Yezu Kristo uvua Misionere mutambe bunene

‘Ngakufuma kudiye, yeye wakuntuma.’​—YONE 7:29.

1, 2. Misionere nnganyi, ne nnganyi utudi mua kubikila ne: Misionere mutambe bunene?

UTU wela meji ku tshinyi pautu umvua muaku “misionere”? Bamue bantu batu bela meji ku bamisionere ba mu Bukua-Buena-Kristo bavua misangu ya bungi badibuejakaja mu malu a tshididi ne a bungenda-mushinga a mu matunga muvuabu babatume. Kadi wewe Ntemu wa Yehowa udi pamuapa wela meji ku bamisionere badi Kasumbu Kaludiki katuma mu matunga mashilangane bua kuyisha lumu luimpe. (Mat. 24:14) Bamisionere aba batu bafila dîba diabu ne bukole buabu bua kuambuluisha bantu bua basemene pabuipi ne Yehowa Nzambi ne bua bikale nende mu malanda mimpe.​—Yak. 4:8.

² Miaku eyi “misionere” ne “bamisionere” kayitu mu Bible ya Tshiluba to. Kadi muaku wa mu tshiena Greke udibu bakudimune mu Mukanda wa Nzambi ne: “batangadiki” anyi “bamuangalaji ba mukenji mulenga” mu Mukanda wa Mvidi Mukulu (Katolike) udi kabidi mua kumvuija “bamisionere.” Yehowa ke Mumuangalaji mutambe bunene wa lumu luimpe, kadi katuena mua kumubikila ne: Misionere mutambe bunene to, bualu muntu nansha umue katu muanji kumutuma to. Kadi Yezu Kristo wakamba bua Tatuende wa mu diulu ne: ‘Ngakufuma kudiye, yeye wakuntuma.’ (Yone 7:29) Yehowa wakatuma Muanende mulela umue pa buloba bua kuleja mudiye munange bantu bikole. (Yone 3:16) Tudi mua kubikila Yezu ne: Misionere mutambe bunene anyi mutambe bulenga bualu Nzambi wakamutuma pa buloba bua “kuamba malu malelela.” (Yone 18:37) Wakayisha bimpe lumu luimpe lua Bukalenge bua Nzambi ne mudimu wakenzaye utshidi utuambuluisha too ne lelu eu. Tshilejilu, tudi mua kuidikija mushindu uvuaye ulongesha bantu nansha tuetu bikale bamisionere anyi katuyi bamisionere.

3. Netuandamune nkonko kayi?

³ Mudimu uvua nawu Yezu wa kuyisha Bukalenge bua Nzambi udi ujula nkonko bu mudi: Mmalu kayi avua Yezu mupete pavuaye pa buloba? Bua tshinyi uvua ulongesha bimpe, ne bua tshinyi malongesha ende avua ambuluisha bantu?

Lungenyi lua didifila mu nsombelu mupiamupia

4-6. Ngamue malu kayi avua mashintuluke bua Yezu pavua Nzambi mumutume pa buloba?

⁴ Bamisionere ba lelu ne bamue bena Kristo batu baya miaba idibu dijinga ne bamanyishi ba Bukalenge badi ne bua kuibidilangana ne nsombelu mushadile ku uvuabu nende kuabu. Kadi katuena mua kufuanyikija nansha kakese nsombelu uvua nende Yezu pa buloba ne uvuaye nende mu diulu pavuaye ne Tatuende Yehowa ne banjelu bavua benzela Yehowa mudimu  ne meji mimpe to. (Yobo 38:7) Malu avua mashilangane bikole pavuaye munkatshi mua bantu bena mapanga. (Mâko 7:20-23) Yezu wakatantamena too ne makokangana avua munkatshi mua bayidi bende. (Luka 20:46; 22:24) Kadi, wakatantamena bimpe menemene malu onso akapetaye pa buloba.

⁵ Yezu kakatuadija kuakula muakulu wa bantu mu tshishima to, kadi wakaulonga patshivuaye muana. Bivua bishilangane bikole ne mushindu uvuaye utumina banjelu dîyi mu diulu. Pavuaye pa buloba uvua wakula muakulu umue anyi ya bungi mu “miakulu ya bantu” ivua mishilangane bikole ne ‘miakulu ya banjelu.’ (1 Kol. 13:1, MMM) Tshidibi, bua mêyi mimpe, kakuena muntu ukadi muakule bu Yezu nansha.​—Luka 4:22.

