Lungenyi luimpe lua dikema!

BANSONGALUME bakuabu basatu ba mu Afrike bavua basue kuya mu mpungilu wa distrike. Bavua badiebeja mushindu uvuabu mua kufika muaba wa mpungilu uvua mutantshi wa kilometre 90. Njila au uvua njila mubi wa buloba ne kabavua ne mashinyi avua mua kubafikishaku to. Bobu kuangata dipangadika dia kusomba makalu asatu, kadi kabakapeta makalu mimpe to.

Mukulu mukuabu wa mu tshisumbu tshiabu kumonaye lutatu luabu ne kubapeshaye dikalu diende dia kale kadi dikale dienda bimpe. Kubalondelaye tshivuaye yeye ne bakuabu benza kale bua kuya mu mpungilu. Yeye kubabela bua kuyabu ne dikalu dimue bonso basatu. Luvua lungenyi luimpe be, kadi luvua lulomba kudilongolola bimpe. Mmunyi muvua bantu basatu mua kuenza luendu ne dikalu dimue?

Bana betu basatu aba bakumvuangana bua kujuka patshiatshia bua kuepuka luendu lua mu nkankala wa munya ne kusuikabu bibuta biabu ku dikalu. Wa kumpala kutuadijaye kuendesha dikalu, bakuabu babidi benda bamulonda lua makasa. Uvua wendesha dikalu metre matue ku 500, pashishe udieyeka ku mutshi. Kadi uvua uditeka mu mushindu wa ne: bantu ba tshianana kabalu kudiba. Pashishe yeye uvua utungunuka lua makasa.

Pavua babidi bavua bashale bafika muaba uvua dikalu, umuepele uvua ubanda, wenza metre matue ku 500, mukuabu wenda umulonda lua makasa bua kuya kuangata pende dikalu pashishe. Nunku bu muvuabu badilongolole bimpe ne bikale ne tshisumi, bana betu basatu aba bakenda kilometre 60 ku makasa pamutu pa 90. Kabavua benza luendu elu tshianana to. Bakadisangisha ne bena Kristo nabu mu mpungilu ne kusankabu bua malongesha onso akapetabu mu mpungilu au. (Dut. 31:12) Tshidimu etshi, newenzaku muebe muonso bua kubuela mu mpungilu wa distrike wa muaba udibu batume tshisumbu tshienu anyi?