Enzela Yehowa mudimu pautshidi nsonga

‘Wikale mu malu awakayila ne awakeyemena ne: Nga bushuwa.’​—2 TIM. 3:14.

1. Mmunyi mudi Yehowa umona mudimu udi Bantemu batshidi bansonga bamuenzela?

MUDIMU wa tshijila udi bansonga benzela Yehowa udi ne mushinga wa bungi ku mêsu kuende. Ke bualu kayi wakamanyisha bua bualu buabu mukana mua mufundi wa misambu ne: ‘Bantu bebe badi badifila kuudi ne disanka mu dituku diudi ukunguija misumba ya masalayi ebe. Bansongalume bebe badi balua kuudi bu lumuma, baluate biabu bilenga bia tshijila, bapatuke munda mua lunkelu.’ (Mus. 110:3) Bushuwa, Yehowa udi wangata bansonga badi bamuenzela mudimu ne mushinga wa bungi.

2. Mmalu kayi atu bantu basaka bansonga bua kuenza lelu eu?

² Nuenu bansonga badi mu tshisumbu tshia bena Kristo, nukadi balambula mioyo yenu kudi Yehowa anyi? Bansonga ba bungi badi mua kumona kuangata dipangadika dia kuenzela Yehowa mudimu bu bualu bukole. Banene ba pa buloba apa, balongeshi ne pamuapa bena mu mêku abu ne balunda babu batu basaka bansonga bua kukeba anu biuma. Padi nsonga kampanda wangata dipangadika dia kuenzela Nzambi mudimu, bantu ba pa buloba ebu batu bamuseka anyi bamumona bu muntu tshianana. Kadi tshia kumanya ntshia se: Kuenzela Nzambi mulelela mudimu, ke mushindu umuepele uudi mua kupeta nsombelu muimpe. (Mus. 27:4) Bua bualu ebu, udiele nkonko isatu eyi: Bua tshinyi udi ne bua kuenzela Nzambi mudimu? Mmunyi muudi mua kufika ku dikala ne nsombelu udi umvuangana ne didilambula diebe kudi Nzambi nansha bantu bobu bakuamba anyi bakuenzela malu mabi? Mmidimu kayi ya tshijila iudi mua kuenza?

Kuenzela Yehowa mudimu ke bualu bua nsongo

3. Bintu bidi Yehowa mufuke bidi bitusaka bua kuenza tshinyi?

³ Bua tshinyi udi ne bua kuenzela Nzambi mulelela udi ne muoyo mudimu? Buakabuluibua 4:11 udi wandamuna ne: ‘Wewe, Mukalenge wetu ne Nzambi wetu, udi muakane bua kuangata butumbi ne buneme ne bukole; bualu bua wewe wakafuka bintu bionso, ne bualu bua disua diebe biakadiku, ne biakafukibua.’ Yehowa ke mufuki wa bintu bionso. Buloba mbuimpe bua dikema! Yehowa mmufuke mitshi, bilongo, nyama, mâyi manene, mikuna ne bibila. Musambu wa 104:24 udi wamba ne: ‘Buloba budi buule tente ne bintu biwakufuka.’ Tudi ne bua kuikala ne dianyisha dia bungi bua mudi Yehowa mutupeshe mubidi ne lungenyi bidi bituambuluisha bua kusanka ne bintu bimpe bidi pa buloba. Nunku, dianyisha bua bintu bimpe bionso bidiye mufuke ditusake bua kumuenzela mudimu.

4, 5. Mmalu kayi avua Yehowa muenze akafikisha Yoshua bua kumunanga bikole?

⁴ Bualu bukuabu budi butusaka bua kuenzela Yehowa mudimu budi mu mêyi kampanda akamba Yoshua uvua mulombodi wa tshisamba tshia Isalele. Pakavuaye pa kufua, wakambila bantu ba Nzambi ne: ‘Nudi bamanye mu mitshima yenu yonso ne mu mioyo yenu yonso ne: kanuakapanga tshintu tshimpe tshimue tshiakanulaya Yehowa Nzambi wenu; nuakapeta bintu bionso, kanuakapanga tshintu tshimue.’ Bua tshinyi Yoshua wakamba nanku?​—Yosh. 23:14.

