Tutumikile mibelu ya Nzambi mu malu onso

‘Eu udi Nzambi, Nzambi wetu too ne tshiendelele. Yeye neikale mulombodi wetu too ne patuafua.’​—MUS. 48:14.

1, 2. Bua tshinyi tudi ne bua kutumikila mibelu ya Yehowa pamutu pa kueyemena meji etu, ne nkonko kayi itudi mua kudiela?

MBITEKETE bua tuetu kudidinga patudi tuela meji bua malu a patupu. (Nsu. 12:11) Patudi tujinga kuenza bualu budi kabuyi buimpe bua bena Kristo, muoyo wetu neukebe anu pa tuetu kubuelela bua kubuenza. (Yel. 17:5, 9) Ke bualu kayi mufundi wa misambu wakaleja muvuaye ne meji pakasambilaye Yehowa ne: ‘Utume munya webe ne bushuwa buebe bindombole.’ (Mus. 43:3) Kakeyemena meji ende makese to, kadi wakeyemena Yehowa bualu kakuvua muntu uvua mua kumupesha mibelu mipite yende nansha. Anu bu mufundi wa misambu, tudi ne bua kukeba mibelu ya Nzambi.

² Kadi bua tshinyi tudi ne bua kueyemena mibelu ya Yehowa kupita ya bantu bakuabu? Ndîba kayi ditudi mua kuyikeba? Ngikadilu kayi itudi ne bua kuikala nayi bua mibelu yende kutuambuluishayi, ne mmunyi mudiye utulombola lelu? Netuandamune nkonko eyi mu tshiena-bualu etshi.

Bua tshinyi kueyemena mibelu ya Yehowa?

3-5. Bua tshinyi tudi ne bua kueyemena mibelu ya Yehowa mu malu onso?

³ Yehowa Ntatuetu wa mu diulu. (1 Kol. 8:6) Mmumanye bimpe yonso wa kutudi ne udi umona malu adi munda muetu. (1 Sam. 16:7; Nsu. 21:2) Mukalenge Davidi wakambila Nzambi ne: ‘Wewe muine udi mumanye  pangashikama panshi ne pangajuka; udi ujingulula meji anyi pantshidi kule. Bua dîyi kadiyi dianji kuikala ku ludimi luanyi, ne mona, wewe Yehowa udi mudimanye tshishiki.’ (Mus. 139:2, 4) Bu mudi Yehowa mutumanye bimpe, yeye ke udi mumanye tshidi tshimpe buetu tuetu. Yehowa udi kabidi ne meji a bungi. Udi umona bintu bionso too ne bitudi katuyi tumona, ne mmumanye nshikidilu wa bualu ku ntuadijilu kuabu. (Yesh. 46:9-11; Lomo 11:33) Udi ‘Nzambi umuepele wa lungenyi.’​—Lomo 16:27.

⁴ Pashishe, Yehowa mmutunange ne utu musue diakalenga dietu. (Yone 3:16; 1 Yone 4:8) Bu mudiye Nzambi wa dinanga, udi utuambuluisha. Muyidi Yakobo wakafunda ne: ‘Kupa kuonso kuimpe ne dipa dionso diakane tshishiki bidi bifuma mu diulu, bipueka panshi bilua kudi Tatu wa munya.’ (Yak. 1:17) Nzambi udi wambuluisha bantu bonso badi batumikila mibelu yende.

⁵ Ndekelu wa bionso, Yehowa ngwa bukole buonso. Ke bualu kayi mufundi wa misambu wakamba ne: ‘Udi mushikame mu tshisokomenu tshia Nzambi Mutambe Bunene wa mulu neikale mu mundidimbi wa Nzambi wa Bukole Buonso. Nengambe bua Yehowa ne: Yeye udi tshinyemenu tshianyi ne musoko wanyi munyunguluke ne Nzambi wanyi undi ngeyemena.’ (Mus. 91:1, 2) Patudi tutumikila mibelu ya Yehowa, tudi tunyemena kudi Nzambi udibu kabayi mua kutshimuna. Yehowa udi utuambuluisha nansha padibu batukengesha. Kakutuela mâyi ku makasa to. (Mus. 71:4, 5; Bala Nsumuinu 3:19-26.) Bushuwa, Yehowa mmumanye tshidi tshimpe buetu tuetu, mmusue tuikale ne diakalenga ne udi ne bukole bua kutupesha bintu bimpe. Kubenga kutumikila mibelu yende, nkudikebela diakabi. Kadi, ndîba kayi ditudi dijinga ne mibelu yende?

