Ulengeje “diyisha” diebe

‘Ambila bantu dîyi dia Nzambi mene; ubakande ku malu abu, ubabele, ubasengelele ne lutulu luonso ne diyisha.’​—2 TIM. 4:2.

1. Ndîyi kayi divua Yezu muambile bayidi bende, ne ntshilejilu kayi tshidiye mutushile?

NANSHA muvua Yezu muenze bishima bia kuondopa bantu pavuaye pa buloba, bavua batambe kumumanya bu mulongeshi kadi ki mbu muntu uvua wondopangana anyi uvua wenza bishima to. (Mâko 12:19; 13:1) Mudimu munene wa Yezu uvua wa kumanyisha bantu lumu luimpe lua Bukalenge bua Nzambi, ne ke mudibi kabidi bua bayidi bende lelu. Bena Kristo badi ne mudimu wa kutungunuka ne kuvuija bantu bayidi pa kubayisha mua kuenza malu onso avua Yezu muambe.​—Mat. 28:19, 20.

2. Ntshinyi tshitudi ne bua kuenza bua kukumbaja mudimu wa kuyisha?

² Bua tuetu kuenza mudimu wetu wa kuvuija bantu bayidi, tukebayi mua kulengeja diyisha dietu. Mupostolo Paulo wakaleja mushinga wa kumanya mua kulongesha mu mukanda wakafundilaye Timote uvuabu benza nende buambi bikole. Wakamuambila ne: ‘Wikale mudimuke ku malu ebe ne ku diyisha diebe. Unanukile kushala mu malu aa; bua pawenza nunku, neudisungile wewe ne bobu kabidi badi bumvua mêyi ebe.’ (1 Tim. 4:16) Diyisha divua Paulo wamba kadivua anu dimanyisha bantu bualu kampanda  patupu to. Balongeshi bimpe ba Dîyi dia Nzambi badi balenga mioyo ya bantu ne babasaka bua kushintuluka. Dienza nunku ke dimanya kuyisha. Kadi mmunyi mutudi mua kulengeja “diyisha” dietu patudi tuamba lumu luimpe lua Bukalenge bua Nzambi?​—2 Tim. 4:2.

Lengeja “diyisha” diebe

3, 4. (a) Mmushindu kayi utudi mua kulengeja “diyisha” dietu? (b) Mmunyi mudi Kalasa ka Mudimu wa Nzambi katuambuluisha bua kulua balongeshi bimpe?

³ Bua tuetu kulua balongeshi bimpe ba lumu luimpe, tudi ne bua kulonga, kutumikila ne kutangila mudi bakuabu balongesha. Tudi mua kumvua bualu kampanda bimpe menemene anu patudi tubulonga ne tusambila. (Bala Musambu wa 119:27, 34.) Kutangila mudi balongeshi bapiluke balongesha kudi kutuambuluisha bua kumanya mishindu mimpe idibu balongesha ne bua kubidikija. Tuetu tudienzeja kabidi bua kutumikila bitudi tulonga nebituambuluishe bua kulengeja ndongeshilu wetu.​—Luka 6:40; 1 Tim. 4:13-15.

⁴ Yehowa ke Mulongeshi wetu Munene. Udi upesha basadidi bende mibelu ya mushindu wa kuyisha ku diambuluisha dia tshitupa tshia bulongolodi buende tshidi pa buloba. (Yesh. 30:20, 21) Bua bualu ebu, tshisumbu tshionso tshia bena Kristo tshitu tshienza Kalasa ka mudimu wa Nzambi lumingu luonso bua kuambuluisha bonso badi badifundishamu bua kulua bamanyishi bimpe ba Bukalenge bua Nzambi. Mukanda munene wa mu kalasa aka m’Bible. Bible udi utuleja tshitudi ne bua kuyisha. Udi kabidi utuleja mishindu mimpe itudi mua kuyisha. Kalasa ka Mudimu wa Nzambi kadi katuvuluija misangu yonso ne: bua kuikala balongeshi bimpe tudi ne bua kuangatshila malu atudi tulongesha mu Dîyi dia Nzambi, kuela nkonko bimpe, kumvuija malu mu mushindu mupepele ne kutabalela bakuabu. Tukonkononayi malu aa bumue ku bumue. Pashishe netulonge mutudi mua kulenga muoyo wa mulongi.

