Kakuena tshia mvita tshidibu bakutudila tshikala ne diakalengele

‘Kakuena tshia mvita tshidibu batula bua kukuluisha natshi tshidi mua kuikala ne diakalengele.’​—YESHAYA 54:17.

1, 2. Mmunyi mudi malu adi menzekele Bantemu ba Yehowa ba mu Albanie aleja mudi mêyi a mu Yeshaya 54:17 malelela?

KUKADI bidimu bia bungi, bavua bakandike mudimu wa bena Kristo mu ditunga dikese dia mikuna didi ku sud-est kua Mputu. Mbulamatadi wa ba-Koministe uvua kayi witaba malu a Nzambi wakenza muende muonso bua kubabutula. Nansha muvuabu babakuma, babenzeja midimu mikole mu maloko ne babashiminyina malu ku tudiomba, kabakapingana tshianyima to. Mbanganyi abu? Mbantemu ba Yehowa ba mu ditunga dia Albanie. Bivua bikole bua bobu kudisangisha ne kuyisha, nansha nanku, disuminyina diabu mu bidimu bipite bungi diakapesha Buena-Kristo lumu ne kutumbishisha dîna dia Yehowa. Mu 2006 pavuabu babanjija Betele wabu mupiamupia, Ntemu mukuabu ukadi muenzele Yehowa mudimu bidimu bia bungi wakamba ne: “Nansha Satana yeye mutete mua kuenza tshinganyi, udi anu wenda upangila ne Yehowa udi anu wenda utshimuna!”

² Bionso ebi bidi bileja ne: Tshivua Yehowa mulaye bua bantu bende mu Yeshaya 54:17 ntshikumbane. Udi wamba ne: ‘Kakuena tshielelu tshia mvita tshidibu batula bua kukuluisha natshi tshidi mua kuikala ne diakalengele; wewe neutuishe ludimi luonso ludibu babandisha bua kukubanda nalu mu tshilumbu.’ Miyuki ya kale idi ijadika ne: kakuena tshintu tshidi bulongolodi bua Satana mua kuenza tshidi mua kuimanyika ntendelelu wa bantu ba Yehowa Nzambi badi badilambule kudiye.

Bia mvita bia Satana bidi bipangila

3, 4. (a) Mbintu kayi bidi munkatshi mua bia mvita bia Satana? (b) Mmushindu kayi udi bia mvita bia Diabolo bipangile bualu?

³ Munkatshi mua bia mvita bidibu bakengesha nabi batendeledi balelela mudi dikandika  mudimu wetu, tshikisu tshia bisumbu bia bena tshimvundu, maloko ne ‘dipangadija malu mabi adi alonda mikenji.’ (Musambu 94:20) Bushuwa, mu amue matunga, nansha patudi tulonga tshiena-bualu etshi, kudi bana betu badi munkatshi mua ‘ditetshibua’ bua lulamatu luabu kudi Nzambi.​—Buakabuluibua 2:10.

⁴ Tshilejilu, bimue biro bia Bantemu ba Yehowa biakamba ne: anu mu tshidimu tshimue tshianana tuvua bapete bilumbu 32 bia basadidi ba Nzambi bavuabu bakume mu buambi. Kabidi kuvua bilumbu 59 bia Bantemu bavuabu bakuate mu buambi kudi bampulushi, munkatshi muabu muvua bana ne bakulumpe, balume ne bakaji. Bakatuisha bamue ba kudibu biala pa mikanda bua kulama bimanyinu bia minu yabu, kubakuatabu foto ne kubelabu mu buloko bu bena tshinyangu. Mbatute bakuabu ne babanyange mubidi. Mu ditunga dikuabu, kudi bilumbu bipite pa 1 100 bia Bantemu ba Yehowa badibu bakuate, bakosele bibawu anyi bakume. Bilumbu bipite pa 200 bia mu biobi ebi bivua bibafikile mu dituku divuabu badisangishe bua kuvuluka lufu lua Yezu. Nansha nanku, nyuma wa Yehowa udi upesha bantu bende bukole bua kupanduka mu bilumbu ebi bipite bungi mu matunga aa ne mu makuabu kabidi. (Zekâya 4:6) Tshiji tshikole tshidi natshi baluishi katshiakupuwisha bantu badi batumbisha Yehowa nansha. Bushuwa, tudi batuishibue ne: kakuena tshia mvita tshidi mua kupumbisha disua dia Nzambi bua kuenzekadi.

