Bantu badi ‘badilongolole’ badi bitabuja
Bantu badi ‘badilongolole’ badi bitabuja
‘Bakadi [badilongolole] bua kubapabu muoyo wa tshiendelele bakitabuja.’—BIEN. 13:48.
1, 2. Mmushindu kayi uvua bena Kristo ba kumpala benze mudimu bua kuyisha lumu luimpe pa buloba bujima bu muvua Yezu muambe?
MUKANDA wa mu Bible wa Bienzedi udi utulondela muvua bena Kristo ba kumpala benze mudimu bua kukumbaja mulayi uvua Yezu muambe ne: bavua ne bua kuyisha lumu luimpe lua Bukalenge pa buloba bujima. (Mat. 24:14) Bamanyishi ba tshisumi aba bakashiya tshilejilu tshivua bantu bonso mua kulonda. Mudimu wa tshisumi uvua bayidi ba Yezu benze mu Yelushalema wakafikisha bantu ba bungi, too ne ‘bakuidi ba bungi’ ku dibuela mu tshisumbu tshia bena Kristo ba mu bidimu lukama bia kumpala.—Bien. 2:41; 4:4; 6:7.
2 Bamisionere ba mu bidimu lukama bia kumpala bakambuluisha bantu bapite bungi bua kulua bena Kristo. Tshilejilu, Filipo wakaya mu Samalea ne bantu ba bungi kumutelejabu. (Bien. 8:5-8) Paulo ne bena diende bashilangane bakaya miaba ya bungi benda bayisha lumu luimpe mu Kupulio, mu maloba a mu Asia Mukese, mu Makedonia, mu Grèce ne mu Italie. Mu bimenga bivuabu bayishe, bena Yuda ne bena Greke ba bungi bakalua bena Kristo. (Bien. 14:1; 16:5; 17:4) Tito yeye wakenzela mudimu wende mu Kulete. (Tito 1:5) Petelo pende uvua mumonangane ne mudimu mu Babulona, ne mu tshikondo tshiakafundaye mukanda wende wa kumpala (pabuipi ne tshidimu tshia 62 too ne tshia 64) lumu luimpe lukavua lumanyike bikole mu Ponto, mu Galatia, mu Kapadokia, mu Asia ne mu Bitunia. (1 Pet. 1:1; 5:13) Tshivua tshikondo tshimpe be! Bua tshisumi tshivua natshi bena Kristo ba kumpala aba, bena lukuna babu bakafika ku diamba ne: bavua ‘batombuesha bonso ba pa buloba.’—Bien. 17:6; 28:22.
3. Mmalu kayi mimpe adi bamanyishi ba Bukalenge bapeta lelu mu mudimu wabu wa kuyisha, ne udi umvua bishi bua bualu ebu?
3 Matuku etu aa kabidi, tshisumbu tshia bena Kristo ntshidiunde mu mushindu wa dikema. Kabituku bikuenza disanka pautu ubala luapolo lua mudimu wetu wa Bantemu ba Yehowa ututu tuenza tshidimu tshionso ne umona mudiwu muenzeke bimpe pa buloba bujima anyi? Kabienaku bikuenza disanka bua kumanya ne: bamanyishi ba Bukalenge mbalonge Bible ne bantu bapite pa miliyo isambombo mu tshidimu tshia mudimu tshia 2007 anyi? Bungi bua bantu bavua babuele mu Tshivulukilu tshia lufu lua Yezu Kristo tshidimu tshishale budi buleja kabidi ne: bantu batue ku miliyo dikumi badi kabayi Bantemu ba Yehowa bavua banyishe bua kubuela mu tshisangilu etshi tshia mushinga mukole. Bidi bileja ne: kutshidi mudimu wa bungi wa kuenza.
