Udi ku luseke lua bukokeshi bua Yehowa anyi?
Udi ku luseke lua bukokeshi bua Yehowa anyi?
‘Nuambe munkatshi mua bisamba bia bantu ne: Yehowa udi ukokesha.’—MUSAMBU 96:10.
1, 2. (a) Mmuanda kayi wa tshikuma wakenzeka bu mu Kasuamansense 29? (b) Ntshinyi tshivua muanda au umvuija bua Yezu?
MUANDA wa tshikuma uvua kauyi muanji kuenzeka pa buloba wakenzeka bu mu Kasuamansense 29. Mufundi wa mukanda wa Matayo udi wamba ne: ‘Pakamubatizabu nunku, Yezu wakumuka mu mâyi; ne monayi, diulu diakamubulukila, [Yone Mubatiji] wakatangila nyuma wa Nzambi upueka bu nyunyu wa nkutshi wikila [Yezu]; ne umvuayi, dîyi diakafuma mu diulu ne: Eu udi Muana wanyi munanga, yeye udi usankisha bimpe.’ Eu uvua umue wa ku mianda mikese ivuabu bafunde kudi bafundi bonso banayi ba Evanjeliyo.—Matayo 3:16, 17; Mâko 1:9-11; Luka 3:21, 22; Yone 1:32-34.
2 Ditshikijila Yezu nyuma muimpe patoke diakaleja muvuaye Muela manyi, mmumue ne: Masiya anyi Kristo. (Yone 1:33) Ndekelu wa bionso “ndelanganyi” uvuabu balaye wakamueneka! Muntu eu uvua muimane kumpala kua Yone Mubatiji ke yeye uvuabu ne bua kusuma ku tshikankanyi kudi Satana ne uvua ne bua kuboza mutu wa muluishi eu munene wa Yehowa ne bukokeshi buende. (Genese 3:15) Kubangila anu pinapu, Yezu uvua mumanye bimpe ne: uvua ne bua kudienzeja bua kukumbaja disua dia Yehowa didi ditangila bukokeshi ne Bukalenge buende.
3. Mmunyi muakadilongolola Yezu bua mudimu uvuaye ne bua kuenza bua kulamata ku luseke lua bukokeshi bua Yehowa?
3 Bua kudilongolola bua mudimu uvuabu bamupeshe, ‘Yezu wakadi muwule tente ne nyuma muimpe, wakafuma ku Yadene, [ne] nyuma wakamulombola mu tshipela.’ (Luka 4:1; Mâko 1:12) Mu matuku 40 au, Yezu wakapeta dîba dia kuelangana meji bikole bua mpata ivua Satana mueleshe bukenji budi nabu Yehowa bua kukokesha ne bua mudimu uvuaye ne bua kuenza bua kumona mua kulamata ku luseke lua bukokeshi bua Yehowa. Tshilumbu atshi tshidi tshitangila bifukibua bionso bia meji bidi mu diulu ne bidi pa buloba. Ke bualu kayi tudi ne bua kuelangana meji bua nsombelu wa lulamatu wa Yezu ne kumona tshitudi ne bua kuenza bua kuleja ne: tuetu petu tudi basue kuikala ku luseke lua bukokeshi bua Yehowa.—Yobo 1:6-12; 2:2-6.
