Malu manene a mu mukanda wa Lomo
Dîyi dia Yehowa didi ne muoyo
Malu manene a mu mukanda wa Lomo
PABUIPI ne tshidimu tshia 56 panyima pa Yezu, pavua Paulo mu luendu luende luisatu lua bumisionere wakafika mu tshimenga tshia Kolinto. Kumvuaye ne: bena Kristo bena Yuda ne bena bisamba bikuabu ba mu Lomo kabavua bumvuangana to. Bu muvuaye musue bua basombe mu buobumue mu Kristo, wakabafundila mukanda bua kubabela.
Mu mukanda uvua Paulo mufundile bena Lomo, udi umvuija mudi bantu babingishibua, ne nsombelu udibu ne bua kuikala nende. Mukanda eu udi uvudija dimanya dietu dia Nzambi ne dia Dîyi diende ne wakula bua luse lua Nzambi ne utumbisha tshidi Kristo muenze bua kutusungila.—Eb. 4:12.
MMUNYI MUTUDI BABINGISHIBUE?
Paulo wakafunda ne: ‘Bonso bakenza malu mabi, ne badi bapanga kupeta butumbi kudi Nzambi. Badi babingishibua anu patupu ku ngasa wende bualu bua dipikula didi mu Kristo Yezu.’ Wakamba kabidi ne: ‘Muntu udi ubingishibua ku ditabuja, ki nku kuenza kua mikenji.’ (Lomo 3:23, 24, 28) Ku diambuluisha dia ditabuja mu ‘buakane bumue buakavuija dibingishibua,’ bena Kristo bela manyi ne bantu ba mu ‘musumba munene’ wa ‘mikoko mikuabu’ badi ‘babingishibua.’ Bena Kristo bela manyi nebabingishibue bua kupeta muoyo mu diulu ne Kristo ne bena musumba munene bua kulua balunda ba Nzambi ne bua kupanduka ku “dikenga dinene.”—Lomo 5:18; Buak. 7:9, 14; Yone 10:16; Yak. 2:21-24; Mat. 25:46.
Paulo wakebeja ne: ‘Tuenze malu mabi bualu bua katuena muinshi mua mikenji ne bua tudi muinshi mua ngasa anyi?’ Wakandamuna ne: ‘Nansha kakese!’ Pashishe udi umvuija ne: ‘Nudi bapika ba bubi too ne ku lufu ne ba ditumikila too ne ku buakane.’ (Lomo 6:15, 16) Udi wamba ne: ‘Binuafuisha bienzedi bia mubidi kudi nyuma nenuikale ne muoyo.’—Lomo 8:13.
Mandamuna a nkonko ya mu Bible:
1:24-32—Bavua benza malu mabi aa mbena Yuda anyi mbantu ba bisamba bikuabu? Nansha mudi bualu ebu mua kukumbanyina bisumbu bionso bibidi, Paulo uvua utamba kuakula bua bena Isalele bavua babenga kutumikila mikenji ya Mose. Nansha muvuabu bamanye mikenji miakane ya Nzambi, ‘bakapidia kuikala ne Nzambi mu meji abu.’ Ke bualu kayi bakapila.
3:24, 25—Mmunyi muvua mulambu wa Kristo Yezu mua ‘kupikula’ bantu ku ‘malu mabi akenzabu diambedi’ kumpala kua kuufilabu? Mulayi wa kumpala uvua wakula bua Kristo udi mu Genese 3:15 wakakumbana mu tshidimu tshia 33 pakashipabu Yezu ku mutshi wa makenga. (Gal. 3:13, 16) Kadi anu dîba divua Yehowa muambe mêyi aa, buende yeye bivua bienze anu bu ne: ukavua mufile mulambu eu bualu kakuena tshintu tshidi mua kumupangisha bua kukumbaja tshidiye mulongolole to. Nunku, ku diambuluisha dia mulambu wa Yezu Kristo uvuabu ne bua kulua kufila, Yehowa uvua mua kubuikidila bana ba Adama bavua bitabuja dilaya diende mibi yabu. Mulambu eu newambuluishe kabidi bua kubisha bantu ba kumpala kua Yezu.—Bien. 24:15.