4. Mbanganyi badi bitaba mukenji wa Bukalenge?
4 Anu bu mu bidimu lukama bia kumpala, lelu bantu bonso ‘badi badilongolole bua kubapabu muoyo wa tshiendelele’ badi bitaba bulelela. (Bien. 13:48) Yehowa udi ubakoka mu bulongolodi buende. (Bala Hagai 2:7.) Mmunyi mutudi ne bua kumona mudimu wa disangisha bantu udi bena Kristo benza bua kutungunuka ne kuwenza bimpe?
Yisha bantu kuyi ubasunguluja
5. Mbantu ba mushindu kayi badi Yehowa wanyisha?
5 Bena Kristo ba kumpala bakajingulula ne: ‘Nzambi kêna ne kansungansunga, kadi yeye udi witabuja wa mu tshisamba tshionso udi umutshina, udi wenza malu makane.’ (Bien. 10:34, 35) Muntu udi musue kuikala mu malanda mimpe ne Yehowa udi ne bua kuleja ne: mmuitabuje mulambu wa Yezu. (Yone 3:16, 36) Yehowa mmusue kabidi bua “bantu bonso basungidibue, bafike ku dimanya dia malu malelela.”—1 Tim. 2:3, 4.
6. Bamanyishi ba Bukalenge kabena ne bua kuenza tshinyi ne mbua tshinyi?
6 Ki mbimpe bamanyishi ba lumu luimpe bikale belela bantu meji mabi bua tshisamba tshiabu, tshitendelelu tshiabu, nsombelu wabu, mushindu udibu anyi bua bualu bukuabu buonso to. Anji ela meji tung: Kuenaku ne dianyisha bualu muntu uvua mukumanyishe bulelela musangu wa kumpala kavua mukuelele meji mabi anyi? Bia muomumue, katuena ne bua kubenga kuambila muntu yonso udi mua kututeleja mukenji udi mua kusungila muoyo wende to.—Bala Matayo 7:12.
7. Bua tshinyi katuena ne bua kuelela bantu batudi tuyisha meji mabi?
7 Yehowa mmuteke Yezu Mulumbuluishi; nunku, tuetu katuena ne bukenji bua kuelela muntu nansha umue meji mabi to. Mbikumbane bua bikale nanku, bualu tuetu tudi tulumbuluisha anu ‘malu adi mêsu etu amona’ anyi ‘malu adi matshi etu umvua,’ kadi Yezu mmumanye meji a muntu ne malu adi mu muoyo wende.—Yesh. 11:1-5; 2 Tim. 4:1.
8, 9. (a) Shaula uvua muntu wa mushindu kayi kumpala kua kuluaye muena Kristo? (b) Tshilejilu tshia mupostolo Paulo tshidi ne bua kutulongesha tshinyi?
8 Bantu ba mishindu yonso mbalue basadidi ba Yehowa. Tshimue tshilejilu tshia pa buatshi ntshia Shaula wa ku Tâso, wakalua kumanyika mu dîna dia mupostolo Paulo. Shaula uvua Mufalese ne uvua uluisha bena Kristo bikole. Bu muvuaye mutuishibue ne: bavua bena dishima, wakatuadija kubakengesha. (Gal. 1:13) Ku mêsu kua bantu, uvua umueneka bu muntu uvua kayi mua kulua muena Kristo nansha. Kadi Yezu yeye wakamona tshintu tshimpe munda mua Shaula ke kumusungulaye bua mudimu wa pa buawu. Nunku Shaula wakalua umue wa ku bena Kristo ba kumpala uvua ne tshisumi tshia bungi.
9 Tshilejilu tshia mupostolo Paulo etshi tshidi tshitulongesha tshinyi? Tshidi tshitulongesha ne: kudi pamuapa bantu badi kabayi basue mukenji utudi tuyisha mu teritware wetu. Nansha mudibi bimueneka ne: kakuena umue wabu udi mua kulua muena Kristo mulelela, katuena ne bua kulekela bua kubeleshisha meji to. Misangu mikuabu, nansha bantu batudi katuyi tuelela meji badi mua kuitaba lumu luimpe. Mudimu wetu ngua kuyisha bantu bonso ‘katuyi tulekela.’—Bala Bienzedi 5:42.
