Nansha mudibu kule ki mbabapue muoyo
Nansha mudibu kule ki mbabapue muoyo
MUPOSTOLO Paulo wakambila bena Kristo nende ne: ‘Tuenzelayi bantu bonso bimpe, kadi tutambe kuenzela bena dîku dia bena kuitabuja bimpe.’ (Gal. 6:10) Lelu, tutshidi tulonda mubelu eu ne tukeba mishindu ya kuenzela bena Kristo netu malu mimpe. Munkatshi mua bantu batudi ne bua kunanga ne kuambuluisha, mudi bana betu bena Kristo bakadi bakulakaje badi basombele mu nzubu itubu balamina bakulakaje.
Mu amue matunga, bena mu mêku batu balama baledi bakadi bakulakaje kumbelu. Kadi mu makuabu, bakulakaje batu basombela mu nzubu itubu babalama. Kadi netuambe tshinyi bua bena Kristo bakulakaje badi mu nzubu eyi? Ntatu kayi itubu nayi? Mmunyi mudibu mua kuyitantamena bikalabu kabayi ne dikuatshisha dia bena mu mêku abu? Mmunyi mudi bena mu tshisumbu mua kubambuluisha? Ndikuatshisha kayi ditudi tupeta patudi tuya kubatangila pa tshibidilu?
Ntatu idi mu nzubu ya bakulakaje
Padi bena Kristo bakulakaje baya mu nzubu eyi, badi badimona muaba udi tshisumbu tshidibu kabayi bamanyangane ne benamu to. Nunku, Bantemu ba mu tshisumbu atshi kabakuikala bela meji bua kuya kubatangila pa tshibidilu to. Pashishe mu nzubu ya bakulakaje eyi, nebikale munkatshi mua bena bitendelelu bikuabu. Malu aa adi mua kukebela bana betu aba ntatu.
Tshilejilu, mu amue matunga, batu babikila bena bitanda bishilangane bua kulua kuenzela Bien. 15:29) Tuetu tuya kusamba bana betu aba pa tshibidilu, tudi mua kubambuluisha bua kutantamena ntatu eyi.
masangisha abu mu nzubu idibu balamina bakulakaje. Muena mudimu mukuabu wa mu nzubu eyi wakamba ne: “Batu basombesha Bantemu badi kabayi bakula bimpe mu tukalu tua balema ne baya nabu bua babuele mu masangisha aa kabayi babebeje.” Pashishe bena mudimu ba mu nzubu eyi batu misangu ya bungi bashintulula malu atubu benzela bakulakaje mu bikondo bia mafesto bu mudi dia Nowele ne dia Pasaka. Batu bapeshe kabidi bamue Bantemu badi mu nzubu ya bakulakaje biakudia bidi kondo kabu ka muoyo kakayi mua kubanyishila bua kudia. (Diambuluisha dia bena mu tshisumbu
Bena Kristo ba kumpala bavua batabalela ne muoyo mujima bakulakaje bavua kabayi ne balela babu bavua mua kubambuluisha. (1 Tim. 5:9) Bia muomumue lelu, bakulu batu batabalela bana betu badi mu nzubu ya bakulakaje idi pabuipi nabu. * Robert udi mukulu udi wamba ne: “Nebikale bimpe bua bakulu bena Kristo baya kusamba bakulakaje, kumona nsombelu udibu nende ne kusambila nabu. Bena mu tshisumbu badi mua kuambuluisha bakulakaje aba bikole.” Tuetu tuya kubakumbula, tudi tuleja mutudi bumvue ne: kutabalela bantu badi bakenga kudi ne mushinga ku mêsu kua Yehowa.—Yak. 1:27.
Padibi ne mushinga, bakulu badi mua kulongolola
mushindu muimpe wa kuambuluisha bana betu badi mu nzubu ya bakulakaje idi pabuipi nabu. Robert udi uleja umue mushindu utudi mua kubambuluisha wamba ne: “Tudi ne bua kukankamija bana betu bakulakaje bua kuya mu bisangilu padibu ne mushindu wa kuyamu.” Kadi bua bakulakaje badi kabayi ne mushindu wa kufika ku Nzubu wa Bukalenge, bakulu badi mua kubambuluisha mushindu mukuabu. Tshilejilu, Jacqueline udi ne bidimu bitue ku 85 ne udi usama binyoka bikole utu utelejila bisangilu ku telefone. Udi wamba ne: “Bidi bingambuluisha bikole bua kuteleja bisangilu padibi munkatshi mua dienzeka. Nansha bia kumona lufu, tshitu musue kubipangila to!”Pikala muena Kristo kayi ukumbana kuteleja bisangilu ku telefone, bakulu badi mua kumukuatshilabi mu bande. Muanetu waya kumupesha bande au, neikale kabidi ne mushindu wa kuyukila nende bua kumukankamija. Mukulu mukuabu udi wamba ne: “Patudi tuambila muanetu mukulakaje malu adi enzeka mu tshisumbu, udi udiumvua ne: udi anu mukantshi mua bana babu bena Kristo.”