Badi batuisha ndimi ya mashimi

5. Ndimi kayi ya dishima ivua mibande basadidi ba Yehowa mu siekele wa kumpala?

⁵ Yeshaya wakamanyisha ne: Basadidi ba Nzambi bavua ne bua kutuisha anyi kupisha ludimu luonso luvua ne bua kubabanda. Mu bidimu lukama bia kumpala, bavua bashiminyina bena Kristo malu ne babamba mudibu benji ba malu mabi. Mêyi adi mu Bienzedi 16:20, 21 adi aleja muanda eu: ‘Bantu aba badi babisha diyoyo dia bungi mu musoko wetu, badi bambila bantu bilele bitudi katuyi bamanye mua kuitabuja anyi kuenza bualu tudi bena Lomo.’ Dituku dikuabu, bamfumu ba bitendelelu bakasaka bakalenge ba musoko bua kukengesha bena Kristo, bamba ne: ‘Bantu aba bakamana kutombuesha bonso ba pa buloba bakufika kuneku kabidi; ne badi benza malu adi ashipa mikenji ya Kaisa.’ (Bienzedi 17:6, 7) Bavua bangata mupostolo Paulo bu ‘mutatshishi wa bantu’ anyi bu tshipupu ne mulombodi wa kasumbu kabi kavua kajudija bimvundu mu bantu ‘pa buloba bonso.’​—Bienzedi 24:2-5.

6, 7. Ngumue mushindu kayi udi bena Kristo balelela batuisha mêyi adibu babamba?

⁶ Bia muomumue, kabiena bitukemesha lelu eu bua mudibu bashiminyina bena Kristo balelela malu ne babendeshila ngumu mibi. Mmunyi mutudi tutuisha mêyi mabi adibu batuamba aa?​—Yeshaya 54:17.

⁷ Bienzedi bimpe bia Bantemu ba Yehowa bitu misangu mivule bileja mudi malu adibu bababanda nawu ne adibu babashiminyina mikale a dishima. (1 Petelo 2:12) Padi bena Kristo badileja bantu badi batumikila mikenji ne badi bakeba disanka dia bantu nabu, malu adibu bababanda nawu adi amueneka a dishima. Bienzedi bietu bimpe bitu bijadika nkayabi tshitudi. Padi bantu bamona tshisumi tshitudi natshi mu dienza dia malu mimpe, batu misangu mivule bafika ku ditumbisha Tatu wetu wa mu diulu ne ku dianyisha nsombelu mulenga udi nende basadidi bende.​—Yeshaya 60:14; Matayo 5:14-16.

8. (a) Ntshinyi tshitu tshikengedibua imue misangu bua kubingisha ngikadilu wetu udi mushindamene pa Bible? (b) Mmunyi mutudi mua kutuisha ndimi ya baluishi bua kuidikija Kristo?

⁸ Pa kumbusha bienzedi bietu bimpe, imue misangu bitu bimpe kubingisha ne dikima ngikadilu wetu udi mushindamene pa Bible. Umue mushindu nkuya kua mbulamatadi ne ku tubadi bua kudikuba. (Esetê 8:3; Bienzedi 22:25-29; 25:10-12) Patshivua Yezu pa buloba, imue misangu uvua wandamuna baluishi bende buludiludi, uleja muvua malu avuabu bamuamba mikale a dishima. (Matayo 12:34-37; 15:1-11) Bua kuidikija Yezu, tudi tuanyisha padi mpunga umueneka bua kumvuija bakuabu malongesha etu bimpe menemene. (1 Petelo 3:15) Katulekedi mêyi mabi adibu batuamba mu kalasa, ku mudimu anyi kudi balela betu badi kabayi Bantemu atufikisha ku dilekela kuyisha lumu lua mu Dîyi dia Nzambi nansha.​—2 Petelo 3:3, 4.

