Badi bumvuilangana luse munkatshi mua bena tshikisu

MUNTU mukuabu wa mu ditunga dia Burundi uvua wamba kufua ne disama dia malaria. Bivua bikengela kuya nende lukasa mu lupitadi. Kadi mmushindu kayi? Kakuvua mashinyi nansha amue avua mua kumuambula to. Balunda bende babidi ba pa muoyo bakalua kumuambuluisha. Bakamuteka pa dikalu ne kuenda nende mêba anayi majima mu njila wa mikuna. Pashishe kumubuejabu mu mashinyi avua mua kumufikisha mu lupitadi luvua pabuipi. Matuku makese pashishe, muntu au kumvuaye bimpe.

Muaba mukuabu mu ditunga dia États-Unis, panyima pa tshipepele tshikole tshia Katrina tshimane kunyangakaja bintu, bantu batanu bakasangana nzubu mukuabu uvua mitshi miupukile. Bantu abu kabavua bamanyangane ne muena nzubu au nansha kakese to, kadi bakenza mudimu dituku dijima bua kumbusha mitshi ivua miupukile pa nzubu ne kuyikosabu bitupa bitupa. Mukaji wa muena nzubu au wakamba ne: “Tshiena ne tshindi mua kuenzela [bantu] aba bua kubela tuasakidila to.”

Bena ku bisanji ne bafundi ba bibejibeji badi batamba kuakula anu bua buenzavi ne bienzedi bia tshikisu bidi bantu benzelangana. Miyuki eyi mmijimije mukono wonso wa malu mimpe adi bantu benzelangana dituku dionso edi. Kadi malu aa kaena apangisha bantu ba miaba yonso bua kuikala dijinga ne dinanga ne luse to. Tuetu bonso tudi basue bua batumvuile luse. Kadi ngikadilu eyi itu itamba kumueneka bikondo bu mudi tshia Noele, patu bantu ba bungi bakula anyi bimba bua ‘ditalala dikale munkatshi mua bantu.’​—Luka 2:14.

 Mbikole bua kumvuilangana luse munkatshi mua bantu badi kabayi nalu nansha lukese. Lelu bantu badi bamona ne: kuikala ne malu makole ne kubenga kumvuilangana ke bidi bifikisha muntu ku nsombelu muimpe ne ku ditshimuna malu a panu. Bidi bimueneka ne: bantu ba bungi badi balonda lungenyi lua ne: Mbitambe kuikala bia meji bua kuikala ne tshikisu pamutu pa kuikala ne luse. Lukuka ne didinanga bidi bipangisha bantu bua kumvuilangana luse.

Ke bualu kayi ba bungi badi baditeka kumpala, kabayi batangila malu a bakuabu. Batu baleja bantu balume batu benza manaya ne bena filme bu “balume ba bushuwa” badi kabayi ne luse nansha lukese. Ke mutu bamue bamfumu ba malu a tshididi.

Nunku bimpe tudiebeje ne: Bua tshinyi tudi ne bua kumvuilangana luse? Luse ludiku ne dikuatshisha anyi? Ntshinyi tshidi mua kutuambuluisha bua kuikala ne luse? Tshiena-bualu tshidi tshilonda netshiandamune nkonko eyi.

[Kazubu mu dibeji 3]

• Kumvuilangana luse mbutekete anyi?

• Kuikala ne luse kudiku kuenzelangana bimpe anyi?

• Ntshinyi tshitudi mua kuenza bua kuleja ne: tudi ne luse?