Yehowa utu umvua kudila kuetu

‘Mêsu a Yehowa adi kudi bakane, ne matshi ende adi buashi ku kudila kuabu.’​—MUS. 34:15.

1, 2. (a) Nsombelu kayi udi nende bantu ba bungi lelu? (b) Bua tshinyi nsombelu au kena utukemesha?

UDIKU ne dikenga anyi? Bikalabi nanku, kuena nkayebe to. Kudi bantu binunu ne binunu badi baluangana ne ntatu ya ku dituku dionso edi ya mu bulongolodi ebu bubi. Bua bantu bakuabu mbikole bua kuyitantamena. Batu badiumvua anu bu muvua Davidi mudiumvue, kufundaye ne: ‘Ngakupanga ne ndi mutshibuke bikole; ndi ntua mikemu bualu bua dipampakana dia mu mutshima wanyi. Mutshima wanyi udi ukuma, bukole buanyi budi bumuka kundi; munya wa mu mêsu anyi kawenaku; wowo kabidi wakumuka kundi.’​—Mus. 38:8, 10.

² Buetu tuetu bena Kristo, ntatu kayitu itukemesha to. Tudi bamanye ne: “kanyinganyinga kakole” ntshimue tshia ku bimanyinu bivuabu bamanyishe bua dikalaku dia Yezu mu Bukalenge. (Mâko 13:8; Mat. 24:3) Muaku udibu bakudimune ne: “kanyinganyinga kakole” udi umvuija bisama bipite bukole bitu mamu umvua pa kulela. Ebi bidi bileja menemene bukole bua ntatu idi nayi bantu mu bikondo ebi bia “malu makole” anyi “dikenga dikole.”​—2 Tim. 3:1; MMV.

Yehowa utu utumvuila mu makenga

3. Ntshinyi tshidi bantu ba Nzambi bajadike bimpe?

³ Bantu ba Yehowa mbajadike bimpe ne: makenga aa adi mua kubakuata pabu, kabidi bidi bimueneka pamuapa ne: nsombelu udi wenda unyanguka anu kunyanguka. Pa kumusha malu adi akuata bantu bonso, tuetu basadidi ba Nzambi tudi tutuilangana ne ‘muena lukuna wetu Diabolo’ udi ukeba anu bua kunyanga ditabuja dietu. (1 Pet. 5:8) Mbipepele bua kudiumvua anu bu Davidi wakamba ne: ‘Bipendu biakutamba kupanda mutshima wanyi, dinyingalala diakuntonda. Ngakatekemena ne: Muntu neamfuile luse, kadi kakadiku; ngakatekemena ne: Basambi nebamueneke, kadi tshiakasangana nansha umue.’​—Mus. 69:20.

4. Ntshinyi tshidi tshitukolesha ku muoyo patudi mu ntatu?

⁴ Mêyi a Davidi au avua asua kuamba ne: kavuaku ne ditekemena anyi? Kabiena nanku to. Mona mêyi makuabu adiye wamba mu musambu eu: ‘Yehowa udi umvua dîyi dia badi bakengela bintu, kena upetula bantu bende badi bakuatshibue mu nkanu.’ (Mus. 69:33) Mu ngakuilu kampanda, tudi mua kudiumvua imue misangu anu bu bantu bela mu buloko kudi ntatu ne makenga. Bidi mua kumueneka bu ne: bakuabu kabena bumvua lutatu lutudi nalu; anyi imue misangu bobu bine kabayi anu balumvuilamu to. Kadi patudi tumanya ne: Yehowa udi utumvuila bimpe mu makenga etu, bidi bitukolesha anu muakakoleshabi Davidi.​—Mus. 34:15.

5. Ntshinyi tshivua mukalenge Solomo mushindike?

⁵ Solomo muana wa Davidi wakaleja bualu ebu dituku dia dibanjija dia ntempelo wa ku Yelushalema. (Bala 2 Kulondolola 6:29-31.) Wakasengelela Yehowa bua kuteleja disambila dia muntu muimpe yonso uvua umulomba bua ‘disama diende ne ntatu yende.’ Ntshinyi tshivua Nzambi mua kuenza bua masambila a bena dikenga aba? Solomo uvua ne dishindika dia ne: Nzambi uvua mua kuteleja masambila abu ne uvua mua kubambuluisha kabidi. Mbua tshinyi wakamba nanku? Bualu Yehowa mmumanye tshidi mu “mitshima ya bantu.”