⁵ Patshivuaye muana mu Ejipitu, Yoshua uvua ne bua kuikala mumanye ne: Yehowa uvua mulaye bua kupesha bena Isalele buloba buabu nkayabu. (Gen. 12:7; 50:24, 25; Ekes. 3:8)  Pashishe Yoshua wakamona muvua Yehowa mutuadije kukumbaja dilaya diende pakatuminaye bena Ejipitu bipupu dikumi ne kuenzeja Palô muena mutu mukole bua kulekela bana ba Isalele. Yoshua uvua munkatshi mua bantu bakapanduka ku Mbuu mukunze ne pashishe wakamona muvua mâyi mamine Palô ne biluilu biende. Pavuabu mu ‘tshipela tshinene tshibi’ tshia Sinai, Yoshua wakamona muvua Yehowa upesha bena Isalele bionso bivuabu nabi dijinga. Muena Isalele nansha umue kakafua bua nzala anyi bua nyota. (Dut. 8:3-5, 14-16; Yosh. 24:5-7) Pakakumbana tshikondo tshia bena Isalele kutshimuna bisamba bia bukole bia bena Kanâna ne kuangata Buloba Bulaya, Yoshua wakamona muvua Nzambi uvua bena Isalele batendelela mubambuluishe.​—Yosh. 10:14, 42.

6. Ntshinyi tshiakuambuluisha bua kupeta dijinga dia kuenzela Nzambi mudimu?

⁶ Yoshua uvua mumanye ne: Yehowa uvua mukumbaje malu avuaye mulaye. Ke bualu kayi wakamba ne: ‘Meme ne ba mu nzubu muanyi netukuatshile Yehowa mudimu.’ (Yosh. 24:15) Netuambe bishi buebe wewe? Paudi wela meji ku milayi ya Nzambi mulelela ikadi mikumbane ne yakumbajaye, kuenaku umvua mua kumuenzela mudimu anu bu Yoshua anyi?

7. Bua tshinyi kutambula mbualu bunene?

⁷ Kutangila bintu bidi Yehowa mufuke ne kuela meji pa milayi yende mimpe ne ya kueyemena kudi ne bua kukusaka bua kudilambula kudiye ne kutambula. Kutambula mbualu bunene budi bantu badi basue kuenzela Nzambi mudimu ne bua kuenza. Ke tshidi tshilejilu tshia Yezu tshitulongesha. Kumpala kua kuatuadija mudimu wende wa bumasiya wakaya kudi Yone Mubatiji bua amutambuishe. Bua tshinyi Yezu wakatambula? Wakalua kuamba ne: “Tshiakufuma mu diulu bua kuenza bu mundi musue, anu bu mudi wakuntuma musue.” (Yone 6:38) Yezu wakatambula bua kuleja ne: uvua mudifile bua kuenza disua dia Tatuende.​—Mat. 3:13-17.

8. Bua tshinyi Timote wakangata dipangadika dia kutendelela Nzambi, ne ntshinyi tshiudi pebe mua kuenza?

⁸ Tangila kabidi tshilejilu tshia Timote nsonga muena Kristo uvua Yehowa mupeshe midimu ya bungi ya pa buayi. Bua tshinyi Timote wakangata dipangadika dia kutendelela Nzambi mulelela? Bible udi utuleja ne: ‘Wakayila malu akeyemenaye ne: nga bushuwa.’ (2 Tim. 3:14) Wewe mumane kulonga Dîyi dia Nzambi ne mutuishibue ne: malongesha adimu mmalelela, udi anu bu Timote. Mpindieu, udi ne bua kuangata dipangadika. Kuenaku mua kuambila baledi bebe tshiudi musue kuenza anyi? Bobu ne bakulu ba mu tshisumbu badi mua kukuambuluisha bua kukumbaja malu adi Mukanda wa Nzambi ulomba bua kutambula.​—Bala Bienzedi 8:12.

