Tshibumba tshia Nsentedi tshipiatshipia tshia kulonga

TSHIBEJIBEJI tshiudi ubala etshi ke Tshibumba tshia Nsentedi tshia kumpala tshia kulonga. Tudi basue kumvuija amue malu mapiamapia ikala mu tshibejibeji etshi.

Tshibejibeji tshia kulonga ntshipatuila Bantemu ba Yehowa ne balongi ba Bible badi balubuluka bimpe. Netshikale tshipatuka musangu umue ku ngondo ne netshikale ne biena-bualu bia kulonga binayi anyi bitanu. Ndongamu wa biena-bualu bia kulonga udi pa tshizubu tshia tshibejibeji. Bu mutuikala katuyi tufila tshibejibeji tshia kulonga etshi mu buambi, tshiotshi katshiakuikala ne bimfuanyi bishilashilangane pa tshizubu tshia tshibejibeji tshionso bu muikala tshia kufila mu buambi to.

Mu dibeji 2 dia tshibejibeji, neusangane bumvuije mu tshikoso tshipatshila tshia tshiena-bualu tshionso tshia kulonga anyi tshia mulongolongo wa biena-bualu bia kulonga ne tshia biena-bualu bikuabu kabidi. Bualu ebu nebutambe kuambuluisha balombodi ba Dilonga dia Tshibumba tshia Nsentedi padibu badilongolola bua kulombola dilonga dimpe dia biena-bualu ebi mu tshisumbu.

Neumone ne: mbipidije ndambu biena-bualu bia kulonga kupita muvuabi kumpala. Nanku, mbashiye dîba dia bungi bua kukonkonona mvese minene mu Dilonga dia Tshibumba tshia Nsentedi. Tudi tukukankamija bua kubala mvese yonso idibu batele. Mvese yonso idibu bafunde ne: “Bala,” nya kubala ne kumvuija mu Dilonga dia Tshibumba tshia Nsentedi. Nudi mua kubala mvese mikuabu kabidi padiku dîba. Mu bimue biena-bualu, nudi mua kusangana bafunde bua mvese ne: “Fuanyikija ne.” Bu mudi mvese eyi kayiyi ijadika diakamue malu manene adi mu tshikoso, pa tshibidilu kanuakuyibala mu tshisangilu tshia tshisumbu nansha. Tshidibi, mvese idibu bafunde ne: “Fuanyikija ne” idi ne malu makuabu mimpe, peshi idi mua kufila tshijadiki tshikuabu bua malu anudi nuakuila. Tudi tukukankamija bua kubala mvese ayi paudi ulongolola Dilonga dia Tshibumba tshia Nsentedi. Pamuapa udi mua kuyibueja mu mandamuna ebe.

Luapolo lua ku tshidimu kaluakupatuka kabidi mu Tshibumba tshia Nsentedi to. Kubangila mu 2008, neluikale lupatuka mu Mudimu wetu wa Bukalenge ne mu Annuaire. Kadi, anu mutudi baleje kulu eku, tshibejibeji tshia kulonga tshidi ne biena-bualu bikuabu. Nansha mutuikala katuyi mua kubilonga mu tshisumbu, tudi tukukankamija bua kubibala ne ntema ya bungi. Biobi pabi bidi ne mibelu ne malongesha a kudi ‘mupika wa lulamatu udi ne meji.’​—Mat. 24:45-47.

Bua kujikija, tshibejibeji tshia kulonga ne tshia kufila mu buambi ki mbishilangane to. Bionso bibidi bidi anu Tshibumba tshia Nsentedi tshidi tshimanyisha Bukalenge bua Yehowa. Bidi ne mêyi a muomumue mu dibeji 2 adi umvuija tshipatshila tshia Tshibumba tshia Nsentedi. Nebikale bapatula biena-bualu bia mu bionso bibidi mu mukanda umue ku ndekelu kua tshidimu tshionso. Malu a mu bionso bibidi neikale mu tshiena-bualu tshia ne: “Udi muvuluke anyi?,” tshikala tshipatuka mu tshibejibeji tshia kulonga.

Katshia mu 1879, Tshibumba tshia Nsentedi ntshitungunuke anu ne kumanyisha bulelela bua Bukalenge bua Nzambi mu bikondo bia mvita, bia ntatu ya mfranga ne makenga. Tudi tujinga ne: Yehowa abeneshe bua tshitungunuke ne kuenza kabidi nanku mu mushindu watshi mupiamupia eu. Tudi tulomba kabidi Yehowa bua akubeneshe wewe mubadi bua muudi ukuata mudimu bimpe ne Tshibumba tshia Nsentedi tshipiatshipia etshi tshia kulonga.