⁶ Tangila mushindu mukuabu uvua malu mashintuluke bikole bua Muana wa Nzambi pavuaye pa buloba. Nansha muvua Yezu kayi mupiane bubi bua mu Adama, wakalua muntu mufuanangane ne bantu bavua ne bua kulua ‘bana babu’ anyi bayidi bende bela manyi. (Bala Ebelu 2:17, 18.) Yezu wakabenga bua kulomba Tatuende ‘banjelu batambe binunu makumi muanda mutekete ne bibidi’ bua kumuambuluishabu butuku buvuaye ne bua kufua. Ela meji bungi bua banjelu bavuaye utumina dîyi, yeye Mikaele muanjelu mutambe banjelu bakuabu. (Mat. 26:53; Yuda 9) Bushuwa Yezu wakenza bishima, kadi bivuaye muenze pavuaye pa buloba bivua bishadile ku bivuaye mua kuikala muenze mu diulu.

7. Mmunyi muvua bena Yuda bangata Mikenji?

⁷ Patshivua Yezu mu diulu muvuabu bamubikila ne: ‘Dîyi,’ yeye ke uvua Nzambi mua kuikala mutume bua kulombola bena Isalele mu tshipela. (Yone 1:1; Ekes. 23:20-23) Nunku, bena Isalele ‘bakangata mikenji ya Mose mipebue kudi banjelu, kadi kabakayitumikila.’ (Bien. 7:53; Eb. 2:2, 3) Kadi balombodi ba bitendelelu bena Yuda kabakajingulula diumvuija dia Mikenji to. Angata tshilejilu tshia mukenji wa Nsabatu. (Bala Mâko 3:4-6.) Bafundi ne Bafalese bavua ‘balengulula malongesha matambe bunene a mu Mikenji, bu buakane, luse ne lulamatu.’ (Mat. 23:23, Muanda Mulenga Lelu) Nansha nanku, Yezu kakalekela kumanyisha bulelela.

8. Bua tshinyi Yezu udi mua kutuambuluisha?

⁸ Yezu uvua ne lungenyi lua didifila. Uvua munange bantu bikole ke bualu kayi uvua musue kubambuluisha. Kavuaku muanji kulekela kuyisha lumu luimpe ne tshisumi. Bu muvua Yezu mulamate Yehowa pavuaye pa buloba, ‘wakalua muenzeji wa lupandu lua tshiendelele kudi bonso badi bamutumikila.’ Bualu bukuabu, bu muvuaye ‘yeye nkayende mukenge pakateyibuaye, yeye udi mumanye mua kukuatshisha badi bateyibua.’​—Eb. 2:18; 5:8, 9.

Uvua mulonge mua kulongesha bimpe

9, 10. Ndilongesha dia mushindu kayi divua Yezu mupete kumpala kua kuluaye pa buloba?

⁹ Lelu kumpala kua Kasumbu Kaludiki kutuma bamisionere, katu kalongolola bua banji kubalongesha mudimu. Yezu Kristo uvuaku pende mulonge mudimu eu anyi? Eyowa, kadi kavua mulonge mu tulasa tua ba Labi bua kuluaye Masiya anyi kavua mulonge ku makasa a balombodi banene ba bitendelelu to. (Yone 7:15; fuanyikija ne Bienzedi 22:3.) Kadi bua tshinyi Yezu uvua mulongeshi muimpe?

¹⁰ Nansha muvua Yezu mulongele amue malu kudi mamuende Mariya ne tatuende mudishi Yosefe, uvua mulongele malu a mushinga wa bungi bua kuyisha kudi Yehowa, Mulongeshi mutambe buimpe. Yezu wakamba bua bualu ebu ne: ‘Tshiena ndiambila nkayanyi; Tatu wakantuma wakampa mukenji wa malu angamba ne bu mungaamba.’ (Yone 12:49) Tangila ne: Muana wa Nzambi uvua mulonge malu masunguluke a kuyishaye. Kakuyi mpata, kumpala kua kuluaye pa buloba wakenza bidimu bia bungi muikale uteleja pavua Tatuende umulongesha. Nunku uvua mulonge mudimu bimpe be!

11. Mmunyi muvua Yezu muidikije mushindu uvua Tatuende wangata bantu?

¹¹ Katshia ku tshikondo tshivuabu bafuke Muana wa Nzambi, uvua mu malanda mimpe ne Tatuende. Pavuaye mu diulu, wakamona  mushindu uvua Nzambi wangata bantu. Wakananga bantu bikole anu mudi Nzambi mubanange, ke bualu kayi yeye muikale bu meji akula pa muaba wa muntu wakamba ne: “Disanka dianyi divule diakadi bua kusomba ne bukua bantu.”​—Nsu. 8:22, 31.

12, 13. (a) Ntshinyi tshiakalonga Yezu pavuaye utangila muvua Tatuende wenzela bena Isalele malu? (b) Mmunyi muakatumikila Yezu malu akalongaye?