9. Ntshinyi tshidi bakuabu mua kuenza paudi utambula?

⁹ Kutambula ke mushindu muimpe wa kutuadija kuenzela Nzambi mulelela mudimu. Paudi utambula, udi umata mu njila mule udi ufikisha ku muoyo wa kashidi ne udi ukupetesha disanka dia kashidi didi difumina ku dienza disua dia Nzambi. (Eb. 12:2, 3) Neusankishe kabidi bena mu dîku dienu bakadi mu njila eu ne balunda bebe badi mu tshisumbu tshia bena Kristo. Kadi neutambe kusankisha Yehowa. (Bala Nsumuinu 23:15.) Bushuwa, bantu bakuabu kabakumvua tshiudi muangatshile dipangadika dia kutendelela Yehowa to, ne  badi mua kuela meji ne: udi muangate dipangadika dibi ne kufika too ne ku dikuluisha. Kadi udi mua kutshimuna ntatu yonso eyi.

Padi bantu bakuela nkonko anyi bakuluisha

10, 11. (a) Nkonko kayi idi bantu mua kukuela bua dipangadika diebe dia kuenzela Nzambi mudimu? (b) Ntshinyi tshiudi mua kulongela ku mushindu uvua Yezu wandamuna nkonko ivua itangila ntendelelu mulelela?

¹⁰ Dipangadika diebe dia kuenzela Yehowa mudimu didi mua kukemesha balongi benu, bena mutumba nenu, ne balela benu. Badi mua kukuebeja bua tshinyi udi muangata dipangadika edi ne kukuela nkonko bua malongesha etu. Newandamune bishi? Udi ne bua kutukija, kuela meji bimpe bua kumanya mua kumvuija tshidi tshikusake bua kuenzela Yehowa mudimu. Pashishe paudi ubandamuna, londa tshilejilu tshia Yezu.

¹¹ Pavua balombodi ba bitendelelu bakonke Yezu bua dibishibua ku lufu, wakabaleja mvese uvuabu kabayi batamba kuelela meji to. (Ekes. 3:6; Mat. 22:23, 31-33) Pavua mufundi kampanda mumulombe bua amuambile mukenji udi mutambe bunene, Yezu wakamutelela mvese miakanyine. Muntu au wakasanka bikole bua diandamuna divua Yezu mumupeshe. (Lew. 19:18; Dut. 6:5; Mâko 12:28-34) Mushindu uvua Yezu utela Mukanda wa Nzambi ne wakula wakakebesha ‘ditapuluka munkatshi mua bantu bua bualu buende’ ne baluishi bende bakapanga bua kumuenzela bibi. (Yone 7:32-46) Paudi wandamuna nkonko idi itangila malongesha etu, ikala ubadisha bantu Bible ne wandamuna ne “kalolo ne ditshina” anyi ne kanemu kakole. (1 Pet. 3:15) Wewe kuyi ne tshia kuandamuna, itaba ne: kuena mumanye ne wambe ne: neuye kukeba diandamuna. Pashishe ukebe diandamuna ku diambuluisha dia Index des publications Watch Tower anyi dia ditadi dia Watchtower Library binuikala nadi mu muakulu wenu. Wewe udilongolola bimpe, ‘neumanye mua kuandamuna muntu ne muntu dîyi.’​—Kolos. 4:6.

12. Bua tshinyi kuena mua kuteketa ku muoyo padibu bakukengesha?

¹² Kabakukuela anu nkonko nkayayi pa bidi bitangila dipangadika diebe ne malongesha etu to. Umanye ne: Satana Diabolo muluishi wa Nzambi ke udi ukokesha malu a pa buloba. (Bala 1 Yone 5:19.) Kuedi meji ne: bantu bonso nebakuele diboko mulu anyi kuanyisha tshiudi muenze to, kadi badi mua kufika too ne ku dikuluisha. Bamue bantu badi mua kutuadija ‘kukupenda’ ne kutungunuka ne kuenza nanku. (1 Pet. 4:4) Kadi uvuluke ne: kuena nkayebe to. Bakaluisha Yezu Kristo pende. Bakaluisha kabidi mupostolo Petelo, ne wakafunda ne: ‘Bananga, kanukemi bua dikenga didi bu kapia munkatshi muenu diakuluila kunudi bu diteta, bu bualu bupiabupia buakanukuata; kadi bualu bua nudi babanyanganyi ba makenga a Kristo, nusanke.’​—1 Pet. 4:12, 13.

