Nkonko ya babadi

Mmunyi mudi muena Kristo ne bua kumona bulembi ne diloba?

Bible ki mmubenge bulembi anyi diloba to. (Dutelonome 14:4, 5, 9, 20; Matayo 17:27; Yone 21:6) Kadi, bena Kristo badi bamanye mua kulemba anyi kuloba badi ne bua kulonda mêyi a mu Bible mu bualu ebu.

Nzambi wakanyishila Noa ne ndelanganyi yende bua bashipe nyama ne badie minyinyi yayi, kadi bavua ne bua kuyikosa muminu kumpala kua kuyidia. (Genese 9:3, 4) Mukenji eu uvua uleja ne: bavua ne bua kunemeka muoyo wa nyama bualu mmufume kudi Nzambi. Ke bualu kayi bena Kristo kabena mua kushipa nyama patupu bua manaya anyi bua kudisankisha to.​—Nsumuinu 12:10.

Kudi bualu bukuabu butudi ne bua kukonkonona pa bidi bitangila ngikadilu wetu. Bapostolo bavua balobi bavua basanka pavuabu bakuata mishipa ya bungi. Kadi kakuena muaba nansha umue mu Bible udibu batuambila ne: bavua badileja bua dimanya kuloba anyi dilemba diabu peshi bajinga kutembangana ne bakuabu bua kuleja mudibu balume ba makanda anyi mudibu bamanye mua kuloba ne kukuata mishipa anyi nyama anu bualu bavua bumvue mua kubikuata pabu kabayi nabi dijinga.​—Musambu 11:5; Galatia 5:26.

Ke bualu kayi, tudi mua kudiebeja ne: ‘Ndiku tshilejilu kudi bakuabu pa kunemeka mushindu udi Yehowa umona muoyo anyi? Meji anyi mmatume anu ku dilemba anyi diloba anyi? Pantu nyukila ne bakuabu, ntu ngakula anu bua dilemba ne diloba anyi? Nsombelu wanyi udiku uleja ne: kulemba anyi kuloba ke kundi ngangata ne mushinga anyi peshi udi uleja ne: ndi musadidi wa Nzambi? Kudi kumfikisha ku didia bulunda ne bantu badi kabayi bena Kristo anyi kunsaka bua kulengulula dîku dianyi?’​—Luka 6:45.

Bamue bana betu batu baya mu bulembi anyi mu kuloba bua kupeta biakudia badi mua kulengulula midimu yetu ya buena Kristo mu bikondo bia kuloba anyi bia kuenza bulembi bela meji ne: badi benza bimpe. Kadi tudi tuleja mutudi bitabuje Nzambi ne bamueyemene patudi katuyi tulekela tshintu nansha tshimue tshiangata muaba wa malu a Nzambi. (Matayo 6:33) Bualu bukuabu, bena Kristo batu batumikila mikenji yonso ya “Kaisa” idi itangila mudimu wa bulembi anyi wa diloba nansha bamfumu balondakaja bualu ebu anyi kabayi babulondakaja.​—Matayo 22:21; Lomo 13:1.

Bamue bena Kristo mbashintulule ngelelu wabu wa meji bua kumona mua kulonda mmuenenu wa Yehowa pa tshilumbu tshia bulembi ne diloba ne kutumikila mikenji yende. (Efeso 4:22-24) Ku lukuabu luseke, tudi basue kunemeka kondo ka muoyo ka bakuabu. Mu muanda eu tudi tuanyisha mubelu eu wa mupostolo Paulo: ‘Katulumbuluishanganyi kabidi, kadi mbimpe dilumbulula dienu dikale bua muntu kateki buteyi anyi tshilenduishi mu njila wa muanetu wa mu Kristo.’ (Lomo 14:13) Kuleja dinanga dilelela dia mushindu eu ne kanemu kudi kukolesha ditalala mu tshisumbu ne kudi kusankisha Mufuki wetu udi mutupeshe muoyo.​—1 Kolinto 8:13. *

[Mêyi adi kuinshi]