Masanka mmindile bantu badi bayisha ‘kabayi balekela’
10. Bua tshinyi katuena ne bua kubenga kuyisha bantu badi bakuatshisha buôwa? Fila bilejilu bia muaba unudi basombele.
10 Tshimuenekelu tshia bantu tshidi mua kutudinga. Tshilejilu, Ignacio * wakabanga kulonga Bible ne Bantemu ba Yehowa pavuaye mu buloko mu ditunga kampanda dia mu Amerike wa ku Sud. Bantu bavua bamutshina bualu uvua ne tshikisu. Nunku, bena buloko bavua benza bintu bua kubipanyisha bena buloko bakuabu bavua batuma Ignacio bua kubananyina makuta abu kudi bantu bavua kabayi bafuta lukasa. Kadi bu muvua Ignacio uya kumpala mu dilonga diende dia Bible ne utumikila bivuaye ulonga, wakashintuluka bikole ne kuluaye muntu muimpe. Muntu katshiena umutuma bua kunana mabanza kabidi to. Kadi Ignacio udi ne disanka bualu Bible ne nyuma wa Nzambi mbimushintulule bikole. Udi kabidi ne dianyisha kudi bamanyishi ba Bukalenge bavua kabayi ne kansungasunga ne bavua badienzeje bua kulonga nende.
11. Bua tshinyi tudi tutungunuka ne kupinganyina bantu?
11 Bumue bualu butudi tutungunukila ne kupinganyina bantu batukavua bayishe lumu luimpe budi ne: nsombelu wabu ne lungenyi luabu bidi mua kushintuluka ne bitu bishintuluka. Katshia musangu mushale utuvua bayukile nabu, bamue mbasame bikole, bakuabu midimu mmibajike anyi mbafuishe muntu uvuabu banange bikole. (Bala Muambi 9:11.) Malu adi enzeka pa buloba adi mua kusaka bantu bua kuela meji bikole ku tshiabafikila. Adi mua kusaka muntu uvua kayi witaba mukenji wetu kumpala anyi mene uvua utuluisha bua kuwitaba. Nunku, katuena ne bua kubenga kuambila bakuabu lumu luimpe padi mpunga umueneka to.
12. Mmunyi mutudi ne bua kumona bantu batudi tuyisha ne mbua tshinyi?
12 Bantu badi ne tshilele tshia kusunguluja bakuabu ne kubelela meji mabi. Kadi Yehowa yeye utu umona muntu ne muntu. Udi umona malu mimpe adiye mua kuikala nawu. (Bala 1 Samuele 16:7.) Tudi ne bua kudienzeja bua kumuidikija patudi tuyisha. Bilejilu bia bungi bidi bileja ne: tudi tupeta malu mimpe patudi tuanyisha bantu bonso batudi tuyisha.
13, 14. (a) Bua tshinyi mpanda-njila mukuabu kavua mutabalele muntu mukaji mukuabu uvuaye mupete mu buambi? (b) Tshilejilu etshi tshidi ne bua kutulongesha tshinyi?
13 Sandra mmuanetu wa bakaji udi mpanda-njila. Uvua uyisha ku nzubu ne ku nzubu mu tshidiila kampanda tshia mu Caraïbes pakapetanganaye ne Ruth uvua musue mafesto atubu benzela mu njila. Misangu ibidi Ruth wakapatuka wa kumpala mu mafesto au. Kadi wakanyisha bikole malu avua Sandra umuambila, ke kutuadijabu kulonga Bible. Sandra udi uvuluka wamba ne: “Pangakabuela mu nzubu mua Ruth, ngakamona foto wende munene uvua umuleja muvuale bilamba bia mafesto ne kumona kabidi bintu bivuaye mupetamu. Ngakela meji ne: muntu uvua mumanyike bikole nunku ne uvua musue mafesto a nunku kavua mua kunanga bulelela to. Ke meme kulekela kulonga nende.”