13. Bua tshinyi bena Kristo badi ne bua kusanka padibu babakengesha?

¹³ Padi muena Kristo utantamena dikengeshibua anyi buluishi, udi ne bua kusanka. Bua tshinyi? Bualu bena panu bobu bakuanyisha, mbuena kuamba ne: udi ulonda mikenji ya Satana, ki nya Nzambi to. Yezu wakamba ne: ‘Nuenu badibu batumbisha kudi bantu bonso, mulawu ulualua kunudi, bualu bua bankambua babu bakenzela baprofete bakadi ne mashimi nunku kabidi.’ (Luka 6:26) Padibu bakukengesha, bidi bileja ne: Satana ne  bena diende badi ne tshiji bualu udi wenzela Yehowa mudimu. (Bala Matayo 5:11, 12.) Padibu ‘batupenda bua dîna dia Yezu,’ mbualu bua disanka.​—1 Pet. 4:14.

14. Mmalu kayi mimpe adi muntu mua kupeta padiye ushala mulamate Nzambi nansha bamukengesha?

¹⁴ Kushala mulamate Yehowa nansha bakukengesha kudi kukupetesha malu mimpe matue ku anayi. Udi ujadikila bantu bualu bua Nzambi ne Muanende. Dilamata Nzambi diebe didi dikolesha bena Kristo nebe. Bamue bantu badi kabayi bamanye Yehowa badi mua kutuadija kumukeba. (Bala Filipoi 1:12-14.) Paudi umona mudi Yehowa mukuambuluishe bua kutantamena ntatu, udi umunanga bikole.

Mbakunzuluile “tshibi tshinene”

15. ‘Ntshibi kayi tshinene’ tshivuabu bunzuluile mupostolo Paulo?

¹⁵ Mupostolo Paulo wakafunda bua mudimu uvuaye muenze mu Efeso ne: “Bakumana kungunzuluila tshibi tshinene ne tshia kuenza mudimu mukole.” (1 Kol. 16:8, 9) Tshibi atshi tshivua tshimufikisha bua kuyisha lumu luimpe bikole ne kuvuija bantu bayidi mu tshimenga atshi. Pavuaye mubuelele ku tshibi atshi, wakambuluisha bantu ba bungi bua kumanya Yehowa ne kumutendelela.

16. Mmunyi muvua bela manyi babuelele ku ‘tshibi tshivuabu babunzuluile’ mu 1919?

¹⁶ Mu 1919 Yezu ukavua mudie Bukalenge mu diulu, wakateka “tshibi tshiunzulula” kumpala kua bena Kristo bela manyi batshivua pa buloba. (Buak. 3:8) Bakabuelela ku tshibi atshi ne kutuadija kuyisha lumu luimpe ne kulongesha bulelela ne tshisumi tshipite tshivuabu natshi kumpala. Mudimu wabu wakapatula tshinyi? Lumu luimpe lukadi lufike too ne ku mfudilu kua buloba, ne bantu batue ku miliyo muanda mutekete badi ne ditekemena dia kupeta muoyo wa tshiendelela mu bulongolodi bupiabupia bua Nzambi.

17. Mmunyi muudi mua kubuelela ku “tshibi tshinene tshia kuenza mudimu mukole”?

¹⁷ “Tshibi tshinene tshia kuenza mudimu mukole” tshitshidi anu tshiunzulula bua Bantemu ba Yehowa bonso. Bantu badi babuelelaku badi bapeta disanka padibu bayisha lumu luimpe bikole. Nuenu Bantemu ba Yehowa batshidi bansonga, mmunyi munudi numona diakalenga dinene dia kuambuluisha bantu bua ‘kuitabuja lumu luimpe’? (Mâko 1:14, 15) Nukadiku bele meji bua kulua bampanda-njila ba pa tshibidilu peshi bambuluishi anyi? Ba bungi ba kunudi badi mua kuenza mudimu wa kuibaka Nzubu ya Bukalenge, kuya ku Betele, kulua bamisionere anyi kuenza midimu mikuabu. Bu mudi matuku adi mashadile malu a pa buloba ebu budi ku bukokeshi bua Satana enda akepa bikole, kuenza midimu eyi kudi kulua ne mushinga dituku dionso edi. Neubuelele ku “tshibi tshinene” patshidiku dîba apa anyi?