Ndîba kayi ditudi dijinga ne mibelu?

6, 7. Ndîba kayi ditudi dijinga ne mibelu ya Yehowa?

⁶ Bushuwa, tudi dijinga ne mibelu ya Nzambi kutuadijila anu ku buana buetu too ne ku bukulakaje. Mufundi wa misambu wakamba ne: ‘Eu udi Nzambi, Nzambi wetu too ne tshiendelele. Yeye neikale mulombodi wetu too ne patuafua.’ (Mus. 48:14) Anu bu mufundi wa Misambu, bena Kristo badi ne meji kabatu balekela kukeba mibelu ya Nzambi to.

⁷ Kadi kudi imue misangu itudi dijinga ne diambuluisha dia pa buadi. Tudi mua kuikala mu “dikenga,” bualu badi batukengesha, tusama bikole anyi mbatuipate ku mudimu. (Mus. 69:16, 17) Dîba adi, mbimpe kunyemena kudi Yehowa, bashindike ne: neatuambuluishe bua kutantamena makenga ne neatulombole bua kuangata mapangadika mimpe. (Bala Musambu 102:17.) Kadi tudi kabidi dijinga  ne diambuluisha diende misangu mikuabu. Tshilejilu, tudi dijinga ne diambuluisha dia Yehowa patudi basue kuyisha bantu lumu luimpe lua Bukalenge bimpe. Misangu yonso itudi ne bua kuangata mapangadika mu malu bu mudi, didisankisha, divuala, didilengeja, balunda, mudimu, tulasa, mbimpe tutumikile mibelu ya Yehowa. Mu kuamba kuimpe, tudi dijinga ne mibelu ya Nzambi dîba dionso.

Bubi bua kubenga kutumikila mibelu ya Nzambi

8. Pakadia Eva tshimuma tshikandika bivua biumvuija tshinyi?

⁸ Tuvuluke ne: tudi ne bua kutumikila mibelu ya Yehowa ne disanka. Nzambi kakutuenzeja bua kutumikila mibelu yende to. Eva ke muntu wa kumpala wakabenga bua kutumikila Yehowa, ne tshilejilu tshiende tshidi tshituleja mudi dipangadika dia nunku dibi. Tuele kabidi meji ku tshivua tshienzedi tshiende tshiumvuije. Eva wakadia tshimuma tshikandika bualu uvua musue ‘kulua bu Nzambi, kumanya malu mimpe ne malu mabi.’ (Gen. 3:5) Pakenzaye nunku, wakaditeka pa muaba wa Nzambi, udiangatshila mapangadika a tshidi tshimpe ne tshibi pamutu pa kulonda mibelu yende. Nunku wakabenga bumfumu bua Yehowa. Uvua musue kudilombola. Bayende Adama wakamutua mu nyima ne kutombokelabu Nzambi.​—Lomo 5:12.

9. Patudi tubenga mibelu ya Yehowa, tudi tuenza tshinyi, ne bua tshinyi ki mbimpe?

⁹ Tuetu katuyi tulonda mibelu ya Yehowa, tudi tuleja petu ne: tudi tubenga bumfumu buende. Tuangate tshilejilu tshia muntu udi musue kutangila bindidimbi bia bantu butaka. Yeye muikale muena Kristo, mmumanye ne: Yehowa udi utukandika bua kuakula malu a bundu anyi kuatangila ne disanka. (Ef. 5:3) Padi muntu eu ubenga kutumikila mibelu ya Yehowa, udi ubenga bumfumu buende. (1 Kol. 11:3) Ki mbimpe, bualu anu bu muvua Yelemiya muambe, ‘muntu kena ne bukole munda muende bua kuendesha nabu biendedi biende bimpe.’​—Yel. 10:23.