¹² Muana wa Nzambi wakalonga kabidi malu makuabu pavuaye utangila tshivua Tatuende wenza pavua malu anyanguka. Tshilejilu, tangila malu avua Yehowa muenzele bena Isalele bavua bamutombokele. Nehemiya 9:28 udi wamba ne: ‘Pakapetabu ditalala, bakenza malu mabi ku mesu kuebe Yehowa kabidi, nunku wewe wakabashiya mu bianza bia bena lukuna babu bua kubakokeshabu; kadi pakakudimunabu mitshima ne pakadilabu kuudi, wewe wakabumvuila mu diulu; bua luse luebe lunene wewe wakabasungila misangu ya bungi.’ Bu muvua Yezu wenza mudimu ne Yehowa ne utangila muvuaye wenza malu, wakaleja luse lua muomumue bua bantu ba mu Isalele bavuaye uyisha.​—Yone 5:19.

¹³ Yezu wakatumikila malu avuaye mulonge bualu uvua uditeka pa muaba wa bayidi bende. Butuku bua kumpala kua kufuaye, bapostolo bende bonso bavuaye munange bikole ‘bakamushiya, bakanyema.’ (Mat. 26:56; Yone 13:1) Mupostolo Petelo wakavila mene Kristo misangu isatu! Nansha nanku, Yezu wakapesha bapostolo bende mushindu wa kupingana kudiye. Wakambila Petelo ne: ‘Ngakukulombela wewe Nzambi bua ditabuja diebe kadipangi; wewe, pawakudimuka, ukoleshe mitshima ya bana benu.’ (Luka 22:32) Isalele wa mu nyuma wakatuadija bimpe ne “bapostolo” ne tshishimikidi tshia mabue tshia lumbu lua Yelushalema mupiamupia tshidi ne mêna a bapostolo ba lulamatu 12 ba Yezu Kristo, Muana wa mukoko. Lelu, bena Kristo bela manyi ne bena mu tshisumbu tshia “mikoko mikuabo” badi badilambule kudi Nzambi badi balubuluka mu mudimu wabu wa kuyisha Bukalenge balombola kudi tshianza tshia bukole tshia Nzambi ne kudi Muanende munanga.​—Ef. 2:20; Yone 10:16; Buak. 21:14.

Mushindu uvua Yezu ulongesha

14, 15. Mmunyi muvua ndongeshilu wa Yezu mushilangane ne wa bafundi ne Bafalese?

¹⁴ Mmunyi muakatumikila Yezu malu akalongaye pavuaye ulongesha bayidi bende? Patudi tufuanyikija ndongeshilu wa Yezu ne wa balombodi ba bitendelelu bena Yuda, tudi tumona bimpe muvua ndongeshilu wende mubandile. Bafundi ne Bafalese bavua ‘buona dîyi dia Nzambi bua bilele biabu.’ Kadi malu avua Yezu yeye wamba kaavua afumina kudiye to; uvua ulongesha anu dîyi dia Nzambi. (Mat. 15:6; Yone 14:10) Ke tshitudi petu ne bua kuikala tuenza.

¹⁵ Kuvua bualu bukuabu buvua buenze bua Yezu ikale mushilangane ne balombodi ba bitendelelu. Wakambila bantu bua bafundi ne Bafalese ne: ‘Nuenze, nutumikile malu onso adibu banuambila; kadi kanuenji malu adibu benza; bualu bua bobu batu bamba, kadi kabatu benza.’ (Mat. 23:3) Yezu uvua wenza malu avuaye ulongesha. Tuangatayi tshilejilu tshidi tshijadika bualu ebu.

16. Bua tshinyi tudi mua kuamba ne: Yezu uvua utumikila mêyi ende adi mu Matayo 6:19-21?

¹⁶ Yezu wakabela bayidi bende bua ‘kudibutshila bintu mu diulu.’ (Bala Matayo 6:19-21.) Yezu muine uvuaku utumikila mubelu au anyi? Eyowa, bualu wakamba buende yeye muine ne: ‘Mibuabua idi ne mena ayi, nyunyi ya mulu idi ne masua ayi; kadi Muana wa muntu kena ne pa kuladika mutu wende.’  (Luka 9:58) Yezu kavua ukeba bintu bia bungi mu nsombelu wende to. Uvua tshia kumpala udifila mu dimanyisha lumu luimpe lua Bukalenge bua Nzambi, ne wakaleja tshivua kubenga kuikala ne tunyinganyinga tudi tufumina ku didibutshila bintu pa buloba kumvuija. Yezu wakaleja mudibi bitambe buimpe bua kudibutshila bintu mu diulu ‘mudi kamuyi bishi ne dimoma bidi mua kubibipisha, ne mudi kamuyi bivi badi mua kubumbula nzubu babiba.’ Udiku ulonda mubelu wa Yezu wa kudibutshila bintu mu diulu anyi?

