Bakalengeja nsombelu wabu: Kuenaku pebe mua kubidikija anyi?

MARC muanetu mukuabu wa mu ditunga dia Canada uvua wenza mudimu muaba kampanda utubu benza biamu bia robot bitu bantu batu baya mu tshibuashibuashi benza nabi mudimu. Uvua wenza mudimu mêba makese ne muikale mpanda-njila wa pa tshibidilu. Dimue dituku, bakajinga kumubandisha muanzu ne difutu, kadi uvua ne bua kuenza mudimu mêba bu bantu bonso. Marc wakenza tshinyi?

Amy muanetu wa bakaji wa mu ditunga dia Philippines utshivua ulonga kadi muikale mpanda-njila wa pa tshibidilu. Pakajikijaye tulasa, wakapeta mudimu uvua umuangata mêba a bungi, kadi muikale ne difutu dia mfranga ya bungi menemene. Amy wakenza tshinyi?

Marc ne Amy bakangata mapangadika mashilangane. Malu akabafikila pashishe adi aleja mudi mubelu uvua mupostolo Paulo mupeshe bena Kristo ba mu Kolinto muikale wa meji. Wakafunda ne: ‘Bantu badi balonda malu a pa buloba bikale bu bantu badi kabayi bukuta nawu.’​—1 Kol. 7:29-31.

Londa malu a pa buloba, kadi kukutshi nawu

Kumpala kua tuetu kumanya tshivua tshifikile Marc ne Amy, tuanji kumona tshivua Paulo musue kuamba mu mukanda wende uvuaye mutumine bena Kolinto pavuaye muakule bua ‘malu a pa buloba.’ Mu mvese eu, malu a pa buloba adi aleja bintu bionso bitu bantu benza matuku onso bu mudi kukeba muaba wa kulala, biakudia ne bia kuvuala. * Bua kupeta bintu bitudi nabi dijinga ebi, ba bungi ba munkatshi muetu badi ne bua kuenza mudimu. Bushuwa, katuena ne tshikuabu tshia kuenza anu kulonda malu a pa buloba bua kukumbaja majinga etu ne a bena mu dîku dietu bu mudi Bible utulomba. (1 Tim. 5:8) Kadi ku  lukuabu luseke, katupu muoyo ne: “Buloba budi bujimina.” (1 Yone 2:17) Nunku, tudi tulonda malu a pa buloba bua kukumbaja majinga etu, kadi ‘katuyi tukuta nawu’ to.​—1 Kol. 7:31.

Mubelu eu wa mu Bible wa kubenga kukuta ne malu a pa buloba mmuambuluishe bana betu ba bungi bua kukonkonona tshiakabidi nsombelu wabu, kukepesha mêba abu a mudimu ne kumbusha bintu bidi kabiyi ne mushinga mu nsombelu wabu. Panyima pa bamane kuenza nanku, bakamona ne: nsombelu wabu wakalua ne mushinga bualu bavua bapeta dîba dia bungi dia kusomba ne bena mu dîku diabu ne dia kuenza mudimu wa Yehowa. Pashishe, nsombelu wabu udibu bapepeje wakabambuluisha bua kutamba kueyemena Yehowa kupita bintu bia pa buloba. Udiku pebe mua kumbusha bintu bidi kabiyi ne mushinga mu nsombelu webe bua kuikala ne dîba dia bungi dia kuenza malu adi asankisha Yehowa anyi?​—Mat. 6:19-24, 33.

“Tudi tudiumvua pabuipi ne Yehowa kupita kumpala”

Marc utudi batele ku ntuadijilu, wakalonda mubelu wa mu Bible wa kubenga kukuta ne malu a pa buloba. Wakabenga muanzu wa mfranga ya bungi uvuabu bakeba kumupesha au. Matuku makese pashishe, mfumuende wa mudimu wakamuambila bua kumubandishila difutu bikole bua kumufikisha ku ditaba mudimu mupiamupia au. Marc udi wamba ne: “Divua diteta, kadi ngakabenga kabidi.” Udi umvuija tshivuaye mubengele wamba ne: “Meme ne mukajanyi Paula tuvua basue kudifila ne muetu muonso mu mudimu wa Yehowa. Nunku tuvua badisuike bua kumbusha bintu bivua kabiyi ne mushinga mu nsombelu wetu. Tuakalomba Yehowa meji bua tumone mua kukumbaja tshipatshila tshietu ne tuakadifundila dituku dituvua mua kutuadija kuenza mêba a bungi mu mudimu wa Yehowa.”

Paula udi wamba ne: “Mvua ngenza mudimu wa bu sekretere matuku asatu ku lumingu mu lupitadi kampanda ne bavua bamfuta bimpe. Mvua kabidi mpanda-njila wa pa tshibidilu. Kadi anu bu Marc, mvua musue kuenzela Yehowa mudimu muaba wonso uvuabu bakeba bamanyishi ba Bukalenge ba bungi. Kadi dîba dingakapesha mfumuanyi wa mudimu mukanda wa dilekela mudimu, wakangambila ne: mvua mukumbane kuangata mudimu wa shefu wa ba sekretere uvua mushale kauyi ne muntu. Uvua mudimu uvua ne difutu dipite dia ba sekretere bakuabu bonso mu lupitadi, kadi ngakaubenga. Pangakumvuija mfumuanyi wa mudimu tshimvua mubengele mudimu au, wakangela kalumbandi bua ditabuja dianyi.”