Ikalayi anu nuyukila nabu
Mu kuamba kuimpe, bakulakaje ba bungi batu bamona kuya kusombela mu nzubu ya bakulakaje kubatonda bikole. Ke bualu kayi bamue batu bashala kabatshiyi nansha basue kuyukila ne bakuabu to. Kadi tuetu tuya kubatangila diakamue padibu baya mu nzubu eyi ne tubaleja ne: netutungunuke ne kubakuatshisha, nebibambuluishe bua kupetulula ditalala ne ndambu wa disanka.—Nsu. 17:22.
Pikala bana betu bakulakaje bakadi bajimija lungenyi, kabayi bumvua anyi bakula bimpe, bamue bana betu badi mua kuela meji ne: kuya kubasamba kakuena ne mushinga. Kadi patudi tudienzeja bua kutungunuka ne kuya kubasamba nansha katuyi tuyukila nabu, tudi tuleja ne: tudi ba kumpala mu dipesha bena Kristo netu “buneme.” (Lomo 12:10) Pikala muanetu mukulakaje katshiyi uvuluka malu adi menzeke matuku adi panshi aa, tudi mua kumukankamija bua kutulondelaye malu a kale bu mudi a ku buana buende anyi mushindu uvuaye mumanye bulelela. Ntshinyi tshitudi mua kuenza padiye ukebulula miaku ya kuamba? Tumuteleje ne lutulu ne bikalabi bikumbanyine, tudi mua kumutelela miaku ibidi anyi isatu idiye mua kuikala ukebulula anyi kuambulula mu tshikoso bikavuaye muambe ne kumukankamija bua kutungunukaye. Pikalaye ubuejakaja malu anyi katshiyi wakula bintu biumvuika bimpe, tudi mua kudienzeja bua kumvua tshidiye musue kuamba pa kuteya ntema bikole ku tshiona tshia dîyi diende.
Kudi malu makuabu atudi mua kuenza pikalaku kakuyi kabidi mushindu wa kuyukila nende to. Tshilejilu, Laurence udi mpanda-njila utu ne tshibidilu tshia kuya kutangila Madeleine udi ne bidimu 80 ne udi katshiyi wakula. Laurence udi umvuija mushindu utuye wakula nende wamba ne: “Ntu nkuata Madeleine ku tshianza patudi tusambila nende. Yeye pende utu ubonda tshianza tshianyi bitekete ne upodia bua kulejaye mudiye wanyisha bikondo bimpe ebi.” Kukuata mukulakaje ku tshianza anyi kumuela mu tshitupa kudi mua kumukolesha bikole.
Kuya kubatangila kudi ne mushinga
Patudi tuya kutangila bakulakaje pa tshibidilu, bidi mua kuambuluisha bua babalame bimpe. Tshilejilu, Danièle utu uya kutangila bana betu mu nzubu ya bakulakaje kukadi bidimu bitue ku 20 udi wamba ne: “Padi bena mudimu ba mu nzubu ya bakulakaje bamona ne: badi balua kutangila mukulakaje kampanda bikole, badi pabu bamutabalela bikole.” Robert utukavua batele kulu eku udi wamba ne: “Bantu batu balama bakulakaje batu batamba kuteleja muntu utu ne tshibidilu tshia kulua kutangila mukulakaje kampanda. Kadi kabena mua kuikala ne kanemu ka muomumue kudi muntu utu ulua ku mpukapuka to.” Bu mutu bena mu mêku a bakulakaje batamba kuakuisha bena mudimu aba, batu basanka bikole patubu babela tuasakidila kudi bakuabu. Kadi tuetu tumvuangana bimpe ne bena mudimu aba, nebikale banemeka mikenji ne malongesha a Bantemu badibu balama.
Tudi kabidi mua kushemeja malanda ne bena mudimu aba pa kubambuluisha ku tumue
tumidimu. Mu matunga makuabu kabena balama bakulakaje bimpe bualu kabena ne bena mudimu ba bungi. Rébecca utu pende ulama bakulakaje udi ufila mubelu eu: “Tutu ne mudimu wa bungi padi dîba dia kudia dikumbana. Nunku ke tshikondo tshimpe tshia kulua kutangila mulunda ne kumuambuluisha bua kudia.” Katuena ne bua kuelakana bua kukonka bena mudimu tshitudi mua kuenza bua kubambuluisha to.Patudi tuya kutangila bakulakaje badi mu nzubu kampanda pa tshibidilu, tudi tumanya bidibu nabi dijinga ne bena mudimu bobu batuanyishile, tudi mua kuenza tshidi tshikengela bua kubambuluisha. Tshilejilu, tudi mua kulengeja muaba udi muanetu mukulakaje musombe pa kulamika foto ya balela ne balunda bende anyi bintu bidi bana bazole ku bimanu. Tuetu bamanye bidibu bakengela, tudi mua kubatuadila bintu bu mudi tshilamba tshia kuvuala padiku mashika, nsabanga anyi mafuta a kudilaba. Bikala nzubu au udi mu lupangu lunene lulengeja bimpe, tudi mua kupatuka ne mukulakaje ne kusomba nende pambelu. Laurence utukavua batele udi wamba ne: “Madeleine utu windila dilua dianyi ne muoyo kulu kulu. Pantu nya ne bana, utu useka diakamue ne usanguluka.” Tuetu tuenze bia muomumue, tudi mua kusanguluja bana betu badi mu nzubu ya bakulakaje.—Nsu. 3:27.
