Dibaka ne kulela mu matuku a ku nshikidilu aa

“Matuku adi mashale makese.”​—1 KOL. 7:29, MML.

1. (a) Ndishintuluka dia malu kayi didi munkatshi mua “malu makole”? (b) Bua tshinyi dishintuluka dia malu a mu mêku didi ditutangila?

DÎYI dia Nzambi dikavua dimanyishe ne: ‘Mu tshikondo tshia ku nshikidilu,’ nekuikale mvita, dikanka dia buloba, biyole bia nzala ne bipupu bia masama. (Dan. 8:17, 19; Luka 21:10, 11) Dikavua kabidi dimanyishe ne: malu a bantu neashintuluke bikole mu tshikondo etshi. Bimvundu bia mu mêku bivua ne bua kuikala munkatshi mua “malu makole” a mu ‘matuku a ku nshikidilu’ aa. (2 Tim. 3:1-4) Bua tshinyi dishintuluka dia malu edi didi ditutangila? Bualu malu aa adi pa buloba bujima ne mmafuane kushintulula mushindu utudi tuetu bena Kristo tumona dibaka ne kulela bana. Mmushindu kayi?

2. Mmunyi mudi bantu bamona dibaka ne kushipa kua dibaka?

² Lelu eu, dishipa dia mabaka ndilue bualu butekete pa buloba bujima, ne bungi bua mabaka adi afua mu matunga a bungi budi buenda buvula. Kadi tudi ne bua kuvuluka ne: Yehowa Nzambi udi wangata dibaka ne kushipa  kua dibaka mu mushindu mushilangane bikole ne wa bantu. Nunku, mmunyi mudi Yehowa ubimona?

3. Mmunyi mudi Yehowa ne Yezu Kristo bamona dibaka?

³ Yehowa udi ulomba bantu badi baselangane bua kulama mitshipu yabu ya dibaka. Pakasangishaye mulume ne mukaji wa kumpala, wakamba ne: ‘Mulume nealamate mukajiende; bubidi buabu nebikale mubidi umue.’ Yezu Kristo wakalua kuambulula mêyi aa ne kusakidila ne: ‘Bua bualu ebu muntu kapanduludi tshidi tshibumbakaja kudi Nzambi.’ Kuambaye kabidi ne: ‘Umusha mukajende kabuyi bua masandi, pabakaye mukaji mukuabu, yeye udi wenda masandi.’ (Gen. 2:24; Mat. 19:3-6, 9) Nunku, Yehowa ne Yezu badi bamona dibaka bu malanda adi ne bua kushala matuku onso a muoyo too ne padi mulume anyi mukaji ufua. (1 Kol. 7:39) Bu mudi dibaka dikale tshintu tshia tshijila, kudishipa ki mbualu bukese to, bualu Dîyi dia Nzambi didi dileja ne: Yehowa mmukine kushipa dibaka bua bualu budi kabuyi bumvuangana ne Dîyi diende. *​—Bala Malaki 2:13-16; 3:6.

Tuangate dibaka ne mushinga

4. Bua tshinyi bamue bansonga bena Kristo badi banyingalala muvuabu babuele mu dibaka ne buana buonso?

⁴ Bantu ba pa buloba badi kabayi batumikila Nzambi mbanange tshiendenda bikole. Dituku dionso edi tudi tupetangana ne bindidimbi bia malu aa. Katuena ne bua kupepeja tshidibi mua kutuenzela, nangananga bua bana betu bansonga badi mu tshisumbu. Ntshinyi tshidi bansonga mua kuenza bua kudilama ku malu mabi aa adi mua kubajula majinga mabi a tshiendenda nansha kabayi basue? Bamue bansonga mbatete mua kudilama pa kubuela mu dibaka ne buana buonso. Kadi matuku makese pashishe, bamue ba kudibu badi batuadija kunyingalala bua dipangadika diabu edi. Bua tshinyi? Bualu padibu banenga mu dibaka, badi bafika ku dimona ne: kabena bapetangana mu malu a bungi a mu nsombelu wa buatshia buila to. Nunku, badi bapeta lutatu lukole.

5. Ntshinyi tshiambuluisha bena mu dibaka bua kulama mitshipu yabu ya dibaka? (Tangila kabidi tshidibu bafunde kuinshi kua dibeji.)

