Udi muvuluke anyi?
Udi muvuluke anyi?
Dibala dia bibejibeji bia Tshibumba tshia Nsentedi bishale ebi divua dikusankishe anyi? Nanku, anji tangila ni udi mua kuandamuna nkonko idi ilonda eyi:
• Ndîba kayi divua bena meji balue kumona Yezu?
Mu Bible mukuabu badi bamba ne: “Bena meji kabavua balue kumona Yezu patshivuaye mu tshikumbi butuku buakamulelabu bu muvua balami ba mikoko benze to. Bakalua kunyima kua ngondo ndambu.” Pakaluabu kumumona, Yezu uvua mu nzubu muabu. (Mat. 2:7-11) Bu bobu bapeshe Yezu ngolo ne bintu bikuabu bia mushinga butuku buvuabu bamulele, Mariya kavua mua kuikala mulambule anu nyunyi ibidi ku ntempelo panyima pa matuku 40 to.—1/1, dibeji 31.
• Ntshinyi tshidi bantu ba bungi mua kuenza bua kuvuija nsombelu wabu ne mushinga?
Udi mua kudiebeja ne: ‘Ndiku mua kushintulula amue malu mu nsombelu wanyi ne kumbusha bintu bionso bidi kabiyi ne mushinga anyi?’ Ke tshivua Amy muenze. Uvua ne makuta a bungi kadi kavua ne disanka to. Wakamona ne: bu muvuaye musue kulua muntu munene pa buloba ebu, kuvua kushala anu kakese bua yeye kusesuka mu njila wa ditabuja. Nunku wakadisuika bua kuteka malu a Bukalenge pa muaba wa kumpala ne wakalua mpanda-njila bua bidimu bikese. Amy udi wamba ne: “Mpindieu ndi mumone ne: nsombelu wanyi udi ne mushinga kupita pamvua mpitshisha dîba dianyi dionso mu dienzela bena mu buloba ebu mudimu.”—15/1, dibeji 19.
• Ntshinyi tshidi mua kuambuluisha bamue bamamu bua kupeta disanka?
Bamamu ba bungi batu baya ku mudimu. Bamue batu bawenza bua kukumbaja majinga a bena mu dîku, ne bakuabu anu bua bikale badikumbajila majinga abu mudibu basue anyi badisumbila bintu bia mushinga. Bakuabu pabu, anu bualu mbanange mudimu wabu. Bamamu bena Kristo badi ne mudimu munene kumbelu yabu, nangangana patshidi bana bapuekele. Bamue mbakepeshe bungi bua mêba adibu benze ku mudimu anyi baulekele bua kutabalela bena mu mêku abu, ne bualu ebu budi bubapetesha disanka dia bungi.—1/4, dibeji 26-29.
• ‘Mbantu ba mu tshikondo’ kayi bavua Yezu wakuila mu Matayo 24:34?
Misangu ya bungi pavua Yezu wakula bua “bantu ba tshikondo etshi” uvua wakula bua bantu babi. Kadi kakakula nunku pavuaye wakula ne bayidi bende bavua ne bua kuedibua manyi a nyuma muimpe matuku makese pashishe to. Bobu ke bavua bakumbane bua kujingulula malu adi mu Matayo 24:32, 33. Nunku, bidi bimueneka ne: Yezu uvua wakula bua bayidi bende bela manyi ba mu bidimu lukama bia kumpala ne ba mu matuku etu aa.—15/2, dibeji 23-24.
• Mmunyi muvua Mikenji ya Mose mikale ndeji bu mudibu baleje mu Galatia 3:24?
Misangu ya bungi kale, ndeji uvua mupika uvua mfumuende mua kueyemena ne muntu mukulumpe uvua ulama muana bimpe, wenza bua ne: benzele muana bionso bivua tatuende musue bua bamuenzele. Bia muomumue, Mikenji ivua ilama bena Yuda ku malu mabi bu mudi diselangana ne bantu bavua kabayi batendelela Yehowa. Kadi anu bu ndeji wa muana, Mikenji ivua bua tshitupa tshîpi, yambuluisha too ne pavua Kristo ne bua kulua.—1/4, dibeji 18-21.
• Mu diumvuangana ne Yakobo 3:17, ngikadilu kayi itudi ne bua kuikala nayi?
Bu mutudi bantu bimpe, katuena ne bua kuitaba malu mabi nansha kakese. (Gen. 39:7-9) Tudi kabidi ne bua kuikala bena ditalala, katuyi tubundangana anyi tuenza malu adi mua kujula bilumbu. Nunku mbimpe tuetu bonso tudiebeje ne: ‘Mbammanye bu muena ditalala anyi bu mukebeshi wa bilumbu? Ntu anu misangu yonso nkokangana ne bakuabu anyi? Ntu nkeba bakuabu bilumbu anyi mfiika munda bua tumalu tukese anyi? Ntu mudiakaje bua kufuila bakuabu luse ne kulengulula bilema bidibu bangenzela anyi?’—15/3, dibeji 24-25.