6:3-5—Kutambula mu Kristo Yezu ne mu lufu luende kudi kumvuija tshinyi? Padi Yehowa wela bayidi ba Kristo manyi a nyuma muimpe, badi balua mu buobumue ne Yezu ne badi balua bena mu tshisumbu tshidi tshikale mubidi wa Kristo udiye yeye muine muikale mutu. (1 Kol. 12:12, 13, 27; Kolos. 1:18) Ke tshidi kutambula kuabu mu Kristo Yezu kumvuija. Bena Kristo bela manyi badi kabidi ‘babatijibua mu lufu lua Kristo’ bualu badi ne nsombelu udi uleja mudibu badifile ne biabu bionso kudi Yehowa ne balekele ditekemena dia kupeta muoyo wa tshiendelele pa buloba. Nunku padibu bafua, badi balambula mioyo yabu anu bu Yezu, nansha mudibu kabayi mua kupikula bantu. Badi batambula mu lufu lua Yezu padibu bafua ne bababisha mu diulu.
7:8-11—Mmunyi muvua bubi ‘bupete tshikondo tshiakane’ (anyi bupetele njila ku mikenji [MMV])? Mikenji yakambuluisha bantu bua kumanya tshivua bubi bumvuija ne kumona muvuabu bobu bine bantu babi. Nunku bakamona malu mabi a bungi avuabu benze, ne bantu ba bungi kufikabu ku dijingulula muvuabu bantu babi. Ke bualu kayi tudi mua kuamba ne: bubi buakapetela njila ku mikenji.
Malongesha adi atutangila:
1:14, 15. Kudi malu a bungi adi atusaka bua kuyisha lumu luimpe ne tshisumi. Bumue bua kudiwu mbua se: tudi bena dibanza kudi bantu badibu basumbe ku mashi a Yezu ne tudi ne bua kubambuluisha bua bamanye Nzambi.
1:18-20. Bantu babi kabena ‘ne tshia kudibingisha natshi’ bualu ngikadilu ya Nzambi idi imueneka patoke mu bintu bidiye mufuke.
2:28; 3:1, 2; 7:6, 7. Panyima pa Paulo mumane kuamba mêyi avua mua kutapa bena Yuda ku muoyo, wakakula kabidi mêyi avua mua kutukija tshilunji tshiabu. Tudi mua kulonda tshilejilu tshiende patudi tuakula malu adi mua kutapa bantu ku muoyo.
3:4. Padi mikenji ya bantu ibengangana ne ya Nzambi, tudi tuleja mudi ‘Nzambi muikale muena bulelela’ patudi tueyemena malu adi mu Bible ne tuenza malu adi umvuangana ne disua diende. Patudi tuyisha Bukalenge ne tshisumi ne tuvuija bantu bayidi, tudi tubambuluisha bua kumona mudi Nzambi muena bulelela.
4:9-12. Nzambi ukavua mubale Abalahama bu muntu muakane kumpala menemene kua kumutengulabu ne bidimu 99. (Gen. 12:4; 15:6; 16:3; 17:1, 9, 10) Mu bualu ebu Nzambi wakaleja tshidi mua kuvuija muntu muakane ku mêsu kuende.
4:18. Ditekemena didi ne mushinga wa bungi bua muntu kuikalaye ne ditabuja. Ditabuja dietu didi dishindamena pa ditekemena.—Eb. 11:1.
5:18, 19. Pavua Paulo uleja muvua Yezu mufuane Adama, wakumvuija mu tshikoso mudi muntu umue mua ‘kufila muoyo wende bua kupikula nawu bantu ba bungi.’ (Mat. 20:28) Kuelesha bantu meji mu mêyi makese mmushindu muimpe wa kulongesha utudi ne bua kuidikija.—1 Kol. 4:17.
7:23. Bitupa bietu bia mubidi bu mudi bianza, mikolo ne ludimi bidi mua ‘kutubueja mu bupika bua mukenji wa bubi;’ nunku tudimuke bua katukuatshi nabi mudimu bibi.
8:26, 27. Patudi ne ntatu idi mitutonde ne katuyi ne mushindu wa kusambila, ‘nyuma muine udi utuakuila.’ Nunku Yehowa udi ‘umvua milombu’ udi umona masambila makanyine adi mu Dîyi diende bu mafumine kutudi.—Mus. 65:2.
8:38, 39. Ntatu, bademon ne bamfumu ba pa buloba kabena mua kupangisha Yehowa bua kutunanga to. Kabatupangishi petu bua kumunanga to.