⁵ Paudi ubuela mu dibaka ne muntu ne ulua kumona ne: mmushilangane bikole ne uuvua ukeba, bidi mua kukebesha ntatu nansha yeye muikale muena Kristo. (1 Kol. 7:28) Kadi nansha koku ntatu, bena Kristo balelela mbamanye ne: kushipa dibaka bua bualu budi kabuyi bupetangana ne Bible ki mmushindu muimpe wa kuyijikija to. Nunku, bena mu tshisumbu badi ne bua kunanga ne kunemeka bantu bonso badi badienzeja bua kulama dibaka diabu bualu mbasue kulama mitshipu yabu ya dibaka. *

6. Mmunyi mudi bansonga bena Kristo mua kumona tshilumbu tshia dibuela mu dibaka?

⁶ Udi nsonga utshidi mujike anyi? Bikalabi nanku, mmunyi muudi mua kumona tshilumbu tshia kubuela mu dibaka? Udi mua kudiepula ku tunyinganyinga tua bungi wewe muindile too ne paudi ushindama ku mubidi, mu lungenyi ne ulua muena Kristo mushindame kumpala kua wewe kubangilangana anyi kuitaba bua bakubangile. Tshidibi, Bible kêna ufila bungi bujalame bua bidimu bidi muntu mua kubuela nabi mu dibaka to. * Kadi udi  uleja ne: mbimpe kuindila too ne padi tshikondo tshitu muntu umvua majinga makole a mubidi tshipita. (1 Kol. 7:36) Bua tshinyi? Bualu dijinga dikole edi didi mua kukupangisha mua kuela meji bimpe ne kukusaka bua kuangata mapangadika mabi adi mua kukunyingalaja pashishe. Vuluka ne: mibelu idi Yehowa ufila mu Bible bua dibaka idi bua diakalengela diebe.​—Bala Yeshaya 48:17, 18.

Tuangate kulela ne mushinga

7. Ntatu kayi idi nayi bantu badi babuela mu dibaka lukasa, ne mmunyi mudiyi mua kunyanga dibaka?

⁷ Bantu badi babuela mu dibaka ne buana buonso batu badimona anu bakadi bindile diledibua dia muana, pabu bobu bine batshikale basaka buana. Ki mbapete dîba dia kumanyangana bobu nkayabu kumpala kua kulelabu muana udibu ne bua kutabalela munya ne butuku. Padi mamu utuadija kutabalela nangananga muana, bayende utshidi pende muana udi mua kumvua mukawu. Dipumba tulu butuku didi kabidi mua kukebesha tulumbulumbu tudi mua kunyanga malanda abu. Badi bamona diakamue ne: mbadiele muonji mu nshingu, bualu mpindieu kabena mua kuya kabidi mu luendu anyi kuenza malu bu muvuabu benza kumpala to. Mmunyi mudibu mua kumona dishintuluka dia nsombelu wabu edi?

8. Mmunyi mutudi ne bua kumona dilela bana, ne bua tshinyi?

⁸ Anu bu mutudi ne bua kuangata dibaka ne mushinga, tudi ne bua kuangata dilela bana bu dipa dia kudi Nzambi didi dituela mu dibanza. Nansha mudi diledibua dia muana mua kushintulula nsombelu, bena dibaka badi ne bua kuenza muabu muonso bua kuambula bujitu ebu mu mushindu muimpe. Bu mudi Yehowa mupeshe bantu mushindu wa kulela, baledi badi ne bua kumona muana udi muledibue bu ‘bumpianyi bufume kudi Yehowa.’ (Mus. 127:3) Baledi bena Kristo badi ne bua kudienzeja bua kukumbaja midimu yabu mu diumvuangana ne ‘Mukalenge.’​—Ef. 6:1.

9. (a) Kukolesha muana kudi kulomba tshinyi? (b) Ntshinyi tshidi mulume mua kuenza bua kuambuluisha mukajende bua ashale mukole mu ditabuja?

⁹ Kukolesha muana kudi kulomba bidimu ne kudipangisha bintu bia bungi. Mmudimu mukole udi wangata dîba dia bungi. Mulume muena Kristo udi ne bua kumanya ne: bidimu bia bungi panyima pa diledibua dia muana, mukajende kakuikala ulonda bisangilu bimpe ne kakuikala ne dîba dia kudilongela Bible ne kuelangana meji to. Bualu ebu budi mua kumufikisha ku diteketa mu ditabuja. Mulume udi wangata kulela ne mushinga udi ne bua kuenza muende muonso bua kuambuluisha mukajende bua kulama muana. Tshilejilu, udi mua kuambuluila mukajende malu avuaye mupangile mu bisangilu padibu baya kumbelu. Udi kabidi mua kulama muana bua mukajende  amone mua kuya mu buambi.​—Bala Filipoi 2:3, 4.