Satana udi welesha bukokeshi bua Yehowa mpata patoke
4. Mbualu kayi buakenza Satana bua kuelesha bukokeshi bua Yehowa mpata patoke?
4 Bushuwa, Satana uvua mumone bimpe malu onso atudi tufuma ku ditela aa. Diakamue, yeye kuela “muana” wa ‘mukaji’ wa Nzambi mvita. (Genese 3:15) Satana wakateta Yezu misangu isatu, umuambila bua kuenzaye malu avua amueneka bu avua mua kumukuatshisha pamutu pa avua Tatuende musue bua kuenzaye. Nangananga pa diteta disatu ke pavua Satana mueleshe bukokeshi bua Yehowa mpata patoke. Wakaleja Yezu ‘makalenge onso a pa buloba ne butumbi buawu,’ kumuambilaye ne dikamakama dionso ne: ‘Nenkupe bintu ebi bionso, biwatua binu biebe panshi biwankukuila.’ Bu muvua Yezu mujadike bimpe ne: Diabolo uvua ne bukokeshi ku mutu kua ‘makalenge onso a pa buloba,’ wakamuleja luseke luvuaye mulamate mu tshilumbu tshia bukokeshi pakamuandamunaye ne: ‘Satana, umuka; bualu bua bakafunda dîyi ne: Kukuila Mukalenge Nzambi webe, umuenzele yeye nkayende mudimu.’—Matayo 4:8-10.
5. Mmudimu mukole kayi uvua Yezu ne bua kukumbaja?
5 Nsombelu wa Yezu wakaleja patoke ne: buende yeye, kulamata ku luseke lua bukokeshi bua Yehowa ke kuvua tshipatshila tshiende tshia kumpala. Yezu uvua mumanye bimpe ne: uvua ne bua kushala ne lulamatu too ne pavua Satana ne bua kumukebela lufu (lukavuabu bamanyishe bu disuma ku tshikankanyi tshia “muana” wa mukaji), bua kumona mua kujadika ne: nkokeshilu wa Nzambi ke uvua muakane. (Matayo 16:21; 17:12) Uvua kabidi ne bua kuyisha bantu ne: Bukalenge bua Nzambi ke budi Yehowa mupeshe bukokeshi bua kutekesha ntomboji Satana ne bua kupingaja ditalala ne bulongame mu bifukibua bionso. (Matayo 6:9, 10) Ntshinyi tshiakenza Yezu bua kukumbaja mudimu mukole eu?
‘Bukalenge bua Nzambi bukadi pabuipi’
6. Mmunyi muakamanyisha Yezu ne: Bukalenge ke tshintu tshikala Nzambi mua ‘kubutula natshi midimu ya Diabolo’?
6 Bua kutuadija, ‘Yezu wakalua mu Galela, wenda wambila bantu lumu luimpe lua Nzambi, wakamba ne: Matuku akukumbana, bukalenge bua Nzambi [bukadi pabuipi].’ (Mâko 1:14, 15) Bushuwa, Yezu wakamba ne: ‘Bundi nabu mbua kuamba lumu luimpe lua bukalenge bua Nzambi; buakantuminabu mbualu ebu.’ (Luka 4:18-21, 43) Yezu wakatambakana mu nseke yonso ya buloba, ‘wenda ne lumu luimpe lua bukalenge bua Nzambi.’ (Luka 8:1) Yezu wakenza kabidi malu a kukema a bungi, kudishaye bisumbu bia bantu, kubatamijaye mpepele mikole, kondopaye babedi ne kubishaye bafue. Ku diambuluisha dia bishima ebi, Yezu wakaleja ne: Nzambi udi mua kulongolola malu onso ne makenga bidi bifumine ku buntomboji bua mu Edene ne ‘kubutula midimu ya Diabolo.’—1 Yone 3:8.
7. Ntshinyi tshivua Yezu mulongeshe bayidi bende bua kuenza, ne kuakapatuka bipeta kayi?
7 Bua kumona mua kufikisha lumu luimpe ku diyishibua miaba yonso, Yezu wakasangisha kasumbu ka bayidi ba lulamatu ne kubalongeshaye mudimu au. Kumpala, wakabikila bapostolo 12 ne ‘kubatumaye bua kuambilabu bantu bualu bua bukalenge bua Nzambi.’ (Luka 9:1, 2) Pashishe, wakatuma bakuabu 70 bua kumanyishabu mukenji wa ne: ‘Bukalenge bua Nzambi buakulua pabuipi nenu.’ (Luka 10:1, 8, 9) Pakapingana bayidi aba ne kulubuilabu Yezu mushindu uvuabu bayishe bimpe, Yezu wakandamuna ne: ‘Ngakadi mmona Satana mukuluke mu diulu mupone bu muele wa mvula.’—Luka 10:17, 18.
