Bantu mu buobumue pa buloba: Mmunyi mudibi bienzeka?

MMUNYI muudi mua kumvuija muaku “buobumue”? Bua bamue bantu muaku eu udi umvuija dibenga kuikalaku dia bimvundu. Tshilejilu, matunga abidi anyi a bungi wowu madie tshipungidi ne manyishe bua kusomba mu ditalala, tudi mua kuamba ne: adi mu buobumue. Kadi mbuobumue bulelela anyi? Tòo.

Tshilejilu, katshia ku kale bantu bakadi benze bipungidi bia ditalala binunu ne binunu ne babishipe. Bua tshinyi? Bualu pa tshibidilu bamfumu ba pa buloba batu baditatshisha bua bukokeshi buabu pamutu pa kuditatshisha bua ditalala anyi buobumue. Pashishe, amue matunga atu ne buôwa bua tshidi mua kuenzekela wowu malekele basalayi bawu badisangisha ne ba matunga makuabu.

Ke bualu kayi ki mbulelela bua ne: matunga abidi wowu kaayi aluishangana mmumue ne: adi mu ditalala ne buobumue. Tshilejilu, bantu babidi bobu batekelangane bingoma, tudiku mua kuamba ne: badi mu ditalala anu bualu ki mbashipangane anyi? Mu kuamba kuimpe, kabena mu ditalala to. Ke nsombelu udi mu matunga a bungi lelu eu. Dibenga kueyemenangana didi divulangane ndisake bantu ku dikala ne buôwa bua ne: dimue dituku nebele bombe mu bantu. Tshia kuenza ntshinyi bua kuepuka njiwu ya mushindu eu?

Tshipungidi tshia buobumue bua buôwa bua bombe

Bantu ba bungi mbeyemene tshipungidi tshidi tshikandika dienza bingoma bia mbutula. Bavua benze tshipungidi etshi mu 1968, ne tshidi tshibenga dienza dia bombe mu matunga adi kaayi manji kuikala nayi ne tshibenga divudija dia bombe eyi mu matunga akadi nayi. Mpindieu matunga mapite pa 180 mmitabe tshipatshila tshia tshipungidi etshi ne tshidi tshiya kumpala mu disaka bantu ku dilekela bingoma.

Nansha mudibi bimueneka ne: matunga aa adi ne tshipatshila tshimpe, bamue bantu badi bamona tshipungidi etshi bu tshidi tshisua kumbusha amue matunga munkatshi mua “tshisumbu tshia benji ba bombe eyi” bua matunga aa kaikadi ne bombe idi mua kuayisha kumpala. Ke bualu kayi bidi bienza buôwa bua ne: amue matunga avua manyishe tshipungidi etshi adi mua kufika ku ditshibenga. Bushuwa, amue matunga adi amona matunga adi madie tshipungidi etshi bu adi ne kansungansunga kakole bualu adi akandika makuabu bua kaenji bombe bua wowu kumona mua kudikuba.

Tshidi tshikolesha bualu ebu ne pamuapa tshivudija njiwu ntshia se: ki mbakandike  ditunga nansha dimue bua kuenza biamu bidi bipatula nzembu ne bintu bitubu benza nabi bombe to. Muanda eu mmusake bamue bantu ku dikala ne buôwa bua ne: matunga adibu bamba mudiwu enza mudimu ne biamu bidi bipatula nzembu ne bintu bitubu benza nabi bombe bua malu makuabu adi mua kuikala enza bombe ya mbutula mu musokoko.

Nansha matunga akavua madianjile kuikala ne bombe eyi adi mua kuikala abenga kunemeka tshipungidi etshi. Bakonkononyi ba malu badi bamba ne: ndipanga dia lungenyi bua kutekemena ne: matunga akavua ne bingoma bia bungi bia bombe adi mua kubiosha anyi kukepesha nansha bungi buabi. Bilondeshile mukanda kampanda, bua “kukumbaja bualu ebu . . . bidi bikengela bua matunga adi kayi apetangana mpindieu ikale mu diumvuangana dikole, pabi [mbikole bua kuitaba ne:] bualu ebu budi mua kuenzeka.”

Malu onso adi bantu benze bua kukeba buobumue (nansha wowu menza ne muoyo umue) mmapangile. Ne bualu ebu kabuena bukemesha balongi ba Bible to, bualu Dîyi dia Nzambi didi diamba ne: ‘Muntu kêna ne bukole munda muende bua kuendesha nabu biendedi biende bimpe.’ (Yelemiya 10:23) Bible udi wamba kabidi ne: ‘Njila udiku udi mululame ku mêsu kua muntu, kadi [njila ya lufu idi ku ndekelu kuende].’ (Nsumuinu 16:25) Mbulamatadi ya bantu idi ne mikalu mu malu adiyi mua kuenza bua kufila buobumue. Nansha nanku, tudi ne ditekemena.

