Tshipungidi tshia mushinga mukole

NDI muangate tshipungidi tshia mushinga mukole. Ndi mamu wa mu ditunga dia Espagne ne ndi musue kunulondela tshivua tshinsake bua kuangata tshipungidi etshi.

Mu dîku dietu kamuvua ditalala ne diumvuangana to. Tuakapeta kanyinganyinga ka bungi pakafua muakunyanyi wa balume wa bidimu binayi mu njiwu kampanda. Bualu bukuabu, bibidilu bibi bia tatu biakapangisha mamu bua kuikala ne disanka mu dibaka. Kadi lutatu alu kaluakapangisha mamu bua kundongesha meme ne tutuanyi malu a mushinga.

Ndekelu wa bionso, mukuluanyi wakasela ne meme panyi ngakasedibua. Matuku makese panyima apu, bakakuata mamu ne disama dia kansere diakamufikisha too ne ku lufu. Kadi kumpala kua kufuaye, wakatushila tshiuma.

Mamu mukuabu uvuabu bamanyangane nende ukavua muyikile nende bua ditekemena dia dibishibua, ne mamu wakitaba bua kutuadija kulonga Bible. Mu matuku a ndekelu a muoyo wende, malu avuaye ulonga akavuija muoyo wende ne mushinga ne akamuambuluisha bua kupeta disanka.

Patuakamona muvua malu a mu Bible mambuluishe mamu, meme ne tutuanyi tuakabanga petu kulonga Bible. Ngakatambula ne kulua Ntemu wa Yehowa ngondo umue kumpala kua meme kulela muananyi muibidi, uvua muana wa bakaji muimpe kumona, diende Lucía.

Dituku dingakatambula divua ne mushinga mukole kundi meme bua malu abidi. Bua kumpala: mvua mpindieu muntu wa Yehowa, muditshipe bua kumuenzela mudimu bua kashidi. Buibidi: mvua ne bua kuambila muananyi wa balume ne wa bakaji malu avua atangila ditabuja dianyi.

Kadi bualu buibidi buvua bumpetesha disanka buakakosekela mu njila. Pavua Lucía ne bidimu binayi, munda muakatuadija kumusama bikole. Panyima pa munganga mumane kumuenza mateta, wakaleja ne: uvua ne tshiuja ku mutshima bunene bua tshimuma tshia oranje. Munganga wakumvuija ne: Lucía uvua ne kansere kavua kenda kadiunda ne lukasa. Ke muakatuadija Lucía kuluangana nunku ne disama edi munkatshi mua bidimu muanda mutekete ne diakamubuejija mu lupitadi misangu ya bungi.

Lungenyi lua didifila

Mu bidimu bia lutatu ebi, Lucía uvua misangu mivule unkankamija pavuaye ungupukila ne untua mishiku ne dinanga. Mushindu uvuaye utantamena disama edi wakakemesha kabidi baminganga. Uvua misangu yonso wambuluisha baminganga bua kuabanyina bana bakuabu bavua basama yaur ne mâyi a bimuma. Baminganga bakamupesha nkanzu mutoke bu wa baminganga ne tshitadi tshivuaye uvuala bua kumumanyisha ne: uvua ubambuluisha.

Muena mudimu mukuabu wa mu lupita alu udi wamba ne: “Lucía wakalenga muoyo wanyi. Uvua wenza tumalu tua bungi ne munange kuzola. Uvua wakula bikole ne uvua wenza malu bu muntu mukulumpe.”

Dîyi dia Nzambi ke divua dipetesha Lucía bukole ne ditalala dia mu lungenyi. (Eb. 4:12) Uvua mutuishibue ne: mu buloba bupiabupia, ‘lufu kaluena luikalaku kabidi; madilu kaena ikalaku kabidi, nansha muadi, nansha kanyinganyinga kabidi,’ anu mudi Nzambi mulaye mu Dîyi diende. (Buak. 21:4) Bu muvuaye uditatshisha bua bantu bakuabu, uvua misangu yonso ukeba bikondo bia kubambila malu a mu Bible. Ditekemena dikole dia dibika ku lufu divuaye nadi diakamuambuluisha bua kuikala ne muoyo mukole ne disanka nansha muvuaye kayi mua kumvua bimpe. (Yesh. 25:8) Wakashala nanku too ne dituku diakafuaye.