8. Ntshinyi tshivua nsombelu wa Yezu uleja patoke?
8 Yezu Kristo wakadifila muende muonso ne kakapitshisha mpunga nansha umue bua kuyisha Bukalenge. Wakenza mudimu kayi wikisha butuku ne munya, kayi mene utangila malu a disanka diende to. Wakamba ne: ‘Mibuabua idi ne mena ayi, nyunyi ya mulu idi ne masua ayi; kadi Muana wa muntu kena ne pa kuladika mutu wende.’ (Luka 9:58; Mâko 6:31; Yone 4:31-34) Katupa kîpi kumpala kua lufu luende, Yezu wakamba ne dikima kumpala kua Pontio Pilato ne: ‘Ngakuledibua bua bualu ebu, ngakuluila pa buloba bualu ebu, bua kuamba malu malelela.’ (Yone 18:37) Yezu wakaleja mu nsombelu mujima ne: kavua mulue pa buloba anu bua kuikala mulongeshi munene anyi muenji wa bishima peshi mene bua kuikala Mupandishi wakadifila bua bakuabu patupu to, kadi mbua kulamata ku disua dia Mukalenge Yehowa ne bua kumanyisha bukole budi nabu Nzambi bua kukumbaja disua diende adi ku diambuluisha dia Bukalenge.—Yone 14:6.
“Bionso mbikumbane”!
9. Mmunyi muakafika Satana ndekelu wa bionso ku disuma “muana” wa mukaji wa Nzambi ku tshikankanyi?
9 Malu onso akenza Yezu bua Bukalenge kaavua asankisha Muluishi Satana Diabolo nansha. Satana wakateta njila ne njila ku diambuluisha dia “bana” bende ba pa buloba bena tshididi ne bena mu bitendelelu bua kushipa “muana” wa mukaji wa Nzambi. Satana ne bena diende bakatua Yezu mutu kutuadijila anu ku dîba diakaledibuaye too ne ku ndekelu kua muoyo wende pa buloba. Ndekelu wa bionso mu muvu wa Automne mu 33, dîba diakakumbana bua Muana wa muntu kufidibuaye mu bianza bia Muluishi eu bua kumusumaye ku tshikankanyi. (Matayo 20:18, 19; Luka 18:31-33) Miyuki ya mu Evanjeliyo idi ileja patoke muvua Satana musake bantu (kubangila ku Yudasa Isakaliote too ne ku bakuidi banene, bafundi, Bafalese ne bena Lomo) bua kupisha Yezu ne kumushipa lufu lubi pa mutshi wa makenga.—Bienzedi 2:22, 23.
10. Mbualu kayi bua mushinga wa bungi buakakumbaja Yezu ku diambuluisha dia lufu luende pa mutshi wa makenga?
10 Ntshinyi tshiudi uvuluka paudi wela meji bua Yezu pa mutshi wa makenga wenda upunga ne lufu ku kakese ku kakese? Pamuapa udi uvuluka mulambu wakafilaye bua kupikula bantu bena mpekatu. (Matayo 20:28; Yone 15:13) Udi mua kukema bua dinanga dia dikema divua Yehowa muleje pakafilaye mulambu eu. (Yone 3:16) Pamuapa udi umvua bu muakumvua kapitene ka masalayi a bena Lomo uvua mufike ku diamba ne: “Bulelela, eu wakadi Muana wa Nzambi.” (Matayo 27:54) Malu onso aa ki mmabi to. Ku lukuabu luseke, vuluka ne: mêyi a ndekelu a Yezu pa mutshi wa makenga avua ne: “Bionso mbikumbane”! (Yone 19:30, MMM) Mbinganyi bivua bikumbane? Nansha muvua Yezu mukumbaje malu a bungi ku diambuluisha dia muoyo ne lufu luende, kabivuaku tshia kumpala bua kukosa tshilumbu tshia bukokeshi bua Yehowa buvuaye muvuile pa buloba anyi? Kabavuaku badianjile kumanyisha ne: “muana” eu uvua ne bua kupeta diteta dikolakolayi dia kudi Satana bua kumona mua kumbusha bipendu bionso bivuabu bapende dîna dia Yehowa anyi? (Yeshaya 53:3-7) Aa avua majitu manene, kadi Yezu wakaakumbaja mu kanungu kuonso. Yezu uvua mukumbaje malu a dikema!