14 Matuku ndambu pashishe, Ruth wakalua ku Nzubu wa Bukalenge, ne panyima pa bisangilu kuebejaye Sandra ne: “Bua tshinyi kutshiena ulua bua kundongesha Bible?” Sandra wakamulomba luse ne kumvuanganabu bua kutungunuka ne kulonga. Ruth wakaya kumpala ne lukasa, kumbushaye foto wende uvua ku tshimanu, kutuadijaye kubuela mu bisangilu ne kuyisha ne kudilambulaye kudi Yehowa. Bushuwa, Sandra wakalua kuitaba ne: lungenyi luende luvua lumushime.
15, 16. (a) Ntshinyi tshivua tshienzeke pavua mumanyishi mukuabu muyishe mulela wende? (b) Bua tshinyi nsombelu wa balela betu kêna ne bua kutupangisha bua kubayisha?
15 Bantu ba bungi badi bayisha balela babu badi bamueneka bu kabayi mua kuitaba bulelela mbapete bipeta bimpe. Tuangate tshilejilu tshia Joyce, muanetu wa bakaji wa mu États-Unis. Bukonde buende uvua anu lelu pambelu, malaba mu buloko . . . katshia anu patshivuaye nsongalume. Joyce udi wamba ne: “Bantu bavua bamba ne: kavua ne tshia nsongo tshivuaye mua kuenza bualu uvua upanyisha diamba, wiba ne wenza malu mabi makuabu a bungi. Nansha muvuabi bimueneka bikole, ngakatungunuka ne kuyukila nende malu a Nzambi munkatshi mua bidimu 37.” Wakumvua disanka dia bungi pakatuadija bukonde buende au kulonga Bible ne Bantemu ba Yehowa ku shòo, ne kushintulukaye bikole. Matuku mashale aa, bukonde bua Joyce wakatambula mu mpungilu kampanda uvua muenzeke mu Californie mu États-Unis muikale ne bidimu 50. Joyce udi wamba ne: “Ngakadila bua disanka. Ndi ne disanka dia bungi bua mumvua tshiyi mulekele kumuyisha.”
16 Pamuapa udi welakana bua kuyisha bamue balela bebe bualu badi ne nsombelu mubi. Kadi Joyce kakelakana bua kuakula ne bukonde buende to. Bushuwa, nnganyi udi mua kumanya tshidi munda mua mukuabu? Muntu au udi mua kuikala ukeba bulelela ne muoyo umue. Nunku, katubengi mua kumupesha mushindu wa kubupeta to.—Bala Nsumuinu 3:27.
Mukanda muimpe wa kulonga nawu Bible
17, 18. (a) Luapolo ya pa buloba bujima idi ileja tshinyi bua mushinga wa mukanda wa Bible utu ulongesha tshinyi menemene? (b) Mmalu kayi mmimpe audi mupete mu dilongesha bantu Bible ne mukanda eu?
17 Luapolo idi ifumina mu matunga a bungi idi ileja ne: bantu ba bungi badi bitaba mukanda wa kulonga nawu Bible wa Bible utu ulongesha tshinyi menemene? Tshilejilu, muanetu wa bakaji Penni udi mpanda-njila mu États-Unis wakatuadija kulongesha bantu ba bungi Bible ne mukanda eu. Munkatshi muabu muvua bakulakaje babidi bavua ne tshisumi tshia bungi mu bitendelelu biabu. Penni kavua mumanye muvuabu mua kuangata malongesha a mu Bible adi mu mukanda wa Bible ulongesha. Nansha nanku udi wamba ne: “Bua mudi malongesha aa mafunda mu mushindu mupepele, alondangana bimpe ne mu tshikoso, bakitaba bulelela buvuabu balonga kakuyi lutatu lua bungi to.”
