu lelu anyi?