Udiku ne mulongeshi wa malu a Nzambi anyi?

UZIYA wakalua mukalenge mu bukalenge bua Yuda buvua ku sud patshivuaye ne bidimu 16. Wakakokesha bidimu bipite pa 50, kubangila ku ndekelu kua siekele wa tshitema too ne ku ntuadijilu kua siekele wa muanda mukulu kumpala kua Yezu. Kubangila anu patshivua Uziya mupuekele, “uvua wenza malu avua [Yehowa] muanyishe.” Ntshinyi tshiakamusaka bua kulonda njila muakane? Bible udi utuambila ne: “[Uziya] uvua ukeba amu [Nzambi] matuku onso avua Zekariya, uvua umulongesha mua kutshina [Nzambi mulelela], mutshikale ne muoyo panu. Bu muvuaye ukeba [Yehowa, Nzambi mulelela] kumututshisha diakalenga.”​—2 Kulondolola 26:1, 4, 5, MMM.

Katuena bamanye malu a bungi a Zekâya eu uvua upesha mukalenge mibelu, pa kumbusha muyuki eu udi mu Bible. Zekâya wakasaka mukalenge eu utshivua nsonga ku dienza malu makane bualu uvua “umulongesha mua kutshina Nzambi mulelela.” Mukanda kampanda udi wamba ne: Zekâya uvua “muntu uvua mumanye Mifundu ya tshijila bimpe, uvua ne dimanya dia bungi mu malu a ntendelelu ne mumanye mua kualongesha bakuabu.” (The Expositor’s Bible) Mushikuluji mukuabu wa malu a mu Bible wakamba bua Zekâya ne: “Uvua mumanye bimpe mêyi a buprofete ne . . . uvua ne meji, lulamatu, uvua muntu muimpe; ne bidi bimueneka ne: wakambuluisha Uziya bikole.”

Nsombelu wa lulamatu wa Uziya wakamupetesha mabenesha a bungi, ne “wakalua muena bukole bua bungi” bualu “Nzambi wakamukuatshisha.” Bushuwa, wakapeta diakalenga mu malu makuabu bualu uvua ne nsombelu wa lulamatu “mu matuku a Zekâya.” (2 Kulondolola 26:6-8) Kunyima kua Uziya mumane kupeta diakalenga, wakalengulula malongesha a mulongeshi wende Zekâya. Uziya ‘wakadisua mu mutshima wende, wakenza malu mabi, wakatombokela Nzambi wende.’ Bua dipanga kanemu edi, Yehowa wakamutua disama dibi dia pa dikoba diakamupangisha bua kuenza bimpe midimu yende yonso bu mukalenge.​—2 Kulondolola 26:16-21.

Udiku ne muntu utudi mua kubikila ne: mulongeshi udi ukuambuluisha bua ‘kukeba Nzambi’ anyi? Udi mua kuikala ne mulongeshi wa nunku nansha wewe muikale nsonga anyi muntu mukole, nansha wewe mulume anyi mukaji. Wangate mulongeshi eu ne mushinga, bualu mibelu yende idi mua kukuambuluisha bua kutungunuka ne kuenza malu adi makane ku mêsu kua Yehowa. Uteleje muena Kristo eu mukole mu nyuma ne uteye ntema mikole ku mibelu idiye ukupesha. Kubengi nansha kakese mêyi a meji a muntu udi ‘ukulongesha mua kutshina Nzambi.’​—Nsumuinu 1:5; 12:15; 19:20.