 Yelushalema udi ‘dibue dipite bujitu’

9. NYelushalema kayi udibu baleje mu tshimfuanyi kudi ‘dibue dipite bujitu’ mu Zekâya 12:3, ne mbanganyi badi bamuimanyina pa buloba?

⁹ Mêyi a Zekâya adi aleja bimpe tshidi bisamba biluishila bena Kristo balelela. Mona tshidi Zekâya 12:3 wamba: ‘Mu dituku adi nemvuije Yelushalema bu dibue dipite bujitu kudi bantu bonso.’ Mêyi a buprofete aa adi atangila Yelushalema kayi? Mêyi a Zekâya aa adi akumbanyina “Yelushalema wa mu diulu” anyi Bukalenge bua mu diulu mudibu babikile bena Kristo bela manyi. (Ebelu 12:22) Bantu bakese bapiana Bukalenge bua Masiya ebu batshidi pa buloba. Bobu aba pamue ne balunda babu ba mu tshisumbu tshia “mikoko mikuabo” badi balomba bantu bua kukokelabu Bukalenge bua Nzambi patshidi dîba dikalaku apa. (Yone 10:16; Buakabuluibua 11:15) Ntshinyi tshidi bantu benze bua dilomba edi? Ne mmushindu kayi udi Yehowa mukuatshishe batendeledi balelela lelu? Bua kupeta mandamuna, tukonkononayi diumvuija dia Zekâya nshapita 12. Dikonkonona edi neditupeshe dishindika dia ne: ‘kakuena tshia mvita’ tshidi mua kuenzela bena Kristo bela manyi ne bena diabu badi badilambule kudi Nzambi bualu.

10. (a) Bua tshinyi badi baluisha basadidi ba Nzambi? (b) Ntshinyi tshidi tshifikile aba badi batete bua kumbusha ‘dibue dipite bujitu’?

¹⁰ Zekâya 12:3 udi uleja ne: bisamba bidi ‘bitapika mputa mibi.’ Mmunyi mudi bualu ebu buenzeka? Nzambi mmutume dîyi bua bambile bantu lumu luimpe lua Bukalenge buende. Bantemu ba Yehowa badi batumikila dîyi edi dia kuyisha. Kadi kumanyisha Bukalenge bua Nzambi bu tshintu tshimuepele tshidi bantu ne bua kutekemena nkulue ‘dibue dipite bujitu’ kudi bantu ba bisamba. Badi bateta bua kudiumbusha pa kutshiamakana bamanyishi ba Bukalenge aba kumpala. Padi bantu baluisha mudimu wa buambi eu, badi ‘baditapa mputa mibi’ miaba ya bungi. Lumu luabu ludi mene lunyanguka padibu bakuma kabongo mu lupuishi mu mushindu udi ufuisha bundu. Kabena mua kupuwisha bena Kristo balelela badi banyisha bikole diakalenga dia kuyisha “lumu luimpe lua tshiendelele” lua Bukalenge bua Nzambi budiye mupeshe Masiya kumpala kua nshikidilu wa buloba ebu kuluaye. (Buakabuluibua 14:6) Pakamona mulami wa buloko mukuabu wa mu dimue ditunga dia mu Afrique mushindu uvuabu bakengesha basadidi ba Yehowa, wakamba ne: ‘Nudi nujikija makanda enu tshianana mu dikengesha bantu aba. Kabakulekela tshidibu balamate nansha kakese. Badi anu benda bavulangana.’

