Udi muvuluke anyi?

Dibala dia nimero ya ndekelu ya Tshibumba tshia Nsentedi divua dikusankishe anyi? Nanku, anji tangila ni udi mua kuandamuna nkonko idi ilonda eyi:

• Bua tshinyi ‘Dipungila Dikulukulu’ didi anu ne mushinga?

Yehowa Nzambi udi mudifundishe ki n’Nzambi wa tshikisu udi ushipa bantu to, kadi n’Nzambi wa dinanga. Yezu ne bayidi bende ba kumpala bakatungunuka ne kutela mêyi a mu Mifundu ya tshiena Ebelu. Mudi mibelu mimpe bua nsombelu wa dituku dionso ne mbatulayamu malu mimpe bua matuku atshilualua.​—1/9, dibeji 4-7.

• Dilekela dia Yehowa matuku apita katshia Adama ne Eva benza bubi ndileja tshinyi?

Mu bidimu bitue ku 6 000 bidi bipite ebi, mbimueneke patoke ne: Satana mmuena mashimi bualu Adama ne Eva ne bana babu binunu ne binunu mbafue. Mbimueneke ne: bantu kabena mua kuikala badikadile ne kuikala ne nsombelu muimpe to; kabena ne bukole ne bukenji bua kudilombola to.​—15/9, dibeji 6-7.

• Bua tshinyi Yakoba kavua muenze tshilema pavuaye mudileje bu Esau?

Bu muvua Yakoba musumbe buana bute kudi Esau, uvua ne bukenji bua kuangata dibenesha kudi tatuende. Pakamanya Isaka ne: uvua mubeneshe Yakoba, kakakeba mua kushintulula dibenesha adi to. Pashishe Nzambi uvua mua kupangisha bualu ebu wakaleja ne: uvua musue bua dibenesha diye kudi Yakoba.​—1/10, dibeji dia 31.

• Mmunyi mudi kondo ketu ka muoyo kaleja ne: katuena bafumine ku nyama?

Bantu ba makoba onso ne bisamba bionso batu basue kuambuluisha bakuabu nansha biobi biteka muoyo wabu mu njiwu. Bu bantu bafumine ku nyama, kabavua mua kuditeka pa muaba wa bakuabu nunku to, bualu yoyi itu ijinga anu bua kudipandisha nansha bia munyi.​—15/10, dibeji dia 20.

• Bua tshinyi tudi mua kuamba ne: Nzambi udi ne budipuekeshi, ne mmunyi mudiye uleja ngikadilu eu?

Nzambi Mmfumu wa bionso ne Mufuki wa bionso, kêna ne bualu budiye kayi mua kuenza bu mutudi tuetu bantu to. Nunku bilondeshile 2 Samuele 22:36, Nzambi udi ne budipuekeshi mu ngumvuilu wa ne: udi utabalela bantu bapuekele badi badienzeja bua kumusankisha ne udi ubafuila luse. Udi wenza bu udi upueka pa buloba bua kuenzela badi bamutshina malu mimpe.​—1/11, dibeji 4-5.

• Mmunyi mudi bintu bia kale biangula mu buloba bijadika malu adi mu Bible?

Bakebuludi ba bintu bia muinshi mua buloba mbapete biyoyi bia ngesu mu Samalea bidi ne mêna a bisamba 7 bidibu batele mu Yoshua 17:1-6. Bintu bidibu bangule mu Alada bidi bijadika tshidi Bible wamba bua mêku a bakuidi ne mudi kabidi dîna dia Nzambi. Biyoyi bia ngesu bidibu bangule mu Lakisha bidi biumvuija nsombelu wa malu a tshididi ne tshimvundu tshivua mu bena Yuda kumpala bena Babulona kubela mvita.​—15/11, dibeji dia 12-14.

• Ntshinyi tshidi tshitufikisha ku diamba ne: Luka ke udi mufunde mukanda wa Bienzedi?

Bu muvua mukanda wa Luka ne wa Bienzedi bia bapostolo mitumina Teofilo, bidi bileja ne: Luka ke uvua muyifunde. Luka udi ne ngakuilu bu mudi wa ‘tuetu’ ne ‘dietu’ bua kuleja ne: uvua pende umue wa ku bantu badi benza malu adibu batela mu mukanda eu. (Bienzedi 16:8-15)​—15/11, dibeji dia 18.

• Mmunyi mudi muena Kristo ne bua kumona bulembi ne diloba?

Katshia anu mu matuku a Noa, Nzambi wakitabila bantu bua kushipa nyama ne kuyidia. Kadi mukenji wa kuyikosa muminu udi uleja ne: tudi ne bua kunemeka muoyo wa nyama bualu mmufume kudi Nzambi. Muena Kristo kêna mua kushipa nyama anyi kuloba mishipa bua manaya anyi anu bua kudisankisha to. Mbimpe kutumikila mikenji ya Kaisa ne kunemeka kondo ka muoyo ka bakuabu. (Lomo 14:13)​—1/12, dibeji dia 31.