Malongesha atudi tupetela ku bilema bia bena Isalele

BENA Isalele bavua bamanye malu avua Yehowa ubalomba pavuabu babuela mu Buloba bulaya. Nzambi wakabambila mukana mua Mose ne: ‘Nenuipate bena buloba ebu bonso kumpala kuenu, nushipe mpingu yabu ya mabue ne mpingu yakatulabu ne tshiamu, ne miaba yabu ya kutendelela.’​—Nom. 33:52.

Bena Isalele kabavua mua kudia tshipungidi ne bena mu buloba abu ne kabavua mua kuselangana nabu to. (Dut. 7:2, 3) Bushuwa, Nzambi wakadimuija bantu bende ne: ‘Udimuke, kupungi tshipungidi ne bantu ba mu buloba buudi uya; bualu ebu kabulu buteyi munkatshi muenu.’ (Ekes. 34:12) Kadi bena Isalele kabakatumikila Nzambi ne bakakuluka mu buteyi. Ntshinyi tshiakabafikisha ku dipona mu buteyi? Malongesha kayi atudi tupetela ku malu akabafikila?​—1 Kol. 10:11.

Bakabuelakana ne batendeledi ba mpingu

Pakabuela bena Isalele mu Buloba bulaya, bakatshimuna bantu bavua basombamu. Kadi bana ba Isalele kabakatumikila mikenji ya Nzambi yonso. Kabakipata baluishi bonso to. (Bal. 1:1–2:10) Kadi, bena Isalele bakasomba munkatshi mua “bisamba muanda mutekete” bivua mu buloba abu, ne dimonangana ne bantu ba bisamba abi diakabafikisha ku didia nabu bulunda. (Dut. 7:1) Mmunyi muvua bualu ebu bunyange bena Isalele? Bible udi wamba ne: ‘Bakangata bana babu bakaji bu bakaji babu ne bakafila bana babu bakaji kudi bana babu balume, bakakuatshila nzambi yabu mudimu. Bena Isalele bakenza malu mabi ku mêsu kua Yehowa, bakapua Yehowa Nzambi wabu muoyo, bakakuatshila Bâla ne Ashelota mudimu.’ (Bal. 3:5-7) Disomba dia bena Isalele ne bantu ba mu buloba diakabafikisha ku diselangana nabu ne ku ditendelela mpingu yabu. Pakaselangana bena Isalele ne bantu abu, kakuvua kabidi mushindu wa kubipata mu buloba to. Ntendelelu mulelela wakanyanguka ne bena Isalele bakatuadija kutendelela nzambi ya dishima.

 Dilua dia bantu abu balunda ba bena Isalele diakateka malanda abu ne Yehowa mu njiwu kupita pavuabu baluishi babu. Tumonayi mushindu mukuabu uvua ntendelelu wa bena Isalele munyanguke.

Midimu ya budimi ne ditendelela dia Bâla

Pakabuela bena Isalele mu Buloba bulaya, kabatshivua kabidi batambakana ne ba bungi bakalua babidime. Mishindu ivuabu badima ivua pamuapa mifuanangane ne ya bantu bavua mu buloba abu kumpala. Bidi bimueneka ne: bena Isalele kabavua anu batentule patupu mishindu ivua bena Kanâna badima to. Disomba ne bantu aba diakafikisha kabidi bena Isalele ku ditaba malongesha a ntendelelu wabu avua atangila malu a madimi.

Bena Kanâna bavua batendelela nzambi ya bungi ya Bâla ivuabu bela meji ne: yoyi ke ivua ifukisha buloba. Pa kumbusha didima ne dinowa bia pa madimi, mu bungi bua matuku bena Isalele bakatuadija kutumbisha nzambi ayi, bamba muvuayi ibapetesha bintu bia bungi. Bena Isalele ba bungi bavua badingidija bu bavua batendelela Yehowa, kadi mu bulelela bikale batendelela Bâla.

Didimuija buetu tuetu lelu

Bidi bimueneka ne: bena Isalele kabavua ne dijinga dia kubuelakana mu ntendelelu wa Bâla ne mu malu mabi ende pakapetanganabu musangu wa kumpala ne bantu ba mu Buloba bulaya. Kadi disomba nabu diakabafikisha ku dienza malu au. Tudi petu mua kunyanguka tuetu tusomba ne bantu badi bamueneka bu balunda bimpe kadi kabayi batendelela Nzambi utudi tutendelela ne kabayi balonda mikenji ya muomumue ne yetu. Bushuwa, bidi mua kuikala ne mushinga bua kupetangana ne bantu badi kabayi bena Kristo ku mudimu, mu tulasa anyi pamuapa kumbelu. Kadi malu avua mafikile bena Isalele adi atudimuija ne: kukeba bua kusomba ne bantu aba kudi kutukebela bilumbu. Bible udi wamba bulelela ne: “Malunda mabi adi anyanga malu makane a bantu.”​—1 Kol. 15:33.

Lelu tudi tupeta mateta a bungi mafuanangane ne avua bena Isalele bapete. Kudi bintu bia bungi ne bantu bidibu bangata bu nzambi. Munkatshi muabi mudi makuta, benji ba manaya banene, bamue balombodi ba bitendelelu nansha bena mu dîku. Tshimue tshia ku bintu ebi tshidi mua kulua ne mushinga mupite mu nsombelu wetu. Kudia bulunda ne bantu badi kabayi banange Yehowa kudi mua kunyanga malanda etu nende.

Tshiendenda tshia masandi tshivua tshitumbe mu ntendelelu wa Bâla ne tshiakakuluisha bena Isalele ba bungi. Mateyi a muomumue atshidi akuata bamue basadidi ba Nzambi lelu. Tshilejilu, muntu udi mua kunyanga kuondo kende ka muoyo padiye utangila bimfuanyi bia bantu butaka ku Internet mu musokoko. Mbia dibungama be padi muena Kristo ulekela bimfuanyi bia bantu butaka ku Internet bimulobesha!

‘Disanka didi kudi badi banemeka mêyi ende’

Dipangadika dia kutumikila Yehowa anyi kubenga kumutumikila patudi tusungula balunda betu mbualu budi butangila anu muntu nkayende. (Dut. 30:19, 20) Nenku tudi ne bua kudiebeja ne: ‘Mbantu kayi bandi nsomba nabu mu mêba anyi a dikisha? Mmunyi mudibu bamona mikenji ya Nzambi? Badi batendelela Yehowa anyi? Disomba nabu nedingambuluishe bua kuikala muena Kristo muimpe anyi?’

Mufundi wa Misambu wakamba ne: ‘Disanka didi kudi badi bajalame tshishiki mu bienzedi biabu, badi balonda mikenji ya Yehowa. Disanka didi kudi badi banemeka mêyi ende, badi bamukeba ne mitshima yabu mijima.’ (Mus. 119:1, 2) Bushuwa, ‘disanka didi kudi muntu yonso udi unemeka Yehowa, udi wenda mu njila yende.’ (Mus. 128:1) Bua bidi bitangila disungula dia balunda betu, tulongelayi ku bilema bia bena Isalele ne tutumikilayi Yehowa mu malu onso.​—Nsu. 13:20.

[Tshimfuanyi mu dibeji 26]

Kusomba ne bantu badi kabayi banange Yehowa kudi mua kutufikisha ku ditendelela mpingu