Diya kubatangila didi ditukankamija tuetu bonso
Diya kusamba bakulakaje pa tshibidilu didi mua kuteta ‘bushuwa bua dinanga dietu.’ (2 Kol. 8:8) Mmu mushindu kayi? Bidi mua kutunyingalaja patudi tumona mudi mulunda wetu wenda uteketa. Laurence udi wamba ne: “Kumpala, diteketa dia Madeleine divua dintonda bikole ne mvua ndila misangu yonso imvua nya kumutangila. Kadi ngakamona ne: kusambila ne muoyo umue kudi mua kutuambuluisha bua kutantamena buowa ne kukolesha bantu batudi tuya kusamba.” Kukadi bidimu bia bungi bitu Robert uya kutangila muanetu mukuabu diende Larry udi ne disama dia mubidi uzakala. Udi wamba ne: “Disama dia Larry dikadi dimukokeshe bikole ne tshitu ngumvua kabidi bituye wamba to. Kadi patudi tusambila nende, ntu ngumvua ne: utshidi ne ditabuja.”
Patudi tuya kutangila bana betu bakulakaje, katuena anu tubambuluisha, kadi bidi bituambuluisha petu. Dipangadika diabu dia kushala balamate Yehowa nansha mudibu munkatshi mua bantu ba bitendelelu bishilangane didi ditulongesha bua kuikala ne ditabuja ne dikima. Disanka didibu nadi padibu bapeta biakudia bia mu nyuma nansha mudibu kabayi bumvua anyi bamona bimpe, didi dileja patoke ne: ‘Muntu kena ne muoyo bualu bua biakudia nkayabi, kadi udi nawu bualu bua mêyi onso adi alopoka mukana mua Nzambi.’ (Mat. 4:4) Padi bakulakaje basanka bua tuntu tukese bu mudi tuseku tua bana anyi kudia biakudia pamue, badi batuvuluija ne: tudi ne bua kusanka ne bitudi nabi. Dinanga didibu nadi bua malu adi atangila ntendelelu wabu didi mua kutuambuluisha bua kuteka ntendelelu wetu pa muaba wa kumpala.
Bushuwa, mushindu utudi tuambuluisha bana betu bakulakaje udi wambuluisha tshisumbu tshijima. Bua tshinyi? Bu mudi bakulakaje aba bikale dijinga ne dinanga dia bana babu, badi bapesha bena mu tshisumbu mushindu wa kuditeka pa muaba wa bakuabu. Nunku, tuetu bonso tudi ne bua kumona diambuluisha bakulakaje nansha munkatshi mua bidimu bia bungi bu mushindu wa kukuatshishangana. (1 Pet. 4:10, 11) Bakulu bobu bikale ba kumpala mu ditabalela bakulakaje, nebambuluishe bena mu tshisumbu bakuabu bua kumona ne: katuena ne bua kulengulula diambuluisha bana betu to. (Yeh. 34:15, 16) Patudi tukuatshisha bana betu bakulakaje ne dinanga ne disanka, tudi tubajadikila ne: katuena babapue muoyo to.
[Mêyi adi kuinshi]
^ tshik. 8 Padi anu sekretere wa tshisumbu umanya ne: muanetu mukuabu mmuye kusombela mu nzubu ya bakulakaje muaba mukuabu, nebikale bimpe bua afundile diakamue bakulu ba mu tshisumbu tshia muaba au bua kubamanyisha.
[Lungenyi lunene lua mu dibeji 28]
“Padi bena mudimu ba mu nzubu ya bakulakaje bamona ne: badi balua kutangila mukulakaje kampanda bikole, badi pabu bamutabalela bikole”
[Tshimfuanyi mu dibeji 26]
Masambila atudi tuenza ne muoyo mujima adi mua kuambuluisha muanetu mukulakaje bua kupetulula ditalala
[Tshimfuanyi mu dibeji 26]
Patudi tuleja bana betu bakulakaje ne: tudi babanange bidi bibakolesha ku muoyo