6. Mmunyi mutudi mua kupita ne tunyinganyinga ne mbua tshinyi?

⁶ Tuetu petu tudi mua kusambila Yehowa bua ‘masama etu ne ntatu yetu’ anyi makenga a muntu  ne muntu. Tudi tukola ku muoyo patudi tuvuluka ne: udi utumvuila patudi mu makenga ne utuambuluisha. Mupostolo Petelo wakajadika bualu ebu pavuaye muambe ne: “Mupuilayi ntatu yenu yonso bualu yeye ke udi unulama” anyi unuambuluisha. (1 Pet. 5:7, MMM) Yehowa utu utuambuluisha padi malu atukuata. Yezu uvua muleje mushindu utu Yehowa utuambuluisha ne dinanga wamba ne: ‘Kabatu bapana mishamisha ibidi ku dikuta dikese anyi? Mushamusha umue kawena upona panshi, anu pitabuja Tatu wenu. Nsuki ya ku mitu yenu mene idi mibala yonso. Nunku kanutshinyi, mushinga wenu udi mutambe wa mishamisha ya bungi.’​—Mat. 10:29-31.

Tekemena diambuluisha dia Yehowa

7. Tuikale bashindike ne: tudi mua kupeta diambuluisha kayi?

⁷ Patudi mu makenga, tuikale bashindike ne: Yehowa udi ne bukole bua kutuambuluisha ne ke tshidi dijinga diende. ‘Nzambi udi tshinyemenu tshietu ne bukole buetu, udi dikuatshisha dietu mu makenga didi kadiyi dipanga tshiendelele.’ (Mus. 34:15-18; 46:1) Kadi mmushindu kayi udi Nzambi utukuatshisha? Tangila tshidi 1 Kolinto 10:13 wamba. Udi wamba ne: ‘Nzambi udi mua kueyemenyibua ngudi kayi witabuja bua nuenu nutetshibue ne diteta didi dinupita bukole; kadi palua diteta, yeye neanuenzele njila wa kupandukila, bua nuenu numanye mua kutantamana mu diteta.’ Yehowa udi mua kulombola malu mu mushindu wa kutumushila lutatu lutudi nalu anyi kutupesha bukole bua kulutantamena. Mu mishindu yonso, Yehowa udi utuambuluisha.

8. Ntshinyi tshitudi mua kuenza bua kupeta diambuluisha dia Nzambi?

⁸ Ntshinyi tshitudi mua kuenza bua kupeta diambuluisha edi? Teleja tshidibu batuambila bua kuenza: ‘Nuteke ntatu yenu yonso kudiye.’ Ebi bidi bisua kumvuija ne: tudi benze anu bu tudi tupesha Yehowa bukole bua kutangila majinga ne malu etu onso. Tudi tulekela kunyingalala ne tumueyemena bindile ne lutulu luonso bua atukumbajile majinga etu. (Mat. 6:25-32) Bua kuikala ne dieyemena dia mushindu eu bidi bikengela tuikale ne budipuekeshi, katuyi tueyemena meji anyi bukole buetu. Patudi tudipuekesha “kuinshi kua tshianza tshikole tshia Nzambi,” tudi tuitaba mutudi bapuekele kudiye. (Bala 1 Petelo 5:6.) Tuetu benze nanku, netupete mushindu wa kupita ne lutatu kayi luonso ludi Nzambi mua kulekela lutukuata. Tudi mua kuikala tuluangana bua kujikija malu atudi nawu lelu, kadi tuikale bashindike ne: Yehowa mmumanye bimpe tshikondo ne dîba ne mushindu wenzaye bua kutuambuluisha.​—Mus. 54:7; Yesh. 41:10.