Ngikadilu ivua bantu banangile Yezu

17. Ngikadilu kayi ivua mivuije Yezu mumanyishi wa lumu luimpe wa pa buende?

¹⁷ Ngikadilu kayi ivua mivuije Yezu mumanyishi wa lumu luimpe wa pa buende? Umue wa ku ngikadilu eyi uvua mushindu uvuaye wangata bantu bavuaye wambuluisha. Munkatshi mua ngikadilu milenga ya Yehowa ivua Yezu mutentule muvua didipuekesha, dinanga ne luse. Tangila muvua ngikadilu eyi mikoke bantu ba bungi kudi Yezu.

18. Bua tshinyi tudi mua kuamba ne: Yezu uvua udipuekesha?

¹⁸ Bu muvua Yezu muitabe bua kulua pa buloba, ‘wakadiumushila bimanyinu bia butumbi buende, pakangataye mubidi wa mupika, pakaluaye mu tshifuanyikiji tshia muntu.’ (Filip. 2:7) Bualu ebu budi buleja muvuaye udipuekesha. Yezu kavua kabidi upepeja bantu to. Kavua ne ngikadilu wa muntu udi uleja ne: ‘Meme ke udi mufumine mu diulu, nunku nudi ne bua kunteleja.’ Yezu uvua mushilangane ne bamasiya ba dishima, bualu yeye kavua uditambisha bua muvuaye Masiya mulelela to. Misangu mikuabu uvua wambila bantu bua kabambidianganyi tshivuaye ne malu avuaye muenze. (Mat. 12:15-21) Yezu uvua musue bua bantu badiangatshile dipangadika dia kumulonda bua malu avuabu badimuene. Biakambuluisha bayidi bende bikole bua muvuaye kayi ubalomba bua kuikala anu bu banjelu bapuangane bavuaye nabu mu diulu.

19, 20. Mmunyi muvua dinanga ne luse bisake Yezu bua kuambuluisha bantu?

¹⁹ Yezu Kristo wakaleja kabidi dinanga, didi dikale ngikadilu munene wa Tatuende.  (1 Yone 4:8) Yezu uvua ulongesha bantu bualu uvua mubanange. Tshilejilu, tangila tshivuaye mumvue bua nsonga mukuabu uvua mfumu. (Bala Mâko 10:17-22.) Yezu “wakamunanga” ne wakajinga kumuambuluisha, kadi mfumu au kakalekela bintu biende bia bungi bua kulonda Kristo nansha.

²⁰ Bantu bavua banange kabidi Yezu bualu uvua ne luse. Anu bu bantu bonso bena mapanga, aba bavua bitaba malongesha ende bavua ne ntatu ya bungi. Bu muvuaye mumanye bualu ebu, wakabalongesha ne luse. Tshilejilu, dimue dituku Yezu ne bapostolo bende bakenza mudimu wa bungi kupangilabu ne mua kudia. Kadi, ntshinyi tshiakumvua Yezu pakamonaye bantu bavua bunguile? ‘Wakadi nabu luse, bualu bua bobu bakadi bu mikoko yakadi kayiyi ne mulami; yeye wakabanga kubayisha malu a bungi.’ (Mâko 6:34) Yezu wakamona lutatu luvua nalu bantu bavuaye uyisha ne wakadifila bua kubalongesha ne kuenzaye bishima bua kubambuluisha. Bamue bantu bakamunanga bua ngikadilu yende milenga, mêyi ende kubalengawu ne kuluabu bayidi bende.

21. Ntshinyi tshitualonga mu tshiena-bualu tshidi tshilonda?

²¹ Anu mutualonga mu tshiena-bualu tshidi tshilonda, kudi malu makuabu a bungi atudi mua kulonga bua mudimu uvua Yezu muenze pavuaye pa buloba. Mmishindu kayi mikuabu itudi mua kuidikija Yezu, Misionere mutambe bunene?

Newandamune munyi?

• Mmalu kayi avua Yezu mulonge kumpala kua kuluaye pa buloba?

• Mmunyi muvua ndongeshilu wa Yezu mushilangane ne wa bafundi ne Bafalese?

• Ngikadilu kayi ivua bantu banangile Yezu?

[Nkonko ya dilonga]

[Tshimfuanyi mu dibeji 15]

Mmunyi muvua Yezu ulongesha bisumbu bia bantu?