11. Mmunyi mudi Nzambi mukumbaje mulayi wende udi mu Zekâya 12:4?

¹¹ Bala Zekâya 12:4. Yehowa mmulaye bua kufofomija mu tshimfuanyi mêsu a bantu badi bakengesha bamanyishi ba dikima ba Bukalenge buende ne kubakuatshisha ‘buôwa.’ Mmukumbaje dîyi diende. Tshilejilu, mu dimue ditunga muvuabu bakandike ntendelelu mulelela, baluishi kabavua ne bukole bua kupangisha basadidi ba Nzambi mushindu wa kupeta biakudia bia mu nyuma to. Tshikandakanda tshikuabu tshiakafika too ne ku diamba ne: Bantemu ba Yehowa bavua bela mikanda yabu mu ndundu (mienze bu tupompa) ne bayibueja mu ditunga! Mêyi avua Nzambi mulaye basadidi bende ba lulamatu akakumbana: ‘Nembulule mêsu anyi, nemfofomije mêsu a tubalu tuonso tua ba pa buloba.’ Bua tshiji tshia bufofo, baluishi ba  Bukalenge bua Nzambi ki mbamanye kua kuya. Bushuwa, tudi batuishibue ne: Yehowa neakube bantu bende mu tshibungi bua diakalenga diabu.​—2 Bakelenge 6:15-19.

12. (a) Mmu ngumvuilu kayi muvua Yezu mutemeshe kapia pavuaye pa buloba? (b) Mmunyi mudi bena Kristo bela manyi batshidi pa buloba batemeshe kapia mu malu a Nzambi ne mbipeta kayi bidi bimueneke?

¹² Bala Zekâya 12:5, 6. ‘Bamfumu ba Yuda’ badi baleja bantu badi balombola munkatshi mua basadidi ba Nzambi. Yehowa udi ubapesha lukunukunu lukole bua kuenzabu malu a Bukalenge buende pa buloba. Dimue dituku Yezu wakambila bayidi bende ne: ‘Ngakuluila bua kutuma kapia pa buloba.’ (Luka 12:49) Bushuwa, wakatemesha kapia. Mu dienza mudimu wa diyisha ne lukunukunu, Yezu wakavuija Bukalenge bua Nzambi muanda wa mushinga wa bungi menemene kumpala kua bantu. Bualu ebu buakakebesha dikokangana dikole mu tshisamba atshi tshia bena Yuda. (Matayo 4:17, 25; 10:5-7, 17-20) Bia muomumue, bayidi ba Yezu ba mu matuku etu aa badi batemesha kapia mu malu a Nzambi anu ‘bu dilonga dia kapia munkatshi mua nkunyi ne bu tshimunyi munkatshi mua bisumbu bia blé.’ Mu 1917 mukanda wa Le Mystère accompli * wakela patoke lubombo lua Bukua-Buena-Kristo. Bualu ebu buakakuatshisha bamfumu ba bitendelelu tshiji tshikole. Mu bidimu bidi panshi ebi, dibeji dia Ngumu ya Bukalenge No. 37 divua ne tshiena-bualu ne: “Bitendelelu bia dishima bikadi pa kufua!” diakasaka bantu ba bungi bua kusungula bua  kulamata anyi kubenga kulamata ku luseke lua Bukalenge bua Nzambi.

Badi bapandisha “ntenta ya bena Yuda”

13. Mêyi aa “ntenta ya bena Yuda” adi umvuija tshinyi, ne bua tshinyi Yehowa udi upandisha aba badi mu njiwu?

¹³ Bala Zekâya 12:7, 8. Mu Isalele wa kale, ntenta ivua mitangalake mu ditunga, imue misangu bavua basombelamu kudi balami ba mikoko ne babidime. Dîba divua baluishi balua kuela tshimenga tshia Yelushalema mvita, bantu aba ke ba kumpala bavua mu njiwu ne bavua dijinga ne bukubi. Mêyi aa “ntenta ya bena Yuda” adi aleja ne: bena Kristo bela manyi ba mu tshikondo tshietu etshi badi pambelu mu budimi mu ngakuilu wa mu tshimfuanyi, kabayi mu bimenga bidi ne ngumbu. Muaba eu badi babingisha malu a Bukalenge bua Masiya ne dikima dionso. Yehowa wa biluilu ‘neadianjile kupandisha ba mu ntenta ya bena Yuda’ bualu bobu ke ba kumpala badi Satana mutue mutu.