Angatshila malongesha ebe mu Dîyi dia Nzambi

5. Malongesha etu adi ne bua kufumina penyi ne bua tshinyi?

⁵ Yezu uvua mulongeshi mutambe bakuabu uvua wangatshila malongesha ende mu Bible. (Mat. 21:13; Yone 6:45; 8:17) Kavua wakula mu dîna diende to, kadi mu dîna dia uvua mumutume. (Yone 7:16-18) Ke tshilejilu tshitudi tulonda. Nunku, malu atudi tuamba patudi tuyisha ku nzubu ne ku nzubu anyi patudi tulonga Bible ne muntu adi ne bua kufumina mu Dîyi dia Nzambi. (2 Tim. 3:16, 17) Nansha tuetu ne meji a mushindu kayi, malu atudi tuamba kaena mua kuikala ne bukole bua muomumue ne bua Bible to. Bible udi ne bukole. Nansha tuetu tuambuluisha mulongi bua kumvua bualu kayi, mushindu mutambe buimpe ngua kumubadisha tshidi Bible wamba bua bualu abu.​—Bala Ebelu 4:12.

6. Ntshinyi tshidi mulongeshi mua kuenza bua mulongi kumvuaye bimpe malu adibu balonga?

⁶ Kadi abi kabiena bisua kumvuija ne: mulongeshi kêna ne bua kudilongolola kumpala kua kulonga ne muntu to. Tshidibi, udi ne bua kudianjila kuela meji ku mvese ikalabu ne bua kubala mu dilonga. Misangu ya bungi, mbimpe kubala mvese idi ijadika malongesha  etu. Mbimpe kabidi kuambuluisha mulongi bua kumvua mvese yonso udiye ubala.​—1 Kol. 14:8, 9.

Ela nkonko bimpe

7. Bua tshinyi kuela nkonko mmushindu muimpe wa kulongesha?

⁷ Kuela nkonko bimpe kudi kusaka mulongi bua kuela meji, ne kudi kuambuluisha mulongeshi bua kulenga muoyo wa mulongi. Nunku, pamutu pa kumvuija mulongi mvese, umulombe bua yeye akumvuijayi. Misangu mikuabu kuela lukonko lukuabu anyi nkonko milondangane kudi mua kuambuluisha mulongi bua kumvua bualu kampanda bimpe. Paudi wela mulongi nkonko bua kumulongesha bualu, udi umuambuluisha ki nganu bua kumvua bijadiki bia bualu kampanda, kadi kabidi bua yeye pende atuishibue.​—Mat. 17:24-26; Luka 10:36, 37.

8. Mmunyi mutudi mua kumanya malu adi mu muoyo wa mulongi?

⁸ Mushindu wa dilongesha udi mu mikanda yetu udi wa kuela nkonko ne kuyandamuna. Kakuyi mpata, bantu ba bungi baudi ulonga nabu Bible nebamanye mua kupeta ne lukasa mandamuna a nkonko adi mu bikoso bidi bipetangana ne nkonko ayi. Tshidibi mulongeshi udi musue kulenga muoyo wa mulongi kakuimanyina anu pa mandamuna mimpe to. Tshilejilu, mulongi udi mua kumvuija bimpe tshidi Bible wamba bua dienda dia masandi. (1 Kol. 6:18) Kadi mbimpe kumuela nkonko idi mua kumufikisha ku dileja tshidiye wela meji bua bualu budiye ulonga. Nunku mulongeshi udi mua kumuebeja ne: “Bua tshinyi Bible udi ukandika dienda masandi? Udi wela meji kayi bua mukenji wa Nzambi eu? Udi wela meji ne: kutumikila mikenji ya Nzambi kudi kupetesha disanka anyi?” Mandamuna a mulongi adi mua kuleja tshidi mu muoyo wende.​—Bala Matayo 16:13-17.

Umvuija malu mu mushindu mupepele

9. Ntshinyi tshitudi ne bua kuvuluka patudi tulongesha muntu Bible?

⁹ Malongesha a bungi adi mu Dîyi dia Nzambi kaatu makole to. Kadi bidi mua kuenzeka ne: malongesha a mu bitendelelu bia dishima mmanyange lungenyi lua bantu batudi tulonga nabu Bible. Tuetu balongeshi ba Dîyi dia Nzambi tudi ne mudimu wa kumvuija malongesha adi mu Bible mu mushindu mupepele. Balongeshi bimpe batu bamba malu malelela mu mushindu mutokesha bimpe ne mupepele. Tuetu tuenza nunku, katuakukolesha malongesha a mu Bible to. Katuikadi tuamba malu adi kaayi ne mushinga to. Kabiena bikengela kumvuija kalu konso kadi mu mvese utudi tubala nansha. Tuimanyine anu pa bualu budi ne mushinga bua muntu umvue tshitudi tulonga. Mulongi neumvue malu male a mu Bible ku kakese ku kakese padi dimanya diende dienda divula.​—Eb. 5:13, 14.