9. Ntatu kayi ivua Davidi ne bua kupuila Yehowa?

⁹ Vuluka mêyi avua Davidi mufunde mu Musambu 55:22 a ne: ‘Teka bujitu buebe pambidi pa Yehowa, ne yeye neakukoleshe; kena witabuja tshiendelele bua bantu bakane banyungishibue.’ Pavua Davidi mufunde mêyi aa, uvua mu lutatu lukole. (Mus. 55:4) Bidi bimueneka ne: uvua mufunde musambu eu mu tshikondo tshivua muanende Abashaloma ukeba kumunyenga bukalenge. Ahitofele mufidi wa ngenyi uvua Davidi weyemena bikole wakamuelela pende tshifufu. Davidi wakanyemena mu Yelushalema bua kudisungila. (2 Sam. 15:12-14) Nansha pavua Davidi mu ntatu eyi mikole, uvua anu mueyemene Nzambi ne kavua mutekete mu maboko to.

10. Ntshinyi tshitudi ne bua kuenza patudi mu ntatu?

¹⁰ Mbia mushinga bua tuetu kusambila Yehowa bua lutatu kayi lonso lutudi nalu anu bu muvua Davidi muenze pende. Tukonkononayi  mubelu uvua mupostolo Paulo mufile pa tshilumbu etshi (Bala Filipoi 4:6, 7.) Disambila dienza ne muoyo mujima didi ne dikuatshisha kayi? ‘Ditalala dia Nzambi didi ditamba dijingulula dionso dia bantu nedilame mitshima yetu ne meji etu mu Kristo Yezu.’

11. Mmushindu kayi udi “ditalala dia Nzambi” dikuba mioyo yetu ne meji etu?

¹¹ Disambila didiku mua kushintulula nsombelu webe anyi? Eyowa, didi mua kumushintulula. Kadi tudi ne bua kumanya ne: Yehowa katu wandamuna masambila etu anu mu mushindu utudi tuetu basue to. Nansha nanku, disambila didi dituambuluisha bua kuikala ne lungenyi lutukije bua ntatu kayilu kutushiya bu bapale. “Ditalala dia Nzambi” didi mua kutupesha lutulu mu tshikondo tshitudi bazengeja kudi ntatu. “Ditalala dia Nzambi” nedikube mioyo yetu ne meji etu anu bu mutu basalayi bateka bua kukuba ditunga. Nedituambuluishe kabidi bua tuetu kulekela dielakana, buôwa ne ngenyi mibi, ne kutupangisha bua tuetu kuenza malu mu tshiputuku ne katuyi bele meji bimpe.​—Mus. 145:18.

12. Umvuija mudi muntu mua kupeta ditalala mu lungenyi.

¹² Mmunyi mutudi mua kupeta ditalala mu lungenyi patudi mu ntatu? Tuangate tshilejilu tshidi ne malu adi mua kupetangana ne nsombelu utudi nende. Muntu kampanda udi wenza mudimu mu kumpanyi kansanga kadi muikale ne shefu mubi. Nansha nanku, muena mudimu udi uya kukuatshila muena kumpanyi udi yeye muntu mulenga ne muena malu mapole lutatu luende. Muena kumpanyi eu udi uleja muena mudimu au mudiye mumvue lutatu luende, ne umujadikila ne: shefu mubi au neamumbushe pa muabu udiye au. Muena mudimu au neumvue bishi? Bu mudiye witaba dîyi dia muena kumpanyi ne mumanye tshienzeka, nebimukoleshe bua yeye kutungunuka ne kuenza mudimu nansha yeye mua kutuilangana ne ntatu mikuabu padiye windila apu. Bia muomumue, tudi bamanye ne: Yehowa mmumone nsombelu utudi nende. Udi utujadikila kabidi ne: mu matuku makese emu ‘nebipate mukokeshi wa buloba ebu.’ (Yone 12:31) Bualu ebu budi butukolesha ku muoyo bushuwa.