Mufidi wa buobumue bulelela

Mu Bible mudi mulayi wa Nzambi udi uleja ne: bantu nebasombe mu buobumue pa buloba kabiyi bua diditashisha dia muntu to. Mufuki uvua mulongolole bua bantu basombe mu ditalala pa buloba bujima ke wakumbaja tshidi muntu mupangile. Bamue bantu badi mua kumona bikole bua kuitaba muanda eu. Kadi disua dia Nzambi dia ku ntuadijilu divua bua bantu bikale ne muoyo pa buloba mu ditalala ne mu buobumue. * Mvese ya bungi ya mu Bible idi ijadika ne: dijinga edi ki ndianji kushintuluka to. Tukonkononayi mvese mikese patupu:

• ‘Luayi bienu, nuenu bantu, nutangile bienzedi bia Yehowa, bu muakuenzejaye dibutuka dia bungi pa buloba. Yeye udi ulekesha mvita bua ijike too ne ku mfudilu kua buloba; udi utshibula buta, udi ukosa difuma bitupa bitupa; udi wosha makalu a mvita mu kapia.’​—MUSAMBU 46:8, 9.

• ‘Kabiena bienzela bikuabu bintu bibi, kabiena bishipa bikuabu, mu mukuna wanyi wa tshijila wonso; bualu bua buloba nebuikale buule tente ne kumanya kua Yehowa, bu mudi mâyi a mu mâyi manene abuikila miaba yawu yonso.’​—YESHAYA 11:9.

• ‘Yeye wakumina lufu tshiendelele; ne Mukalenge Yehowa neakupule binsonji ku mêsu kua bantu bonso; neumushe tshipendu tshidibu bapenda natshi bantu bende, utshimusha pa buloba buonso; bualu bua Yehowa wakuamba dîyi edi.’​—YESHAYA 25:8.

• ‘Bu mudi mulayi wende tudi tutekemena diulu dipiadipia ne buloba bupiabupia mudi buakane buikalemu.’​—2 PETELO 3:13.

 • ‘[Nzambi] neakupule tshinsonji tshionso ku mêsu kuabu, ne lufu kaluena luikalaku kabidi, madilu kaena ikalaku kabidi, nansha muadi, nansha kanyinganyinga kabidi; malu a kumudilu akumuka.’​—BUAKABULUIBUA 21:4.

Milayi eyi mmilelela. Bua tshinyi? Bualu bu mudi Yehowa Nzambi Mufuki, udi ne bukole ne mushindu wa kubueja buobumue mu bantu. (Luka 18:27) Udi kabidi ne dijinga dia kuenza nunku. Bushuwa, Bible udi ubikila bualu ebu ne: ‘disanka dia Nzambi dimpe bua kusangisha bintu bionso mu Kristo, ne bidi mu diulu ne bidi panshi pa buloba.’​—Efeso 1:8-10.

Mulayi wa Nzambi wa ‘buloba bupiabupia’ mudi “buakane buikalemu” ki ngua dishima to. (2 Petelo 3:13) Bilondeshile dîyi didi Yehowa Nzambi mulaye, udi wamba ne: ‘Kadiena dipingana kundi patupu, kadiyi dianji kuenza muanda undi musue dienze, kadiyi dianji kujikija muanda ungakaditumina.’​—Yeshaya 55:11.

Dîyi dia Nzambi ndisangishe bantu mu buobumue

Anu bu mutukavua baleje mu tshiena-bualu tshishale, bitendelelu mbitapulule bantu pamutu pa kubasangisha mu buobumue. Bidi bikengela tuetu kutangila bualu ebu bimpe, bualu bu mutudi tuitaba ne: Mufuki udiku, kabienaku biakanyine bua bantu badi bamutendelela kuikalabu mu ditalala ne mu buobumue anyi? Ke mudibi kakuyi mpata.

Bitendelelu bidi bitapulula bantu kabiena biangatshisha Yehowa Nzambi ne Dîyi diende bimpe to. Kadi Dîyi diende edi didi dipisha bitendelelu bidi bikankamija ngenyi ya bantu bua kufila buobumue pamutu pa kueyemena tshidi Nzambi mulongolole. Yezu wakabikila bamfumu ba bitendelelu ba mu tshikondo tshiende ne: “bena lubombo” ne wakabambila ne: ‘Yeshaya wakamba bulelela bua bualu buenu ne: Bantu aba badi bannemeka ne mishiku yabu, kadi mitshima yabu kayena kundi, idi kule. Badi bantendelela tshianana, badi bayisha bantu diyisha dia mikenji ya bantu.’​—Matayo 15:7-9.