10. Bua tshinyi tudi ne bua kukuata mudimu bimpe ne bukokeshi buetu bua kudisunguila malu?

¹⁰ Bamue bantu kabena bitaba mêyi a Yelemiya aa, bualu badi bela meji ne: bu mudi Yehowa mutupeshe bukokeshi bua kudisunguila malu, kena ne bua kutulumbuluisha to. Kadi katupu muoyo ne: bukokeshi bua kudisunguila malu ndipa didi dituela kabidi dibanza. Nzambi neatulumbuluishe bua mêyi ne bienzedi bietu. (Lomo 14:10) Yezu wakamba ne: “Mukana mudi muamba anu malu adi matambe kuvulangana mu mutshima.” Wakamba kabidi ne: ‘Meji mabi ne kushipa kua bantu ne masandi ne tshiendenda ne buivi ne mashimi ne kupenda Nzambi bidi bilopoka mu mutshima.’ (Mat. 12:34; 15:19) Nunku mêyi etu ne bienzedi bietu bidi bileja malu adi mu mutshima wetu. Bidi bileja tshitudi menemene. Ke bualu kayi muena Kristo wa meji udi utumikila mibelu ya Yehowa mu malu onso. Dîba adi udi ulua muntu ‘muakane mu mutshima wende’ ku mêsu kua Yehowa ne ‘neamuenzele bimpe.’​—Mus. 125:4.

11. Tshivua tshienzekele bena Isalele tshidi tshitulongesha tshinyi?

¹¹ Tuvuluke tshivua tshienzekele bena Isalele. Pavuabu bangata mapangadika mimpe, batumikila mikenji ya Yehowa, uvua ubalama. (Yosh. 24:15, 21, 31) Kadi misangu ya bungi, bavua bakuata mudimu bibi ne bukokeshi buabu bua kudisunguila malu. Yehowa  wakamba bua bualu buabu mu tshikondo tshia Yelemiya ne: ‘Bobu kabakumvua, kabakateya matshi, bakalonda anu lungenyi luabu ne tshitshu tshia mu mitshima yabu mibi; bakalukila kunyima, kabakaya kumpala nansha.’ (Yel. 7:24-26) Bakenza bualu bubi be! Katubengi bua kutumikila mibelu ya Yehowa, kulonda meji etu ne ‘kualukila kunyima, katuyi tuya kumpala’ bualu tudi bena tshitshu anyi bena mutu mukole.

Tshidi mua kutuambuluisha bua kutumikila mibelu ya Nzambi

12, 13. (a) Ngikadilu kayi udi utusaka bua kutumikila mibelu ya Yehowa? (b) Bua tshinyi ditabuja didi ne mushinga?

¹² Tudi tutumikila mibelu ya Yehowa bualu tudi bamunange. (1 Yone 5:3) Kadi Paulo wakakula bua ngikadilu mukuabu utudi nende dijinga pakambaye ne: ‘Tudi tuenda bua ditabuja, ki mbua bintu bidi bimueneka ku mêsu.’ (2 Kol. 5:6, 7) Bua tshinyi ditabuja didi ne mushinga? Bushuwa, Yehowa udi utulombola mu ‘njila ya buakane,’ kadi njila eyi kayena itupesha bubanji anyi lumu lua pa buloba to. (Mus. 23:3) Bua bualu ebu, ditabuja dietu didi ne bua kuimanyina pa masanka atudi tupeta mu mudimu wa Yehowa. (Bala 2 Kolinto 4:17, 18.) Nunku ditabuja didi dituambuluisha bua kusanka ne bikese bitudi nabi.​—1 Tim. 6:8.