10, 11. (a) Mmunyi mudi baledi mua kukolesha bana ne ‘didimuija’ dia Yehowa? (b) Bua tshinyi baledi bena Kristo ba bungi mba kuela kalumbandi?

¹⁰ Kuikala muledi muimpe kakuena kumvuija anu kukebela bana biakudia, bilamba, muaba wa kulala ne kubondopesha to. Nangananga mu matuku etu a ku nshikidilu aa, baledi badi ne bua kulongesha bana babu bikadilu bimpe anu patshidibu bashadile bikole. Badi ne bua kukolesha bana babu mu ‘dibela ne didimuija bia Mukalenge.’ (Ef. 6:4) ‘Didimuija’ edi didi diumvuija kulongesha muana meji a Yehowa kutuadija anu ku buana buende too ne mu tshikondo tshia bunsonga tshitu ne ntatu ya bungi.​—2 Tim. 3:14, 15.

¹¹ Pavua Yezu muambile bayidi bende bua ‘kuvuija ba bisamba bionso bayidi,’ uvua ne bua kuikala uleja kabidi ne: baledi badi ne bua kuvuija bana babu bayidi. (Mat. 28:19, 20) Ki mbualu bupepele to, bualu bena panu badi basaka bansonga ku dienza malu mabi. Nunku, bena mu tshisumbu bonso badi ne bua kuela baledi badi bakokeshe bua kuvuija bana babu bena Kristo badilambule kalumbandi. ‘Mbapite’ lungenyi lua pa buloba “bukole” ku diambuluisha dia ditabuja diabu ne bualu mbangate kulela ne mushinga.​—1 Yone 5:4.

Kushala mujike anyi kubenga kulela bua tshipatshila tshilenga

12. Bua tshinyi bamue bansonga mbangate dipangadika dia kushala bajike bua tshikondo kampanda?

¹² Bu mudi matuku anyi ‘musangu mukepe’ ne ‘tshimuenekelu tshia malu a pa buloba ebu ne bua kujimina,’ Dîyi dia Nzambi didi ditulomba bua kukonkonona buimpe bua kushala mujike. (1 Kol. 7:29-31) Nunku, bamue bena Kristo mbasungule bua kushala bajike kashidi anyi bua kuindila ndambu wa bidimu kumpala kua kubuela mu dibaka. Mba kuela kalumbandi bualu kabena bangata bujike buabu bua kudikebela masanka to. Ba bungi badi bashala bajike bua kuenzela Yehowa mudimu ‘kabayi ne ntatu.’ (Bala 1 Kolinto 7:32-35.) Bamue bena Kristo bajike mbampanda-njila ne bakuabu badi benza mudimu ku Betele. Bakuabu kabidi badi bajinga kuvudija mudimu udibu benzela Yehowa mu bulongolodi buende padibu bakumbaja malu malomba bua kubuela mu Kalasa ka dilongesha mudimu. Bena Kristo bajike badi mu mudimu wa ku dîba ne ku dîba ne batu balua kuangata dipangadika dia kubuela mu dibaka pashishe batu bamona ne: malu avuabu balonge pavuabu bajike adi abambuluisha mu dibaka diabu bikole.

13. Bua tshinyi bamue bena Kristo mbabenge bua kulela?

¹³ Mu amue matunga nkuenzeke dishintuluka dikuabu mu mêku a bungi, bualu bena dibaka ba bungi mbangate dipangadika dia kubenga kulela. Bamue mbenze nunku bua ntatu ya makuta; bakuabu pabu bualu mbasue kuikala bapepele bua kukeba makuta. Munkatshi mua bena Kristo mudi pamu bamue badi babenge bua kulela.  Kadi badi batamba kuenza nunku bua kuikala bapepele bua kuenzela Yehowa mudimu. Kabiena bisua kumvuija ne: bena Kristo aba kabena ne masanka atu bantu badi baselangane nawu to. Badi pabu nawu, kadi mbasue kuteka malu a Bukalenge kumpala kua amue masanka a mu dibaka. (1 Kol. 7:3-5) Bamue ba ku bana betu aba badi benzela Yehowa mudimu ne bambuluisha bena Kristo nabu bu batangidi ba bijengu, ba distrike ne bakuabu badi ku Betele. Bakuabu pabu mbampanda-njila anyi bamisionere. Yehowa kakupua muoyo mudimu wabu ne dinanga didibu baleja bua dîna diende.​—Eb. 6:10.