13. Pakumbusha disambila, ntshinyi tshikuabu tshitudi ne bua kuenza?

¹³ Nanku tudi mua kushala bavunge maboko bualu tudi bambile Yehowa malu adi matutonde anyi? Too. Bidi bikengela tuetu kuenza malu makuabu. Tudi ne bua kuenza malu adi apetangana ne tshituvua balombe mu disambila. Pavua mukalenge Shaula mutume bantu kua Davidi bua kumushipa, Davidi wakasambila ne: ‘Nzambi wanyi, umpandishe mu bianza bia badi nanyi lukuna, umbandishe kulu bua badi bajuka bua kunduisha kabafiki kundi. Umpandishe mu bianza bia benji ba malu mabi, unsungile mu bianza bia badi bamatshisha mashi a bantu.’ (Mus. 59:1, 2) Pakumbusha disambila, Davidi wakateleja mubelu wa mukajende ne kusokomaye. (1 Sam. 19:11, 12) Mu mushindu wa muomumue, tudi mua kusambila bua kulomba meji a tshia kuenza ne pamuapa kuakaja nsombelu wetu mu amue malu.​—Yak. 1:5.

Mmunyi mutudi mua kupeta bukole bua kunanukila?

14. Ntshinyi tshidi mua kutuambuluisha bua kutantamena ntatu idi mua kutukuata?

¹⁴ Ntatu yetu kayakujika dimue dimue to. Idi pamuapa mua kutungunuka mu bule bua matuku. Bu yoyi mua kutungunuka tuenze tshinyi bua kuyitantamena? Tshia kumpala, Tumanye ne: patudi tutungunuka ne kuenzela Yehowa mudimu ne lulamatu nansha mu ntatu, tudi tuleja mutudi bamunange. (Bien. 14:22) Vuluka muvua Satana mubande Yobo wamba ne: ‘Padi Yobo mukulamate mbua patupu anyi? Udi mumututshishe dikasa dimpe mu bintu biende bionso. Bimuna biende mbitangalake ditunga  dijima. Ndi nkujadikila ne: bu wewe mua kumunyenga bionso bidiye nabi, neakuele mulawu bantu bonso bumvue.’ (Yobo 1:9-11, MMV) Lulamatu lua Yobo luvua luleja muvua Satana muambe malu a dishima. Patudi tutantamena ntatu idi itukuata, tudi petu tupeta mushindu wa kuleja mudi Satana muena mafi. Ditantamena dietu dia ntatu didi kabidi dikolesha ditekemena dietu ne dieyemena dietu.​—Yak. 1:4.

15. Mbilejilu kayi bidi mua kutukolesha ku muoyo?

¹⁵ Tshibidi, tuikale bavuluke ne: ‘Makenga a momumue adi makumbajibue mu bana betu badi pa buloba ebu.’ (1 Pet. 5:9) Bushuwa, ‘kakuena diteta diakunukuata didi kadiyi dikuata muntu yonso.’ (1 Kol. 10:13) Udi kabidi mua kupeta bukole ne kukola ku muoyo wewe welela bilejilu bia bantu bakuabu meji pamutu pa kushala mutuishile mêsu anu pa ebe makenga. (1 Tes. 1:5-7; Eb. 12:1) Kebaku dîba dia kuelela meji pa bilejilu bia bantu baudi mumanye bimpe bavua bashale ne lulamatu pavuabu mu ntatu mikole. Ukadiku mukebe bua kubala muyiki wa mu nsombelu mupatula mu mukanda wetu kampanda udi ulonda bua lutatu lua buena luebe luvua muanetu kansanga mutantamene anyi? Muyiki wa mushindu eu udi mua kukukolesha bikole.

16. Mmushindu kayi udi Nzambi utukolesha patudi mu ntatu ya mishindu yonso?

¹⁶ Tshisatu, vuluka ne: Yehowa udi ‘Nzambi wa busambi buonso, utu watusamba mu makenga etu onso, bua tuetu tumanye mua kusamba bakuabu mu makenga abu onso ne busambi butudi tusambibua kudi Nzambi.’ (2 Kol. 1:3, 4) Mbienze anu bu ne: Nzambi udi ku luseke luetu bua kutukolesha, kabiyi anu mu dikenga ditudi nadi mpindieu to, kadi ‘mu makenga etu onso’ kabidi. Ditukolesha edi didi dituambuluisha bua tuetu petu kusamba bakuabu ‘mu makenga abu onso.’ Malu avua Paulo mupete akamujadikila mudi mêyi aa malelela.​—2 Kol. 4:8, 9; 11:23-27.