10. Mmalu kayi adi ajadika bungi bua bikoso bitudi mua kulonga musangu umue?

¹⁰ Tudi ne bua kulonga ne muntu bikoso bungi kayi musangu umue? Mbimpe tuikale ne busunguluji. Dimanya ne nsombelu wa mulongi yonso ne mulongeshi yonso mbishilangane,  kadi tshia kumanya ntshia se: tshipatshila tshietu tuetu balongeshi ntshia kuambuluisha mulongi bua ikale ne ditabuja dikole. Nunku tumushile dîba dikumbane dia kubala malongesha adi mu Dîyi dia Nzambi, kuumvua ne kuitaba. Katulongi malu a bungi mapite adiye mua kumvua to. Ku luseke lukuabu, tutungunuke ne kuya kumpala mu dilonga dietu. Padi mulongi umvua bualu, tupite ku bukuabu.​—Kolos. 2:6, 7.

11. Ntshinyi tshitudi mua kulongela kudi mupostolo Paulo bua mushindu wa kulongesha?

¹¹ Mupostolo Paulo uvua uyisha bantu bapiabapia mu mushindu uvua umvuika bimpe. Nansha muvuaye mulonge tulasa tua bungi, kavua wakula ne miaku mikole to. (Bala 1 Kolinto 2:1, 2.) Bu mudi malongesha a mu Bible mapepele, adi akoka bantu badi banange bulelela. Kabiena bikengela kulonga tulasa tua bungi bua kuumvua to.​—Mat. 11:25; Bien. 4:13; 1 Kol. 1:26, 27.

Ambuluisha balongi bua kuanyisha bidibu balonga

12, 13. Ntshinyi tshidi ne bua kusaka mulongi bua kutumikila bidiye ulonga? Umvuija.

¹² Bua tuetu kulongesha bimpe, tudi ne bua kulenga muoyo wa mulongi. Mulongi udi ne bua kumvua mudi bualu budiye ulonga bumutangila, mudibu mua kumuambuluisha ne mudi nsombelu wende mua kulengela yeye mulonde mibelu ya mu Bible.​—Yesh. 48:17, 18.

¹³ Tshilejilu, tudi mua kuikala tukonkonona mvese wa Ebelu 10:24, 25, udi ulomba bena Kristo bua kudisangisha ne bena Kristo bakuabu bua kukoleshangana ne kulejangana dinanga. Bikala mulongi kayi muanji kutuadija kubuela mu bisangilu, tudi mua kumumvuija mu tshikoso mutubi bienzeka ne malu atutu tulongamu. Tudi mua kumuambila ne: bisangilu bia tshisumbu bidi munkatshi mua malu atudi tuenza bua kutendelela Nzambi ne tudi mua kumuleja mudibi bituambuluisha. Pashishe tudi mua kumubikila bua abuelamu. Mulongi udi ne bua kutumikila mikenji ya mu Bible bualu mmusue kusankisha Yehowa, kadi ki mbua kusankisha muntu udibu balonga nende to.​—Gal. 6:4, 5.

14, 15. (a) Ntshinyi tshidi mulongi wa Bible mua kulonga pa bidi bitangila Yehowa? (b) Mmunyi mudi dimanya dia ngikadilu ya Nzambi mua kuambuluisha mulongi wa Bible?

¹⁴ Bualu bunene budi balongi bapeta padibu balonga Bible ne batumikila mikenji idimu mbua ne: badi bamanya Yehowa ne bamunanga bu muntu wetu wa bushuwa eu. (Yesh. 42:8) Kêna anu Tatu wa dinanga, Mufuki ne muena diulu ne buloba to, kadi udi kabidi uleja bantu badi bamunange ne badi bamuenzela mudimu ngikadilu yende ne malu adiye mua kuenza. (Bala Ekesode 34:6, 7.) Pakavua Mose pa kupatula bena Isalele mu bupika mu Ejipitu, Yehowa wakadimanyisha kudiye wamba ne: ‘Nengikale tshingikala.’ (Ekes. 3:13-15, NW) Bivua biumvuija ne: Yehowa uvua mua kulua tshionso tshivua tshikengedibua bua kukumbaja malu avuaye mulongolole bua tshisamba tshiende. Ke bualu kayi bena Isalele bakalua kumumanya bu Muntu uvua mubapandishe, muena mvita, muntu uvua ubapesha bintu, ukumbaja milayi yende ne uvua ubambuluisha mu mishindu mikuabu.​—Ekes. 15:2, 3; 16:2-5; Yosh. 23:14.