9:22-28; 11:1, 5, 17-26. Milayi ya bungi ivua yakula bua dialukila dia bena Isalele kuabu idi ikumbana mu tshisumbu tshia bena Kristo bela manyi badibu ‘babikila ki nganu munkatshi mua Bayuda nkayabu, kadi munkatshi mua bisamba bia bende kabidi.’
10:10, 13, 14. Pa kumbusha dinanga Nzambi ne muntu netu, ditabuja dikole dia Yehowa ne dia milayi yende bidi bitusaka bua kuikala ne tshisumi mu mudimu wa kuyisha.
11:16-24, 33. ‘Buimpe ne mutshima mukole bia Nzambi’ bidi bikumbajangana bimpe bitambe. Eyowa, ‘yeye udi Dibue; mudimu wende wonso udi muakane, bualu bua njila yende yonso idi milulame.’—Dut. 32:4.
TUIKALAYI NE NSOMBELU UDI ULEJA MUTUDI BANTU BAKANE
Paulo wakamba ne: “Nunku, bana betu, ndi nnusengelela bua luse lua Nzambi, bua nufile mibidi yenu bu mulambu udi ne muoyo, wa tshijila, udi usankisha Nzambi bimpe.” (Lomo 12:1) “Nunku” (anyi bu mudi bena Kristo babingishibue bua ditabuja diabu) malu adi Paulo wamba mpindieu adi atangila mushindu udibu ne bua kudimona, kumona bakuabu ne kumona bamfumu.
Paulo wakafunda ne: ‘Ndi ngambila muntu yonso udi munkatshi muenu ne: Katambi kudielangana meji mapite adiye ne bua kuela.’ Wakatubela ne: ‘Dinanga dienu dikale kadiyi ne lubombo.’ (Lomo 12:3, 9) ‘Muntu yonso aditeke kunyima kua bakokeshi badi ku mutu kuende.’ (Lomo 13:1) Bua malu adi atangila kondo ka muoyo, wakakankamija bena Kristo bua ‘kabalumbuluishanganyi.’—Lomo 14:13.
Mandamuna a nkonko ya mu Bible:
12:20—Mmunyi mutudi ‘tutentakaja makala a kapia’ pa mutu pa muena lukuna wetu? Ku kale, bavua bela tshiamu pankatshi pa makala a kapia bua kutshiengulula ne kumbusha bintu bibi bionso bivua bilamataku. Bia muomumue, tudi tutentakaja makala a kapia pa mutu pa muena lukuna wetu patudi tumuenzela malu mimpe bua muoyo mubi wende utekete ne atuadije kuenza malu mimpe.
12:21—Mmunyi mutudi ‘tupita malu mabi bukole ku malu mimpe?’ Tudi tuenza nunku patudi tutungunuka ne kuenza mudimu udi Nzambi mutupeshe wa kuyisha lumu luimpe lua Bukalenge too ne pamonaye ne: biakumbanyi.—Mâko 13:10.
13:1—Mmu mushindu kayi udi makokeshi adiku ‘ajadikibua kudi Nzambi’? Bamfumu ba mbulamatadi ‘mbajadikibue kudi Nzambi’ mu mushindu wa ne: badi bakokesha bualu Nzambi mmubanyishile ne imue misangu uvua udianjila kuleja bamue bantu bavua ne bua kukokesha. Bualu ebu budi bumuenekela patoke ku tshikavua Bible mumane kuamba bua amue makokeshi.
Malongesha adi atutangila:
12:17, 19. Patudi ‘tualujila muntu bubi ku bubi buende,’ tudi tuenza bualu budi anu Yehowa nkayende ne bua kuenza. Kuenza nunku nkubi be!
14:14, 15. Katuena ne bua kunyingalaja muena Kristo netu anyi kumulenduisha ne biakudia peshi ne bia kunua bitudi tumupesha to.
14:17. Ki mbintu bitudi tudia anyi tunua peshi bitudi tubenga kudia anyi kunua bidi bifikisha Yehowa ku dituanyisha to. Kadi bua kumusankisha, tudi ne bua kuikala bantu bakane, bena ditalala ne bena disanka.
15:7. Tudi ne bua kuakidila bantu bonso badi bakeba bulelela ne muoyo mujima padibu balua mu tshisumbu ne kuyisha bonso batudi tupetangana nabu lumu luimpe lua Bukalenge katuyi tubasunguluja.
[Bimfuanyi mu dibeji 31]
Mulambu wa Yezu udiku mua kubuikila malu mabi avuabu benza kumpala kua kuufilabu anyi?