Kadi tshitendelelu tshilelela tshidi tshisangisha bantu mu buobumue. Muprofete Yeshaya wakadianjila kuamba ne: ‘Mu matuku atshidi alua mukuna wa nzubu wa Yehowa neujadikibue bu mukuna mupite mikuabu bule, neubandishibue pa mutu pa mikuna mikese; ne ba mu bisamba bionso nebabuelemu. Yeye nealumbulule bilumbu bia munkatshi mua bisamba bia bantu, neakosele bantu ba bungi bilumbu biabu; bobu nebafule nkasu ya kudima nayi ku miele yabu ya mvita, nebafule miele ya kukosa nayi matamba mafubidila a mitshi ku mafuma abu; tshisamba tshikuabu katshiena tshibisha muele wa mvita bua kuluisha nawu tshisamba tshikuabu, ne kabena bayila lungenyi lua kuluangana nalu mvita kabidi.’​—Yeshaya 2:2, 4.

Lelu eu mu matunga mapite pa 230, Bantemu ba Yehowa badi batumikila mikenji ya Yehowa Nzambi idi itangila mushindu wa kusomba mu buobumue. Ntshinyi tshidi tshibambuluishe bua kuikalabu mu buobumue? Mupostolo Paulo wakamba ne: ‘Nuluate dinanga, didi tshisuikidi tshia malu onso a buakane’ anyi a buobumue. (Kolosai 3:14) Muaku wa mu tshiena Greke uvua Paulo muangate bua kuakula bua “tshisuikidi” udi mua kuleja bituangaji bia mubidi wa muntu. Bituangaji ebi bidi bikole anu bu nshinga ne bidi ne midimu ibidi ya mushinga mukole. Bidi biambuluisha bitupa bia mubidi bua bikale pa muaba wabi, ne bidi bituangaja mifuba.

Ke tshidi dinanga dienza. Ngikadilu eu kêna anu wepula bantu ku dishipangana patupu to. Dinanga dia buena dia Kristo didi diambuluisha bantu ba miaba mishilangane bua kusomba pamue mu ditalala. Tshilejilu, kutumikila mêyi a Yezu a mushinga mukole kudi kuambuluisha bantu bua kusomba mu ditalala. Anu bu mudibi bileja mu Matayo 7:12, Yezu Kristo wakamba ne: “Nuenzele bantu malu onso anudi basue banuenzele.” Kutumikila mêyi aa nkuambuluishe bantu ba bungi bua kulekela kansungansunga.

‘Nusuangane’

Bantemu ba Yehowa mbadisuike bua kuleja mudibu bayidi ba Kristo pa kulonda mêyi akamba Yezu aa: ‘Bantu bonso nebamanye ne: Nudi bayidi banyi, binuasuangana.’ (Yone 13:35) Dinanga dia mushindu eu ndimueneke mu bikondo bia bimvundu bia bisamba ne bia malu a  tshididi. Tshilejilu, pavua bena bisa bikuabu bashipangana mu ditunga dia Rwanda mu 1994, Bantemu ba Yehowa bakalejangana bobu dinanga. Bantemu ba mu tshisa tshia Hutu bakateka mioyo yabu mu njiwu bua kukuba bana babu ba Tutsi!

Bushuwa, katuena mua kutekemena ne: matunga a pa buloba adi mua kunangangana mu mushindu wafila buobumue pa buloba bujima to. Bilondeshile Bible, Nzambi ke wenza bualu ebu mu tshikondo tshidiye musungule. Kadi nansha lelu eu, bantu badi mua kunangangana bikole ne kuikala mu buobumue.

Mu tshidimu tshishale, Bantemu ba Yehowa mbenze mêba mapite pa muliyare mujima mu mudimu wa kuya kutangila bantu bua kuyukila nabu malu a mu Bible ne kubaleja mushinga udiwu nawu mu nsombelu wa ku dituku dionso. Dimanya dilelela dia Dîyi dia Nzambi ndiambuluishe bantu ba bungi bua kuikalabu mu buobumue, bamue ba kudibu bavua bakinangane kumpala. Mukantshi mua bantu aba tudi mua kutela anu ba Arabe ne bena Yuda, bena Amerike ne bena Turquie, bena Allemagne ne bena Russie.

Udiku musue kumanya malu a bungi a mushindu udi Dîyi dia Nzambi dikale ne bukole bua kusangisha bantu mu buobumue anyi? Biwikala musue, keba Bantemu ba Yehowa ba muaba uudi, anyi bafundila mu adrese umue ku idi mu dibeji 2.

[Mêyi adi kuinshi]

[Lungenyi lunene lua mu dibeji 4]

Bantu mbenze bipungidi bia ditalala binunu ne binunu ne babishipe

[Lungenyi lunene lua mu dibeji 7]

Ditumikila dia mêyi a mu Bible didi dikumbaja tshidi mbulamatadi ya bantu mipangile

[Tshimfuanyi mu dibeji 5]

Dîyi dia Nzambi didi dileja Mufidi wa buobumue bulelela

[Tshimfuanyi mu dibeji 7]

Bantemu ba Yehowa ba Hutu ne ba Tutsi badi bibaka pamue muaba wa ntendelelu