Yezu uvuaku ne Bible anyi?

TÒO, Yezu kavua ne Bible to. Bua tshinyi? Bualu tshikondo atshi kabavua ne Bible mujima bu mutudi nende lelu eu to. Kadi mu nsunagoga muvua mivungu ivuabu basangishe kaba kamue ivua ne mifundu idi milue tshitupa tshia Bible utudi nende lelu eu. Yezu wakabala muvungu wa Yeshaya mu nsunagoga wa mu Nazaleta. (Luka 4:16, 17) Mupostolo Paulo wakumvua ‘kubala kua mikenji ya Mose ne mêyi a baprofete’ mu Antiokia wa mu Pisidia. (Bienzedi 13:14, 15) Muyidi Yakobo wakamba ne: bavua ‘babala mêyi a Mose ku lumingu ku lumingu’ mu nsunagoga.​—Bienzedi 15:21.

Muntu yonso wa mu bidimu lukama bia kumpala uvuaku ne wende muvungu wa Mifundu minsantu anyi? Muntu mutungula wa mu Atiopa uvua wenza mudimu mu lubanza lua Mukalenge-mukaji Kandake uvua nawu, bualu uvua ‘mushikame mu dikalu diende ubala mukanda wa muprofete Yeshaya’ pakalua muyidi Filipo kusambakena nende mu njila wa ku Aza. (Bienzedi 8:26-30) Mupostolo Paulo wakambila Timote bua kumutuadilaye ‘mikanda ne biseba bidi ne mêyi mafundapu.’ (2 Timote 4:13) Nansha mudi Paulo kayi mutele mêna a mikanda eyi, idi mua kuikala bitupa bia Mifundu ya tshiena Ebelu.

Bilondeshile Alan Millard, mulongeshi wa miakulu ya ku Nord kua Afrike ne ku Sud kua Asia, munkatshi mua bena Yuda, bantu bavua ne yabu mivungu ya Mifundu bavua anu “banene ba mu Palestine, bantu bonso bavua bamba mudibu balonge, bamue Bafalese ne balongeshi bu mudi Nikodemo.” Bivua nanku bualu ivua mushinga mukole. Millard udi utshinka ne: “mukanda wa Yeshaya nkayau uvua ne mushinga wa ndenalio isambombo too ne ku dikumi” ne udi wamba ne: Bible mujima wa mu tshiena Ebelu “uvua mua kuenza mivungu 15 too ne ku 20,” anyi kuangata difutu dia muntu dia ngondo isambombo.

Bible kêna utuambila bikala Yezu anyi bayidi bende bavua ne yabu mivungu ya Bible. Kadi tudi bamanye ne: Yezu uvua mumanye Mifundu bimpe bitambe, uvua utela mvese anyi wamba mêyi adimu ku muoyo. (Matayo 4:4, 7, 10; 19:4, 5) Bualu ebu kabuenaku butusaka bua kumanya Bible bimpe, bu mutudi ne mushindu wa kumupeta lelu eu kakuyi lutatu anyi?