¹³ Yezu wakaleja ne: bua kutendelela Nzambi bimpe tudi ne bua kudipangisha amue malu ne kuikala ne ditabuja. (Luka 9:23, 24) Bamue batendeledi ba lulamatu mbadipangishe amue malu bualu badi batantamena bupele, ntatu, kansungasunga ne dikengeshibua. (2 Kol. 11:23-27; Buak. 3:8-10) Anu ditabuja dikole ke didi dibambuluishe bua kutantamena malu aa ne disanka. (Yak. 1:2, 3) Ditabuja dikole didi ditusaka bua kuitaba ne: kutumikila mibelu ya Yehowa kutu kuimpe misangu yonso. Kutu kutupetesha anu diakalenga. Tudi bashindike ne: bantu badi batantamena ntatu nebapete masanka mapite ntatu ya tshitupa tshipi idibu nayi.​—Eb. 11:6.

14. Bua tshinyi Hagâ uvua ne bua kudipuekesha?

¹⁴ Kudipuekesha kudi paku kutuambuluisha bua kutumikila mibelu ya Yehowa. Tuangate tshilejilu tshia Hagâ muena mudimu wa Sala. Bu muvua Sala kayi mulele, wakambila Abalahama bua angate Hagâ bua kumulelelaye bana. Pakapeta Hagâ difu wakatuadija kubuidia Sala. Ke bualu kayi Sala wakatuadija ‘kumuenzela bibi,’ ne Hagâ wakanyema. Muanjelu wa Yehowa wakasambakena nende ne kumuambila ne: ‘Pingana kudi mukalenge webe mukaji, udikokeshe mu tshianza tshiende.’ (Gen. 16:2, 6, 8, 9) Mubelu eu kauvua mua kuikala musankishe Hagâ to. Bua kuulondaye, uvua ne bua kulekela lutambishi luvuaye nalu. Hagâ wakadipuekesha ne kuenza tshivua muanjelu mumuambile, ne muanende Yishemaele wakaledibua mu tshitudilu tshia tatuende.

15. Tela imue nsombelu idi ileja ne: tudi ne bua kudipuekesha bua kutumikila mibelu ya Yehowa.

¹⁵ Tuetu petu tudi ne bua kudipuekesha bua kutumikila mibelu ya Yehowa. Bakuabu badi ne bua kuitaba ne: manaya kampanda atubu basue kaena asankisha Yehowa. Muena Kristo udi mua kuikala muenzele mukuabu bibi ne udi ne bua kumulomba luse. Anyi udi mua kuikala muenze tshilema ne udi ne bua kuitaba  ne: mmutshienze. Netuambe tshinyi bikaleye muenze bubi bunene? Udi ne bua kudipuekesha ne kutondela bakulu bubi buende. Badi mua kuikala bipate muntu mu tshisumbu. Bua kupinganaye, udi ne bua kudipuekesha, kunyingalala ne kulekela bubi buende. Mu malu aa ne makuabu, mêyi adi mu Nsumuinu 29:23 a ne: ‘Kudisua kua muntu nekumupuekeshe, kadi udi ne mutshima mupuekele neapete buneme’ adi atukolesha ku muoyo.

Mmunyi mudi Yehowa utulombola?

16, 17. Ntshinyi tshitudi ne bua kuenza bua mibelu ya Nzambi idi mu Bible kutuambuluishayi?

¹⁶ Tshintu tshinene tshidi Nzambi utulombola natshi mBible anyi Dîyi diende. (Bala 2 Timote 3:16, 17.) Bua Dîyi edi kutuambuluishadi, katuikadi tuindila anu padi ntatu itukuata bua kushisha kukeba mibelu idimu to. Kadi tudi ne bua kuikala ne tshibidilu tshia kudibala dituku dionso. (Mus. 1:1-3) Tuetu tuenza nunku, netuibidilangane ne mibelu idimu. Netutuadije kumona malu bu mudi Nzambi uamona ne tudi mua kutantamena lutatu nansha luolu lua mushindu kayi.