18 Muanetu Pat wa mu Grande-Bretagne yeye wakatuadija kulonga Bible ne mamu mukuabu uvua munyeme ditunga diabu dia mu Asia. Mamu au wakanyema ditunga diabu pavua basalayi bantomboji bakuate bayende ne bana bende ba balume ne kujiminabu kashidi. Bakavua basue kumushipa yeye muine, bakosha nzubu wende ne kulala nende ku bukole kudi balume ba bungi musangu umue. Malu onso aa akamusaka bua kumona ne: muoyo wende kautshivua ne mushinga to, ne wakakeba bua kudishipa misangu ya bungi. Kadi dilonga dia Bible diakamupesha ditekemena. Pat udi ufunda ne: “Malu adibu bumvuija mu mushindu mupepele mu mukanda wa Bible ulongesha ne bilejilu bidimu biakamuambuluisha bikole.” Wakaya kumpala ne lukasa mu dilonga diende, kukumbajaye malu malomba bua kulua mumanyishi uvua kayi muanji kutambule, ne wakaleja dijinga dia kutambula mu mpuilu uvua ne bua kulonda. Bushuwa, tudi tupeta masanka a bungi patudi tuambuluisha bantu badi banange bulelela bua kumvuabu ne kuanyishabu ditekemena didi mu Bible.
‘Katupangi mu kuenza kua malu mimpe’
19. Bua tshinyi tudi ne bua kutamba kuyisha mpindieu?
19 Bu mudi matuku enda apita, tudi ne bua kuenza petu mudimu wa kuyisha ne kuvuija bantu bayidi ne tshisumi tshikole. Bantu binunu ne binunu badi basue kulonga malu a Nzambi badi bitaba patudi tubayisha tshidimu tshionso etshi. Pabi, ‘dituku dinene dia Yehowa didi pabuipi,’ mbuena kuamba ne: bantu badi kabayi banji kumanya Nzambi ne malu adiye mulongolole ‘badi bamba kushipibua.’—Sef. 1:14; Nsu. 24:11.
20. Ntshinyi tshidi yonso wa kutudi ne bua kudisuika bua kuenza?
20 Tudi ne mushindu wa kuambuluisha bantu bonso aba. Kadi bua tuetu kubambuluisha, tudi ne bua kuidikija bena Kristo ba kumpala bavua ‘kabayi balekela kuyisha bantu ne kubambila lumu luimpe ne: Yezu udi Kristo.’ (Bien. 5:42) Tulonde tshilejilu tshiabu pa kutungunuka ne kuyisha nansha bobu batukengesha, pa kulengeja “diyisha” dietu ne pa kuyisha bantu bonso katuyi tubasunguluja. ‘Katupangi mu kuenza kua malu mimpe’ bualu tuetu batungunuke nunku netupete masanka a bungi kudi Nzambi.—2 Tim. 4:2; bala Galatia 6:9.
[Mêyi adi kuinshi]
^ tshik. 10 Tudi bashintulule amue mêna.
Mmunyi muwandamuna?
• Mbanganyi badi bitaba lumu luimpe?
• Bua tshinyi katuena ne bua kuelela bantu batudi tuyisha meji mabi?
• Mmalu kayi atudi tupeta patudi tulongesha bantu Bible ne mukanda wa Bible utu ulongesha tshinyi menemene?
[Nkonko ya dilonga]
[Bimfuanyi mu dibeji 13]
Bantu ba bungi badi banange bulelela badi bitaba lumu luimpe
[Bimfuanyi mu dibeji 15]
Ntshinyi tshidi dishintuluka dia mupostolo Paulo ditulongesha?
[Tshimfuanyi mu dibeji 16]
Bamanyishi ba lumu luimpe kabatu belela bantu meji mabi