Matuku makese panyima, bakatuma Marc ne Paula bu bampanda-njila ba pa buabu mu tshisumbu kampanda tshikese tshia kule mu Canada. Dimuangala diabu diakabapetesha tshinyi? Marc udi wamba ne: “Pangakalekela mudimu wa mfranga ya bungi umvua muenze bidimu bia bungi, tshivua mumanye tshivua mua kutufikila to; kadi Yehowa wakabenesha mudimu wetu wa kuyisha. Tudi ne disanka dinene ditu difumina ku diambuluisha bakuabu bua kuenzelabu Nzambi mudimu. Mudimu wa bumpanda-njila wakalengeja kabidi dibaka dietu. Tutu tuyukila malu adi ne mushinga adi atangila mudimu wetu wa Yehowa. Tudi tudiumvua pabuipi ne Yehowa kupita kumpala.” (Bien. 20:35) Paula udi wamba pende ne: “Paudi ulekela mudimu ne nzubu webe muimpe, udi ne bua kueyemena Yehowa bikole. Ke tshituakenza ne Yehowa wakatubenesha. Bana betu ba mu tshisumbu tshietu tshipiatshipia mbatunange  ne badi batuleja mutudi ne mushinga. Bukole bumvua mua kufila mu mudimu wanyi wa kumpala ndi mbufila mpindieu mu mudimu wa kuambuluisha bantu bua bamanye Nzambi. Ndi ne disanka dia bungi dia kuenza mudimu eu.”

‘Muikale ne bintu bia bungi, kadi kayi ne disanka’

Amy utudi batele ku mbangilu yeye wakasungula njila mukuabu. Wakitaba mudimu au wa mfranga ya bungi uvua ne bua kumuangata mêba a bungi. Udi wamba ne: “Mu tshidimu tshia kumpala, ngakatungunuka anu ne kuyisha, kadi ngakajingulula ne: nsombelu wanyi katshivua muimanyine kabidi pa malu a Bukalenge to, kadi anu pa dibanda mianzu ku mudimu. Bakangambila bua kumbandisha mianzu ne nkavua ngenza muanyi muonso anu bua kuyipeta. Bu munkavua ne bia bungi bia kuenza ku mudimu, tshitshivua nyisha kabidi bikole to. Ngakalua too ne kulekela kuyisha kuine.”

Padi Amy wela meji bua tshikondo atshi, udi wamba ne: “Bua mfranga, mvua nayi, tshivua mpangila tshintu to. Mvua ngenza ngendu ya bungi ne mvua ne lumu lua bungi bua muanzu umvua nawu. Kadi tshivua ne disanka to. Nansha mumvua ne makuta a bungi, mvua ne bilumbu bia bungi. Mvua ndiebeja tshivua malu kaayi endela bimpe. Ke meme kulua kumona ne: bu mumvua musue kulua muntu munene pa buloba ebu, kuvua kushala anu kakese bua meme ‘kusesuka mu njila wa ditabuja.’ Anu bu mudi Dîyi dia Nzambi diamba, mvua ne ‘tunyinganyinga tua bungi.’”​—1 Tim. 6:10.

Amy wakenza tshinyi? Udi wamba ne: “Ngakalomba bakulu bua bangambuluishe bua meme kupetulula malanda mimpe ne Nzambi ne ngakatuadija kubuela mu bisangilu. Dimue dituku ngakatuadija kudila munkatshi mua musambu. Ngakavuluka disanka dimvua nadi bidimu bitanu bimvua mpanda-njila nansha mumvua mupele tshikondo atshi. Mvua mumanye ne: mvua ne bua kulekela kujimija dîba dianyi mu dikeba makuta ne mvua ne bua kuteka malu a Bukalenge bua Nzambi pa muaba wa kumpala. Ngakalomba bua kuenza mudimu mushadile uvua unjimijila tshia bibidi tshia difutu dianyi ne ngakatuadija kuyisha kabidi.” Amy udi wamba ne disanka ne: “Mvua ne disanka dia kuikala mpanda-njila bidimu bikese. Mpindieu ndi mumone ne: nsombelu wanyi udi ne mushinga kupita pamvua mpitshisha dîba dianyi dionso mu dienzela bena mu buloba ebu mudimu.”

Udiku mua kushintulula amue malu mu nsombelu webe ne kumbusha bintu bionso bidi kabiyi ne mushinga anyi? Wewe pebe neuvuije nsombelu webe ne mushinga wewe muvudije mudimu webe wa kuyisha Bukalenge bua Nzambi.​—Nsu. 10:22.

[Mêyi adi kuinshi]

[Lungenyi lunene lua mu dibeji 19]

Udiku mua kushintulula amue malu mu nsombelu webe ne kumbusha bintu bionso bidi kabiyi ne mushinga anyi?

[Kazubu/​Tshimfuanyi mu dibeji 19]

“Nkadi muunange!”

Davidi (udi mukulu mu États-Unis) uvua musue kulua mpanda-njila anu bu mukajende ne bana bende. Wakalomba ku mudimu bua kukepesha mêba avuaye wenza mudimu ne wakalua mpanda-njila wa pa tshibidilu. Dishintuluka edi divua divuije nsombelu wende ne mushinga anyi? Ngondo mikese panyima, Davidi wakafundila mulunda wende mukuabu ne: “Kakuena tshintu tshidi tshisankisha kupita kuenzela Yehowa mudimu bu mpanda-njila pamue ne bena mu dîku dianyi to. Mvua ngela meji ne: nebiangate dîba bua meme kuibidilangana ne mudimu eu, kadi nkadi muunange! Mmudimu mulenga menemene.”

[Tshimfuanyi mu dibeji 18]

Marc ne Paula mu buambi