17. Mmushindu kayi udi Bible mua kutuambuluisha bua kupita ne ntatu yetu?

¹⁷ Tshinayi, tudi ne Bible Dîyi dia Nzambi didi ne ‘mudimu muimpe wa kuyisha bantu, ne wa kubabela, ne wa kubadimuija, ne wa kubalongesha mu buakane bua Nzambi; bua muntu wa Nzambi ikale mukumbajibue, mulongolola tshishiki bua midimu yonso mimpe.’ (2 Tim. 3:16, 17) Mukanda wa Nzambi kawena anu utuvuija ‘bakumbajibue’ ne ‘balongolola bua midimu yonso mimpe’ to. Udi utuambuluisha kabidi bua kumanya mua kupita ne ntatu ya mu nsombelu. Udi utuvuija ‘bakumbajibue’ tshishiki ne ‘balongolola tshishiki bua mudimu onso.’ Muaku wa mu Greke udibu bakudimune ne: ‘mulongolola tshishiki’ udi umvuija ne: “muakaja bimpe.” Muaku eu bavua pamuapa benza nawu mudimu mu bikondo bia kale bua buatu buvua buakaja bimpe ne bintu bionso bua luendu anyi bua tshiamu kampanda tshivua tshiakaja bimpe bua kuenza mudimu kansanga. Yehowa pende udi utuakaja ne Dîyi diende ne bintu bionso bitudi nabi dijinga bua tuetu kupita  bimpe ne nsombelu yonso udi mua kutuvuila. Tudi mua kuamba petu ne: “Nzambi yeye mulekele lutatu kampanda lumfikila, ndi mua kulutantamena ne diambuluisha diende.”

Disungidibua ku makenga etu onso

18. Tudi ne bua kuvuluka tshinyi tshiatuambuluisha bua kutantamena makenga ne lulamatu?

¹⁸ Tshitanu, tuikale anu bavuluke ne: Yehowa neumushile bantu makenga abu onso. (Mus. 34:19; 37:9-11; 2 Pet. 2:9) Patumbushila Nzambi makenga aa neatupeshe kabidi muoyo wa tshiendelele, bua bamue mu diulu ne Yezu, ne bua bakuabu mu mparadizu pa buloba.

19. Bua tshinyi tudi tuamba ne: tudi mua kutantamena ntatu ne lulamatu?

¹⁹ Mu dindila dia tshikondo atshi tudi ne bua kutungunuka ne kutantamena makenga adi pa buloba apa. Tudi bindile ne muoyo kulu kulu tshikondo atshi tshikala malu aa kaayiku kabidi. (Mus. 55:6-8) Tuvulukayi ne: dinanukila dietu ne lulamatu didi dileja mudi Diabolo muena mafi. Tudi kabidi mua kupetela bukole ku masambila etu ne kudi bana betu bena Kristo bamanye ne: makenga atudi nawu adi kabidi kudi bana betu bakuabu. Tungunuka ne kuikala mukumbane ne mulongolola tshishiki bua kuenza mudimu bimpe ne Mukanda wa Nzambi. Kulekedi kueyemena diambuluisha dia dinanga dia ‘Nzambi wa busambi buonso’ to. Uvuluke kabidi ne: ‘Mêsu a Yehowa adi kudi bakane, ne matshi ende adi buashi ku kudila kuabu.’​—Mus. 34:15.

Udi mua kuandamuna anyi?

• Ntshinyi tshivua Davidi mumvue pavua makenga mamukuate?

• Mukalenge Solomo uvua ne dishindika kayi?

• Ntshinyi tshidi mua kutuambuluisha bua kutantamena ntatu idi Yehowa mulekele itukuata?

[Nkonko ya dilonga]

[Tshimfuanyi mu dibeji 13]

Solomo uvua mushindike ne: Yehowa uvua mua kuambuluisha bantu Bende bavua mu ntatu

[Tshimfuanyi mu dibeji 15]

Davidi wakateka bujitu buende pambidi pa Yehowa ne wakenza malu bilondeshile disambila diende