11. Ntshinyi tshienza Yezu bua kukumbaja tshishiki mêyi a buprofete a mu Edene?
11 Bua lulamatu luende, Yezu wakabishibua ku lufu ki mbu muntu to, kadi bu ‘nyuma udi upesha bantu muoyo.’ (1 Kolinto 15:45; 1 Petelo 3:18) Yehowa uvua mulaye Muanende mutumbishibue eu ne: ‘Ushikame biebe ku tshianza tshianyi tshia balume too ne pangavuija badi nebe lukuna ditanda dia muinshi mua makasa ebe.’ (Musambu 110:1) Munkatshi mua ‘badi nende lukuna’ aba mudi Satana, mushiminyinyanganyi wa malu munene ne bonso badi bikale “bana” bende. Bu mudi Yezu Kristo muikale Mukalenge wa Bukalenge bua Yehowa, neikale ntunga-mulongo mu dibutula bantomboji bonso badi miaba ya mulu ne badi pa buloba. (Buakabuluibua 12:7-9; 19:11-16; 20:1-3, 10) Pashishe mêyi a buprofete a mu Genese 3:15 neakumbane tshishiki pamue ne disambila dia Yezu divuaye mulongeshe bayidi bende ne: ‘Bukalenge buebe bulue. Benze pa buloba muudi musue bu mudibu benza mu diulu.’—Matayo 6:10; Filipoi 2:8-11.
Tshilejilu tshia kulonda
12, 13. (a) Diyisha dia lumu luimpe lua Bukalenge ndipatule bipeta kayi lelu? (b) Nkonko kayi itudi ne bua kudiela bituasua kulonda mu makasa a Kristo?
12 Lelu tudi tuyisha lumu luimpe lua Bukalenge mu matunga a bungi anu mukavua Yezu mumanyishe. (Matayo 24:14) Ke bualu kayi bantu miliyo mivule mbalambule mioyo yabu kudi Nzambi. Badi basanka bikole bua mabenesha ikala Bukalenge mua kubatuadila. Mbatekemene bua kuikala ne muoyo wa kashidi mu ditalala ne bupole mu mparadizu pa buloba, ne badi bambila bantu bakuabu bua ditekemena diabu edi ne disanka dionso. (Musambu 37:11; 2 Petelo 3:13) Udi umue wa bamanyishi ba Bukalenge aba anyi? Biwikala umue wabu, udi wa kuela kalumbandi. Kadi kudi bualu bukuabu budi yonso wa kutudi ne bua kuelela meji.
13 Mupostolo Petelo wakafunda ne: ‘Kristo wakakenga bua bualu buenu, wakanushila tshilejilu bua nuenu numulonde mu makasa ende.’ (1 Petelo 2:21) Tangila ne: muaba eu Petelo kakatela lukunukunu lua Yezu mu buambi anyi bulenga bua ndongeshilu wende to, kadi wakakula bua makenga ende. Bu muvua Petelo muikale mumonyi wa malu aa, uvua mumanye bimpe mushindu uvua Yezu muitabe ne muoyo mujima bua kukenga bua kumona mua kukokela bukokeshi bua Yehowa ne kujadika ne: Satana mmuena mashimi. Kadi mmu malu kayi mutudi mua kulonda mu makasa a Yezu? Tudi ne bua kudiebeja ne: ‘Ndiku ngitaba ne muoyo mujima bua kukenga bua kumona mua kulamata ku luseke lua bukokeshi bua Yehowa ne kubutumbisha anyi? Ndiku ndeja ku bienzedi bianyi ne ku lukunukunu luanyi mu buambi ne: kulamata ku luseke lua bukokeshi bua Yehowa ke tshipatshila tshianyi tshitambe bunene anyi?’—Kolosai 3:17.