‘Teta, ulabule, umvue ne: Yehowa udi muakane’

18, 19. (a) Ntshinyi tshivua tshiambuluishe Davidi bua kuikala ne dijinga dikole dia kuenzela Yehowa mudimu? (b) Ntshinyi tshidi tshileja ne: Davidi kavua munyingalale nansha kakese bua muvuaye muenzele Nzambi mudimu?

¹⁸ Nyuma muimpe wakasaka mufundi wa misambu bua kulomba bantu bakuabu bua ‘kuteta, kulabula bua kumvua ne: Yehowa udi muakane.’ (Mus. 34:8) Pavua Davidi mukalenge wa Isalele muikale muana ne ulama mikoko, Yehowa wakamusungila kudi nyama ya luonji. Wakamuambuluisha mu mvita ivuaye muluangana ne Goleyata ne wakamusungila ku ntatu mikuabu ya bungi. (1 Sam. 17:32-51; Mus. 18) Dinanga dinene dia Nzambi diakasaka Davidi bua kufunda ne: ‘Yehowa Nzambi  wanyi, wakuvudija malu a kukema awakuenza ne malu awakupangidija bua kutuenzela; kakuena mukuabu utudi bamanye mua kuelekeja nebe.’​—Mus. 40:5.

¹⁹ Davidi wakalua kunanga Yehowa bikole ne uvua musue kumutumbisha ne muoyo wende mujima ne lungenyi luende luonso. (Bala Musambu 40:8-10.) Nansha pavua bidimu bienda bipita, Davidi kavua munyingalale nansha kakese bua muvuaye mutendelele Nzambi mulelela mu nsombelu wende mujima to. Kutendelela Nzambi kuvua ne mushinga wa bungi kudiye ne kuvua kumupetesha disanka dia dikema. Pakavuaye mukulakaje, wakamba ne: ‘Mukalenge Yehowa, udi ditekemena dianyi; udi tshieyemenu tshianyi ku buana buanyi too ne katataka. Nzambi, kundekedi nansha, too ne ku bununu buanyi ne pangikala ne mvia.’ (Mus. 71:5, 18) Dieyemena divua nadi Davidi kudi Yehowa ne bulunda buabu bivua anu bienda bikola nansha muvua makanda ende a mubidi enda akepela.

20. Bua tshinyi kuenzela Nzambi mudimu ke bualu bua nsongo mu nsombelu wa muntu?

²⁰ Nsombelu wa Yoshua, wa Davidi ne wa Timote idi itujadikila kabidi ne: Kuenzela Yehowa mudimu ke bualu bua nsongo mu nsombelu wa muntu. Masanka a tshitupa tshipi audi mua kupetela ku bintu bia pa buloba ebu, mmashadile bikole ku masanka a kashidi audi upeta mu dienzela Nzambi mudimu ne muoyo webe mujima. (Yosh. 22:5) Wewe kuyi muanji kudilambula kudi Yehowa mu disambila, udiebeje ne: ‘Ntshinyi tshidi tshimpangisha bua kulua Ntemu wa Yehowa?’ Biwikala ukadi mutambule, udiku musue bua kuikala ne disanka dia bungi mu nsombelu webe anyi? Nunku uvudije mudimu uudi wenzela Yehowa ne utungunuke ne kukola mu buena Kristo buebe. Tshiena-bualu tshidi tshilonda netshikuleje mushindu uudi mua kulua muena Kristo mushindame pa kulonda tshilejilu tshia mupostolo Paulo.

Newandamune munyi?

• Tela malu manene abidi adi atusaka bua kuenzela Nzambi mudimu.

• Ntshinyi tshivua tshiambuluishe Timote bua kuangata dipangadika dia kuenzela Nzambi mudimu?

• Bua tshinyi udi ne bua kushala mulamate Nzambi padibu bakukengesha?

• Mmidimu kayi iudi mua kuenza mu mudimu wa Yehowa?

[Nkonko ya dilonga]

[Tshimfuanyi mu dibeji 18]

Kuenzela Yehowa mudimu ke bualu bua nsongo

[Tshimfuanyi mu dibeji 19]

Udiku mua kuandamuna padibu bakuela nkonko idi itangila malongesha etu anyi?