 Dituku adi ke dingakangata tshipungidi tshia mushinga mukole. Lucía katshivua kabidi utabala bimpe to. Tatuende uvua mumukuate ku tshianza tshimue ne meme mumukuate ku tshikuabu. Ngakamuambila ku ditshi ne: “Kutshinyi to, tshiena nkushiya nansha. Ikala weyela kakese kakese. Pawabika neumvue bimpe. Kuakumvua kabidi tshintu tshikusama ne meme nengikale nebe.”

Mpindieu ndi ne bua kulama tshipungidi atshi. Ndi mumanye ne: kuindila dituku dia dibishibua diende ki nkupepele to. Kadi ndi mumanye kabidi ne: meme mueyemene Yehowa ne lutulu ne mushale mumulamate, nengikalepu pabika Lucía.

Bumpianyi budi Lucía mutushile

Muoyo mukole wa Lucía ne dikuatshisha dia bena mu tshisumbu biakalenga bayanyi uvua kayi Ntemu wa Yehowa. Dituku diakafua Lucía, bayanyi wakangambila ne: uvua ne bua kuelulula meji. Mbingu mikese panyima, wakalomba mukulu umue wa mu tshisumbu tshietu bua kulonga nende Bible. Mu matuku makese, bayanyi wakabanga kubuela mu bisangilu bionso. Ku diambuluisha dia Yehowa, wakalekela mfuanka uvuaye kayi mukokeshe bua kulekela kumpala.

Kanyinganyinga kandi naku bua lufu lua Lucía ki kanji kujika menemene to, kadi ndi ngela Yehowa tuasakidila bua bumpianyi budi Lucía mutushile. Meme ne bayanyi tudi tukoleshangana ne ditekemena dimpe dia dibishibua, ne tudi tuela meji bua tshikondo tshituamona tshiakabidi Lucía ne mêsu ende a bijengu ne tubuyi tuende tua pa matama tuvua tumueneka pavuaye useka.

Lutatu luvua lufikile muananyi luakalenga kabidi muena mutumba wetu mukuabu bikole. Dimue Disambombo pavua mvula muloke mu dinda, mamu mukuabu wakalua kumbelu kuetu. Muana wa mamu eu uvua ulonga muaba umue ne Lucía. Mamu eu uvua pende mufuishe muanende wa balume wa bidimu 11 uvua ne disama adi. Pakumvuaye tshivua tshifikile Lucía, wakakeba muaba utuvua basombele ne wakalua kututangila. Uvua musue kumanya mushindu umvua mupite ne lufu lua Lucía ne wakangambila bua tuetu kuenza kasumbu ka bamamu badi mua kuambuluisha bantu badi ne lutatu lua muomumue.

Ngakamumvuija ne: mulayi kampanda wa mu Bible udi mupite diambuluisha dia kudi bantu munsambe bikole. Mêsu ende akakenka pangakamubadila mêyi a Yezu adi mu Yone 5:28, 29. Wakitaba bua kulonga Bible ne wakabanga kupeta “ditalala dia Nzambi didi ditamba dijingulula dionso dia bantu.” (Filip. 4:7) Misangu ya bungi, patuvua tulonga nende Bible, tuvua tuanji tuimana katupa bua kuela meji mushindu utuakidila bana betu bakadi bafue pabikabu mu buloba bupiabupia.

Nansha muvua Lucía kayi mulale bidimu bia bungi to, uvua mutushile bumpianyi bua matuku a bungi. Ditabuja diende diakatuambuluisha bua kuenzela Nzambi mudimu mu buobumue mu dîku dietu, ne diakakolesha dipangadika dianyi dia kushala ne lulamatu. Kakuyi mpata, tuetu bonso badi bafuishe bantu batudi banange bikala ne bua kubika tudi ne tshipungidi tshia mushinga mukole.

[Tshimfuanyi mu dibeji 20]

Mparadizu uvua Lucía muzola