‘Kanyinganyinga mu mubidi’

14, 15. Baledi bena Kristo badi mua kupeta ‘tunyinganyinga kayi mu mibidi yabu’?

¹⁴ Mupostolo Paulo wakambila bena Kristo badi baselangana ne: bavua ne bua kupeta ‘kanyinganyinga mu mibidi yabu.’ (1 Kol. 7:28) Tunyinganyinga tudi mua kulua bua masama, bua bana anyi bua baledi babu bakadi bakulakaje. Tudi kabidi mua kufumina ku ntatu ya dikolesha bana. Anu mudibu bafunde ku ntuadijilu kua tshiena-bualu etshi, Bible ukavua muambe ne: ‘matuku a ku nshikidilu’ avua ne bua kulua ne “malu makole.” Bumue bua ku malu makole aa buvua ne bua kuikala bana badi ‘kabayi batumikila mêyi a baledi babu.’​—2 Tim. 3:1-3.

¹⁵ Kukolesha bana ndutatu lunene ludi nalu baledi bena Kristo. “Malu makole” adi akuata bantu bonso lelu. Ke bualu kayi baledi bena Kristo badi ne bua kutungunuka ne kuluisha lungenyi lubi ludi mu “tshikondo tshia buloba ebu” bua kalunyangi bana babu. (Ef. 2:2, 3) Kadi kabatu batshimuna misangu yonso to! Padi baledi badi badienzeje bua kukolesha muana mu njila wa bulelela bamumona ulekela kuenzela Yehowa mudimu, badi bapeta “kanyinganyinga.”​—Nsu. 17:25.

“Dikenga dinene nedilue”

16. ‘Ndikenga’ kayi diakamanyisha Yezu?

¹⁶ Kadi ntatu anyi tunyinganyinga tuonso tudi bantu mua kupeta mu dibaka anyi mu dikolesha bana katuena mua kupita tua dikenga dinene to. Pavua Yezu wakula bua tshikondo tshikalaye Mukalenge mu diulu ne bua nshikidilu wa tshikondo etshi wakamba ne: ‘Tshikondo etshi dikenga dinene nedilue; ku tshibangidilu tshia buloba too ne katataka kakuakadi dikenga bu adi, kadiena dilua kabidi tshiendelele.’ (Mat. 24:3, 21) Yezu wakalua kuleja kabidi ne: tshisumbu tshinene tshia bantu tshivua ne bua kupanduka ku “dikenga dinene.” Kadi Satana ne bantu bende nebatungunuke ne kuluisha bikole Bantemu ba Yehowa batu bena ditalala. Kakuyi mpata, netshikale tshikondo tshikole bua bantu bonso, bakulumpe ne bana.

17. (a) Bua tshinyi katuena mua kutshina bua matuku atshilualua? (b) Ntshinyi tshidi mua kushintulula mushindu utudi tumona dibaka ne kulela?

¹⁷ Nansha nanku, katuena ne bua kutshina bua matuku atshilualua to. Baledi badi balamate Yehowa badi mua kutekemena ne: neabalame bobu ne bana babu. (Bala Yeshaya 26:20, 21; Sef. 2:2, 3; 1 Kol. 7:14) Kadi bua mpindieu, dimanya dia mutudi mu tshikondo tshia malu makole dituambuluishe mu mushindu utudi tumona dibaka ne kulela mu matuku a ku nshikidilu aa. (2 Pet. 3:10-13) Nansha tuetu bajike anyi basele, ne bana anyi katuyi nabu, tuetu tuangata dibaka ne kulela ne mushinga, nsombelu wetu neatumbishe Yehowa ne tshisumbu tshia bena Kristo.

[Mêyi adi kuinshi]

Diambulula

• Bua tshinyi bansonga bena Kristo kabena ne bua kuzukila dibaka?

• Kukolesha muana kudi kulomba tshinyi?

• Bua tshinyi bena Kristo ba bungi badi bashala bajike, anyi basela kadi babenga kulela?

• Baledi bena Kristo badi mua kupeta ‘tunyinganyinga’ kayi?

[Nkonko ya dilonga]

[Tshimfuanyi mu dibeji 17]

Bua tshinyi ki mbimpe bua bansonga bena Kristo babuele mu dibaka ne buana buonso?

[Tshimfuanyi mu dibeji 18]

Kudi malu a bungi adi mulume mua kuenza bua kuambuluisha mukajende bua kuenzela Nzambi mudimu bimpe

[Tshimfuanyi mu dibeji 19]

Bua tshinyi bamue bena Kristo mbabenge kulela?