14, 15. (a) Ntshinyi tshiakenza Yezu pakamuambilabu bua kuenza malu avua kaayi mimpe, ne bua tshinyi? (b) Ntshilumbu kayi tshitudi ne bua kuikala anu bavuluke? (Sakidila malu a mu kazubu kadi ne mutu wa bualu ne: “Lamata ku luseke lua Yehowa.”)
14 Dituku dionso tutu tupeta mateta ne mapangadika a kuangata manene ne makese. Mmunyi mutudi mua kumanya njila utudi ne bua kulonda? Tshilejilu, ntshinyi tshitudi tuenza patudi kumpala kua diteta dia kuenza bualu kampanda budi mua kunyanga buena-Kristo buetu? Pavua Petelo mubele Yezu bua adiumvuile luse, ntshinyi tshiakandamuna Yezu? Yezu wakamusamina ne: ‘Satana, yila kunyima kuanyi, wewe kuena welangana meji a malu a Nzambi, udi welangana meji anu a malu a bantu.’ (Matayo 16:21-23) Peshi padibu bakeba kutupesha mpunga wa kupeta mfranga ya bungi anyi bakeba kutubandisha muanzu ku mudimu kadi bifuanyike kutatshisha midimu yetu ya bena Kristo ne malanda etu ne Nzambi, tudi tuenza anu muvua Yezu muenze anyi? Pakamanya Yezu ne: bantu bavua bamone bishima biende bavua ‘bamba kumukuata ku bukole bua kumubueja mu bukalenge,’ wakabanyema ne lukasa luonso.—Yone 6:15.
15 Bua tshinyi musangu au ne misangu mikuabu kabidi Yezu wakabenga ne muoyo mujima bua kuenza bivuabu bamuambila? Bualu wakajingulula bimpe ne: kuvua bualu bua mushinga wa bungi kupita bukubi ne disanka diende yeye. Uvua musue kuenza disua dia Tatuende ne kulamata ku luseke lua bukokeshi bua Yehowa nansha bia munyi. (Matayo 26:50-54) Nenku, tuetu katuyi bavuluke tshilumbu tshia bukokeshi bua Yehowa misangu yonso anu muvua Yezu mutshivuluke, kabiakutukolela bua kutupa ku mikenji anyi kuenza malu mabi to. Bua tshinyi nanku? Bualu tudi mua kupona bipepele mu mateyi a Satana, udi mupiluke mu divuija malu mabi amueneka bu mimpe, anu muakenzaye pakatetaye Eva.—2 Kolinto 11:14; 1 Timote 2:14.
16. Ntshipatshila kayi tshinene tshitudi ne bua kuikala natshi patudi tuyisha bakuabu?
16 Patudi tuyisha, tudi tudienzeja bua kuyukila ne bantu bua malu adi mabatonde ne tubaleja tshidi Bible wamba. Eu mmushindu muimpe wa kubajula nyota ya kulonga Bible. Kadi tshipatshila tshietu tshinene katshiena anu tshia kubambuluisha bua kumanya tshidi Bible wamba anyi masanka abatuadila Bukalenge bua Nzambi to. Tudi ne bua kubambuluisha bua kufika ku dijingulula tshilumbu tshia bukokeshi bua Yehowa. Badiku bitaba bua kulua bena Kristo balelela ne bua kuambula “mutshi” wabu wa makenga ne kukenga bua Bukalenge ebu anyi? (Mâko 8:34) Badiku bitaba bua kubuela mu mulongo wa bantu badi ku luseke lua bukokeshi bua Yehowa ne baleja mudi Satana muena mashimi ne mushiminyinyanganyi wa malu anyi? (Nsumuinu 27:11) Tudi ne diakalenga dia kudiambuluisha tuetu bine ne bantu bakuabu bua kulamata ku luseke lua bukokeshi bua Yehowa.—1 Timote 4:16.
