Padi bena Kristo basengibua bu ntete

MÊBA makese kumpala kua Yezu kufua, wakambila bayidi bende ne: ‘Monayi, Satana wakalomba bua kunuangata bualu bua kunusengaye bu ntete.’ (Luka 22:31) Uvua musue kuamba tshinyi?

Mu tshikondo tshia Yezu, dinowa dia ntete ya blé divua diangata dîba ne bukole bua bungi. Tshia kumpala, banowi bavua basuika miepu ya blé mu bisumbu. Pashishe, bavua bayituta pa tshintu tshikole anyi bavua bangata nyama bu mudi ngombe bua kukokayi mitshi ya kushipula nayi ntete bua kuyumbusha ku miepu. Pavuabu benza nunku, ntete ivua ituka ku miepu ne yumbuka mu bizubu. Panyima, babidime bavua babipepula bionso pamue. Ntete ivua imata panshi, kadi lupepele luvua lupepula bisote. Pashishe bavua basenga ntete bua kumusha bisonsa bionso bivua mua kuikalamu.

Bilondeshile mêyi a Yezu, Satana uvua uluisha anu kuluisha bayidi ba Yezu tshikondo atshi, ne utshidi utuluisha lelu. (Ef. 6:11) Bulelela, ntatu yonso itudi tupeta kayitu ifumina anu kudi Satana to. (Muam. 9:11) Kadi Satana mmusue kuenza mudimu ne tshionso tshidi tshimueneka bua kunyanga ditabuja dietu. Tshilejilu, udi mua kutusaka bua kunanga biuma bikole, bua kusungula manaya mabi anyi bua kuditua mu tshiendenda tshia masandi. Udi kabidi mua kufikisha balongi netu, bena mudimu netu ne balela betu badi kabayi Bantemu bua batusake bua kuditua ne kasuki mu malu a tulasa ne a midimu a bena pa buloba ebu. Pashishe udi mua kutukengeshisha bua tulekele ditabuja dietu. Kudi mishindu mikuabu ya bungi idi Satana utusenga.

Mmunyi mutudi mua kutantamena muluishi eu wa bukole? Katuena mua kumukandamena ku bukole buetu nkayetu to. Satana mmutupite bukole, kadi tudi bamanye ne: Yehowa mmumupite bukole kule ne kule. Tuetu beyemene Yehowa ne muoyo wetu wonso, tumulomba meji ne muoyo mukole bua kutantamena ntatu, ne tulonda mikenji yende, neatupeshe bukole bua kukandamena Satana.​—Mus. 25:4, 5.

Patudi mu diteta, tudi ne bua kumanya mua ‘kujingulula tshidi tshimpe ne tshidi tshibi’ bua Satana katukuatshi mu mateyi ende to. (Eb. 5:13, 14) Yehowa udi mua kutuambuluisha bua kumanya mua kujingulula malu nunku. Pashishe tudi ne bua kulamata ku tshidi tshiakane nansha bia munyi. Tuetu tulonda mikenji ya Yehowa, neatukuatshishe mu dipangadika dietu dia kuenza anu malu mimpe.​—Ef. 6:10.

Satana udi mua kukeba bua kutusenga anu bu ntete. Kadi bua bukole bua kudi Yehowa, tudi mua kumutantamena, bajalame mu ditabuja. (1 Pet. 5:9) Dîyi dia Yehowa didi ditujadikila ne: “Nukandamene Diabolo ne yeye neanunyeme.”​—Yak. 4:7.