¹⁵ Imue misangu balongi betu kabakupeta diambuluisha dia mu tshishima dia kudi Yehowa bu muvua Mose mudipete to. Nansha nanku, padibu bakola mu ditabuja, banyisha bidibu balonga ne batuadija kubitumikila, nebamone mushinga wa kueyemena Yehowa bua abalombole, abapeshe dikima ne meji. Padibu benza nanku, bobu pabu nebafike ku dimanya Yehowa bu Mubapeshi wa mibelu wa meji udibu ne bua kueyemena, udi ubalama ne ubakumbajila majinga abu onso.​—Mus. 55:22; 63:7; Nsu. 3:5, 6.

Ikala utabalela bakuabu

16. Bua tshinyi kabiena bikengela kuikala anu ne tshipedi tshia kulongesha bua kushisha lulua mulongeshi muimpe?

¹⁶ Wewe mumone ne: kuena ulongesha  bimpe muudi musue to, kuteketshi ku muoyo to. Yehowa ne Yezu badi batangila mudimu wa dilongesha udi wenzeka pa buloba bujima lelu. (Bien. 1:7, 8; Buak. 14:6) Badi mua kutukuatshisha mu bionso bitudi tuenza bua mêyi etu ikale alenga bantu badi basue malu makane. (Yone 6:44) Mulongeshi udi munange mulongi wende ne muoyo mujima udi mua kumuambuluisha nansha yeye kayi ukokesha mua kulongesha bimpe to. Mupostolo Paulo wakaleja muvuaye mujingulule mushinga wa kunanga bantu batudi tulongesha.​—Bala 1 Tesalonike 2:7, 8.

17. Mmunyi mutudi mua kutabalela mulongi wa Bible yonso?

¹⁷ Bia muomumue, tudi mua kutabalela mulongi yonso wa Bible patudi tukeba mushindu wa kumumanya bimpe. Patudi tulonga nende Bible, tudi mua kufika ku dimanya nsombelu wende. Tudi mua kumona ne: ukadi utumikila amue malu adiye mulonge mu Bible ne kutshidi kushale makuabu adiye ne bua kutumikila. Tuetu tuambuluisha mulongi bua kumona mudi malu atudi tulonga amutangila, udi mua kulua muyidi wa Kristo muimpe.

18. Bua tshinyi mbimpe kusambila ne mulongi ne kumutela patudi tusambila nende?

¹⁸ Bualu bua mushinga mukole kupita onso budi ne: tudi ne bua kusambila ne mulongi wetu ne kumutela patudi tusambila nende. Udi ne bua kumona ne: tudi basue kumuambuluisha bua amanye Mufuki wende bimpe, ikale nende mu malanda mimpe ne apete masanka adi afumina ku dilonda mikenji yende. (Bala Musambu wa 25:4, 5.) Patudi tusambila bua Yehowa ambuluishe mulongi bua kutumikila malu adiye ulonga, mulongi neamone mushinga wa kulua ‘muenji wa dîyi.’ (Yak. 1:22) Padiye uteleja kabidi masambila atudi tuenza ne muoyo umue, yeye pende nealonge mua kusambila. Kuambuluisha balongi ba Bible bua kudiabu malanda ne Yehowa ndisanka dinene be!

19. Netukonkonone tshinyi mu tshiena-bualu tshidi tshilonda?

¹⁹ Tudi tukola ku muoyo patudi tumanya ne: Bantemu ba buloba bujima bapite pa miliyo isambombo ne tshitupa badi badienzeja bua kulengeja “diyisha” diabu bua kuambuluisha bantu badi banange bulelela bua kuenzabu malu onso avua Yezu muambe. Mmalu mimpe kayi adi apatuka mu mudimu wa diyisha udibu benza? Netuandamune lukonko elu mu tshiena-bualu tshidi tshilonda.

Udi muvuluke anyi?

• Bua tshinyi bena Kristo badi ne bua kulengeja “diyisha” diabu?

• Mmunyi mutudi mua kulengeja ndongeshilu wetu?

• Ntshinyi tshidi mua kutuambuluisha nansha tuetu katuyi ne tshipedi tshia kulongesha?

[Nkonko ya dilonga]

[Tshimfuanyi mu dibeji 9]

Ukadi mudifundishe mu Kalasa ka Mudimu wa Nzambi anyi?

[Tshimfuanyi mu dibeji 10]

Bua tshinyi mbimpe kulomba mulongi webe bua kubala Bible?

[Tshimfuanyi mu dibeji 12]

Ikala usambila ne mulongi webe ne umutela mu disambila