¹⁷ Mbimpe kabidi kuelangana meji bua malu atudi tubala mu Bible ne kusambila bua bualu buawu. Patudi tuelangana meji a mvese ya mu Bible, tudi tumona mushindu utudi mua kuyitumikila mu nsombelu mishilangane. (1 Tim. 4:15) Patudi tupetangana ne malu makole, tudi tusambila Yehowa bua atuambuluishe bua kupeta mibelu bimpe. Nyuma wa Yehowa neatuambuluishe bua kuvuluka mikenji ituvua babale mu Bible anyi mu mikanda yetu mikuabu.​—Bala Musambu 25:4, 5.

18. Mmunyi mudi Yehowa utulombola ku diambuluisha dia bana betu bena Kristo?

¹⁸ Bana betu bena Kristo badi pabu batuambuluisha bua kutumikila mibelu ya Yehowa. Bamue ba ku bana betu aba badi benza kasumbu ka ‘mupika wa lulamatu ne wa budimu’ kadibu baleja mpala kudi Kasumbu Kaludiki. Kasumbu aka kadi katupesha malongesha adi bu biakudia mu mikanda, mu bisangilu ne mu mpuilu ne mpungilu. (Mat. 24:45-47; tangila Bienzedi 15:6, 22-31.) Munkatshi mua bana betu, tudi kabidi ne bantu badi bashindame mu ditabuja, bu mudi bakulu badi bakumbane bua kutuambuluisha ne mibelu ya mu Bible. (Yesh. 32:1) Bansonga badi mu mêku a bena Kristo badi kabidi ne bantu bakuabu badi mua kubambuluisha. Nzambi mmupeshe baledi babu bukokeshi bua kubabela ne bansonga badi ne bua kutumikila mibelu yabu.​—Ef. 6:1-3.

19. Mmasanka kayi atudi tupeta bualu tudi tutungunuka ne kutumikila mibelu ya Yehowa?

¹⁹ Bushuwa, Yehowa udi utubela mu mishindu ya bungi, ne mbimpe tulonde mibelu yende. Mukalenge Davidi wakamba bua bena Isalele patshivuabu balamate Nzambi ne: ‘Batatu betu bakakueyemena, bakakueyemena, ne wewe wakabasungila. Bakadila kuudi, bakapandishibua; bakakueyemena, kabakafuishibua bundu.’ (Mus. 22:3-5) Tuetu tulonda petu mibelu ya Yehowa ne muoyo mujima, ‘katuakufuishibua bundu.’ Ditekemena dietu nedikale anu dikole. Tuetu ‘bateke njila yetu mu bianza bia Yehowa’ pamutu pa kueyemena meji etu, netupete masanka a bungi kutuadija ku mpindieu. (Mus. 37:5) Tuetu batungunuke ne kuenza nunku, masanka aa neikaleku bua kashidi. Mukalenge Davidi wakafunda ne: ‘Yehowa udi unanga kulumbulula kuakane, kena ulekela bansantu bende. Bantu bakane nebalamibue tshiendelele. Bantu bakane nebapiane buloba, nebashikamemu tshiendelele.’​—Mus. 37:28, 29.

Udi mua kumvuija anyi?

• Bua tshinyi tudi ne bua kueyemena mibelu ya Yehowa?

• Kubenga kutumikila mibelu ya Yehowa kudi kumvuija tshinyi?

• Tela imue nsombelu idi muena Kristo ne bua kudipuekesha.

• Mmunyi mudi Yehowa utulombola lelu eu?

[Nkonko ya dilonga]

[Bimfuanyi mu dibeji 8]

Utu ukeba mibelu ya Yehowa mu malu ebe onso anyi?

[Tshimfuanyi mu dibeji 9]

Eva wakabenga bumfumu bua Yehowa

[Tshimfuanyi mu dibeji 10]

Hagâ uvua dijinga ne ngikadilu kayi bua kutumikilaye tshivua muanjelu mumuambile?