14. Mmunyi mudi Yehowa uluangena badi mu “ntenta ya bena Yuda” ne ubalama bua kabalenduki?

¹⁴ Bushuwa, miyuki ya kale idi ijadika ne: Yehowa udi uluangena bena Kristo bela manyi badi bikale milopo ya Bukalenge mu “ntenta” yabu pambelu mu budimi. * Udi ubalama bua kabikadi ‘batekete’ anyi kabalenduki mu ngumvuilu wa se: udi ubavuija bakole ne bikale ne dikima anu bu Davidi mukalenge muluanganyi wa mvita.

15. Bua tshinyi Yehowa udi ‘ukeba kubutula bisamba bionso,’ ne ndîba kayi dienzaye bualu ebu?

¹⁵ Bala Zekâya 12:9. Bua tshinyi Yehowa udi ‘ukeba kubutula bisamba bionso’? Bualu mbitungunuke ne kuluisha Bukalenge bua Masiya. Bu mudibi bitatshisha ne biluisha basadidi ba Nzambi ke bualu kayi bidi ne tshibawu. Mu katupa kîpi emu, bena dia Satana ba pa buloba nebele batendeledi balelela ba Nzambi mvita ya ndekelu ne bualu ebu nebufikishe ku nsombelu wikala pa buloba bujima udi Bible ubikila ne: Armagedone. (Buakabuluibua 16:13-16) Dîba adi, Mulumbuluishi Munene nealuangene basadidi bende ne neatumbishe dîna diende munkatshi mua bisamba.​—Yehezekele 38:14-18, 22, 23.

16, 17. (a) ‘Bumpianyi bua badi bakuatshila Yehowa mudimu’ ntshinyi? (b) Ditantamena dietu dia mvita idi Satana utuela didi dijadika tshinyi?

¹⁶ Satana kêna ne tshia mvita tshidi mua kutekesha ditabuja anyi lukunukunu lua basadidi ba Nzambi badi pa buloba bujima to. Ditalala dia mu nyuma ditudi nadi, didi difumina ku bukole budi Yehowa utupandisha nabu, didi ‘bumpianyi bua badi bakuatshila Yehowa mudimu.’ (Yeshaya 54:17) Muntu nansha umue kêna mua kutunyenga ditalala edi ne nsombelu muimpe wa mu nyuma utudi nende nansha. (Musambu 118:6) Satana neatungunuke ne kutukebela buluishi ne makenga. Ditantamana ditudi nadi nansha mudibu batupenda didi dijadika ne: tudi ne nyuma wa Nzambi. (1 Petelo 4:14) Tudi tumanyisha lumu luimpe lua Bukalenge budi Yehowa mujadike pa buloba bujima. Basadidi ba Nzambi mbapete buluishi bukeba kuimanyika mudimu wabu wa diyisha. Nansha nanku, badi batshimuna buluishi ebu bua bukole budi Yehowa mubapeshe. (Zekâya 9:15) Kakuena wimanyika bena Kristo bela manyi batshidi ne muoyo pa buloba ne balunda babu ba lulamatu nansha.

¹⁷ Tudi bindile ne mioyo kulukulu dipikudibua dinene ku mvita idi Diabolo utuluisha. Bidi bitukolesha menemene patudi bajadike ne: ‘kakuena tshia mvita tshidibu batutudila tshikala ne diakalengele; ne netutuishe ludimi luonso luatubandabu nalu ku tshilumbu.’

[Mêyi adi kuinshi]

Mmunyi muwandamuna?

• Ntshinyi tshidi tshileja ne: bia mvita bia Satana mbipangile bualu?

• Mmunyi mudi Yelushalema wa mu diulu mulue ‘dibue dipite bujitu’?

• Mmunyi mudi Yehowa upandisha “ntenta ya bena Yuda”?

• Bu mukadi Armagedone pabuipi, ndishindika kayi diudi nadi?

[Nkonko ya dilonga]

[Bimfuanyi mu dibeji 21]

Basadidi ba Yehowa ba mu Albanie bakashala ne lulamatu nansha muvua Satana ubaluisha

[Tshimfuanyi mu dibeji 23]

Yezu wakaleja muvua malu avuabu bamuamba mikale a dishima

[Bimfuanyi mu dibeji 24]

Kakuena tshia mvita tshitudila badi bamanyisha lumu luimpe tshikala ne diakalengele