Padi Nzambi ulua ku mutu kua “bionso ne mu bintu bionso”
17, 18. Ntshikondo kayi tshilenga tshitudi mua kutekemena bitualeja ne: tudi balamate bukokeshi bua Yehowa?
17 Patudi tudienzeja muetu muonso mpindieu bua kulejila ku ngikadilu wetu ne ku mudimu wetu ne: tudi ku luseke lua bukokeshi bua Yehowa, tudi mua kutekemena tshikondo tshikala Yezu Kristo mua ‘kufila bukalenge kudi Nzambi, Tatu mene.’ Bualu ebu nebuenzeke dîba kayi? Mupostolo Paulo udi umvuija ne: ‘Pajimijaye makalenge onso makuabu ne bukokeshi buonso ne bukole. Budiye nabu mbua kukokesha too ne patekaye bena lukuna nende bonso muinshi mua makasa ende. Pashishe Muana muine kabidi neatekibue muinshi mua Tatu wakateka bintu bionso muinshi muende, bua Nzambi kuikala ku mutu kua bionso ne mu bintu bionso.’—1 Kolinto 15:24, 25, 28.
18 Tshikondo tshikala Nzambi mua kulua “ku mutu kua bionso ne mu bintu bionso” netshikale tshilenga tshia dikema! Bukalenge nebuikale bukadi bukumbaje tshipatshila tshiabu. Baluishi bonso ba bukokeshi bua Yehowa nebikale bakadi babutudibue. Nekuikale kukadi ditalala ne bulongame miaba yonso. Mu mêyi a mufundi wa Misambu, bifukibua bionso nebimbe ne: ‘Nuambike Yehowa butumbi budi buakanangane ne dîna diende. Nuambe munkatshi mua bisamba bia bantu ne: Yehowa udi ukokesha.’—Musambu 96:8, 10.
Udi mua kuandamuna anyi?
• Mmunyi muakaleja Yezu ne: tshilumbu tshia bukokeshi bua Yehowa tshivua ne mushinga wa bungi kudiye?
• Mudimu wa Yezu ne lufu luende biakakumbaja tshia kumpala bualu kayi?
• Mmu malu kayi mutudi mua kulonda tshilejilu tshia Yezu bua kuleja ne: tudi balamate ku bukokeshi bua Yehowa?
[Nkonko ya dilonga]
[Kazubu/Bimfuanyi mu dibeji 29]
LAMATA KU LUSEKE LUA YEHOWA
Anu bu bana betu ba bungi ba mu ditunga dia Corée ne ba miaba mikuabu, padi bena Kristo bapeta mateta makole, kuvuluka bimpe tshidi mateta au abakuatshila kudi kubambuluisha.
Umue wa ku bana betu bavuabu bele mu buloko mu tshikondo tshia Union Soviétique wakamba ne: “Tshiakatuambuluisha bua kutantemena mateta tshivua dijingulula bimpe tshilumbu tshivua tshijuke mu budimi bua Edene: tshilumbu tshia bukenji budi nabu Nzambi bua kukokesha. . . . Tuvua bamanye ne: tuvua ne mpunga wa kulamata ku luseke lua bukokeshi bua Yehowa. . . . Bualu ebu buakatukolesha ne kutupesha mushindu wa kulama lulamatu luetu.”
Ntemu mukuabu wakumvuija tshivua tshimuambuluishe yeye ne Bantemu bakuabu mu buloko muvuabu babenzeja midimu mikole. Wakamba ne: “Yehowa wakatukuatshisha. Nansha muvuaku ntatu mikole, tuakashala anu balame malanda etu ne Yehowa makole. Tuvua misangu yonso tukankamijangana patuvua tuvuluijangana ne: tuvua balamate ku luseke luimpe mu tshilumbu tshia bukokeshi bua diulu ne buloba.”
[Tshimfuanyi mu dibeji 26]
Mmunyi muvua Yezu mulamate ku bukokeshi bua Yehowa pavua Satana umuteta?
[Tshimfuanyi mu dibeji 28]
Ntshinyi tshivua lufu lua Yezu lukumbaje?